HECHOS 2

Jotsaꞌen jaꞌe Isennixtjintsjere Naꞌenchana

1Kionga jaꞌe nixtjinre sꞌi Pentecostés, ngatsiꞌi xi makjainre ngatꞌa tseꞌe Jesús tu jngu ngaꞌnde kuañajan. 2ꞌBa tukjiaꞌa janeya ngankꞌa jo ma nga ꞌñu faꞌa ntjo, ꞌba janeya niꞌya ña tjinduya. 3ꞌBa kuatsejen ngasun nindaku nga jngu jngu xutabiu kitsojosunre tsajmi xi jo kun najenre ndiꞌi. 4ꞌBa ngatsiꞌi kitse ngajinre Isennixtjintsjere Naꞌenchana. ꞌBa ꞌbatsaꞌen ꞌetutsꞌinre nga kinchja kjaꞌe kuanga en jotsaꞌen nga Isennixtjintsje kitsjare nga kuinchja.

5ꞌBa kui nixtjinbiu tjindu naxinanda Jerusalén nchja judío xi bekun Naꞌenchana, xi jendibani ngayéje nangi xi tjin ngasunꞌndebi. 6ꞌBa kuañajan ngatsiꞌi xutankjiun nga kjintꞌe siꞌa xi janeya, ꞌba bi be mé= xi sikjaꞌetsjen, ngatꞌa nga jngu jngu inyantꞌere enre. 7ꞌBa tu ꞌba= kjimare ꞌba kjimakunre nga tsiningiyare xinkjin:

—¿A bi tsa xuta xi Galilea tseꞌe ngatsiꞌi xi ꞌbatsaꞌen inyanchja? —kitsure xinkjin—. 8¿Jótsaꞌen nga tenuꞌyani_ra nga inyanchja en xi mana nga jngu jngua? 9Ngatꞌa tjindujinna ngaꞌe xuta xi nangi Partia tseꞌe, xuta xi Media tseꞌe, xuta xi Elam tseꞌe, xuta xi ndibani nangi Mesopotamia, Judea, Capadocia, Ponto, Asia, 10Frigia, Panfilia, Egipto ko ngaꞌnde xi tjin nangi Libia xi tiñare naxinanda Cirene ꞌba ko xuta xi jendibani naxinanda Roma. 11Tjin xi nchja judío ꞌba tjin xi bi judío tunga makjainre ngatꞌa tseꞌe Naꞌenchana. Tjin xuta xi Creta tseꞌe ꞌba ko xuta árabe. ꞌBa ngatsiꞌa tenuꞌya_ra nga enna inyatsuyani xutabi kjuaje xi tsaꞌen Naꞌenchana.

12ꞌBa ngatsiꞌi kuakunre ꞌba bi be mé= xi sikjaꞌetsjen.

—¿Jó tsunire kibi? —kitsure xinkjin.

13—Chꞌi=ni nchjabiu —kitsu yakꞌa xi tu tsejnuke.

Pedro yeꞌere nijmi xuta

14ꞌBa ꞌbatsaꞌen Pedro tsakasen nduju ko nchja apóstol xi ngitejngu, ꞌba ꞌñu kinchja nga kitsure xuta naxinando:

—Jun nchja judío ko ngatsiꞌu xi tetsubo naxinanda Jerusalén, ngatjaꞌyo ꞌba tasen ñojon mé= xi xin_nuu̱. 15Bi chꞌi nchjabi jotsaꞌen tenikjaꞌetsjion, ngatꞌa saꞌe= chuba ñajan nga tajñu. 16Kui=bi xi kitsutitjun xuta chinga profeta Joel:

17ꞌBi= ku̱an nixtjin xi fetꞌani,

sja_ra̱ Isennixtjinna̱ ngatsiꞌi xuta, kitsu Naꞌenchana.

Kiꞌndi xiꞌinnu ꞌba kiꞌndi yanchjinnu kuinchja ngatꞌana̱ joni jngu profeta,

ꞌba nchja nistinu sꞌejñatsejenre mé= xi tijñaꞌmo,

ꞌba nchja chinganu kuaꞌere chini xi kjuakixi.

18Kui nixtjinbiu sja_ra̱ Isennixtjinna̱ nchja chuꞌndana̱ ꞌba ko yanchjin chuꞌndana̱.

ꞌBa kuinchja ngatꞌana̱ joni jngu profeta.

19Saꞌaa̱n kjuakun ngankꞌaa

ꞌba chu̱ba̱ xi kuakutsejen kjuajena̱ tꞌanangiu,

ꞌba sꞌe̱ jin ko ndiꞌi ꞌba ko niꞌndi xi yufi ni.

20Tsuꞌbiu ku̱ajñu

ꞌba naꞌenso ini ku̱an joni jin,

kionga kje faꞌejín nixtjin nga kjuaꞌe Naꞌenna,

nixtjin xi je ꞌba xi tjinre kjuaje.

21ꞌBa kꞌuangi ngatsiꞌi xi kuinchja jaꞌenre Naꞌenna.

22’ꞌBamani jun naꞌen xi Israel tsojon, tasen ñojon mé= xi xin_nuu̱. Jesús xi Nazaret tseꞌe, kui jngu xuta xi Naꞌenchana yaku chuya ngajinnu. Ngatꞌa Naꞌenchana kitsjare kjuaꞌñu nga kitsaꞌen ngajinnu kjuaje ko kjuakun ko chuba xi yakutsejen kjuaꞌñure Naꞌenchana jotsaꞌen jun nda ꞌyo. 23Kui Jesús xi kuangantsja, jotsaꞌen tjun kitsikjaꞌetsjen ꞌba kuamejénre Naꞌenchana ꞌndani nga ꞌetutsꞌinre. ꞌBa jun kjindubo ꞌba kjinikꞌion, kionga kjiningantsjo ngaya ntsja nchja chꞌokun tuxi sꞌetꞌani kru. 24Tunga Naꞌenchana kitsikjaꞌaya nganire ꞌba ꞌejñatꞌaxinre kjuaꞌonre kjuabeya, ngatꞌa kjuabeya bi kuánre kitsikꞌejñaꞌñu. 25Ngatꞌa ꞌba kitsu David nga kinchja ngatꞌare Jesús:

Tsaꞌbia̱ nga Naꞌenna ngantsjai tijña ngixkuaa̱n.

Ngatꞌa ngate kixina̱ sejñatꞌa, kui kjua bi kjuatseni inimana̱.

26Kui kjuañu kuatsjanire inimana̱, ꞌba en xi tsja tsu ꞌetjuni ndsuꞌbaa̱,

ꞌba kaꞌnda yojona̱ tikuyare nga sa̱kure mé= xi nda.

27Ngatꞌa bi sikumanaa̱ ngaꞌndere mikꞌen,

ꞌba bi kuaꞌeꞌnde tsa kjueꞌndu Xuta Tsje xi tsiji.

28Kikakutsejennaa̱ ndiya xi fi ña kꞌuendukun xuta,

ꞌba sitsenaa̱ kjuatsja nga kuatejñaa̱ ngixkuin.

29’Jun ntsꞌia̱ xian, ma mixan ko kjuakixi ngatꞌare xuta chingana David nga kꞌen ꞌba kisꞌeyanijin, ngatꞌa kaꞌnda nixtjin ngandaꞌe tijñajin ngisana tsjure. 30Kui= xi jngu profeta kuán ꞌba tsabe nga Naꞌenchana jaꞌba je= kitsjare en ngatꞌare jaꞌenre nga ntje xi tseꞌe stjujin xi kꞌuejñasun ngaꞌndere ña batexuma rey. 31ꞌBa ꞌbatsaꞌen David tsabe titjun mé= xi ku̱an ꞌba kitsuya nga Cristo kjuaꞌaya nganire, nga bi sꞌe̱jña ngaꞌndere mikꞌen, ꞌba nga bi kjueꞌndu yojore. 32Kui Jesús kibi xi Naꞌenna kitsikjaꞌaya nganire, ꞌba ngatsiꞌi ji̱n tenikixiyee̱ ngatꞌare kibi. 33Kui xi kitsaꞌere kjuaje nga kjinikꞌejña ngate kixire Naꞌenchana ꞌba kisakure Isennixtjintsjere Naꞌenchana xi Naꞌenchana kitsuyatitjun nga sjare. ꞌBa kui Isennixtjinbi xi titsikasen ꞌba kui xi teꞌyo ꞌba xi tenuꞌyo ngandaꞌe. 34Ngatꞌa bi David xi tsijin ngankꞌaa, tunga ꞌba= kitsu:

Naꞌenchana kitsure Naꞌenna̱:

“Teni ngate kixina̱,

35kaꞌnda nga xi stikeri ngi ndsakui sikꞌenda.”

36’Kui kjua nda ngatjaꞌyañu ngatsiꞌu xi Israel tseꞌe, nga Jesús xi jun kikjatꞌo kru, kui= xi Naꞌenchana kitsaꞌen Naꞌen ꞌba Cristo —kitsu Pedro nga kinchja.

37ꞌBa kionga kjintꞌe kibi nchja xi tjindu kio, ne ba kisꞌere ꞌba tsiningiyare Pedro ko nchja chinga apóstol xi yakꞌa:

—Jun ntsꞌe xian, ¿mé= xi tjinnere nga siꞌee̱n?

38ꞌBa Pedro kitsingojore:

—Tikꞌantjaiyo kjuafaꞌetsjennu ꞌba ndiba ngañu ngixkun Naꞌenchana. ꞌBa nga ko jaꞌenre Jesucristo ngatasatendo nga jngu jngu tuxi ku̱achatꞌanu jenu ꞌba ꞌbatsaꞌen Naꞌenchana sjanu Isennixtjintsjere. 39Ngatꞌa tsojon mé= xi kitsuyatitjun Naꞌenchana, ꞌba tseꞌe kiꞌndi nistinu, ꞌba tseꞌe ngatsiꞌi xuta xi kjin tjindu, ngatsiꞌi xuta xi Naꞌenchana kuinchjare nga kjuaꞌe ngatꞌare Kui.

40Kui enbi ko kjaꞌe ngisa en xi kitsu Pedro nga kinchja ꞌba nga ꞌenere xuta.

—Tꞌetutꞌaxin_ru kui xuta chꞌokun xi tjin ngandaꞌe —kitsure.

41Kui kjua kisatendani xuta xi yatesinre en xi kitsu Pedro. Kui nixtjinbiu jánru mi xuta jaꞌe ngisa ngajinre xuta xi je kuakjainre ngatꞌa tseꞌe Jesús. 42Kjitꞌa yasen ñojon en xi bakuya nchja chinga apóstol, ꞌba jngu kitsaꞌen xinkjin, ꞌba kuañajan nga yakjanya niñuxtila xi kiskine, ꞌba nga jako Naꞌenchana.

Jotsaꞌen tsekꞌendu xuta xi tjun kuakjainre ngatꞌa tseꞌe Jesús

43Kuakunre ngatsiꞌi xuta, ngatꞌa nchja chinga apóstol kitsaꞌen nkjin kjuakun ko chuba xi yakutsejen kjuajere Naꞌenchana. 44ꞌBa ngatsiꞌi xuta xi makjainre ngatꞌa tseꞌe Jesús jngu kitsaꞌen yojore ꞌba tujngu kitsichjenko xinkjin ngayéje mé= xi tjinre. 45Yateña nangire ꞌba ko xi tjinre, ꞌba kitsitsojosun ton ngajinre ngatsiꞌi xuta xi yakꞌa nga kitsjare jó tjin machjenre nga jngu jngu. 46Nyujun nyujun kuañajan ña ma ndetsinre ningu ꞌba xki niꞌya yakjanya niñuxtila nga kiskineko xinkjin ko kjuatsja ꞌba nga inda kjiyuju inimare. 47Kitsichjire Naꞌenchana, ꞌba ngatsiꞌi xuta xi naxinando tseꞌe nda kinchja ngatꞌa tseꞌe. ꞌBa nyujun nyujun Naꞌenchana kitsikasen ngisare ngajinre kui kjaꞌe ngisa xuta xi inyaꞌbangi.

Currently Selected:

HECHOS 2: vmy

Highlight

Copy