Aj Rom 6

Ma qo kyim toj twutz il, me ma qo itzꞌje te qMan Dios

1Qatzin qa ikyjo, ¿Ma kukxpela qo bꞌinchiltzjo il, noq tuꞌn tkubꞌ tnajsin qMan Dios qil tuꞌn t-xtalbꞌil? 2¡Mina! Quꞌn ma qo kyim toj twutz il, atxix tej xqo nimin, ex ntiꞌ toklin qiꞌj. ¿Tzeꞌntzin ttentz tuꞌn kukx tuꞌn qbꞌinchin il? 3Quꞌn bꞌin quꞌn qkyaqilx, a ma qo kuꞌx toj aꞌ te jawsbꞌil aꞌ toj tbꞌi Crist, a Jesús, tuꞌntzin qyekꞌinte kywutzxjal, qa ma qo kyim junx tukꞌa, ikyxjo tzeꞌnku jun kyimnin nkux muqet toj txꞌotxꞌ. 4Quꞌn ikytziꞌn, tej qkuꞌx toj aꞌ te jawsbꞌil aꞌ, ikytziꞌn tzeꞌnku ma qo kux muqet junx tukꞌa Crist, tej tkyim. Exsin tej qjatz toj aꞌ, tzaj tqꞌoꞌn qMan Dios jun akꞌaj chwinqil qe tzaluꞌn twutz txꞌotxꞌ, ikyxjo tzeꞌnku te Crist, tej tjaw anqꞌin juntl majl kyxol kyimnin, tuꞌn tipin tqoptzꞌajiyil qMan Dios.#Col. 2:12.

5Quꞌn qa ma tzꞌok qmujbꞌin qibꞌ junx tukꞌa Crist tojjo tkyimlin, tej qkuꞌx toj aꞌ te jawsbꞌil aꞌ, ex ikyxjo ma tzꞌok qmujbꞌin qibꞌ tojjo akꞌaj chwinqil, tuꞌn tjawlintz anqꞌin juntl majl. 6Quꞌn bꞌiꞌn quꞌn, qa a ojtxe qten ntiꞌ tipin qibꞌaj, quꞌn nyakuj o jaw pejkꞌit twutz cruz junx tukꞌa Crist tuꞌn tkyimlin, tuꞌntzintla ntiꞌ tipin il toj qchwinqil jaꞌlin, ex tuꞌntzintla mi qo okine te taqꞌnil il tuꞌn qil, 7quꞌn qa ma qo kyim, ma qo tzaqpaj toj il.

8Ex qa o qo kyim junx tukꞌa Crist tiꞌj tkyaqil nya wen toj qanmin, ma qe qkꞌuꞌj tiꞌj, qa ok qo najal tukꞌa te jun majx toj kyaꞌj. 9Quꞌn bꞌiꞌn quꞌn, qa tuꞌn tjawlintz anqꞌin juntl majl Crist kyxol kyimnin, ntiꞌ tipin kyimin tiꞌj. 10Quꞌn tej tkyim Crist, bꞌeꞌx chjet til tkyaqil xjal tuꞌn, a kchi nimil tiꞌj. Tej tjatz anqꞌin, lu nnajle tukꞌa Dios jaꞌlin. 11Exsin ikyx kyejiꞌy, kyqꞌonktzin kyibꞌa tzeꞌnku kyimnin te il, me itzꞌ te Dios, noq tuꞌn kymujbꞌil kyibꞌa tukꞌa, tuꞌn Crist, a Jesús. 12Tuꞌnpetziꞌn, mi txi kyqꞌoꞌn ambꞌil te il, tuꞌn tkubꞌ tiꞌj kyxmilila tuꞌn, ex tuꞌn tkubꞌ kyniminjiꞌy a ntqanin tachbꞌil kyxmilila. 13Ex mi txi kyqꞌoꞌn kyxmilila te bꞌinchbꞌil il. Qalaꞌ, kyqꞌonx kyxmilila te Dios te bꞌinchbꞌil bꞌaꞌn, quꞌn ma chi kyima te il, noq tuꞌn akꞌaj kychwinqila, ex ma chi jatz anqꞌiꞌn juntl majl jaꞌlin, me te Dios. 14Ex atzin jaꞌlin, ntiꞌl tipin il kyibꞌaja, quꞌn ntiꞌ kyokliꞌn tiꞌjjo a ntqanin ojtxe kawbꞌil kyiꞌja, a kyimin; qalaꞌ noq tiꞌjjo t-xtalbꞌil qMan Dios.

Taqꞌnil Diosqo, tuꞌn qnimbꞌil tiꞌj

15¿Tzeꞌntzintz? ¿Ma okpela qo bꞌinchiltz il, tuꞌn nya otoꞌkx tjaqꞌ ojtxe kawbꞌil, a nqanintaq qiꞌj tuꞌn qkyim, a qa at t-xtalbꞌil qMan Dios qukꞌa te najsbꞌil qil? ¡Mina!

16Quꞌn bꞌiꞌn kyuꞌn, qa ma chi oka te kyaqꞌnil jun xjal, il tiꞌj tuꞌn tkubꞌ kynimiꞌn. Exsin ikyxtzjo luꞌn, qa ma txi kyqꞌoꞌn kyibꞌa tuꞌn kybꞌinchiꞌn il, kchi okila te taqꞌnil il. Me noq tuꞌn kꞌwel kynimiꞌn il, kchi xel qꞌiꞌn tuꞌn toj kyimin. Qalaꞌ qa ma kubꞌ kynimiꞌn qMan Dios, kchi okila te tzꞌaqle tuꞌn. 17Quꞌn ojtxe, taqꞌnil ilqetaqa. Me atzin jaꞌlin, chjonte Dios, ma txi kynimiꞌn tukꞌa tkyaqil kyanmiꞌn, a tumil xnaqꞌtzbꞌil, a saj qꞌoꞌn kyeꞌy. 18O chi tzaqpaja te tipin il; atziꞌn jaꞌlin ma chi oka te taqꞌnil bꞌaꞌn.

19Nchin yoliꞌn kyukꞌiy tukꞌa jun yol nya kuj, tuꞌn tel kynikyꞌa te, quꞌn tuꞌn naꞌm telxix kynikyꞌa te t-xilin lo. Quꞌn ikytziꞌn tzeꞌnku ojtxe, xi kyqꞌoꞌn kyxmilila te bꞌinchil il ex tkyaqil wiq nya bꞌaꞌn; exsin ikyxtzjo jaꞌlin, kyqꞌoꞌnx kyxmilila te bꞌinchil bꞌaꞌn, tuꞌn kyoka tzꞌaqle, ex tuꞌn kyanqꞌiꞌn toj jun kychwinqil saqxix twutz Dios. 20Quꞌn ojtxe, tej iteꞌxtaqa te taqꞌnil il, mi nchi okintaqa te bꞌinchil bꞌaꞌn. 21¿Me tiꞌtzin chꞌin saj tqꞌoꞌn kyeꞌy, tkyaqiljo a nchi txꞌixwiꞌy te jaꞌlin? Quꞌn tkyaqiljo anetziꞌn, nqoꞌx tiꞌn toj kyimin te jun majx. 22Me atzin jaꞌlin tzaqpinqiꞌy tjaqꞌ tipin il, ex ma chi oka te taqꞌnil qMan Dios. Quꞌn atpen teꞌ luꞌn tajbꞌin. O tzaj tqꞌoꞌn qe jun qchwinqil saqxix twutz, ex qo xel tiꞌn toj jun tkabꞌ chwinqil te jun majx, aj qkyim. 23Quꞌn atzin chojbꞌil ntzaj tuꞌn il, te kyimin. Me atzin toyaj qMan Dios ntzaj tqꞌoꞌn, jun chwinqil te jun majx, noq tuꞌn qmujbꞌil qibꞌ tukꞌa Crist, a Jesús, a qAjaw.

Currently Selected:

Aj Rom 6: mamC

Highlight

Copy