Marks 12

Jun techil tuꞌn Jesús kyiꞌjjo manil txꞌotxꞌ

(Mt. 21:33-46; Lc. 20:9-19)

1Kubꞌ tqꞌoꞌn Jesús jun techil tiꞌj jun ichin tajaw txꞌotxꞌ: Jun ichin ok tawin tqan uv. Ok tchꞌlajin tiꞌjile, ex bꞌeꞌx jaw twaꞌbꞌin jun xkyaqꞌte toj te tzajbꞌilte.#Is. 5:1-2. Exsin xi tqꞌoꞌntz te kymajin aqꞌnil, ex bꞌeꞌx xiꞌ najchaq. 2Teꞌ tul kanin tqꞌij awal, tzaj tchqꞌoꞌn jun taqꞌnil qanil teꞌ twutz awal te manbꞌil ttxꞌotxꞌ. 3Me ayetzin manil, teꞌ tkanin taqꞌnil, bꞌaj kylankꞌin, ex kukxjo aj kychqꞌoꞌne. 4Toj juntl majl tzaj tchqꞌoꞌn juntl taqꞌnil, ex ikyxjo, bꞌeꞌx kyꞌixbꞌe twiꞌ, noqx jniꞌ bꞌaj kyyisoꞌn, ex kukxljo, aj kychqꞌoꞌn. 5Tzaj tchqꞌoꞌn juntl taqꞌnil; noqx teꞌ tkanin, bꞌeꞌx kubꞌ kybꞌyoꞌn. I tzaj tchqꞌoꞌnl txqantl. Me ikyx bꞌajjo kyiꞌj: At kyꞌixbꞌe, ex at bꞌeꞌx bꞌaj kubꞌ kybꞌyoꞌn. 6Noq jun tkꞌwal kyij, tuꞌn ttzaj tchqꞌoꞌn, a kꞌuꞌjlinxixtaq tuꞌn. Quꞌn kubꞌ tbꞌisin: Nyapela kꞌwel kynimin nkꞌwala.

7Atzin teꞌ t-xi kykaꞌyin manil txꞌotxꞌ teꞌ ttzajjo kꞌwalbꞌaj, bꞌeꞌx i bꞌaj ja yolin kyxolile: Ate luꞌn kyjel te tajaw txꞌotxꞌ. Tuꞌnpetzintzjo, qbꞌyoꞌnku, tuꞌntzin qkyij te tajaw.

8Bꞌeꞌxsin tzaj kytzyuꞌn, exsin kubꞌ kybꞌyoꞌn, ex i xtaꞌj xoꞌlte ttxanxi txꞌotxꞌ.

9¿Tiꞌtzila kbꞌajil te tajaw txꞌotxꞌ kyiꞌjjo manil, toj kywutza, aj tul? ¿Nyapela bꞌeꞌx kchi kꞌwel tbꞌyoꞌn, ex kxel tqꞌoꞌn ttxꞌotxꞌ te kymajin txqantl? 10¿Naꞌmtzin tel kynikyꞌa te ntqꞌmaꞌn Tyol Dios?

A abꞌj, a xi kyxoꞌn bꞌinchil ja, a nyakuj ntiꞌtaq tajbꞌin,

me axixpente abꞌjjo ma tzꞌokin te tqꞌuqil tẍkyin ja, a nimxix toklin.

11Atzin tbꞌanilxjo ma tzaj tqꞌoꞌn tAjaw Tkyaqil qe,

ex ma qo jaw kaꞌylajx tiꞌj.#Sal. 118:22-23.

12Tetziꞌn tkubꞌ tyolin Jesús ikyjo, bꞌeꞌxtaq xi qꞌiꞌn toj tze kyuꞌn kynejil Judiy, quꞌn bꞌeꞌx el kynikyꞌ te techil, qa kyiꞌjtaq nyoline. Me bꞌeꞌx kyij kytzaqpiꞌn, tuꞌn kyxobꞌil kye xjal.

Jun xjelbꞌitz te Jesús qa wen tuꞌn t-xi chjet kꞌaybꞌil

(Mt. 22:15-22; Lc. 20:20-26)

13Ayetzin kynejil Judiy i xi kychqꞌoꞌn junjun Parisey ex junjuntljo aye lipcheqetaq tiꞌj Herodes, tuꞌn kyxiꞌ qanil jun kyxjelbꞌitz te Jesús, noq tuꞌn tkubꞌ tzꞌaq kyuꞌn tiꞌjjo t-xnaqꞌtzbꞌil.#Mt. 12:10; Mr. 3:2; Lc. 11:54; 14:1. 14Teꞌ kykanin, xi kyqanin: Ay, xnaqꞌtzil, noq samiy, bꞌiꞌn qe quꞌn, qa nyolin te twutzxix, ex nxnaqꞌtziꞌn noq tiꞌjjo tbꞌeyil chwinqil tuꞌn qxiꞌ tukꞌa qMan Dios. Ex nya noq lipcheka tiꞌjjo nkyqꞌmaꞌnxjal, ex mi nchi kubꞌ tniminjiy aye nim kyoklin, quꞌn toj twutza, junx kyoklinxjal kykyaqil. Tuꞌnpetziꞌn, ¿Wenpela tuꞌn t-xi qchjonjiꞌy kꞌaybꞌil te kawil te Rom, mo minaj?

Xi kyqanin ikyjo quꞌn kykyꞌeꞌtaq Parisey tuꞌn t-xi chjet kꞌaybꞌil, me ayetzin kyukꞌa Herodes, kyajtaq. Ikytzin iltaq tiꞌj tuꞌn tkubꞌ tzꞌaq Jesús kyuꞌn toj til kywutzjo jun chꞌuq xjal lo.

Tuꞌnpetziꞌn, xi kyqꞌmaꞌn te: ¿Okpela kxel qchjoꞌntza, mo minaj? 15Me tojtzqiꞌntaq te Jesúsjo kyxmiletzꞌil tiꞌjjo xi kyqanin, ex xi tqꞌmaꞌn kye: N-el we nikyꞌ te tiꞌjjo kyaja. Kyaja tuꞌn nkubꞌ tzꞌaqa tiꞌjjo nxnaqꞌtzbꞌila. Kyyekꞌintziꞌn jun pwaq weꞌy, tuꞌn tok nkaꞌyiꞌn.

16Xi kyyekꞌin te, ex xi tqanin Jesús kye: ¿An qwutzbꞌiyiljo lo, ex an qbꞌi tzꞌibꞌink twutz?

Xi kytzaqꞌwinxjal: Te nmaq kawil te Rom, chi chiꞌ.

17I xi ttzaqꞌwin Jesús: Tuꞌnpetziꞌn, kyqꞌoꞌnx kyejiꞌy a ntqanin nmaq kawil te Rom, ex kyqꞌoꞌnxjiꞌy a te Dios ntqanin.

Tetziꞌn kyxi ttzaqꞌwin ikyjo, noqx i bꞌaj jaw kaꞌylaj.

T-xnaqꞌtzbꞌil Jesús tiꞌj qa il tiꞌj tuꞌn qjatz anqꞌin juntl majl

(Mt. 22:23-33; Lc. 20:27-40)

18Attaq jun chꞌuq Sadusey nbꞌaj xnaqꞌtzintaq, qa aj tkyim jun xjal, minataq njaw itzꞌje juntl majl.#Kybꞌi. 23:8. I tzaj tkꞌatz Jesús, ex xi kyqꞌmaꞌn te: 19Xnaqꞌtzil, kyij ttzꞌibꞌin Moisés toj Tyol Dios, qa aj tkyim jun ichin, ex qa ntiꞌ jun tkꞌwal kyij tukꞌa t-xuꞌjil, il tiꞌj tuꞌn tjaw meje tukꞌaxjo ttziky mo titzꞌin qtzan tchmil, quꞌn tuꞌntzin aj tuljo tnejil tal, te tkꞌwaljo qtzan tchmil tuꞌn toke.#Deu. 25:5-10. 20Jun maj, attaq wuq ichin kyitzꞌimila kyibꞌ. Atzin kytziky knet t-xuꞌjil, me ntiꞌx jun tkꞌwal kyij, teꞌ tkyim. 21Atzintzjo tkabꞌ jaw meje tukꞌa t-xuꞌjil kyij, me ikyxljo, ntiꞌ jun tkꞌwal kyij, teꞌ tkyim. Ex ikyxl bꞌajjo tiꞌjjo toxin, 22ex ikyx bꞌajjo kyiꞌjjo txqantl. Ex bꞌeꞌx kyimljo qya.

23Atziꞌn jaꞌlin, at jun qxjela teꞌy: ¿Tzeꞌntzila tteꞌn tuꞌn kyjaw anqꞌintl kyimnin? Quꞌn, qa ikyjo, aj kyjaw itzꞌje juntl majl, ¿Tiꞌtzila kbꞌajiltz? ¿Altzila kye k-okil te tchmiljo qya kyxoljo wuq ichin, quꞌn kykyaqilx i ok meje tukꞌa?

24I xi ttzaqꞌwin Jesús: Najninx iteꞌya kyeꞌ. ¿Naꞌmxsin tel kynikyꞌa te Tyol Dios, ex te jniꞌ tipin? 25Ajtzin kybꞌaj jaw itzꞌje juntl majljo kyimnin, mikyxil teꞌ chwinqil tzeꞌnku luꞌn. Ayetzin ichin exqetziꞌn qya mina chi bꞌaj jaw meje juntl majl. Iky kchi bꞌaj okileꞌ tzeꞌnqeku angel toj kyaꞌj. 26Tiꞌjtzintzjo aj kyjatz itzꞌje juntl majl kyimnin, ¿Ma naꞌmtzin tkux kyuꞌjinjiꞌy Tyol Dios, a kyij ttzꞌibꞌin Moisés, tej tyolin Dios tukꞌa tojjo tqan txꞌiꞌx, a nkꞌanttaq? Chiꞌ kyjaluꞌn: Ayin wejiꞌy tDios Abraham, te Isaac ex te Jacob. Mix tqꞌma qa ayintaq wejiꞌy, qalaꞌ ayin wejiꞌych.#Ex. 3:6. 27Ikytziꞌn, ate Dios nya kyDios kyimnin, qalaꞌ kyDios itzꞌ, exla qa o chi kyim tzaluꞌn twutz txꞌotxꞌ, quꞌn toj twutz Dios, itzꞌqe kykyaqilx.

Tuꞌnpetziꞌn, najninx iteꞌy.

Alkye kawbꞌil nimxix toklin kyxoljo txqantl

(Mt. 22:34-40)

28Teꞌ tok tbꞌiꞌn jun xnaqꞌtzil tiꞌj ojtxe kawbꞌil ikyjo, tuꞌn toj tumil i xi ttzaqꞌwine Jesús, xi laqꞌe tkꞌatz ex xi tqanin: ¿Ankyeꞌ tkawbꞌil Dios nimxix toklin kyxoljo txqantl?

29Xi ttzaqꞌwin Jesús: An tnejiljo luꞌn:

Kybꞌinkuxixsiꞌn, tyajil Israel.

Oꞌkx Diosjo junchꞌin, a tAjaw Tkyaqil.

30Tuꞌnpetzintzjo, kꞌuꞌjlinkxixa tukꞌa tkyaqil tanmiꞌn ex tukꞌa tkyaqil tnabꞌla ex tukꞌa tkyaqil tipiꞌn.#Deu. 6:4-5.

31Atzin tkabꞌtz:

Kꞌuꞌjlink t-xjalila tzeꞌnkux ay.#Lv. 19:18; 1Jn. 4:21.

Ntiꞌx juntl tkawbꞌil nim toklin tzeꞌnqe luꞌn.

32Ante xnaqꞌtzil tiꞌj ojtxe kawbꞌil xi tqꞌmaꞌn: Xnaqꞌtzil, twutzxjo ikyjo tzeꞌn ntzaj tqꞌmaꞌn; junchꞌinx te Dios, tAjaw Tkyaqil; ntiꞌ juntl.#Deu. 4:35. 33Tuꞌn tok qkꞌuꞌjlin Dios tukꞌa tkyaqil qanmin, tkyaqil qnabꞌl, ex tkyaqil qipin, ex tuꞌn kyok qkꞌuꞌjlin qxjalil tzeꞌnkux awo; axixjo luꞌn nim toklin tzeꞌnqekuꞌ oyaj ex chojbꞌil nchi kubꞌ patit twiꞌ t-altar Dios.#Os. 6:6.

34Teꞌ tok tbꞌiꞌn Jesús, teꞌ otaq txi ttzaqꞌwin xnaqꞌtzil tiꞌj ojtxe kawbꞌil toj tumil, xi tqꞌmaꞌn te: Noq chꞌintl tuꞌn tel te tnikyꞌ teꞌ Tkawbꞌil Dios.

Tbꞌajlinxiꞌ ikyjo, mix aꞌl juntl el t-xobꞌil, tuꞌn t-xi tqanin juntl t-xjelbꞌitz te Jesús.

T-xjelbꞌitz Jesús kye Parisey

(Mt. 22:41-46; Lc. 20:41-44)

35Teꞌ nxnaqꞌtzintaq Jesús toj tnejil ja te naꞌbꞌl Dios, xi tqanin jun t-xjelbꞌitz kye xnaqꞌtzil tiꞌj ojtxe kawbꞌil: ¿Tzeꞌntzin tten kyqꞌmaꞌn xnaqꞌtzil tiꞌj ojtxe kawbꞌil, qa tyajil David te Crist, a Kolil, a at toklin tuꞌn Dios? 36Ax David qꞌmante jun maj tuꞌn Xewbꞌaj Xjan:

Xi tqꞌmaꞌn Dios te wAjawa:

Qekuy toj nman qꞌobꞌa kawil wukꞌiy,

ex kꞌwel kyiꞌjjo tajqꞌoja wuꞌnch.#Sal. 110:1.

37Twutzx teꞌ qa a David t-xeꞌchil Crist. ¿Me tzeꞌntzin ttentz o yolin te David tiꞌj Crist, a naꞌmtaq titzꞌje, ex ok tqꞌoꞌn te tAjaw?

Tbꞌanilx ele t-xnaqꞌtzbꞌin toj kywutzjo jniꞌ xjal.

Tej tyolin Jesús kyiꞌjjo xnaqꞌtzil tiꞌj ojtxe kawbꞌil

(Mt. 23:1-36; Lc. 11:37-54; 20:45-47)

38Nxnaqꞌtzintaq Jesús kye jniꞌ xjal, ex xi tqꞌmaꞌn: Kykaꞌyink kyibꞌa, tuꞌn mina chi ok lipeꞌy kyiꞌjjo xnaqꞌtzil tiꞌj ojtxe kawbꞌil. Nbꞌaj kubꞌ kyyekꞌin kyibꞌ te tnejinel tnam, ex nbꞌaj ok kyqꞌoꞌn kyxbꞌalin tbꞌanilx, manyor xqerx wen, noq tuꞌn kyokku kaꞌyin kyuꞌnxjal. Ex kyajxix, tuꞌn kyok qꞌolbꞌit wen jaꞌchaq nchi bꞌete. 39Kyajxix tuꞌn kyokx qe te tnejil kyojjo ja te naꞌbꞌl Dios ex toj jun waꞌn toj jun nintz qꞌij. 40Me nbꞌajel kyelqꞌin kyja qya mebꞌeqe, a o chi kyim kychmil, ex tkyaqiljo jniꞌ at kye, ex tuꞌn mina tzꞌel kynikyꞌtzajil, nchi ok tennaj naꞌl Dios nimx tqan.

Tuꞌntzin ikyjo, okx kychjaꞌbꞌilx toj qꞌaqꞌ.

Qqꞌoꞌnx jun oyaj tukꞌa tumil

(Lc. 21:1-4)

41Qꞌuqletaq Jesús jun maj tkꞌatz jun tkubꞌil oyaj pwaq, tokxtaq toj tnejil ja te naꞌbꞌl Dios, nkaꞌyintaq kyiꞌjjo jniꞌ xjal tzeꞌn nbꞌaj kux kyqꞌoꞌntaq kyoyaj. Ex ayetzin qꞌinin, nimx pwaq bꞌaj kux kyqꞌoꞌn. 42Ex kanin jun qya, a otaq kyim tchmil, yajxix wen. Kux tqꞌoꞌn kabꞌe tal netzꞌ pwaq.

43I tzaj ttxkoꞌn Jesúsjo t-xnaqꞌtzbꞌin, ex xi tqꞌmaꞌn kye: Twutzxix kxel nqꞌmaꞌn kyeꞌy; ajo tal qya lo, nim chꞌintljo toyaj ma kux tqꞌoꞌn kywutzjo txqantl, 44quꞌn jotxjo xjal, a ma kux qꞌonte toyaj, a t-xkyijlbꞌin; qalatzinl teꞌ tal yaj, a ma kux tqꞌoꞌn, a attaq tajbꞌin te tuꞌn tanqꞌin.#Lc. 21:4; 2Co. 8:1-15.

Currently Selected:

Marks 12: mamC

Highlight

Copy