Lucas 21

Qqꞌoꞌnx jun oyaj tukꞌa tumil

(Mr. 12:41-44)

1Tzuntaq nkaꞌyin Jesús kyiꞌjjo xjal, a qꞌininqetaq, tej nkuꞌxtaq kyqꞌoꞌn kyoyaj tojjo tkubꞌil pwaq toj tja Dios. 2Ex ok tkaꞌyin Jesús jun tal qya yajxix, a kyimnin tchmil, tej tkux tqꞌoꞌn kabꞌe tal netzꞌ pwaq te toyaj. 3Chitzin Jesúsjo kyjaluꞌn: Twutzxix kxel nqꞌmaꞌn kyeꞌy; ajo tal qya lo, nim chꞌintljo toyaj ma kux tqꞌoꞌn kywutzjo txqantl. 4Quꞌn jotxjo xjal, a ma kux qꞌonte toyaj, a kyoyajjo ma kux kyqꞌoꞌn, a t-xkyijlbꞌin; qalatzinl teꞌ tal yaj, a ma kux tqꞌoꞌn, a attaq tajbꞌin te tuꞌn tanqꞌin.

Tej tyolin Jesús tiꞌj aj tjapin bꞌaj tkyaqil

(Mt. 24:1-2; Mr. 13:1-2)

5Iteꞌtaq junjun kyexjal nchi yolintaq tiꞌjjo tnejil ja te naꞌbꞌl Dios, quꞌn ponixtaq chi kaꞌyin kyuꞌn abꞌj, a iteꞌktaq te bꞌinchbꞌilte, ex kyuꞌn jniꞌ oyaj, a xi kyqꞌoꞌnxjal te pitxbꞌilte. Chi Jesúsjo kyjaluꞌn: 6Tzul jun te qꞌij, ex tojjo qꞌij anetziꞌn, jotxjo lo, a n-ok kykaꞌyiꞌn, tkyaqilx bꞌeꞌx kꞌwel yuchꞌin, ex ntiꞌx jun te abꞌj kyjel tibꞌaj juntl, aj tjapin tqꞌijil.

Tej t-xi tqꞌmaꞌn Jesús tiꞌ kbꞌajil, aj chꞌixtaq tjapin bꞌaj tkyaqil

(Mt. 24:3-28; Mr. 13:3-23)

7Xitzin kyqanin t-xnaqꞌtzbꞌin te kyjaluꞌn: Ay Xnaqꞌtzil, ¿Jtojtzila bꞌaꞌn tbꞌajjo ikyjo? ¿Altzila kye techil, tuꞌn tok qkaꞌyiꞌn, noq tuꞌn tel qnikyꞌa te, qa chꞌixtaq tul kanin tkyaqiljo lo?

8Chi Jesúsjo kyjaluꞌn: Kykaꞌyink kyibꞌa quꞌn noq chi kubꞌ sbꞌuꞌn. Quꞌn ilaꞌx tzul, ex ok k-okil kyqꞌoꞌn kyibꞌ tzeꞌnku ayiꞌn. Iky ktzajil tqꞌmaꞌn junjun kyjaluꞌn: Ayin weꞌ Tkꞌwal Diosqiꞌn, ex apente qꞌijjo ma tzul kanin jaꞌlin, tuꞌn tjapin bꞌaj kykyaqil, chichkulaꞌ. Me ayetzin kyeꞌ ntiꞌx tuꞌn kyxi lipey kyiꞌj. 9Ajtzin t-xi kybꞌiꞌn kyeꞌ tqanil jniꞌ qꞌoj, ex aj kyjaw tzaqpaj xjal tuꞌn kyjyon qꞌoj kyxolile, mina chi jaw xobꞌa, quꞌn tuꞌn nej kbꞌajiljo jniꞌ lo kyxolxjal. Me naꞌmtaqx tpon tqꞌijil tuꞌn tjapin bꞌaj tkyaqil.

10Ok tenl Jesús qꞌmalte kyjaluꞌn: Quꞌn ilxix tiꞌj nej tuꞌn kyqꞌojin junjun chꞌuq xjal tukꞌa junjuntl, ex junjun ma tij tnam kqꞌojlil tukꞌa juntl. 11Nimx kyaqnajnabꞌ, a kujxix kchi tzajil, junx kyukꞌa nimx waꞌyaj ex nimx yabꞌil, a noq jaꞌchaqku. Ex nim techil kylabꞌila twutz kyaꞌj, a bꞌeꞌx akux chi tzaj xobꞌxa kye.

12Me naꞌmxtaq txi xkyeꞌ lo, aye kyeꞌ nej kchi okil tzyuꞌn kyuꞌnxjal, ex ktzyetil kylajchiy. Ok kchi xel qꞌiꞌn tojjo muꞌẍ ja te kynaꞌbꞌl Dios Judiy, tuꞌn kykawita. Ex ok kchi kꞌwelix qꞌoꞌn toj tze, ex ok kchi xel patiꞌn kyuꞌnxjal kywutz nmaq kawil ex kywutzjo txqantl nejinel noq tuꞌn npaja. 13Me tojjo lo k-ajbꞌil te kyeꞌy te jun yekꞌbꞌil qa ojtzqiꞌnqiꞌn kyuꞌn. 14Me ntiꞌ tuꞌn kyok ten bꞌisilte jaꞌlin, tiꞌ tuꞌn t-xi kyqꞌmaꞌn te kolbꞌil kyeꞌy, aj tpon qꞌij anetziꞌn. 15Quꞌn tuꞌn ayin weꞌ kchin xel qꞌonte kyyola, a nimxixjo kynabꞌl, a mix aꞌlx jun kyajqꞌoja aku tzikyꞌx kyuꞌn, ex mix aꞌlx aku xkye tyolin kyiꞌja.#Lc. 12:11-12. 16Toj tkyaqiljo lo, atkula maj ayex kytatiy, ex kyitzꞌiꞌn, mo ayex kyxjalila mo jniꞌ kyukꞌiy kchi okil meltzꞌaj kyiꞌja, tuꞌn kyxi kꞌayita. Iteꞌla junjun kyeꞌ ok kchi kꞌwel bꞌyoꞌn kyuꞌn, 17ex ok kchi okil ikyꞌiꞌn kyuꞌn kykyaqilxjal, noq tuꞌn tpajjo kynimbꞌila wiꞌja. 18Me mixpela jun tal tsmal kywiꞌy knajil. 19¡Chi weꞌkuxixa toj kynimbꞌila, tuꞌntzintla kykleta!

20Ajtzin t-xi kykaꞌyinjiꞌy tnam Jerusalén, aj tok kytxolbꞌin xoꞌl qꞌaqꞌ kyibꞌ tiꞌjile, bꞌiꞌnkutzintz kyuꞌn, qa chꞌixtaq tkubꞌ yuchꞌin. 21Tuꞌnpetziꞌn, jniꞌ xjal, ayeꞌ iteꞌ toj txꞌotxꞌ Judey, il tiꞌj tuꞌn kyex oq toj kꞌul. Ex ayetzin kyeꞌ, a iteꞌ toj tnam te Jerusalén, il tiꞌj tuꞌn kyetz oq. Ex ayetzin xjal iteꞌtaq toj kojbꞌil, mi tuꞌn kymeltzꞌaj toj tnam. 22Quꞌn kyojjo qꞌij lo, ok kꞌwel nimitjo kawbꞌil kyibꞌajxjal, a kujxix wen, a tzꞌibꞌin taꞌye toj Tuꞌjil Tyol Dios.#Os. 9:7. 23¡Ayex kyeꞌ tal qya, a chꞌixtaq kykubꞌ tzꞌaq, ex ayeꞌ tzmataq nbꞌaj miꞌẍin kyal, quꞌn tuꞌn nimx kyixkꞌoj tzul tojjo tnam anetziꞌn tuꞌnjo kawbꞌil ktzajil, kujxix wen, kyibꞌajjo jniꞌ xjal antza! 24Iteꞌ junjun kye kkyimil tuꞌn kxbꞌil, a kabꞌe tste. Ex iteꞌ junjuntl kchi xel xoꞌn toj tze tojile tkyaqil twutz txꞌotxꞌ. Atzin teꞌ tnam Jerusalén, noqx techx kbꞌajil waꞌbꞌin teꞌ kyuꞌnxjal aj il, ex tzmaxi aj tjapin bꞌajjo ambꞌil, a xi tqꞌmaꞌn Dios.

A tulil Jesucrist juntl majl

(Mt. 24:29-35, 42-44; Mr. 13:24-37)

25Iteꞌ techil ok kchi okil tiꞌj qꞌij ex tiꞌj yaye ex kyiꞌj cheꞌw.#Is. 13:10; Ez. 32:7; Jl. 2:31; Tchi. 6:12-13. Ex atzin teꞌ twutz txꞌotxꞌ noqx kchi jawil najx kyexjal, ex nim kyxobꞌil ktzajil, quꞌn tuꞌn okx ktinilxjo ttxuyil aꞌ, aj tok ten puljil. 26Bꞌeꞌx kchi tzajil numtzꞌaj xjal tuꞌn kyxobꞌil, aj kyok ten bꞌisil, tiꞌ kkyꞌelix tibꞌaj tkyaqil twutz txꞌotxꞌ. Quꞌn majqexpe kye kykyaqil nchi qoptzꞌaj toj kyaꞌj exsin jniꞌ iteꞌ antza okx kchi luꞌlilx. 27Aj tul kanin tkyaqiljo lo, okpetzin kchin iwliltza, a ayiꞌn Tkꞌwal Ichin, aj ntzaja toj muj twutz kyaꞌj tukꞌa tkyaqil wipiꞌn ex jniꞌ nqoptzꞌajiyila.#Dan. 7:13; Tchi. 1:7. 28Aj t-xi xkyeꞌ jotxjo lo, qexix kykꞌuꞌja, ex kybꞌinchinku kyibꞌa, quꞌn chꞌixtaqtzin tkanin tqꞌijil kolbꞌil.

29Ex kubꞌ tqꞌmaꞌn Jesúsjo juntl techil lo: Kykaꞌyinka jun tqan iw mo qa aꞌlchaqx kye juntl tzetz. 30Aj tok kykaꞌyin aj ttzaj poqꞌle jniꞌ t-xaq, oktzin k-elil kynikyꞌtza te, qa chꞌixtaq tul kanin qꞌijil. 31Ikyxsin tteꞌn lo, aj tok kykaꞌyiꞌn aj tjapin bꞌajjo jniꞌ techil, tzꞌelkutzin kynikyꞌtza te, qa chꞌixtaq tul laqꞌeꞌ Tkawbꞌil qMan Dios kykꞌatza. 32Twutzxix kxel nqꞌmaꞌn kyeꞌy, a qa tzul kanin jotxjo lo, a naꞌmtaq kykyimxjal, a iteꞌ tojjo tqꞌijil lo. 33A kyaꞌj ex txꞌotxꞌ ok kchi bꞌajil, me mex weꞌ nyol nlayx chi kyij xkyeꞌ, tuꞌn mi chi japin bꞌaje.

34Kykaꞌyink kyeꞌ kyibꞌ, ex mina txi kychꞌuẍsin kyanmiꞌn tuꞌnjo jniꞌ achbꞌil at twutz txꞌotxꞌ tzeꞌnkuꞌ txꞌujtin, ex jniꞌ bꞌis tojjo kychwinqila jaꞌlin, quꞌn nyajqa njapinkutaq tqꞌijiljo lo, exsin nya bꞌinchin kyeꞌ kyten, bꞌeꞌx aku chi naja, 35tzeꞌnku jun txuk nkyij tjaqꞌ jun tzuybꞌil txuk. Quꞌn kykyaqilxjal, a najleqe toj tkyaqil twutz txꞌotxꞌ, mi naꞌbꞌinx kyuꞌn, aj kykyij tjaqꞌ tkawbꞌil Dios, a kujxix wen. 36Tuꞌnpetziꞌn, kybꞌinchinkutzin kyeꞌ kyibꞌ, ex chi naꞌn Diosa tkyaqil qꞌij, tuꞌntzintla kytzaqpaja toj tkyaqiljo kbꞌajil kyibꞌaj txqantl, ex tuꞌntzinlta kypon kaniꞌn nwutza, a ayiꞌn Tkꞌwal Ichin, tukꞌa tqꞌuqbꞌil kykꞌuꞌja.

37Qꞌijl nxnaqꞌtzintaq te Jesús tojjo tnejil ja te naꞌbꞌl Dios.#Lc. 19:47. Atziꞌn tzeꞌnkuꞌ qnikyꞌin, antza nkyijetaq twiꞌ Wutz Olivos. 38Ex qlixjexix, nbꞌaj xiꞌtaqxjal bꞌil teꞌ tyol tojjo tnejil ja te naꞌbꞌl Dios.

Currently Selected:

Lucas 21: mamC

Highlight

Copy