Kybꞌinchbꞌin 6
6
Tej kyok qꞌoꞌn wuq mojil kyxol nimil
1Kyojjo qꞌij anetziꞌn, liwey i chꞌiy kybꞌajjo nimil. Tuꞌntzintzjo, ayetzaj nchi yolintaq griego jaw wulj kyiꞌjjo nchi yolintaq ebrey, ex kyqꞌma qa minataq ntzaj qꞌoꞌnxix kyokliꞌn qya mebꞌe, ayeꞌ iteꞌtaq kyxol, tzeꞌnku nkubꞌ paꞌntaqjo mojbꞌil, a ntzaj qꞌoꞌn kyuꞌn tsanjil te junjun qꞌij.
2Ok chmoꞌn kykyaqil nimil kyuꞌn kabꞌlajaj tsanjil, ex kyqꞌma: Nya wen tuꞌn tkyij qtzaqpiꞌn tuꞌn qyolin tiꞌj Tyol qMan Dios, exsin oꞌkxtza tuꞌn qkubꞌe tena sipil teꞌ tkyaqiljo n-ajbꞌin kye mebꞌe qya anetziꞌn. 3Tuꞌnpetziꞌn, ayiꞌy werman, kyskꞌoꞌnksa kyxolxa wuq ichin bꞌaꞌn kychwinqil, tzꞌaqle kynabꞌl, ex nojnin kyanmin tukꞌa Xewbꞌaj Xjan, tuꞌntzin t-xi qqꞌoꞌn kyoklin, tuꞌn kyaqꞌnin tiꞌjjo aqꞌuntl lo. 4Qalaꞌ, awotzintla qeꞌ tuꞌn qnaꞌn Dios, ex tuꞌn qyoliꞌn tiꞌjjo Tyol, chi chiꞌ.
5Kykyaqilx i kyij toj wen tiꞌjjo tumil, ex jaw skꞌoꞌn Esteban, jun ichin nojnin tanmin tukꞌa Xewbꞌaj Xjan ex nim tnimbꞌil; junx tukꞌa Lip; Prócoro; Nicanor; Timón; Parmenas; ex Nicolás, a tzajnin te Antyokiy. A ichin lo, otaq nimin tiꞌj kynimbꞌil Judiy, me nya jun Judiy te titzꞌjlin.
6Tej kybꞌaj skꞌoꞌn wuq ichin kyxol nimil, bꞌeꞌx i xi qꞌiꞌn jaꞌ iteꞌtaq tsanjil. Tej kykanin antza, kubꞌ kyqꞌoꞌn tsanjil kyqꞌobꞌ kyibꞌaj, ex i naꞌn Dios. 7Tuꞌnpetziꞌn tkyaqiljo lo, liwey chꞌiy tyolajtzjo Tyol Dios. Tuꞌntziꞌn, chmet txqantl kybꞌajjo nimil toj Jerusalén; ex nimku pale Judiy xi kynimiꞌn nimbꞌil.
Tej tok tzyuꞌn Esteban kyuꞌn kawil aj Judiy
8Nkubꞌ tbꞌinchintaq Esteban techil tipin Dios kyxolxjal, quꞌn tuꞌn nojnintaq tanmin tuꞌnxjo tipin ex tkyꞌiwbꞌil Dios.
9Iteꞌtaq junjun xjal toj ja te naꞌbꞌl Dios, Tzaqpiꞌntaq tbꞌi, junx kyukꞌa jteꞌbꞌintl te aj Cirene, ex te Alejandría, ex te Cilicia, ex te aj txꞌotxꞌ te Asia. Ayetzaj xjal, i ok ten chꞌotjil tukꞌa Esteban, 10me mix i xkyeye kyyolin, quꞌn ante Esteban nyolintaq teꞌ toj tumil, ex tukꞌa tnabꞌl, a ntzajtaq tqꞌoꞌn Xewbꞌaj Xjan.
11Tuꞌn mix xkyeye kyyolin, i chjet jun jteꞌbꞌin xjal kyuꞌn, ayeꞌ nya wenqetaq, tuꞌn tkubꞌ kysbꞌuꞌn, ex tuꞌn t-xi kyqꞌmaꞌn qa otaq kybꞌi paꞌj yol tuꞌn Esteban tiꞌj Moisés ex tiꞌj Dios. 12Ikytzin oke kyuꞌn, tuꞌn tjaw tiljxjal. Ex ayeꞌ nim kyoklin, junx kyukꞌa xnaqꞌtzil tiꞌj ojtxe kawbꞌil i xi tꞌilpaj tzyulte Esteban. Tej ttzyet kyuꞌn, bꞌeꞌx xi kyiꞌn twutz Sanedrín, 13ex i ok kyjyoꞌn xjal iqil yolqe, ayej kyqꞌma: A ichin lo minax nkubꞌ qen tuꞌn t-xoꞌn yol tiꞌjjo xjan qja te naꞌbꞌl Dios ex tiꞌjjo kawbꞌil. 14O qbꞌi qeꞌ, tej tqꞌma qa ok kꞌwel tyuchꞌin Jesús te Nazaret tnejil qja te qnaꞌbꞌl Dios, ex kjawil ttxꞌixpin tzeꞌn nqo anqꞌina tzeꞌnkux tzaj tqꞌmaꞌn Moisés.
15Ayetzaj kawil exqetziꞌn kykyaqiljo qꞌuqleqetaq antza toj Sanedrín, tej tok kykaꞌyin twutz Esteban tukꞌa jun tzaljbꞌil, ex el kynikyꞌ qa ikytaq twutzjo tzeꞌnku jun angel.
Currently Selected:
Kybꞌinchbꞌin 6: mamC
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.