2 Aj Corint 3

Jun tqanil tiꞌj jun akꞌaj tumil tuꞌn qkyij toj wen tukꞌa qMan

1¿Ma tzunpela nja qnimsin qibꞌa tukꞌa yol lo? ¿Mo ilpela tiꞌj tuꞌn t-xi qqꞌoꞌn jun uꞌj kyeꞌy te oqxenbꞌil qeꞌy, noq tuꞌn qkubꞌ kyxkꞌamiꞌn; mo tuꞌn ttzaj kyqꞌoꞌn jun uꞌj qeꞌy te oqxenbꞌil qeꞌy, jaꞌ tuꞌn qponiꞌy? Quꞌn ikytzin tumiljo kyuꞌnxjal, a nya wen, ayeꞌ nchi bꞌet suqil Tyol qMan. 2-3¡Mina! Quꞌn ayeku kyeꞌ ma chi ok tzeꞌn jun uꞌj te oqxenbꞌil qey. Quꞌn tzꞌibꞌinqe kyeꞌ tuꞌn Crist toj qanmiꞌn, nya tukꞌa jun tzꞌibꞌbꞌil, a aku naj, qalaꞌ tukꞌa Xewbꞌaj Xjan, a T-xew Dios, itzꞌ te jun majx. A uꞌj lo, ayeku kyeꞌ; mikyxi tzeꞌnku ojtxe kawbꞌil noq tzꞌibꞌin twutz abꞌj, a nlay bꞌant tbꞌinchinte jun tiꞌ;#Ex. 24:12. qalaꞌ tzꞌibꞌin toj kyanmiꞌn, a itzꞌ, ex aku tzꞌel tnikyꞌtzajil kywutzxjal noq tiꞌjjo kybꞌinchbꞌiꞌn bꞌaꞌn, ex aku bꞌant tuꞌjit qaqꞌiꞌn kyuꞌnxjal noq kyiꞌja. 4Atzin kynimbꞌila ikyjo ntzaj tqꞌoꞌn tqꞌuqbꞌil qkꞌuꞌja twutz qMan Dios, noq tuꞌn Crist. 5Quꞌn nya tuꞌn qbꞌinchbꞌiꞌn kyxola, kjawil qnimsin qibꞌa, quꞌn tkyaqiljo lo tzajnin te Dios, 6quꞌn axte Dios ma tzaj qꞌonte qokliꞌn tuꞌn qoka te taqꞌnil tiꞌj jun akꞌaj tumil bꞌantlin tiꞌj tuꞌn, tuꞌn kykyijxjal toj wen tukꞌa. Quꞌn atzin ojtxe tumil nqanin qiꞌj tuꞌn qkyim tuꞌn, tuꞌn mi njapin bꞌaj tkyaqil quꞌn. Atzin kolbꞌil jaꞌlin nya te ojtxe tumil, a tzꞌibꞌink twutz abꞌj, qalaꞌ tuꞌn Xewbꞌaj Xjan, a ntzaj tqꞌoꞌn qchwinqil te jun majx.#Jer. 31:31-34.

7Atzin jaꞌlin, qo ximin chꞌin tiꞌjjo ojtxe kawbꞌil, a te kyimin, a ok tzꞌibꞌin twutz abꞌj. Atzinjo lo ul kyxol aj Israel tukꞌa txqan tqoptzꞌajiyil Dios. Me ayetzin aj Israel mix kypaꞌye tuꞌn kykaꞌyin twutz Moisés, noq tuꞌn tpajjo tqoptzꞌajiyil Dios pon kanin tiꞌj, a chebꞌe kubꞌ bꞌaj tqan.#Ex. 34:29. 8Ex qa tukꞌa nim tqoptzꞌajiyil Dios s-ule lo, ¿Yajtzila teꞌ te akꞌaj tumil, a tzajnin tuꞌn Xewbꞌaj Xjan? 9Qa a ojtxe kawbꞌil ma tzul tukꞌa tqoptzꞌajiyil Dios, exsin nqanintz kyiꞌjxjal tuꞌn kykyim tuꞌn, ¿Yajtzila teꞌ akꞌaj tumil, a ma chi okxjal tzꞌaqle tuꞌn? 10-11Quꞌn ante ojtxe kawbꞌil nyala teꞌ toklin twutzjo akꞌaj. Quꞌn ante ojtxe kawbꞌil il tiꞌj tuꞌn tbꞌaj, me ante akꞌaj, ok kyjel teꞌ te jun majx.

12Me tzeꞌnku qa ma qe qkꞌuꞌj tiꞌjjo akꞌaj tumil, a mi bꞌaj, nqo yolin tiꞌj tukꞌa tkyaqil qanmin; 13mikyxi tzeꞌn te Moisés, n-ok tktxuꞌntaq twutz, tuꞌn mi tzꞌiwle tqoptzꞌajiyil Dios tiꞌj, kyuꞌn aj Israel, tzmaxi k-elil tjqoꞌn twutzjo, ajxi tkubꞌ yupjjo tqoptzꞌajiyil.#Ex. 34:33. 14Ex ikyxjo tzeꞌnku jaꞌlin, atzin kynabꞌlxjal ma tzꞌok juple nyakuj tuꞌn jun kutxbꞌil. Quꞌn ajtzin tja kyuꞌjin xjaljo Tuꞌjil Tyol Dios, mi n-el kynikyꞌ te t-xilin tumil, quꞌn oꞌkxjo tuꞌn kynimbꞌil tiꞌj Crist, aku tzꞌel qꞌinte kutxbꞌil kywutz tok, tuꞌn tel kynikyꞌ te. 15Kyojjo tqꞌijil jaꞌlin, aj tjaw kyuꞌjin tkawbꞌil Moisés, jpuꞌnkjo kynabꞌl nyakuj tuꞌn jun kutxbꞌil, tuꞌn nya tzaqpiꞌnqe tuꞌn tel kynikyꞌ te kolbꞌil. 16Me qatzin qa ma nimin jun xjal tiꞌj qAjaw, atzin kutxbꞌil bꞌeꞌx k-elil. 17Quꞌn axte qAjawjo, a Xewbꞌaj Xjan, ex jaꞌ taꞌye T-xew qAjaw, antza taꞌye tzaqpibꞌl tuꞌn tel qnikyꞌ te. 18Tuꞌnpetziꞌn, qkyaqilx nya ktxun qwutz tukꞌa jun kutxbꞌilte tzeꞌnku te Moisés; qalaꞌ ma qo ok tzeꞌnku jun kaꞌybꞌil wutzbꞌaj, tuꞌn kykaꞌyinxjal tqoptzꞌajiyil qAjaw toj qchwinqil. Quꞌn axte T-xew qAjaw ntxꞌixpinte qchwinqil, tuꞌntzintla chebꞌe tuꞌn qxi laqꞌe, tuꞌn qok tzeꞌnku te Crist.

Currently Selected:

2 Aj Corint 3: mamC

Highlight

Copy