1 Aj Corint 6

Nya wen tuꞌn qxiꞌ jstisil kyukꞌa nimil

1Ex atx juntl o nbꞌiꞌy kyiꞌja: ¿Tzeꞌn qa at jun tiꞌ saj kyxola, liweyxix ncheꞌxa chikyꞌbꞌil kyibꞌa kywutzjo kawil, nya nimilqe? ¿Tiquꞌn nya kywutzjo nimilqe? 2¿Ma mitzin bꞌiꞌn kyuꞌn, qa aye nimil kchi kawil kyiꞌjjo xjal nya nimilqe tkyaqil twutz txꞌotxꞌ? Exsin qa ikytzjo, ¿Ma ntiꞌtzin kyetza kynabꞌl, tuꞌn kynikꞌetjo junjun tiꞌ, a noq chꞌin t-xilin? 3¿Ma mitzin bꞌiꞌn kyuꞌn qa aye nimil kchi kawil kyiꞌj angel? ¿Yajtzila teꞌ junjun tal tiꞌ tzaluꞌn twutz txꞌotxꞌ? 4Tuꞌnpetziꞌn, qa at kyqꞌoja kyxola tiꞌj junjun tiꞌ tzaluꞌn twutz txꞌotxꞌ, ¿Tiquꞌnil nchi ok kyqꞌoꞌnjiꞌy nya nimil te kawil kyeꞌy? Quꞌn ntiꞌ kye kyoklin toj Ttanim Dios. 5Nxi nqꞌmaꞌnjiꞌy luꞌn kyeꞌy tuꞌn kytzaj txꞌixwe chꞌin tuꞌn, quꞌn ¿Ma mixpela aꞌl jun kyeꞌ at chꞌin tnabꞌl tuꞌn tskꞌet tumil jun tiꞌ kyxolxa, ayiꞌy nimilqiꞌy? 6Ex nya noq nchi bꞌaj ja jyoꞌn qꞌoj kyxolxa, qalaꞌ ex liweyxix ncheꞌxa chikyꞌbꞌil kyibꞌa kywutzjo kawil nya nimilqe. ¿Ma mixsin aꞌl jun kyxola, a ayiꞌy nyakuj aj nabꞌlqiꞌy, tukꞌaxpetla jun, a at chꞌin tnabꞌl tuꞌn tnikꞌetjo jun tiꞌ kyxoljo nimil?

7Ex noq tiꞌjjo kyjoybꞌiꞌn qꞌoja kyxoliliꞌy, n-el tnikyꞌtzajil qa ma kubꞌ kyiꞌja tuꞌn nya bꞌaꞌn. ¿Ma nyapetzintla bꞌaꞌn tuꞌn tikyꞌx chꞌin nya bꞌaꞌn kyuꞌn, a n-ok bꞌinchin kyiꞌja, ex tuꞌn tikyꞌx elqꞌbꞌin kyuꞌn? 8Qalaꞌ ayex kyeꞌ nchi bꞌaj jaw bꞌinchinte noq tiꞌchaqku tiꞌ kyxolxa, mo nchi bꞌaj elqꞌiꞌn.

9¿Ma mitzin bꞌiꞌn kyuꞌn qa ayeꞌ xjal bꞌinchil ilqe, ntiꞌ kyoklin toj Tkawbꞌil Dios? Mitzin txi kyqꞌoꞌn sbꞌubꞌl kyibꞌa, quꞌn tkyaqiljo xjal lo ntiꞌ kyoklin toj Tkawbꞌil Dios: Jniꞌ aj pajil, ex aj kꞌulil kywutzjo twutzbꞌiyil, ex aye n-el kyiꞌjlin mejebꞌlin, ex jniꞌ ichin, a n-ok kyqꞌoꞌn kyibꞌ te qya, noq tuꞌn kykyꞌaꞌjin ichin tukꞌa ichin; 10exqetziꞌn ileqꞌ, exqetziꞌn npon kykꞌuꞌj tiꞌj nimku tiꞌ, exqetziꞌn txꞌujtinel, ex xoꞌl yol, ex jniꞌ sbꞌul. 11Ikytaqtzin tten junjun kyejiꞌy ojtxe. Me atzin jaꞌlin, ma chi txjeta toj tkyaqiljo lo, ex ma chi el paꞌn tuꞌn Dios, tuꞌn tsaqix kychwinqila, ex ma chi oka tzꞌaqle twutz Dios toj tbꞌi qAjaw Jesucrist, tuꞌn Xewbꞌaj Xjan.

Nya wen tuꞌn qkyꞌaꞌjin

12Ikytzin tzeꞌnku nkyqꞌmaꞌn: Tzaqpiꞌnqo tuꞌn tkubꞌ qbꞌinchin noq alkyex qaj. Me te weꞌy, nya tkyaqil at tajbꞌin. Ex qa tzaqpiꞌnqo tuꞌn tkubꞌ qbꞌinchin noq alkyex qaj, me nlay txi nqꞌoꞌn wibꞌa tuꞌn tkubꞌ wiꞌja tuꞌn tajbꞌil nxmilila.#1Co. 10:23. 13Qalatzin kyeꞌ, qa aj ttzaj tqanin kyxmilila juntl qya, ikynajla kye toj kywutz, tzeꞌnku aj ttzaj tqanin kykꞌuꞌja chꞌin twa; ex bꞌaꞌn tuꞌn t-xi kyqꞌoꞌn kyibꞌa tzeꞌnku kyaja, ex akula tzaj kyqꞌmaꞌn te kolbꞌil kyibꞌa, ¿Ma nyatzin n-okin qwa te qkꞌuꞌj, ex atzin qkꞌuꞌj tzaj tqꞌoꞌn Dios te kꞌuꞌbꞌl qwa? Me aye luꞌn kchi bꞌajil kykabꞌil tuꞌn Dios. Me nya ikyxjo tukꞌa qxmilil. Quꞌn nlay tzꞌokjo qxmilil te kyꞌaꞌjil, qalaꞌ te qAjaw, ex a qAjaw kyꞌiwlilte qxmilil. 14Quꞌn ikytziꞌn tzeꞌnku xjaw anqꞌin t-xmilil qAjaw tuꞌn Dios, exsin ikyxjo qe, kjawil anqꞌin qxmilil, tuꞌn tipin. 15¿Ma nyapela bꞌiꞌn kyuꞌn qa ajo qxmilil ma tzꞌok te jun tnej t-xmilil Crist? ¿Ma akutzin tzꞌel wiꞌnjiꞌy jun tnej t-xmilil Crist, tuꞌn tok mujbꞌit tukꞌa jun kyꞌaꞌjil? Ntiꞌx tumil ikyjo. 16¿Ma nyapela bꞌiꞌn kyuꞌn, qa ma tzꞌok meje jun ichin tukꞌa jun qya aj kyꞌaꞌjil, kykabꞌil kchi okil junx kyxmilil? Quꞌn ikytziꞌn ntqꞌmaꞌn Tuꞌjil Tyol Dios kyjaluꞌn: Toj nwutza, chi Diosjo, aye kabꞌe nchi ok meje, junxchꞌin kyxmililch.#Gen. 2:24.

17Exsin ikyxjo, qa at jun xjal s-ok tmujbꞌin tibꞌ tukꞌa qAjaw, bꞌeꞌx k-okil junxchꞌin kyanmin tukꞌa.

18Tuꞌnpetziꞌn, ku kyel oqa teꞌ jniꞌ kyꞌaꞌjin. Nxi kyqꞌmaꞌn qa tkyaqil kyila, mi nchi bꞌinchin mibꞌin kyiꞌja. Me mina werman, quꞌn tkyaqiljo il nbꞌinchin mibꞌin qiꞌj, ex a xjal nbꞌinchin kyꞌaꞌjin, nbꞌinchin il tiꞌjx t-xmilil. 19¿Ma nyatzin bꞌiꞌn kyuꞌn, qa a kyxmilila o tzꞌok te tnajbꞌil Xewbꞌaj Xjan, a o tzaj tqꞌoꞌn Dios toj kyanmiꞌn?#1Co. 3:16; 2Co. 6:16. Tuꞌnpetziꞌn, nyaqe kyeꞌ tajawjo kyxmilila, qalaꞌ a Dios. 20Quꞌn o chi laqꞌeta tuꞌn tchkyꞌel Jesucrist. Tuꞌnpetziꞌn, chi nimsiꞌn tbꞌi Dios tukꞌa kyxmilila.

Currently Selected:

1 Aj Corint 6: mamC

Highlight

Copy