Mateo 17

Esus bëchamauanquiecsho isaid

(Madc. 9.2-13; Duc. 9.28-36)

1Aden chiashic 5tedec ushanec nidquimbi Esusën abëd icquido nëidted buampondash. Petedo yec Santiaco yec aidën utsi Uan yec quenuc buanash macuësh tapa abucquiocquid yacno dectatoash mannanënquio tabadtuidpanëdash. 2Tabadtuidshun aidon isnubi Esus utsiacbimbuec yanec aton bëtantete uëshëbimbuec chënquec bëchamauanquiec yannubi aton dashcute ushumboshë yampanëdash.#17.2 Adec Esus bëchamauanquiec yanaid tantiaquin Petedon chuiquin dada uapanëdash. Pet.2. 1.16-18 isbanta.

3Adnubien Moisesbëd Nuquin Papan oncamiampid Edias isadcuenash Esusbëd onquec tabadsho ispanëdash.#17.3 Moisesën Esus chote chuipanëdash. M.I.Ch. 18.15 dada uaquin aden chuipanëdash. Mad. 4.5-6 dada uaquin Nuquin Papan Chomiaid Edias iquendac, quequin chuipampic. 4Adsho isashien Petedo: Icbo, Mibëd nëmbo choash tabadquin mibitedi isec bëdambo iquebi. ¿Ada naden naid buntsia? Mibi nëmbo tabadte 3ted icnuc shubumpi uanu, mitsana yec Moisesëna yec Ediasëna yec quenuc, quepanëdash. 5Adec Petedo onquenubien abu ushu bëchamauanquiec choquidën abitedi bëtimpanëdash. Adnubien abu ushu nënantanuëshquio Nuquin Papa onquiampanëdash: Nëid Umbi tantiaidquio yec Cun Madombo nec. Umbi chiacpadombuen nasho Umbi bëdambuen isaidquio neque. Aidën chuibansho bëdambuen tantiata, quec dacuëdampambuec onquepanëdash. 6Adsho tantiash cumapenec dacuëdtanec nidaidën isec uebudcuededpanëdash Petedo chedo.

7Adshobien Esusën camishquin: Dacuëdenquio yec nidto, cac 8nidtoquimbi Esus abentsëqui icsho ispanëdash.

9Adtanec macuësh budequi Esus: Mimbi isbued nëbi utsibo chienda. Matsesën Tishaid icshobi uënës uamiac ubi uincuenacsho issumbi chianta, quepanëdash ambi buanaido chiec.

10Adsho tantiashun ambi buanaidon: Nuquin Papan Chomiaidquio nec, quequin nëbi mibi tantiembi. Mibi adquid icnuc ¿Mitsi padquid chuiquin Moisesën chiampid tantiamequidon chuiposh? Nuquin Papan Chomiaid choabi icnuc bëyuc Edias yampidba choendac, quequin ma chuibampaboc, queshobien#17.10 Aid chiaid istiadquiocquin Mad. 4.5 ista. 11Esusën: Ai, abimbo chiosh. Bëyuc choshon Ediasën matses bëdambuen tabadmenuen chuibanquid choendac, quequin abimbo chiosh. 12Adquid Ediasbimbuecquid chondash. Choacsho tantienquio icquin matsesën abi bunacpaden cuessunepanëdash. Adembidi Matsesën Tishaid icsho ubitsen chieshënquin uënës uamendac, quequin chuipanëdash. 13Adoac: Uan acten mentoandenned caquinshenda Edias caposh, quepanëdash abëd nidbuedo.#17.13 Adec Esus bëchamauanquiec yanaid tantiaquin Petedon chuiquin dada uapanëdash. Pet.2. 1.16-18 isbanta.

Madompi dapuduedaid podobitsi icsa cuenmeshunaid

(Madc. 9.14-29; Duc. 9.37-43)

14Bëchamauanquiec ictanec abi icbocno choquimbi matses dadpen ubi chedo datsidadacsho Esusën istuidpondash. Adec Esus chosho issumbien dadan Esus ismec dannëshën sebudshun naden chuipondash: 15Cun mado bëdambuen isquin bëdanmeta, Icbo. Baded badedquiec uënësannec cute nëpaëdec pichiquianniosh. Adecbidi acte nëpaëdtedniosh. 16Mibëd icquidon bëdanmete danquin bëuidombi. Bëdanme, cac bëdanmenuen tanuidosh, caquien 17Esusën abëd icquidobëta ambo icquidotedi naden chuipondash: Umbi nadatiambo icquin nabanquin dadpen ismiaqui mimbi ubi tantienquio iquec. Icsambuen tantiaquid yec icsambuec tabadquido mibitedi nec. Mibitedishun tantienquiocsho isash ¿tedectsibi mibëd icpe? ¿Mitsipadombuembimbi chieshtoenquio icquin mibi chuibudpe? quetanquin: Min mado bec cho, capondash. 18Adoac bësho istanquin Esusën podobitsi icsa chushcapondash. Padi. Dapuduen, cac podobitsi icsa dapuduennubi madompi bëdampondash.

19Adsho issumbimbi ubitedshun utsibo tantiamenquio icquin Esus chuipondac. Umbi: Dapuduenmenu, cac ¿atotsi quiash podobitsi icsa dapuduenenquio icposh? caquien Esus: 20-21Nuquin Papambo tantiaquioquin mimbi bëdambuen natsenac. Cute mostasa caid ëshë pistsëcquio yacbimbuen mimbi ubi bëdiactsëc tantiatsec. Aden bëdiactsëc tantiaquid icquin nëid macuësh cain: Nëmbo icbuedi uanno mannëdta, cac ambo ictsiandac. Adembidi: Umbi natiapimbo ictequid nec, mimbi caidi mimbi: Ubi bëdambuen nameta, Papa, quequin abi chuidonesho issun aidëmbi mibi nametsiash. Nëbi umbi dapuduenmebued abembi cuentiapimbo icquid nec. Nuquin Papauidtsëqui tantiaquin buna mëmunquin Nuquin Papa chianneshun adquid dapuduenmetequid nendac, quequin Esusën abëd icquido chuipondash.

Abi uënës uamete Esusën padpiden chiaid

(Madc. 9.30-32; Duc. 9.43-45)

22Adanec aton nidaid Cadidea yacno capucuennequimbi Esusën ubitedi naden chuiuapondash: Matsesën Tishaid icshobi ubëd icquid abentsëcshun chieshëmënquido ubi bedmendac. 23Adoac ubi uënës uamendac. Aden ubi uënës uamiacsho chococaquini daëdec ushash uincuenendac, quesho tantiatanequien abëd icquido uënësquio yanec shubiantiadtsëcquio yancuededpondabi.

Nuquin Papa tabadte shubu dapa nacnenmenuen menetequid piucquid Petedon bedaid

24Aden chianec nidequi shubu dadpen icquid Capednaun yacno Esus chopondash. Adnubien Nuquin Papa tabadte shubu dapa nacnenmenu, quequin piucquid bedquidon Petedo chuituidpanëdash: Nuquin Papa tabadte shubu dapa nacnenmenuen ¿ada min icbon piucquid menepatsiash? caquien 25Petedon: Ai, menetsiash, capanëdash. Adanec nidec shubun puduedshobien Esusën ambia Petedo naden chuipondash: ¿Mitsi paden tantie? Simon. Aton matsesëna nacnenmenuen ¿tsutsi chuiquid tapabon piucquid bedshumpec? ¿Ada aton matses piucquid bedshumpec? Aido bedshunenquio icquin ¿ada matses utsibon aton iuabo piucquid bedshumpec? caquien 26Petedo: Ma iuabona bedshumpaid yoc, quesho tantiash Esus: Aden aton matses piucquid bedshunenquio iquec, quepondash. 27Aden tantiaquimbi: Nëishnushe, queshun menenun chianën ansemetan. Bëyucquio mimbi nuëcquid ansemiaid ancanshun anisquin shocosh nacnenaid piucquid abentsëc mimbi istuidendac. Aid bedshun piucquid bedshumënquido menetanta. Në cun icbonabëdi cuna nec, quequin menetanta, capondash Esusën. Adoac Petedon Esusën chiacpadombuen bedtanquin piucquid menetampanëdash.

Currently Selected:

Mateo 17: mcfNT

Highlight

Copy