Mateo 12

Chonoadtemaid uëshën icbo nebi, quequin chiaid

(Madc. 2.23-28; Duc. 6.1-5)

1Adshumbic chonoadtemaid uëshën tied matanquin adosbiecquid tidico caid istuidshun cumapenec bundoshon cuëstanquin ëshchicshun Esusbëd icquidobëtambi pebededpondambi. 2Aden pebededsho istuidshumbien padiseobon: Is. Mibëd icquido chonoadtemaid uëshëmbi chonoadeque, capondash Esus chuiquin.

3Adoaquien Esusën: ¿Abëd icquidobëtan chuiquid tapa Dabidën natiambo bundoshon ambi petemaidi pepampic, quequin chuiquin dada uampid isbanquin tantiamboda icco? 4Aidën Nuquin Papa tabadte shubumpi yacno puduedshun ambi petemaid pan sanaid istuidpampic. Aid pan Nuquin Papa ismequin nëish iua cuessunneshun pichicaquidon peteuidtsëqui nepampic. Adquid icshobi aid pan bedshun abëd icquidobëtan Dabidën pepampic.#12.4 Aid chiaid istiadquiocquin Sam.1. 21.1-6 ista. 5Adecbidi chonoadtemaid uëshën chonoadenda, quequin chiaid niacquimbi Nuquin Papa ismequin nëish iua cuessunneshun pichicaquidon aid uëshëmbi Nuquin Papa tabadte shubu dapan puduedshun nacnenquin Nuquin Papan chiacpadombuen naiqui icsainquio icpampic.#12.5 Nëish iua pichicate iste bunquin chotaquën onqueten I.T. 28.9-10 isbanta. 6Aden ambi nacnendedniaid Nuquin Papa tabadte shubu bëdapabi icnubi bëdamboshë icquidquio nëmbobi iquec, quepondash Esus. 7Adashic abi onquec: Nuquin Papan naden chiampid mibitedishun bëdambuen tantienquio iquec.

Umbi chiacpadombuen nëish iua dadpen uënës uashun ubi ismequinuidi pichicata, quenquio iquebi.

Adoenquio icquin ubi tantiaquin mimbi: Icsambuen naquido nec, caidobi uënësquiocquin tantiaquin nashunta.

Adosho issun: Mibi bëdambo iquec, caimbi,

quequin Nuquin Papan chiacpadombuen naquin ubëd icquidon nasho mibitedishun chushcainquio ictsenoc.#12.7 Oseas 6.6 tantiaquin nëid dada uapanëdash. 8Ubien Matsesën Tishaid yequi chonoadtemaid uëshën icbo nendac. Adquid icquin umbi tantiacpadombuen matses namequid nebi, quepondash Esus padiseobo caic.

Esusën chonoadtemaid uëshëmbi bëdanmiaid

(Madc. 3.1-6; Duc. 6.6-11)

9Adanec nidequi Nuquin Papan Chiaid chuibante shubun Esus puduedpondash. 10Ambobi dada mëicsatsaid tsadnubi: Chonoadtemaid uëshëmbi matses bëdanmequin Nuquin Papan Chiaid niacsho issun: Mimbi icsambuen naic, canuna, queshun padiseobon Esus naden chuipondash: ¿Nadquid chonoadtemaid uëshëmbi matses bëdanmequinda Nuquin Papan Chiaid niaquenquio icpec? caquien 11Esusën: ¿Ada mimbi iuaid obeca icpec? Aidi chonoadtemaid uëshëmbi shëcuë uëdëshcaidën ampaëdacsho ¿istuidshun bedenquioda mibitedishun icpatsia? Ai, mimbi bedtsiac. 12Aden min obeca bëdiactsëc tantiaquin naquid icnubi matses tantiaquin nashunquid bëdamboshë iquec. Nadquid chonoadtemaid uëshëmbi matses bëdambuen nashunquidën Nuquin Papan Chiaid niaquenquio ictsiash, quequin Esusën chuipondash.

13Adotanquimbien Esusën dada mëicsatsaid chuiquin: Ubi mëd, cac mëdequi aton mëdante utsiuc yacpadquiobidi yec bëdampondash. 14Aden bëdanmesho isashien padiseobo nëishquiopanëdash. Adec nëishanec nidanniash aton matses utsibobëd onquecuededec: ¿Mitsi padombuen Esus cuessunnemenuen bedmetiad? quecuededpanëdash.

Esusën nate ëndenquimboshë chiampid

15Adnubien Esus: Ubi cuessunnemete bunec, quequin tantianec auëshquiobi puduanec nidpondash. Nidsho issumbien matses dadpenshun tsibanampondash. Adshumbic aidon bëbëaid daicsaidobëta nënquidotedi bëdanmebampondash. 16Adshumbic ambi bëdanmebuedo chuiquin: Aidën bëdanmioshi, quequin utsibo chienda, quequin Esusën chuipondash. 17Aden Esusën nate chuiquin Nuquin Papan oncamiaid Isayasën naden chuiquin dada uapampic:

18Nëid Umbi Chomiaid umbi namiaidquio nec.

Umbi tantiaidquio nec.

Adquid icsho isash cuishonquebi.

Cun Mayan aidbëd icmendambi.

Adoac nidaid utsi utsiec yacno tabadquidtedi Nuquin Papan matses bëdambuen iste tantiamequin chuibanendac.

19Umbi chiaid chuibanec cumapenec cuëdenquio iquendac.

Matses dadpen tabadacno nidash chushquesho tantienquio iquendac.

20Acte pia abentsëc podquëdaid teshunnenquio yacbimbuen

matses ambi icsambuen naid tantiec uënësquio icsho shubimenquio iquendac.

Tabote uënëstiadtsëcquio icquid dëbedquin uënësmenquio yacbimbuen

matsesën ambi icsambuen naid ënte bunsho mëyadmenquio icquin bëdambuen isendac.

21Nuquin Papan tantiacpadombuen matses bëdambuen namec,

queshun nidaid utsi utsiec yacno tabadquidon matses dadpenshun aid tantiaquin cainendac,

quequin Esusën bëdambuen nate Isayasën chuipampic.#12.17-21 Isa. 42.1-4 tantiaquin nëid chedo dada uapanëdash.

Podobitsi icsan icbon namiaid Esus nec, quequin icsambuen chuishunaid

(Madc. 3.20-30; Duc. 11.14-23; 12.10)

22Adnubien: Ma Esusën bëdanmenu, queshun bëshuash onquesa bëpondash. Aidi podobitsi icsa dapuduedshun bëshu uain eme uaid yec onquesa nepanëdash. Adquid icshobien Esusën podobitsi icsa dapuduenmepondash. Adoac isbenequi onquiampondash. 23Adsho isashien Esus datsidadquido tantiadempambo yec tabadec: ¿Nuquin tsusedpa Dabidën Mado choendac, canëdaidta nepec? quecuededpondash.#12.23 Adquid yec nuqui cainaidquio Nuquin Papan Chomiaidien nechitec, quequin chuipanëdash.

24Aden chuisho tantiash padiseobo: ¿Aidta nedic? Ma aidpenquio neoc. Podobitsi icsan icbo Bedsebu caidën namiaid icquimbien Esusën podobitsi icsa dapuduenmequin naic, quequin Esus icsambuen chuishumpanëdash.

25Aden chuisho tantiashien aidon otacquio tantiaid tantiaquidquio yec abi icsambuen chuimenuequido chiec Esus nadpondash: Chuiquid tapan nëishshun abëd icquido cumapenen chushcac: Aidbëd ictiapimbo iquebi, quianec cuëshcuëshëdec niquetsiash. Adec niquian chuiquid tapa ictiapimbo aid iquendac. Adecbidi shubu dadpen icquidën tabadquido chushcananash cuëshcuëshëdec niquian shubu dadpen icbuedi daëdpactsëc iquendac. Adquiecbidi shubu icbo abëd icquido chushcaquin cuëshëdmiash shubu abentsëquën bëdambuec tabadtiapimbo iquendac. 26¿Ambi namiaidën nashobida Mayan Icsa Satanasën aton iua podobitsi icsabo dapuduenquin cuenmepatsiash? Padenquio. Mayan Icsa Satanasën cuenmiac aidbëdi aton iuabo cuësh cuëshëdtsiash. Adnuc Mayan Icsa Satanas aton icbopenquio yantsiash. 27Umbi podobitsi icsa dapuduedaid dapuduenmesho issun: Bedsebu caidën namiaquien nachitec, quequin mibitedishun tantianuc ¿tsuntsin namiac mibëd icquidon podobitsi icsa dapuduedaid dapuduenmepac caosh? Aden nasho issun mimbi ubi chuibocpadombuembidi ma mimbi min matses aden chiambo icpaboc. Mimbi adoac mibëd icquido: Mimbi icsambuen chiec, quetsenosh podobitsi icsa cuenmequido. 28Nuquin Papan Mayanën nadatiambocquin namiac podobitsi icsa dapuduenmequid iquec ¿ambi Chomiaidquio Nuquin Papan namiacno matses tabadmequid mibitedi yacno ënden choabida ictic? quepondash Esus.

29Adshumbic naden Esusën chuiuapondash: ¿Mitsipaden dada uidënquiocquidën shubun puduedshun atonatedi ampeshumpatsiash? Shubu icbo dataneshunuidtsëqui atonatedi ampeshuntsiash, quequin Esusën chuipondash.

30Ubi cun icbo cainquio icquido ubi chieshënquido nec. Adquid icquin ubi tantiactsëcquido chieshënquin cuëshëdmendac, quequin Esusën chuipondash.

31Adshumbic nadentsen chuipondash: Nuquin Papa icsambuen chuishunquin Ambi Chiaid niac niacbuedëmbi ënsho isash aidën icsambuen naid tantienquio yec Nuquin Papa bëshunendac. Aton Mayan Bëdan nasho issun icsambuen chuishunquid icsho aidën icsambuen naid tantiec Nuquin Papa bëshuntiapimbo iquendac. 32Ubi Matsesën Tishaid icshobi chieshënquin icsambuen chuishunquidëmbi ënsho isash aidën icsambuen naid tantienquio yec Nuquin Papa bëshunendac. Padnuen Aton Mayan Bëdan namesho issumbi: Icsambo iquec, quequin icsambuen tantiaquin chuishunsho issun aidën icsambuen naid tantiec Nuquin Papa bëshuntiapimbo iquendac. Nëbi bëshunenquio icashic adecbidi iuecash bëshuntiapimbo iquendac, quequin Esusën chuipondash.

Bëdambo icquid nec, quequin matsesën tantiate chiaid

(Mat. 7.15-20; Duc. 6.43-45)

33Adshumbic naden Esusën chuiuapondash: Cute bëdan bacuë bëdambocquid nec. Cute icsan bacuë icsambo icquid nec. Bacuë chetequid issun cuten dada matsesën tantiec.#12.33 Adembidi matses bëdambocquid bëdambuec onquec bëdambuec tabadsho issun: Aid bëdambocquid nec, quequin matsesën tantiatsiash. 34Ma mibitedi nisibimbuecquido neyoc. Adquido icquin ¿Mitsipaden bëdambuen tantiaquin mimbi chuibampe? Ma mimbi icsambuen tantiaquin utsibo icsambuen chuishumboc. 35Padnuen bëdambuen tantiaquidën ambi tantiacpadombuen utsi bëdambuen tantiaquin nabanendac. Adecbidi ambi tantiacpadec bëdambuec onquec. Padnuen icsambuen tantiaquidën ambi tantiacpadombuen utsi icsambuen tantiaquin nabanec. Adecbidi ambi icsambuen tantiacpadequi icsambuec onquec, quepondash Esus. 36Ambi cuidte uëshëmbi Nuquin Papan: ¿Ada bëdambuen tantiaquin chiec onquedennio? quequin matses abitedi chuimendac. 37Adoac abimbo chiec: Ai, bëdambuen tantiaquin chiec onquequid nebi, quesho matses mëyadtequid yacno nidmenquio iquendac. Padnuen utsi: Padenquio. Icsambuen chiec onquequid nebi, quesho mëyadtequid yacno nidmequin cuideque. Icsambuen chienda, quequin Esusën chuipondash.

Padiseobon: Ubi isme, quequin Esus chiaid

(Madc. 8.12; Duc. 11.29-32)

38Aden chuisho tantiashumbien padiseobobëtan Moisesën chiampid tantiamequidon naden Esus chuipondash: Nuquin Papan Chomiaid nebi, quequin nadatiambocquin nabanquin ubitedi isme, capondash.

39Adoaquien Esusën: Nuquin Papan Chiaid niac niacquido yec mibitedi icsamboshë icquido nec. Adquido yec ubi tantiate bunenquio icquimbi: Nadatiambocquin nabanquin ubi isme, mimbi ubi capec. Adsho nëbi mibitedi ismenquio iquembi. Iuecshumbimbi ismendac. ¿Ada ambi oncamiaid Onas Nuquin Papan namiampid tantie? Aid nanëdacbimbuen naquin ismendambi.#12.39 Onas 1.2 istanquin Ede. 3.20 ista. 40Onas nuëcquid tapa nuamboshëcquidën chebudac aidën pucun uec daëdec ushpampic. Adecbidi Matsesën Tishaid icshobi mëyanquin uënës uacsho chococac Onas yampicpadec daëdec ushash uincuenquin mibitedi ismendambi.#12.40 Onas 1.17 tantiaquin nëid dada uapanëdash. 41Ubi tantienquio yec mibitedi icsambocquido nec. Padnuen Nuquin Papan oncamiaid Ambi Chiaid Onasën chuibanac shubu dadpen icquid Ninibe yacnocquido badedi icsainquio yec ënëdpampic.#12.41 Onas 3.5 tantiaquin aden chuipanëdash Esusën. Nuquin Papan Chiaid chuibanquid yec Onas bëdambo icpampic. Ubien aid udictsëcquidquio yec nadatiambocquidquio nec. Adquid icquin chuibanquin dadpen ismiaqui mimbi ubi tantienquio iquec. Aden ubi tantienquio icquido icsho Nuquin Papan abitedimbo cuidte uëshëmbi Ninibe yacnocquidon: Icsambo icquido neque. Cuid, mibitedi caindac. 42Adquid icnuc abitedimbo cuidte uëshëmbidi matses utsi Sud yacnocquidon chuiquid tapa chido nuquin tsusedpa Sadomonën bëdambuen chuibansho tantianuec ënapenuësh choampidëntsen: Icsambocquido neque. Cuid, mibitedi cauaindac. Sadomon bëdambuen tantiaquid icpampid icnubi ubien aid udictsëcquidquio yec abitedi tantiaquidquio icquin nadatiambocquin nabanquin ismiaqui mibitedishun ubi tantienquio iquec, quepondash Esus.#12.42 Ch.D.2. 10.1-10 tantiaquin Esusën aden chuipanëdash. Aid istiadquiocquin chotaquën onqueten Ch.D.2. 10.1-10 ista.

Ambi nianaid podobitsi icsa dapudueduate chiaid

(Duc. 11.24-26)

43Adshumbic naden Esusën chuipondash: Dada podobitsi icsa dapuduedaid icposh. Aidi abi dapuduedaid dapuduenash podobitsi icsa matses nibëdec masiuidpambo yacno nidash capucuennequimbi abi dapuduedtequid utsi istuidenquio icposh. 44Adquid istuidambo yec: Abibidi dapudueduaic nidnu, quianec anobidi chouaposh. Adec choshon abi dapuduembued nadsho tantiatuidposh: Icsamboshë yanuidbuedi nëbi bëdambo iquebi, queshumbi Nuquin Papa tantianu, quenquio icsho istuidposh. 45Aden istuiduashic: Dapuduedtequidquio nëid nec, quianec abipadquid utsi bedec niduaposh. Nidshumbic 7ted icsamboshë icquido istuidshun bëash aidobëdi dapuduedposh. Adnuc podobitsi icsa abentsëc dapuduedaid yec ënden icsambo iquequi bëdapabi icbuedi aido dadpen dapuduedash buëdanquiec aid dada icsamboshë yanuaposh. Aidbimbuecquido yec nëbi matses icquid icsamboshëcquido nendac, quequin Esusën chuipondash.

Aton titabëd Esusën utsibo choaid

(Madc. 3.31-35; Duc. 8.19-21)

46Aden chuishun abi Esusën matses chuibampondash. Adnubien aton titabëd aton utisbo Esus isnuec chochopanëdash. Adash umanuc tabadsho issun 47utsin puduedshun Esus naden chuituidpondash: Mibi isec titabëd min utsibo chochoash umanuc tabadec, caquien badedi nidenquio icpondash. 48Adec nidenquio icquin Esusën: ¿Mitsicquid cun tabëd cun utsibo nepec? quetanquin 49abëd icquido mëdquin ismec: Nëido cun tabëd cun utsibo nec, caimbi. 50Cun Pa abuc tabadquidën chiacpadombuen nabanec tabadquid icsho dada cun utsibo caquimbi chido cun chu catanquimbi utsi cun ta caimbi, quepondash Esus.

Currently Selected:

Mateo 12: mcfNT

Highlight

Copy