Epeso 2

Nuquin Papan Esuquidistubëd icmiaido chiaid

1Ënden icsambuen nabanquido yec uënësacbimbuec mibitedi Nuquin Papabëd ictiapimbo icpondac. 2Adquid icquin Nuquin Papa tantiesabon nacpadombuen mimbi icsambuen nabampondac. Adombuembidi podobitsi icsabon chuiquid tapa Mayan Icsa Satanas bunacpadombuen nabampondac. Aidëmbi Nuquin Papan Chiaid niacmequin icsambuen nate matses bunmec. 3Ënden Esus tantiesa yec icsambuen naidbëta icsambuen tantiaidtedi tantiaquin nabanec nuquitedi tabadpondac. Adec tabadquin nuqui bunacpadombuen nabanquin Ambi Chiaid niacniacsho issun Nuquin Papan nëishënshun: Cumapenen cuidembi, caido nuquitedi icpondac. 4Aden cuidembi, quebuedëmbi nuqui cuidte bunenquio icquin Nuquin Papan nuquitedi tantiaquiec. 5Adec tantianquid icquin icsambuen naic uënësacbimbuec tabadshobi nuquitedi tantiaquioquin Esuquidistubëta uincuemiacbimbuen abëd ictequido Nuquin Papan nuquitedi icmiac. Adec tantianquid icquin Nuquin Papan nuquitedi abi yacno tabadmendac. 6Nuquitedi Esuquidistubëd abentsëc yacbimbuec tabadquido nec. Nuquin Papan Esuquidistubëta uincuemiacbimbuen ambi tantiamiaido yec abuc Nuquin Papa yacno Esuquidistun dayun tsadunacbimbuecquido nuquitedi nendac. 7Iuecshun utsibon Nuquin Papan aden naid icsho issun: Nuquin Papa bëdambocquid yec matses tantiaquidquio icquin Esuquidistu tantiasho bëdambuen isec, ma capanuna. 8Nuquin Papa matses bëdambuen iste bunquid icquin Esuquidistu tantiasho abi yacno tabadtequido mibitedi icmiac. Umbibi tantiacpaden naquin Nuquin Papa bëdambuen ismembi, quetiapimbo mibitedi iquec. Padnuen mibi tantiaquioquin: Ubi cuidquin mene, quenquiocquin Nuquin Papan abi tantiamiaido mibitedi nec. 9Matses iquec abi bunacpadombuen naic: Umbimbo bëdambuen nabanquin Nuquin Papa bëdambuen ismembi, quetiapimbo matses abitedi iquec. 10Nuquin Papan uaido nuqui nec. Adoshon Aidënquiobi nuquitedi Esus tantiaquido icmiac. Aden chucauaido yec bëdambuec tabadquin utsibo tantiaquin nashunquid nuquitedi nec. Nuquin Papa ëndenquimbo: Ma utsibo nashunnu. Esuquidistu tantiaquido icmendambi, quepampic.

Esuquidistubëd abentsëc yacbimbuec tabadte chiaid

11Mibitedi isadaidpembo icsho: Shui dëbid dëtemesa nec, quequin isadaidbo shui dëbid dëtemequidon mibi icsambuen chuishumpondash. Nuquin Papan matses nebi, quequin shui dëbid dëtemequid isadaidbo nec. 12Adquid icnuc: Nadquid iccondabi, quequin tantiata. Ënden Esus tantiesabo yec isadaidpembo icquin: Cun matses tsusedpabo chuiquin Nuquin Papan: Umbi chiacpadombuen nasho adoendambi, quequin chuipampic, quetiapimbo mibitedi iquec. Isadaidbon aden chuipampic. Adecbidi nëid nidaidën tabadec Nuquin Papa tantiesa icquin abëd tabadte caintiapimbo mibitedi icpondac.#2.12 Isadaidbo Nuquin Papan: Naden naindambi, quequin chiaid dadpen iquec. Nëidtedi Ene. 6.18; 9.9; 15.18; 17.2, 7-9. Nëidic Buan. 19.7-8. Nëidic Sam.2. 7.11, 16 isbanta. 13Ënden Nuquin Papa tantiesa yec uannombo mibitedi tabadpondac. Adbuedi nëbi Esuquidistu aton intac chididiquec abided cuidadec uënësaid tantiaquid yec aidbëd abentsëc yacbimbuec tabadquid yanash Nuquin Papabëd tabadtequido mibitedi nendac.

14Esuquidistunuidtsëqui nuquitedi bëdambuen tabadmec. Ënden isadaidbobëd isadaidpembo chieshënampondash. Adquid icbuedi Esuquidistun daquënë uaquin tsicatiaid chic chicacbimbuen abi tantiaquido icmiac. Nëbi aidobëd matses abentsëc yacbimbuecquido yanash chieshënnanenquio yec bëdambuec tabadec. 15Nuquin Papan: Naden nata, quequin Moises chiampidtedi Esusën ënmiac namenquio icpanëdash. Adoshombic aidëmbidi isadaidbobëd isadaidpembo matses abentsëc yacbimbuecnuc tabadmequin chuca uacbimbuen icmepanëdash. Adoshombic Esuquidistun bëdambuen isnanmequin bëdambuen tabadmec. 16Aden bëdambuen isnanmiaido yec isadaidbobëd isadaidpembo chieshënnantiapimbo iquec. Esuquidistu cueste napotiaidën dectanac uënëspanëdash, quequin tantiasho Nuquin Papan bëdambuen isendac. Adoac matses abentsëc yanacbimbuec bëdambuec tabadendac.

17Ambi Nuquin Papa bëdambuen ismete Chiaid Bëda matses abitedi chuibennenuec Esuquidistu chopanëdash. Mibitedi Nuquin Papa tantiesabo yec uannombo icpondac. Padnuen ubitedi Nuquin Papa tantiaquido yec aton dayuntsëqui tabadacbimbuec icpondac. Adquido abitedi chuibannuec chopanëdash.#2.17 Isa. 52.7 isbanta. Chotaquën onqueten dada uaid Isa. 57.19 isbanta. 18Esuquidistunuidtsëqui nac: Nëid isadaidbo nec. Nëid isadaidpembo nec, quenquio icquin aton Mayambëd abentsëc yacbimbuecnuc tabadmiaido yec Nuquin Papa yacno puduedtequido nuqui nendac.

19Adquid iquec mibitedi isadaidpembo icbuedi nëbi Nuquin Papan Cun matses caido yanash ënden Nuquin Papan Cun matses canëdaidobëd tabadtequido mibitedi nendac. Nuquin Papan shubun icquidobimbuecquido mibi nec. 20Mibitedi Esus tantiaquido yec shububimbuecquido nec. Adquido icsho Esuquidistun: Ubi chuibenneta, caidobëtan Nuquin Papan oncamiampidon chuiquin dada uaid shubu uanun nacnenquin nitsinacbimbuen chuibansho tantiaquido nec. Aid shubun buintad bëdambocquid nitsinaid nidquidbimbuecquid Esuquidistu nec.#2.20 Shubu nitsinaidbimbuecquid nec, quequin Esus chiampid Isa. 28.16 isbanta. 21Aidted abia icquid icnuc Esuquidistu tantiaquid dadpen yansho issun Icbon tabëcshun tanebanaidbimbuecquido neuaic. Adec abi tantiaquido abi tabadte icmiac bëdamboshë yampec. 22Mibitedi Esuquidistu tantiaquid utsibobëd abentsëc yacbimbuecsho Nuquin Papan Aton Mayan meniaid yec Aid tabadte shubu mibitedi nendac.

Currently Selected:

Epeso 2: mcfNT

Highlight

Copy