Hechos 2
2
II. EDUSADEN YACNOSHON CHIAID BËDA CHUIBENNIAID
(2.1—8.3)
Esus tantiaquidbëd icnuec Mayan Bëda choaid
1Adashic isadaidbon aton tiedën caniquid tidico caid bedbante tantiate uëshë chotsëcnubi Esus tantiaquidotedi shubu nuntan iccuededpanëdash. 2Ambo iccuedednubien abucuësh choec cumapenec cuëdec cunquequid tapabimbuec nuntan chosho tantiapanëdash. 3Aden aid tantianubi cute nëdënquiacbimbuecquid budec icbo icboec matsadtocuededpanëdash abi isquidtedi.#2.3 Chotaquën onqueten dada uaid iqueque. Aid ista. Cuëd. 29.7-9 tantiaquin nëid dada uapanëdash. 4Aden Nuquin Papan: Ma nëidobëd tabadnu, queshun Aton Mayan menebanac abi onquiacmaid matses utsin onqueten onquetenquiec ambi matsadtomiaidotedi onquecuededpanëdash.
5Aden Nuquin Papan aton Mayan menenubien isadaidbo utsibo Edusaden yacno chochoash dadpen tabadpanëdash. Aido Esus tantiesabo iquequi aton tsusedpabon chiampicpaden nanuec nidaid utsi utsiec yacnouësh Edusaden yacno chochoaido icpanëdash. 6Cunquequidbimbuecquid cuëdsho tantiash chochoash tabadnubi Nuquin Papan aton Mayan meniaidotedi chochoquidon onquete anquiadabi onqueten onquetenquiec onquesho tantiash nëbi chochobuedo utsi utsiec nadec onquepanëdash:#2.5-6 Esus choabicnuc isadaidbo utsi utsiec nidaid utsi utsiec yacno nidash ambo tabadquidon onquete anquiadash onquete utsin utsinquiec onquepanëdash. Aton matsesbëd icnuec Edusaden yacno choaido nepanëdash. 7¡Padtec! Dacuëdampambo iquec. Ubipadquiequien onquepec. ¿Onquequidotedi nidaid cuëshë Cadidea yacnocquidopenquioda nedic? 8¿Mitsipadec cun onquete anquiadash onquecuededec nepec? 9Ubitedi nëidtedi yacnouësh chochoquido nebi. Nidaid Padtia caid yacnouësh choquido. Utsibic Media yacnouësh choquido. Utsibic Edan yacnouësh choquido. Utsibic Mesopotamia yacnouësh choquido. Utsibic nidaid cuëshë Udea yacnouësh choquido. Utsibic nidaid cuëshë Capadosia yacnouësh choquido. Utsibic nidaid cuëshë Ponto yacnouësh choquido. Utsibic nidaid cuëshë Asia yacnouësh choquido. 10Utsibic nidaid cuëshë Pidiquia yacnouësh choquido. Utsibic nidaid cuëshë Pampidia yacnouësh choquido. Utsibic Equipito yacnouësh choquido. Utsibic shubu dadpen icquid Sidene anoentsëcquid nidaid Dibia caid yacnouësh choquido. Utsibic shubu dadpen icquid Doma caid yacnouësh choquido. 11Utsibic acte nënantan nidaid nacnëdquid Quedeta caid yacnouësh choquido. Utsibic Adabia caid yacnouësh choquido. Adec chochoquido dadpen isadaidbombo icnubi utsibo isadaidbopadquio icnuequido Edusaden caid yacno isadaidbon tsusedpabon chiampicpaden nanuec chochobuedo ubitedi nebi. Adec chochoshon cun onquetenquio Nuquin Papan natiambocquin naid chuibansho tantiembi. 12Adash tantiadempambo yec tabadec ¿Mitsi paden tantiequien adec onquepec? quepanëdash Edusaden yacno chochoaido.
13Adnubien utsi utsien icsambuen chuishunec: ¿Bëdambuen tantiec onquepequida nepec? Acte paë uaid acash tantienquio yec nepanui, quecuededpanëdash.
Iccuededquido Petedon chuibanaid
14Adec chochoquido onquesho tantiashun Esusën: Ubi chuibenneta, caidobëd nidtoshon Petedon naden chochobuedo cumapenec onquequin chuipanëdash: Isadaidbobëta Edusaden yacnocquido, mimbi tantienquio yaid chuinu. Bëdambuen tantiata. 15Uëshë abuctoec 9 icnuc nuquin matsesën acte paë uaid aquenquio icquid. Mibitedishun tantiacpaden tantiadennuen aid acambo iccombi. 16Utsin utsinquiec onquete utsin utsinquiec onquesho mimbi tantiaid Nuquin Papan ëndenquimboshë chiampicpadec onquec nebi. Tsusedpa Nuquin Papan oncamiaid Oedën naden chuiquin dada uapampic:
17Iuecshun umbi tantiacpadënquiobi
Cun Mayan matses utsi utsien menendambi, quec Nuquin Papa.
Adoac aidon madobobëtan aidon champibontsen
umbi iuecshun nate chuibanendac.
Adembidi caniabontsen ushquin isacbimbuen umbi ismiac isendac.
Adembidi ismiac tsësiobon ushquin isendac.
18Adembidi Cun Mayan meniac umbi chuiquin namiaidon dadabëtan chidon
umbi iuecquio icshun nanun chiaidquiobidi chuibanuaindac.
19Adnubi abucuësh uinsadpambo ictequid icnubi
nidaidënshun istequid intac yec
nëdënquequid yec nidaidën abembi pushudquid yec
quenuc adquidtedi mibi ismendambi.
20Adquid icnubi badiadën uëshë chënquebuedi
inchëshquio yanendac.
Inchëshën uëshë piupiupambo
yec intacbimbuecsho mimbi isbededendac.
Umbi ismiaidtedi icambic Nuquin Papan uëshë bëdamboshëcquid chomendac.
21Adnubimbi: Cun Icbombo Esus nec, ubi caquidquio ëbëd tabadmendambi,
quequin Nuquin Papan chuimiacpaden Oedën dada uapampic.#2.17-21 Oed 2.28-32 tantiaquin nëidtedi dada uapanëdash.
22Adembidi Nuquin Papan Chomiaid chuinu. Tantiata, isadaidbo. Nasaded caid yacnouësh caniquid Esus Nuquin Papan Chomiaid icquin nadatiambocquin nabanquin dadpen ismebansho mimbi isondac. 23Aidi Nuquin Papan ëndenquimboshë tantiampicpaden bedmeshun mëyanmequin: Uënës uata, cac Nuquin Papa tantiesabo matses icsambocquidën cueste napotiaidën dectanquin uënës uapondash. 24Aden mimbi aton dada paëmbo icmequin uënës uacshobien Nuquin Papan: Matsesën nibëdquiecnuc uënësmetiapimbo iquec, queshun Esus uincuenmepaccondash. 25Adembidi ëndenquimboshë chuiquid tapa Dabidën Esus chuiquin naden dada uapampic:
Ënëdenquio yec mibi ubëd iquec, Icbo.
Aden ubi dayun uaquid icquin
cudasënac utsibon ubi chieshtometiapimbo iquec.
26Ubi adoquid nec, quiash bëdambo yec
cuishonquec cuëdënebi.
Ubi dayun uaquin ubi bëdambuen namec, quequin tantiec
natiec tabadenquio iquebi.
27Ënenquio icquin umbi chiacpadombuen naquidquio nec,
queshun mimbi ubi uënës uacsho
cun dada chodcamenquio icquin ubi uincuenmendac.
28Nadec bëdambuec tabadtsiash, quequin
mimbi ubi bëdambuen tantiamec.
Mibëd iquec bëdambo yec cuishonquec tabadebi,#2.25-28 Dabid Cuëd. 16.8-11 tantiaquin nëid dada uapampic.
quequin Dabidën dada uapampic.
29Tantia, cun utsibo, mibi cuembo chuinu. Tsusedpa Dabid uënësacsho chococampid abi nëbi shëcuë nacnenaidquio iquec. 30Dabidën Nuquin Papan oncamiaidquio icquin dada uaquin: Naden Nuquin Papan chiondashi. Mibi uënësan min tsiuecquid chuiquid tapabidi iquendac, quequin Nuquin Papan Chiaid abimbo iquec, quequin tantiaquiopampic Dabidën.#2.30 Chotaquën onqueten dada uaid isbanta Cuëd. 132.11-12 tantiaquin nëid dada uapanëdash. 31Aden Nuquin Papan nanun chiaid tantiaquin Esus uincuente isacbimbuen dada uaquin: Nuquin Papan Chomiaid Quidistu uënësacsho chococaqui aton nami chodquenquio yec uincuenendac, quequin Dabidën chuipampic.#2.31 Cuëd. 16.10 tantiaquin nëid dada uapanëdash. Aid ista. 32Aden Dabidën chiampicpadembi Nuquin Papan Esus uincuenmepanëdash. Aid uincuenmiacsho isondaido icquin ubitedishun mibitedi chuibanec nebi. 33Aidi uincuenash nidacsho Nuquin Papan aton dayun abiucquio tsadtomepanëdash. Ambo nidacsho Nuquin Papan Aton Mayan Bëda menepanëdash. Adoac ambi chiannebocpadombuen Esusën aton Mayan Bëda ubitedi menebanac onquete utsin utsinquiec onquesho nëbi mibitedishun tantiec. 34Dabid abuc nidambo icpampic. Nidambobi Nuquin Papan tantiamiac naden chuipampic:
Icbo Dapan Cun Icbo naden chiendac:
Cun abiuc abitedishun Icbombo icnuec nëmbo tsadec cho.
35Mibi chieshënquidobi dëniacmeshun Cun Icbo mibi camenu, quequin Nuquin Papan Cun Icbo chiendac,
quequin Dabidën chuipampic.#2.34-35 Chotaquën onqueten dada uaid iqueque. Nëid isbanta. Cuëd. 110.1bëta Cuëd. 118.16 isbanta.
36Tantia. Cun matses isadaidbo. Dabidën chiampid Esus mibitedishun cueste napotiaidën dectanquin uënës uaid Nuquin Papan Chomiaid Mesias caid yec Nuquin Papan icmiacpadec abitedishun Icbombo nec, quequin abimbo chiec nebique. Esus tantiata, quepanëdash Petedo.
37Aden Petedon chuisho tantiash iccuededquido ambi icsambuen naid tantiec uënësquio yec: Esus tantianu, quequin ¿atotsimbi nape? quepanëdash Petedobëta Esusën: Ubi chuibenneta, caido utsibo chiec.
38Adoaquien Petedon: Mimbi icsambuen naid ënshun: Esus cun Icbombo nec, quequin abimbo tantiaquin acten mentometa: Ma umbi icsambuen naid tantienquio yec Nuquin Papa bëshunnu, queshun. Adoacsho aton Mayan Bëda mibi menendac. 39Adembidi abi tantiasho issun mibitedibëta min bacuëbo menendac. Adembidi nidaidtedi yacnocquid Nuquin Icbo Nuquin Papa bunacpaden Esus tantiasho issun aton Mayan Bëdambocquid meneuaindac ambi chiampicpaden, quepanëdash Petedo.#2.39 Aden Isayasën chuiquin dada uapampic. Chotaquën onqueten dada uaid iqueque. Aid isbanta. Isa. 57.19 ista.
40Aden iuen bëdambuen chuibanequi: Nuquin matses isadaidbo Esus tantiesabo icnubi mimbi icsambuen naid ënash Esus tantiaquidquio icta, quequin chuibudquin Petedon ëmpanëdash.
41Aden chuisho tantiash: Abimbo caic, quequin tantiaquido utsi utsiec yampanëdash. Aid uëshëmbi dadpenquioshë 3midted Esus tantiaquido yampanëdash. Adquid yansho issun acten mentobampanëdash. Adoac Esus tantiaquido utsibobëd iccuededpanëdash.
Esus tantiaquido iccuededaid
42Aden Esus tantiabenshun Esusën: Ubi chuibenneta, caidon Esus chuibansho tantiec abëd icquido menenanec tabadquimbi Esus uënësaid tantiaquin actequid acshun pan cuëshë pebededtednepanëdash. Adembidi Nuquin Papa chiannepanëdash. 43Adec tabadcuededquimbi Esusën: Ubi chuibenneta, caidon nadatiambocquin nabampanëdash. Adosho isash abitedi tantiadempambo yec tabadpanëdash. 44Adnubien Nuquin Papan Esus tantiamiaidotedi atona cudasenquio yec menenanec bëdambuec tabadcuededpanëdash. 45Shububëta atona utsi menequin piucquid bedshun utsina nibëdsho issun menepanëdash. 46Adecbidi badiadquidën badiadquidënquiec Nuquin Papa tabadte shubu dapa yacno nidash iccuededpanëdash. Adecbidi shubu utsi utsiec yacno nidash iccuededquin Esus uënës uaid tantiaquin pan cuëshcuëshshun pebededpanëdash. Adecbidi bundoshon pete pec cuishonquecuededuapanëdash. 47Adec tabadquin Nuquin Papan naid chiec cuëdëncuededpanëdash. Adec tabadsho isash: Bëdambocquido nec, quec Nuquin Papan tantiacpadec badiadquidën badiadquidënquiec utsibotsen Esus tantiash abëd tabadtequid yanash aid tantiaquid utsibobëd dadpen iccuededpanëdash.
Currently Selected:
Hechos 2: mcfNT
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.