2 Timoteo 3
3
Le'ec biqui'iloo' u na'at a cristiano tu q'uinil u jobeeb a yoc'olcaba.
1Pues te'i. Timoteo, in c'ati ca' a weelte ada'a. Le'ec ti nütz'ünac u jobol a yoc'olcaba, yantal u ca'a a top yaja.#Gn 49:1; Is 2:2; Jer 48:47; Jud 18 2Le'ecoo' a cristiano ti a q'uin abe'e, chen u bajil a yaj u yuboo'o. Top jac'oo' ti'i a taq'uini. Walacoo' u tz'eec u bajil jabix jadi' ala'oo' a top pataloo'o, wa jabix jadi' ala'oo' a top yanoo' u na'ata. Walacoo' u maclant'an. Ma' ta'achoo' u tz'ocsic u na' u tat. Ma' ta'achoo' u yadic ma'ax bo'tic. Ma' yanoo' u Dios.#Ro 1:30 3C'asoo' u püsüc'al. Ma' ta'achoo' u ch'a'ic u yotzilil a maca. Aj lic'saj tusoo'. Yan ma' yan a c'as a walacoo' u betic ti'i ix ch'upu. Top tz'iicoo'. Walacoo' u motzintic a qui'oo' u na'ata. 4Walacoo' u beel u tzolo' u yet'oc ti'ijoo' u yettz'iiquil. Ma' yanoo' u saaquil. Top yan u na'at tu yubicoo' u bajil. Jadi' a fiesta a c'ocha'anoo' tu wichi. A Dioso, ma' c'ocha'anoo' tu wich. 5Walacoo' u betic jabix top c'ocha'anoo' tu wich a Dioso, pero chen pachoo' u yool. Le'ecoo' a cristiano jabix abe'e, ma' beeloo' tu yaam.#Is 29:13; Ez 33:30-32; 1 Ti 5:8 6Tu yaamoo' abe'e, yanoo' a maca, ich mucul walacoo' u yocol ichil u yotoch a mac u tusu' ix ch'up a ma' yan u tuculu. Ix ch'up jabix abe'e, yaab u sip'il. Qui' tu wich a ca'ax c'u'ac ti c'asili.#Mt 23:14 7Ix ch'up jabix abe'e, walac u tz'ocsic a ca'ax macaca, pero ma' yan q'uin u cünic a jaja.#1 Ti 2:4 8Aj Janes y aj Jambrese, u yaaltajoo' cuchi u wet'e' u meyaj aj Moisese. Baalo' ilic a beloo' u cu bete' a cristiano ti a q'uin abe'e. Beloo' cuchi u cu yaalte u wet'e' a jaja. C'asoo' u na'at a winic abe'e. Ma'ax c'u' aj beel a walacoo' u tz'ocsiqui.#Ex 7:11; Ro 1:28 9C'u' betiqui, ma' top yaab a beloo' u cu bete'i, u men bel u ca'a ti chictal ti chen tanoo' u cho' jabix ilic a mani ti'i a ca' tuulu.#Ex 8:18
Boon a yaj u c'ümaj aj Pablojo.
10Pues te'i. Timoteo, a weeltaj c'u' a walac in wadic ti'ijoo' a cristianojo. A weeltaj c'u' a walac in betiqui, c'u' in c'ati in bete' ti cuxa'anene, le'ec biqui ti walac in tz'ocsic a Dioso, le'ec biqui ti walac in muc'yajtic a yaja. A weeltaj biqui ti walac in yacunticoo' in wetcristianojil, biqui ti ma' ta'ach u siq'uil in wool. 11A weeltaj boon a yaj a tz'abi ten u men a cristianojo, y boon a yaj in c'ümaj ti beje. A weeltaj boon a yaj in c'ümaj ichil a caj Antioquiaja, ichil a caj Iconiojo, ichil a caj Listraja. A weeltaj biqui ca' in muc'yajtaj boon a yaj a tz'abi ten te'iji. C'u' betiqui, ichil tulacal a yaj abe'e, a Noochtzili, u sa'altajen.#Hch 13:45; Hch 14:2; Sal 34:19 12Le'ec boon a tanoo' u tz'ocsic a Jesucristo etel tulacaloo' u yool tu jajili, beloo' u ca'a betabül a yaj ti'ijoo' u men a ma' ta'achoo' u tz'ocsic a Dioso.#Hch 14:22 13Le'ecoo' a c'ac'as cristiano u yet'ocoo' a walacoo' u seeltic ti tz'aj c'asili, c'asoo' u na'at. Tan ti tanoo' u mas c'astal. Aj tusoo' y walacoo' ilic u ca' tusbul u menoo' a cristianojo.
14Pues te'i. Incheche, Timoteo, ma' a p'ütic u jajil u t'an a Dios a cünaja. A weel ilic ti jaj abe'e. A weel mac u ca'ansajech. 15Le'ec ti tz'ubech tojo, a cünaj u t'an a Dioso. Le'ec ilic abe'e, u tz'aj tech ca' a weelte biqui ca' sa'albüquech, le'ec ca' a tz'oques a Jesucristojo.#Sal 119:11; Jn 20:31; Ro 10:17 16Tulacal a c'u' a tz'iiba'an ichil u ju'um a Dioso, laj etel Dios tala'an. Laj yan u c'abeetil. Walac u yadic to'on c'u' a jaja. Walac u tze'ectico'on. Walac u tojquintic ti na'at. Walac u yadic to'on biqui ca' ti benes a cuxtal a tojo.#He 3:7; 2 P 1:20 17Etel tulacal abe'e, le'ec mac a walac u tz'ocsic a Dioso, seeb u yool u bete' tulacal a ba'al a qui'i.#1 Ti 6:11; Tit 1:9; 2 Ti 2:21
Currently Selected:
2 Timoteo 3: mop
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.