Roma 15

Ẽg tỹ ẽg mré ke ag to há nỹtĩnh ke

1Ha vé, tar ẽg nỹtĩ. Hã kỹ tóg ẽg tỹ ũn krój nỹtĩ ag to fen nỹtĩnh há tĩ. “Ẽn tóg inh mỹ há nĩ, hã kỹ sóg han sór mũ,” henh ke tũ ẽg tóg nĩ. 2“Mỹ inh régre mỹ há nĩ vỹ?“ he jé ẽg tóg ke mũ. Ti tỹ ti mỹ há tũ nĩn kỹ ẽg han ke tũ nĩ. Ẽg tỹ ti tar han sór vẽ, ẽg tỹ nén han mũ kar tỹ. 3Cristo pijé ti tỹ nén to én mũ ẽn han ja nĩgtĩ'. Hã kỹ tóg ẽg jagfy jagtar ja nĩgtĩ. Kỹ tóg Topẽ mỹ: “ã to ag tóg vĩ kónãn tĩ, ã kato tẽ ag. Hã ra ag vĩ vỹ inh kri kutẽnh ke mũ,” he ja nĩ. Ti mur tũg ki Topẽ vĩ tó tĩ ũ tóg ti vĩ tag rán ja nĩ, hã ra tóg ge nĩ. 4Hã ra Topẽ tóg ẽg kanhrãn sór mũ. Hã kỹ tóg ti vĩ tó tĩ ag mỹ: “ha rán,” he ja nĩgtĩ. Hã kỹ ag tóg ránrán ja nĩgtĩ. Ẽn ve kỹ ẽg tar nỹtĩ, Jesus jykre mĩ mũ to. Kỹ ẽg tỹ prãnh kenh ke tũ nĩ. Kỹ ẽg tóg ẽg tỹ kanhkã tá nén venh ke mũ ẽn kã jatu' henh ke tũ nĩ gé. 5Topẽ vỹ ẽg to fen kỹ nĩ. Ti hã vỹ ãjag tỹ jagnẽ to fen han ke mũ, ti kóm, ãjag tỹ ti mré jykre pir nỹtĩ jé, ãjag tỹ Jesus Cristo ki ge kỹ nỹtĩn kỹ. Ẽg tỹ to vãsãn han ki kanhró tóg nĩ. 6Kỹ ãjag tóg jagnẽ mré ẽg jóg tỹ Topẽ to: “ũn mág vỹ tỹ ti nĩ,” henh ke mũ gé. Vẽnh vĩ pir han jé ãjag tóg ke mũ, ti to, ẽg Senhor tỹ Jesus Cristo to ke gé.

Fóg ag mré kanhgág ag tỹ Topẽ vĩ mẽnh ke

7Hã kỹ jagnẽ to há nỹtĩm nĩ. Cristo tỹ ẽg to há nĩ ri ke nỹtĩm nĩ, jagnẽ to. Kỹ ũ tóg ãjag jykre ve kỹ Topẽ to: “ũn mág vỹ tỹ ti nĩ,” henh ke mũ. 8Tag to jykrén nĩ, ha mẽ. Cristo vỹ Judeu ag ki rĩr jé kãtĩg ja nĩ, ti tỹ Topẽ tỹ vãsỹ ẽg jógjóg ve ag mỹ nén tó ja ẽn han jé. Ẽn ve kỹ ẽg tóg Topẽ tỹ vẽnh vĩ há hã tó tĩ ki kanhrãn mũ. 9Kỹ tóg povo ũ ag jagãgtãn gé. Kỹ ag tóg ti tugrĩn Topẽ mỹ vĩ há han mũ gé sir, fóg ag, kanhgág ag ke gé. Hã kỹ Davi tóg tag rán ja nĩ gé, ha mẽ: “tag tugnĩn sóg ã mỹ vĩ há han ke mũ, fóg ag rĩnve, kanhgág ag rĩnve ke gé. Ag rĩnve sóg ã mỹ jãn ke mũ, ã jiji tó kỹ,” he ja tóg nĩ, Topẽ vĩ tỹ rán kỹ nĩ ki. 10Kỹ tag tóg rán kỹ nĩ gé. “Fóg', kanhgág', mỹ sér nỹtĩm nĩ, Judeu ag mré hã, ti tũ ag mré hã,” he tóg mũ gé, Topẽ vĩ tỹ rán kỹ nĩ ki. 11Kỹ tag tóg rán kỹ nĩ gé. “Fóg', kanhgág', ẽg Senhor mỹ vĩ há han nĩ. Topẽ to vĩ há han kãn nĩ, povo kar',” he ja tóg nĩ gé. 12Kỹ Isaías vỹ Cristo to: “Jessé krẽ'krẽ ũ vỹ tỹ ũn mág jẽnh mũ, Davi panh ẽn krẽ'krẽ ũ. Kỹ tóg tỹ povo kar ag pã'i mág jẽnh mũ. Fóg ag vỹ kanhgág ag mré ti ki ge sór ke mũ,” he ja tóg nĩ. 13Topẽ hã ne ẽg mỹ ven ke mũ', nén ũ há kar, hã kỹ tóg ẽg mỹ tó ja nĩ. Ti hã ki ãjag tóg ge kỹ nỹtĩ. Ti hã vỹ ãjag fe tỹ mrin kenh ke mũ. Ti hã vỹ ãjag krĩ kuprãg ke mũ'. Topẽ kuprĩg vỹ tỹ ãjag jagrẽ nĩ. Kỹ tóg nén kar han há nĩgtĩ. Ti hã vỹ ãjag tar han ke mũ', ãjag tỹ Topẽ tỹ ẽg mỹ nén ũ há ven ke ẽn to tar nỹtĩ jé, ãjag tỹ tag hã mĩ ẽkrén jé.

Paulo rãnhrãj

14Inh kanhkã', vẽjykre há han kỹ ãjag tóg nỹtĩ. Isỹ ãjag mỹ tó tũg ki ãjag tóg ki kanhrãn ja nĩ. Vég isóg nĩ nĩ. Hã kỹ ãjag tóg jagnẽ jyvẽn ki kanhró nỹtĩ gé. 15Inh vẽnh rá tag ki sóg ãjag mỹ nén ũ tỹ hẽn ri ke kãmén, ti tỹ inh mỹ sér tĩn kỹ, sỹ ãjag vég tũ ra. Ãjag mỹ sóg kãmén há han, ãjag tỹ kã jatu tũ nĩ jé, ãjag tỹ mẽg mũ tag kã. Topẽ ne tag to inh jẽnẽ'. Tag to tóg isar han'. 16Inh jé tóg prẽr, isỹ povo kar mỹ Jesus Cristo kãmén jé. Kỹ sóg ti tũ ki rĩr jẽ nĩ. Topẽ vĩ sér tó sóg tĩ, fóg ag mỹ, kanhgág ag mỹ ke gé. Ag tỹ ti ki ge kỹ tóg ti mỹ sér tĩ, Topẽ kuprĩg tỹ ag tỹ ũn há han kỹ, ag tỹ tỹ Topẽ tũ nỹtĩn kỹ. Inh rãnhrãj hã vẽ.

17Tỹ sóg Jesus Cristo rãnhrãj han tĩ nĩ, Topẽ tỹ isar han kỹ. Kỹ inh rãnhrãj tóg inh mỹ sér tĩ. 18Kỹ sóg ãjag mỹ Cristo tỹ inh mỹ vẽnh rãnhrãj nĩm ja hã tỹ vẽmén sór mũ. Fóg ag mré kanhgág ag tỹ ti ki ge jé tóg isar han tĩ, isỹ ti vĩ tó tag to. Inh vĩ mẽ kỹ ag tóg ti ki ge sór mũ, ag tỹ inh jykre ve kỹ ke gé. Jesus Cristo tỹ nén han mũn hã vẽ. 19Nén ve vãnh han sóg tĩ gé, Topẽ tỹ isar han kỹ. Ti kuprĩg tỹ inh krĩn kỹ sóg han tĩ. Kỹ sóg vẽnh kar mỹ ti vĩ tó ja nĩgtĩ, Jerusalém tá. Tá kãkutẽ kỹ sóg ga kar mĩ tĩg ja nĩgtĩ gé, ga tỹ Ilíria mĩ hã. Vẽnh kar mỹ sóg Cristo kãme sér tó ja nĩgtĩ. 20Ũ tỹ tá jun tũ ra sóg tá jun vén ja nĩgtĩ, sỹ tá ti vĩ tó vén jé, ag tỹ vãhã Cristo kãme mẽ jé. Inh hã ne ag mỹ tó vén sór ja nĩgtĩ', isỹ ũ rãnhrãj ja ki rãnhrãj tũ nĩ jé. 21Hã kỹ tag tóg rán kỹ nĩ, ha mẽ: “ũ tỹ ti vĩ mẽ ja tũ ẽn ag vỹ mẽnh ke mũ,” he ja tóg nĩ, Topẽ vĩ rá ki. Sỹ ti vĩ tag hã ki króm sór vẽ.

Paulo tỹ Roma ra tĩg sór

22Hã kỹ sóg ãjag tá jun ja tũ nĩ ver, sỹ ãjag venh há hã ra. 23Tag ki sóg inh rãnhrãj han kãn huri. Vãsỹ sóg to jykrén, sỹ ãjag venh tĩg jé. 24Kỹ tóg hẽn ri ke mũn inh mỹ ki króm kenh mũ ha. Sỹ ga tỹ Espanha ra tĩg sór vẽ. Ra tĩg kỹ sóg ãjag venh rãnh mũ. Kỹ tóg há tĩnh mũ, ãjag tỹ inh jagãgtãn kỹ. Kỹ sóg tĩg há han ke mũ, Espanha ra. Hã ra sóg ãjag mré nĩ sĩ han sór mũ, ãjag tỹ isar han jé.

25Hã ra sóg ver Jerusalém ra tĩg sór mũ. Sỹ tá Topẽ tũ ag mỹ jãnkamy ma tĩg ke vẽ. 26Ga tỹ Macedônia tá Jesus mré ke ag vỹ inh mỹ jãnkamy vin, ga tỹ Grécia tá ke ag ke gé, isỹ Jerusalém tá ẽg mré ke tỹ jagtar nỹtĩ ẽn ag mỹ nĩm jé. 27Ag kar mỹ tóg sér tĩ, ag tỹ Jerusalém tá ke ag mré jãnkamy tỹ vẽnh kãpãm kỹ. Hã ra tóg inh mỹ há tĩ gé. Jerusalém tá ke ag vỹ Jesus ki ge vén, Judeu ag. Kỹ fóg ag vỹ ag tugrĩn Jesus kãme mẽ ja nĩgtĩ. Hã kỹ ag tóg Judeu ag tũ mãn ja nĩ, hã vỹ: Topẽ vĩ, he mũ. Kỹ tag tóg há nĩ, ag tỹ vẽnh kaja jé ag tũ tỹ vẽnh kãpãm kỹ, ag jãnkamy ti.

28Isỹ tag han kãn kỹ, sỹ ag mỹ jãnkamy tag vin kar kỹ sóg ẽmã tỹ Roma tá nĩ sĩ han kar kỹ ga tỹ Espanha ra tĩg sór mũ ha. 29Ha mẽ, isỹ ãjag ki jun kỹ Cristo vĩ vỹ ãjag mỹ sér tĩnh mũ, ẽg tỹ jagnẽ mré ti to vẽmén kỹ, isỹ ãjag mỹ ti vĩ tón kỹ, ha vem nĩ. Ti vĩ sér to tóg ẽg mỹ sér tĩnh mũ.

30Inh kanhkã', ẽg Senhor tỹ Jesus Cristo ki ge kỹ ãjag tóg nỹtĩ. Kỹ ãjag tóg jagnẽ to há nỹtĩ gé, Topẽ kuprĩg tugrĩn. Kỹ sóg ãjag mỹ tag to vĩ sór mũ gé, ha mẽ. Iso Topẽ mré vĩm nĩ, inh mré. To krónh ke tũg nĩ. 31Judéia tá ag e nỹtĩ, ũ tỹ Jesus kato tẽ mũ ag. Kỹ ag tóg inh kato tẽ sór mũ gé. Kỹ iso Topẽ mré vĩm nĩ, ti tỹ inh jy nĩgãn jé. Ũ tỹ Jerusalém tá Jesus ki ge kỹ nỹtĩ ag tỹ inh mỹ vĩ há han jé, sỹ jãnkamy ẽn tỹ ag mỹ nĩm kỹ. 32Tá kãtĩg kỹ sóg ãjag ki jun há han ke mũ. Kỹ tóg ẽg kar mỹ sér tĩnh mũ, sỹ ãjag mré nĩn kỹ, isĩg ke tag tỹ Topẽ mỹ há nĩn kỹ. Kỹ ãjag tóg isar han ke mũ sir.

33Topẽ vỹ ẽg krĩ kuprãg tĩ. Kỹ sóg ti mỹ to vĩ tĩ, ti tỹ ãjag krĩ kãnhvy han jé. Hã vẽ.

Currently Selected:

Roma 15: kgp

Highlight

Copy