Marcos 7

Judeu ag si ag jykre ti

(Mt 15.1-9)

1Kejẽn Fariseu ag tóg Jesus to vẽnhmãn mũ, Topẽ vĩ to ẽg kanhrãn tĩ ag mré. Jerusalém tá ag kãmũ ja nĩ. 2Hã ra ag tóg ti mré mũ tĩ ũ ag tỹ nĩgpég mẽ kã jẽn vég mũ, hã kỹ tóg ag tỹ ag jẽgry tĩ. 3Fariseu ag tóg nĩgpe kar kỹ tỹ jẽg tĩ, ag tỹ Judeu ag si ag jykre han kỹ. 4Ag tỹ negocio tá kãmũ kỹ ag tóg vẽso tỹ kó'kó' he tĩ, goj tỹ. Vẽso tỹ kó he kar hã ag tóg jẽg tĩ. Vẽjykre si tỹ hẽn ri ke han ag tóg tĩ. Caneca mré kukrũ to ag tỹ kó he tĩ, lata to ke gé, nén kar to.

5Kỹ Fariseu ag tóg Jesus mỹ: “ã mré mũ tĩ ag tỹ hẽ ri ken kỹ ẽg si ag jykre han tũ nĩ nẽ? Ag tỹ ne jé ag nĩgé to tỹ kó he tũ ra jẽn nẽ?“ he mũ. 6Hã ra tóg ag mỹ: “Isaías vỹ ãjag to vĩ ja nĩgtĩ, vãsỹ, kỹ tóg rán kỹ nĩ,” he mũ. “Ti vĩn hã vẽ, ha mẽ: “povo tag vỹ ag nũnẽ hã tỹ inh mỹ vĩ há han tĩ, hã ra ag jykre pijé tỹ inh jykre nỹ'. 7Fagrĩnh mỹ ag tóg iso grĩnh ke tĩ, hã ra ag tóg ẽprã ke ag jykre to: Topẽ tỹ tón hã vẽ, he tĩ,” he ja tóg nĩgtĩ, Isaías ti,” he tóg, Jesus ti. “Hã ra tóg ãjag to ki hã tó ja nĩ, ãjag jykre régre nỹtĩn kỹ. 8Topẽ vĩ tovãnh ãjag tóg mũ. Hã ra ãjag tóg ẽprã ke jykre hã han tĩ,” he tóg.

9“Ãjag hã vỹ Topẽ vĩ mranh tĩ', ãjag tỹ ãjag jykre si han kỹ,” he tóg. “Hã ra tóg ãjag mỹ há nỹ. 10Moisés tỹ ãjag mỹ Topẽ vĩ tó kỹ tóg ãjag mỹ: “ã mỹnh fi mré ã panh kamẽg nĩ, fag jagãgtãn nĩ,” he ja nĩgtĩ. “Ũ tỹ ti han mũ fag mỹ vĩ kónãn mũ ẽn tén jé ã tóg ke mũ,” he ja tóg nĩgtĩ. 11-12Moisés jãvo ãjag tóg: “ã tỹ ã han mũ fag jagãgtãn sór tũ nĩn kỹ fag mỹ ón kỹ: “Topẽ tũ vẽ, isỹ nén ti,” hem nĩ,” he tĩ. Gen kỹ tóg fag jagãgtãn tũ nĩ. Ti tỹ fag to é he vẽ. Ãjag jykre kórég hã vẽ,” he tóg. 13Kỹ tóg ag mỹ: “Topẽ vĩ mranh ãjag tóg tĩ, ti jẽgja ki ãjag tóg ẽprã ke ag jykre hã ki króm sór tĩ. Ge tỹ hẽn ri ke han ãjag tóg tĩ, ón kỹ,” he mũ.

Nén tỹ ẽg kavénh mũ

(Mt 15.10-20)

14Kỹ tóg vẽnh kar jé prẽr mãn kỹ ag mỹ: “inh vĩ jẽmẽ ra,” he mũ. 15“Vẽjẽn pijé ẽg kavénh tĩ'. Nén tỹ ẽg ki kãpa mũ hã vỹ ẽg kavénh tĩ. Ẽg tỹ nén ũ vẽnh mỹ han mũ hã vỹ ẽg kavénh tĩ. 16Ũ nĩgrẽg nỹtĩ tỹ tỹ jẽmẽ jé,” he tóg.

17Ti tỹ ti pir mỹ ĩn kã ra rã kỹ ti mré mũ tĩ ag tóg ti mỹ: “ẽg mỹ kãmén há han nĩ, ã vĩ tag,” he mũ.

18Kỹ tóg ag mỹ: “kỹ ãjag mỹ ver ki kanhrãn tũ'?“ he mũ. “Ẽg jẽn tỹ ẽg jẽnky kã ra rã kỹ tóg ẽg kavénh tũ nĩgtĩ mỹr. 19Ẽg nug kã ra tóg rã mũ, kar ẽg tóg fón tĩ. Hã kỹ tóg tỹ nén ũ tũ nĩ,” he tóg. Hã kỹ Jesus tóg vẽjẽn kar to: “há ti nĩ,” he mũ.

20Kỹ tóg: “nén tỹ ẽg ki kãpa hã vỹ ẽg kavénh tĩ,” he mũ, 21“hã vỹ: jykrén kónãn, ũn mén tũ fag to én, nén ũ péju, ũ tén, ti prũ tũ fi mré nỹ, fi mén tũ mré nỹ, 22nén kar to én, vẽjykre pãno han, ti tỹ nén ũ nenh mẽ, ũ kato vĩ kónãn, vẽnh mỹ inh ag kãfór kar nĩ, he tĩ, krĩ tũ, he mũ. 23Nén kar kórég ẽn tóg ẽg ki kãpa tĩ, hã kỹ tóg ẽg kavénh tĩ,” he tóg.

Jesus tỹ tytãg sĩ fi jagrẽ kórég kutẽm

(Mt 15.21-28)

24Kỹ tóg tá kãkutẽ mũ sir, ẽmã tỹ Tiro ra tĩg jé, ẽmã tỹ Sidom ra ke gé. Tá tóg ĩn ũ krẽm rã mũ, kỹ tóg: “ker ũ inh nĩgja ki kanhrãn hẽ',” he mũ. Ge ra ag tóg ki kanhrãn mũ.

25Kỹ vẽsỹmér fóg ũ fi tóg kãtĩ mũ. Fi kósin fi vỹ jagrẽ kórég nĩ. Kỹ fi tóg ti krẽm mũg ke mũ, ti tỹ fi mỹ fi kósin fi jagrẽ kórég ẽn kutẽm jé. 26Hã ra fi tóg Grego vĩ hã tó tĩ. Ga tỹ Siro-Fenícia tá ke fi vẽ. Ti mỹ fi tóg to vĩ mãn', to vĩ mãn' he mũ.

27Vãhã tóg fi mỹ: “ẽg jẽn vỹ tỹ ẽg krẽ tỹ ko jafã nĩ,” he mũ. “Vẽnh mỹ ti nĩ, ẽg tỹ ẽg krẽ jamĩ tỹ kasor mỹ fón kỹ,” he tóg.

28Hã ra fi tóg: “hỹ,” he mũ. “Hã ra kasor sĩ tóg ẽg krẽ jamĩ mru vár ẽn ko tĩ,” he fi tóg. 29Kỹ tóg: “tó há han ã tóg. Ha tĩg, fi jagrẽ kórég tóg hur kutẽ, ã kósin fi ki,” he mũ.

30Kỹ fi tóg fi ĩn ra tĩ mũ sir. Fi tỹ tá jun mũ ra fi kósin fi tóg nỹ nĩ, kỹmỹ kri, hã ra fi jagrẽ kórég ẽn vỹ kutẽ ja nĩ.

Jesus tỹ ũn vĩ vãnh vĩn

31Kỹ Jesus tóg ẽmã tỹ Tiro ki ga ki kutẽ mũ. Kỹ tóg ẽmã tỹ Sidom mĩ tĩ mũ gé sir. Ẽmã tỹ 10 (ke) fĩn rãm kỹ tóg ga tỹ Galiléia ki goj nig mág tá jun mũ sir. 32Kỹ ag tóg ti to ũn kutu pére kãmũ mũ, ũn vĩ kar vãnh. Kỹ ag tóg ti mỹ: “ã nĩgé tỹ ti mẽ,” he mũ. 33Hã ra tóg ti pére tĩ mũ, ti pin kỹ. Kỹ tóg ti nĩgé juféj tỹ ti nĩgrẽg nor nĩgfénh mũ. Kỹ tóg ti nũnẽ to sug mũ sir. 34Kỹ tóg kanhkã ki ẽvãnh kỹ ỹnh' ỹnh' ke mũ sir. Kỹ tóg ti mỹ: “efatá,” he mũ. Ẽg vĩ ki ke hã vỹ: “ti nĩgrẽg jé nor' hé,” he mũ. 35Kỹ ti nĩgrẽg tóg nor' he mũ sir. Ti nũnẽ tóg kavar mũ sir. Vĩ tóg mũ sir. Há' he tóg mũ sir vẽsỹmér. 36Kỹ tóg ag tỹ tó kamẽg mũ, hã ra ag tóg tugtó kãn mũ, ti tỹ: “ker tó hẽ', ker tó hẽ',” he mũ ra. 37Kỹ ag fe tóg hẽn ri ke mũ. “Ti tỹ nén han mũ vỹ tóg há tãvĩ nĩ,” he ag tóg. “Ũn kutu ag ẽmẽ han tóg, ũn vĩ vãnh ag vĩ han tóg mũ gé,” he ag tóg.

Currently Selected:

Marcos 7: kgp

Highlight

Copy