Mateus 4
4
Japo tỹ Jesus krĩn kónãn sór
(Mc 1.12-13; Lc 4.1-13)
1Kỹ Topẽ kuprĩg vỹ Jesus mỹ: “ẽmã tũ ja ra tĩg,” he mũ. Kỹ tóg tĩ mũ. Ti tỹ ẽmã tũ ja tá nĩn kỹ Japo vỹ, ti tỹ ti jóg vĩ mranh han sór mũ, hã ra tóg ke jãvãnh nĩ. 2Kurã tỹ 40 han tóg, ẽmã tũ ja tá nĩ ki. Kỹ tóg jẽg tũ nĩ, kurã tỹ 40 ẽn ki, kuty mré hã. Kỹ tóg, vãhã kókĩr mũ sir, vẽjẽn tũ tĩn kỹ. 3Kỹ Japo tóg, ti to kãtĩ mũ sir, ũ tỹ ẽg tỹ Topẽ vĩ mranh han sór tĩ ẽn ti. Kỹ tóg ti mỹ: “Topẽ kósin vỹ tỹ ã nĩ,” he mũ. “Hã kỹ pó tag tỹ ẽmĩ han, ã tỹ ko jé,” he tóg ti mỹ. 4Kỹ tóg ti mỹ: “hã ra tag tóg rán kỹ nĩ, ha mẽ,” he mũ. “Ẽg pijé ẽmĩ tãvĩ jamẽn kỹ rĩnrĩr mũgtĩ'. Topẽ vĩ hã jamẽn kỹ ẽg tóg rĩnrĩr mũgtĩ, he tóg, Topẽ vĩ tỹ rán kỹ nĩ ki. Kỹ tóg isỹ ti vĩ mranh jãvãnh tĩ, ẽmĩ to,” he tóg.
5Kỹ Japo vỹ ti pére tĩ mũ, ẽmã mág tỹ Jerusalém ẽn ra. Kỹ ag tóg tá Topẽ ĩn kri nỹtĩ nĩ. Hã ra tóg tá kãgnó nĩ, Topẽ ĩn mã tá. 6Kỹ tóg ti mỹ: “ã hã ne tóg tỹ Topẽ kósin nĩ',” he mũ. “Kỹ kema ki hũm,” he tóg. “Topẽ vĩ ki tag tóg rán kỹ nĩ, hã vỹ: “ti tỹ jẽgnẽ jafã ag mỹ tóg tónh mũ, kỹ ag tóg ã jy nĩgãn ke mũ,” he mũ. “Kỹ ã tóg rỹj ke tũ nĩ. Ã pẽn vỹ rỹj ke tũ nĩ,” he tóg. 7Kỹ tóg ti mỹ: “hỹ. Kỹ tag vỹ rán kỹ nĩ gé, ha mẽ,” he mũ. “Topẽ mỹ: “ã mỹ ã tỹ nén tó ja ẽn han mũ vỹ?” he tũg nĩ, ti to é he tũg nĩ,” he tóg mũ gé. Hã kỹ sóg ti tỹ inh mỹ nén to: “han ra,” he mũ ẽn hã han tĩ, hã kỹ sóg hũm ke tũ nĩ,” he tóg.
8Kỹ Japo tóg, ti mré tĩg mãn mũ. Pãnónh téj ra ag tóg mũ mũ sir. Kỹ tóg, ti mỹ ga kar ven kãn mũ, ga kri mũ kar ag ke gé. Ti sĩnvĩ kar ẽn ven kãn tóg ti mỹ. 9Kỹ tóg ti mỹ: “isũ vẽ, tag kar ti,” he mũ. “Hã ra sóg, ã mỹ tovãnh kãn sór mũ, ã tỹ ã jakrĩ tỹ grĩnh ken kỹ, inh krẽm, inh mỹ: Topẽ vỹ tỹ ã nĩ, he jé,” he tóg. 10Kỹ tóg ti mỹ: “ha tĩg, Satanás,” he mũ. “Ẽg pã'i tỹ Topẽ hã krẽm ẽg tóg ẽg jakrĩ tỹ grĩnh ke tĩ, ti hã to ẽg tóg: “Topẽ vẽ,” he tĩ, hã kỹ tóg rán kỹ nĩ, Topẽ vĩ tỹ rán kỹ nĩ ki,” he tóg.
11Kỹ Japo vỹ tóg tĩ mũ sir, ti tovãnh kỹ. Kỹ Topẽ tỹ jẽgnẽ jafã ag tóg ti tá junjun mũ sir, Jesus ki rĩr jé. Ti jóg vĩ mranh ja tũ tóg nĩ.
Jesus tỹ Galiléia tá Topẽ vĩ tó
(Mc 1.14-15; Lc 4.14-15)
12Kejẽn ag tóg João ség mũ sir, kỹ Jesus tóg mẽg mũ. Kỹ tóg ga tỹ Galiléia ra vỹn ke mãn mũ. 13Ẽmã tỹ Nazaré tá kãkutẽ kỹ tóg, ẽmã tỹ Cafarnaum ra tĩ mũ, tá nĩ jé, goj nig mág ẽn tá, Zebulom ag jamã tá, Naftali ag jamã tá. 14Hã ra tag tóg rán kỹ nĩ gé. Vãsỹ Topẽ vĩ tó tĩ tỹ Isaías tóg: 15“Zebulom ag jamã tá ti nĩnh mũ, Naftali ag jamã tá, goj nig mág tá, goj tỹ Jordão mã tá. Fóg ag jamã tá ti nĩnh mũ, Israel tũ ag jamã tá, ũ tỹ Topẽ ki kagtĩg ag jamã tá, goj nig mág tỹ Galiléia fyr ki. 16Tá ag tóg Topẽ ki kagtĩg nỹtĩ, hã kỹ tóg tá ag kri kuty ri ke nĩ. Ti tỹ tá jun kỹ tóg ag kri kurã ẽn ri ke nĩ. Ag kãgter ke vẽ vẽ, hã ra tóg ag kanhrãn mũ, ag krenkren jé,” he tóg, Topẽ vĩ rán ki. 17Ga ẽn tá nĩ kỹ tóg, ag mỹ Topẽ vĩ tó mũ, kỹ tóg ag mỹ: “ãjag jykre pãno tovãnh ra,” he mũ, “ãjag tỹ ũri ũ tỹ kanhkã tá nĩ ẽn tỹ tỹ ẽg pã'i nĩ ve jé,” he tóg, Jesus ti.
Jesus tỹ ti mré mũ tĩ ag jé prẽr
(Mc 1.16-20; Lc 5.1-11)
18Kỹ tóg kejẽn, goj nig mág tỹ Galiléia ẽn fyr jagma tĩ mũ. Kỹ tóg tá ũn régre ag vég mũ, hã vỹ: Simão Pedro mré ti jãvy tỹ André, he mũ. Kur tỹ pirã kugmĩ jafã tỹ ag tóg, goj kã ki fón mũ. Ag rãnhrãj hã vẽ. 19Kỹ Jesus tóg ag mỹ: “inh mré kãmũjẽg,” he mũ. “Pirã kugmĩ há ãjag nỹtĩ. Ãjag kanhrãn jé sóg ke mũ, ãjag tỹ ẽprã ke ag tỹ inh ki ge han jé,” he tóg. 20Kỹ ag tóg vẽsỹmér ti mré mũ mũ, ag tỹ nén tovãnh kỹ.
21Kỹ ag tóg mũ mũ, goj fyr jagma. Ag mũ sĩ han mũ ra tóg, ũn régre ũ ag ve mãn mũ gé, hã vỹ: Tiago mré ti jãvy tỹ João he mũ. Zebedeu krẽ ag vẽ. Canoa kã ki ag nỹtĩ, kur tỹ pirã kugmĩ jafã ki ag tóg han nỹtĩ nĩ. Ag panh vỹ, ag mré nĩ nĩ. Kỹ Jesus tóg, ag mỹ: “inh mré kãmũjẽg,” he mũ. 22Kỹ ag tóg vẽsỹmér, ag tỹ nén tovãnh kỹ ti to kãmũ mũ, canoa tovãnh kỹ, ag panh ti tovãnh kỹ ke gé. Jesus mré ag tóg mũ mũ.
Jesus tỹ ag tỹ há' he
(Lc 6.17-19)
23Kỹ Jesus tóg, ga tỹ Galiléia kar mĩ tĩ mũ sir, ag mré. Judeu ag vẽnh kanhrãn jafã krẽm tóg ag kanhrãn mũ. Ag mỹ tóg Topẽ vĩ sér tó mũ, ũ tỹ kanhkã tá nĩ ẽn tỹ tỹ ẽg pã'i nĩ tĩ. Ũn kagyga kar ag hynhan tóg, fag kar ke gé, gĩr kar ke gé. 24Hã kỹ ti kãme tóg vẽnh kar kri rũm mũ sir, ga tỹ Síria tá ke kar kri. Kỹ ag tóg sir ũn kagyga ag tatĩ kãmũ mũ, ti to, vẽnh kaga vẽnh mỹ han mũ ag mré hã, kỹ tóg ag tỹ há' he kãn mũ sir. Vẽjagrẽ kórég ag pan kãn tóg mũ gé. Ũ ter tĩ han tĩ ag tỹ tóg há' he mũ gé, ũn kãnhgrĩn kỹ nỹtĩ ag tỹ ke gé, fag kar tỹ ke gé. 25Hã kỹ ũn tỹ hẽn ri ke ag tóg, ti mré mũ mũ sir. Ũ ag tóg, ga tỹ Galiléia tá kãmũ mũ, kỹ ũ ag tóg, ẽmã tỹ Decápolis tá kãmũ mũ gé, Jerusalém tá ke gé, ga tỹ Judéia tá ke gé, goj tỹ Jordão mã tá ke gé.
Currently Selected:
Mateus 4: kgp
Highlight
Share
Copy
Want to have your highlights saved across all your devices? Sign up or sign in
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido
