Mateus 28

Jesus rĩr mãn

(Mc 16.1-10; Lc 24.1-12; Jo 20.1-10)

1Vẽnhkán ke kurã tỹ semana kurã ve ki Maria Madalena fi tóg, ti kej venh tĩ mũ, kusãg pẽ ki, Maria ũ fi mré. 2Hã ra ga tóg, ragra ke tar han mũ sir. Kỹ Topẽ tỹ jẽnẽ jafã tóg, kanhkã tá kãtére mũ. Kỹ tóg pó tỹ ti kej jãnkã nĩfé ẽn tĩn mũ, kỹ tóg kri nĩ mũ sir, pó ẽn kri. 3Tỹ tóg ta tỹ kóm kóm ke ve nĩ gé, Topẽ tỹ jẽnẽ jafã ẽn ti. Ti kur vỹ kópréj nĩ, kukryr kó ri ke. 4Kỹ porisa ag tóg jũrũn ke mũ, kamẽg kỹ ag tóg kãgter ve nĩ. 5Kỹ Topẽ tỹ jẽnẽ jafã tóg, ũn tỹtá fag mỹ: “kamẽg tũg nĩ,” he mũ. “Jesus kanẽg ãjag tóg mũ, ag tỹ krunh to ũn sãg mũ ẽn ti. 6Ki ti tũ nĩ, rĩr ti huri, hã kỹ tóg ãjag mỹ tó ja nĩgtĩ. Ha kãge jẽg, ãjag tỹ ti nỹgja ve jé. 7Kuri, ha ti mré mũ tĩ ag mỹ tónh mũjẽg, ti rĩr mãn ti. Ha vé, ãjag jo tóg tĩg mũ, Galiléia ra. Tá ãjag tóg ti venh mũ, ha vem nĩ. Inh vĩ kã jatun tũg nĩ,” he tóg, Topẽ tỹ jẽnẽ jafã ti, ũ tỹtá fag mỹ. 8Kỹ fag tóg, ti kej tá kãpa kỹ fũrũrũn mũ mũ sir. Fag mỹ tóg e tĩ. Ge ra tóg fag mỹ sér pẽ tĩ, hã kỹ fag tóg pétẽ mũ sir, fag tỹ Jesus mré mũ tĩ ag mỹ tó jé.

9Fag mũ ra Jesus tóg, fag kato tẽ mũ', kỹ tóg fag mỹ: “mỹ sér nỹtĩm nĩ,” he mũ. Vãhã fag tóg, ti to grẽn ke mũ sir. Ti pẽn kãgmĩg fag tóg mũ, kỹ fag tóg, ti krẽm mũg ke mũ gé. 10Kỹ Jesus tóg fag mỹ: “kamẽg tũg nĩ,” he mũ. “Ha mũjẽg, inh régre ag mỹ tó jé, ag tỹ ga tỹ Galiléia ra mũ jé. Tá ag tóg inh venh ke mũ,” he tóg.

Porisa ag ón

11Fag mũn kỹ porisa tỹ Jesus kej ki rir mũ ẽn ag tóg, ẽmã ra mũ mũ. Tá junjun kỹ ag tóg, Topẽ tũ to pã'i ag mỹ tó kãn mũ, ag tỹ nén vég mũ ẽn ti. Kỹ tóg ag mỹ e tĩ. 12Kỹ ag tóg, kófa ag mré vẽnh mãn kỹ: “ẽg hỹn hẽ ri kenh mũ?“ he mũ jagnẽ mỹ. Kỹ ag tóg, porisa ag mỹ jãnkamy e vin mũ sir. 13“Ón kỹ vẽnh kar mỹ: “ẽg nũgnũr mũ jãvo Jesus mré mũ tĩ ag tóg, ti péju ja nĩ, kuty si há tá,” hem nĩ,” he ag tóg. 14“Hẽn ri ke mũn pã'i tỹ governador tóg mẽnh mũ, ãjag nũgnũr ja ti. Kỹ ẽg tóg, ti mré vẽmén ke mũ, ti tỹ ãjag vóg kónãn tũ nĩ jé,” he ag tóg, porisa ag mỹ. 15Kỹ porisa ag tóg, jãnkamy ẽn mãn kỹ vẽnh kar mỹ ónón mũ mũ sir, Jesus mré mũ tĩ ag to. Hã kỹ Judeu ag tóg, ver tag tó tĩ, ũnri.

Jesus tỹ ti mré mũ tĩ ag mỹ vẽnh ven

(Mc 16.14-18; Lc 24.36-49; Jo 20.19-23; Hk 1.6-8)

16Kỹ ti mré mũ tĩ ag tóg, ga tỹ Galiléia ra mũ mũ, pãnónh ra, Jesus tỹ ag mỹ: “ẽn ra mũm nĩ,” he ja ẽn ra. 17Tá ag tóg ti vég mũ sir, kỹ ag tóg, ti krẽm mũgmũg ke mũ sir. Hã ra tóg ũ ag mỹ vẽnh mỹ tĩ. Ag mỹ tóg tỹ, ki hã ke tũ nĩ ve nĩ. 18Kỹ Jesus tóg, ag rã hã jẽ kỹ, ag mỹ: “nén kar vỹ tỹ, inh krẽm ke nĩ ha, kanhkã tá ke kar, ga tá ke kar ke gé,” he mũ. 19“Hã kỹ mũjẽg, povo kar kanhrãn jé. Ag tỹ inh ki ge kỹ nỹtĩn kỹ ag kygpem nĩ gé. Inh panh jiji tó kỹ, ti kósin jiji tóm nĩ gé, kỹ Topẽ kuprĩg jiji tóm nĩ gé, ãjag tỹ ag kygpe kỹ, fag ke gé. 20Kỹ isỹ ãjag mỹ nén tó mũ kãmén kãn nĩ gé, ag tỹ ki króm jé. Ha mẽ, ãjag mré sóg jẽ nĩ, kurã kar ki, ãjag tovãnh ke tũ sóg nĩ ha, ga tũg ke kurã ki ke gé,” he tóg, Jesus ti, ti tỹ ti mré mũ tĩ ag jẽgnẽn kỹ.

Currently Selected:

Mateus 28: kgp

Highlight

Copy