Mateus 22

Vẽnh prũg kãme

(Lc 14.15-24)

1Kỹ Jesus tóg ag mỹ: “Topẽ tỹ tỹ ẽg pã'i nĩ vỹ ge nĩ, ha mẽ,” he mãn mũ. 2“Pã'i mág ri ke ti nĩ. Ti kósin prũg ken kỹ tóg to fénhta mág han sór mũ. 3Hã kỹ tóg vẽnh kar mỹ vẽnh vĩ jẽnẽg mũ. Hã ra ag tóg kãmũ sór tũ nĩ. 4Kỹ tóg: “hẽn ri ke mũn ag mẽ há han tũ nĩ, ti kurã ti,” he mũ. Kỹ tóg ag mỹ vẽnh vĩ jẽnẽ mãn mũ, ag mỹ: “ũri ke vẽ,” he jé.

5Ge ra ag tóg kãmũ sór tũ nĩ. Ũ tóg ti japỹ ra tĩ mũ, jó ũ tóg ti tỹ nén han sór mũ nón tĩ mũ gé, pã'i ẽn to é he kỹ. 6Ũ ag tóg ti tỹ ũn jẽnẽg mũ ag kugmĩ kỹ ag vóg kónãn mũ. Ũ ag kãgtén ag tóg mũ sir, mỹr, ha mẽ. 7Kỹ pã'i mág tóg ag to jũ mũ. Kỹ tóg ti porisa ag jẽgnẽ kỹ ag kãgtén mũ gé sir, ũ tỹ ti to é he mũ ẽn ag. Ag ĩn kugprũg ag tóg mũ sir. 8Kỹ tóg ti tũ ag mỹ: “inh fénhta vỹ kar kỹ nĩ ha,” he mũ. “Hã ra ag tóg kãmũ jãvãnh nỹtĩ, ag jykre kórég nỹtĩn kỹ. 9Ha ẽpry ra mũjẽg, ẽmĩn vẽnh kãpóv ja ra ke gé. Ãjag tỹ ũ ve kỹ ti mỹ inh fénhta ti tóm nĩ,” he tóg, pã'i mág ti. 10Kỹ ag tóg mũ mũ sir. Vẽnh kar mỹ ag tóg tó mũ, ũn jykre há ag mỹ, ũn jykre kórég ag mỹ ke gé. Hã kỹ tóg fór mũ sir, clube ti.

11Kỹ pã'i mág tóg kãrã mũ sir, ag vigve jé. Kỹ ũ tóg tá jẽ nĩ, hã ra tóg fénhta to kur tu tũ nĩ. 12Kỹ tóg ti mỹ: “isỹ ã mỹ fénhta to kur nĩm mũ ra ã tóg tu tũ nĩ, vỹ,” he mũ. “Ã hã ne tóg ã kur pẽ tu sór mũ', inh fénhta ki',” he tóg. Hã ra tóg vĩ tũ nĩ sir. 13Kỹ tóg: “ti mrĩnh ra, ti pẽn, ti nĩgé. Re tá ti fón,” he mũ. Re tán kuty nĩ. Tá ag tóg jagtar tĩ. Ag jã tỹ ag tóg gángán ke tĩ sir, vẽso jũgjũ kỹ. 14Ge ti nĩ. Ũ tỹ hẽn ri ke tóg mẽgmẽg mũ, hã ra tóg pipir nỹtĩ, ũn kuprẽg kỹ nỹtĩ ag, ũ tỹ to jykrén há han mũ ag,” he tóg, Jesus ti.

Ag tỹ imposto to ti ki jẽmẽ

(Mc 12.13-17; Lc 20.20-26)

15Kỹ pã'i ag tóg jagnẽ mỹ: “ti vĩ tỹ hẽ to ẽg hỹn ti senh mũ?“ he mũ. 16Kỹ ag tóg Jesus to ũ ag jẽgnẽg mũ, pã'i mág tỹ Herodes mré ke ũ ag mré hã, ag tỹ ón kỹ ti ki jẽmẽ jé. “Senhor,” he ag tóg mũ. “Ã jykre kuryj nĩn kỹ ã tóg, Topẽ to ẽpry ki ẽg kanhrãn há han tĩ. Ũ tỹ vẽjykre há hã han ve ra ã tóg, ti jykre ki kanhró kar nĩ. 17Hã kỹ ẽg mỹ ã tỹ nén to jykrén mũ tóm nĩ. Mỹ há nỹ', ẽg tỹ governo mỹ imposto kajãm jé'? Ẽg mỹ hỹn ti mỹ nĩm mũ', vó mỹ vó?“ he ag tóg mũ.

18Hã ra Jesus tóg ag jykre pãno ki kanhró nĩ. Hã kỹ tóg ag mỹ: “ãjag ne tóg ón kỹ inh ki jẽmẽ sór mũ',” he mũ. “Jykre régre ãjag nỹtĩ mỹr. 19Inh mỹ jãnkamy jun, imposto kajãm jafã ẽn ti,” he tóg. Kỹ ag tóg ti mỹ ũ jun mũ sir. 20Kỹ tóg ag mỹ: “ũ jiji nỹ kã nĩ, ũ kãgrá nỹ kã nĩ?“ he mũ. 21Kỹ ag tóg ti mỹ: “pã'i mág tỹ governo kãgrá vẽ,” he mũ. Kỹ tóg ag mỹ: “kỹ pã'i mág mỹ ti tũ nĩm nĩ, hã ra Topẽ mỹ ti tũ nĩm nĩ gé,” he mũ sir.

22Ag tỹ ti vĩ mẽ kỹ ti jykre tóg ag mỹ e tĩ sir. Kỹ ag tóg ti tovãnh kỹ mũ mũ sir.

Ẽg tỹ ẽg ter ja tá vỹn kenh ke

(Mc 12.28-34; Lc 10.25-28)

23Kỹ kejẽn Saduceu ag tóg, ón kỹ Jesus ki jẽmẽ sór mũ gé. Ẽn ag tóg: “ẽg ter ja tá ẽg vỹnvỹn kenh ke tũ nĩ, rĩr mãn ke tũ ẽg tóg nĩ,” he tĩ. 24Kỹ ag tóg: “Senhor,” he mũ gé. “Moisés tỹ ẽg mỹ vẽjykre nĩm kỹ tóg: “ã régre tỹ krẽ tũ ra ter kỹ ã tỹ ti prũ fi tỹ prũg ke vẽ. Ã tỹ ã régre mỹ ã krẽ han ke vẽ, fi ki,” he ja nĩgtĩ. 25Kỹ ũ tỹ jagnẽ mré pafa ja tỹ 7 (ke) vỹ nỹtĩgtĩ. Ag kãke tóg prũg mũ, hã ra tóg ti kósin tũ ra ter mũ. Kỹ ti jãvy tóg fi tỹ prũg mũ, hã ra tóg ti kósin tũ ra ter mũ gé. Kỹ ti jãvy ũ tóg, fi tỹ prũg mũ gé sir, 26hã ra tóg ti kósin tũ ra ter mũ gé, ti jãvy ũ ke gé, hã ki ag kar vỹ, kósin tũ ra kãgter kãn mũ sir. 27Kỹ vãhã ag kar prũ fi tóg, ter mũ gé sir. 28Kỹ fag kãgter ja tá rĩnrĩr mãn kỹ fi hỹn, mén tỹ 7 (ke) nĩnh mũ vẽ. Ag kar vỹ fi tỹ prũg ja nĩ mỹr. Hã kỹ tóg vẽnh mỹ nỹ, ag tỹ: “rĩr mãn jé ẽg tóg ke mũ,” hen kỹ,” he ag tóg, Saduceu ag, Jesus mỹ.

29Hã ra Jesus tóg: “kygnẽ ãjag huri,” he mũ. “Ãjag pijé Topẽ vĩ tỹ rán kỹ nĩ ki kanhró nỹtĩ', ãjag pijé Topẽ jykre ki kanhró nỹtĩ'. 30Ẽg rĩnrĩr mãn kỹ ẽg tóg, prũg mãn ke tũ nĩ sir, kỹ fag mén mãn ke tũ nĩ gé. Topẽ tỹ jẽgnẽ jafã ri ke ẽg nỹtĩnh mũ, kanhkã tá.

31Kỹ Topẽ vĩ rá ũ to jykrén nĩ, ti tỹ ẽg ter ja tá vỹn ke tó ti. Topẽ hã ne tỹ vẽmén ja nĩ mỹr, hã kỹ tóg tag tó ja nĩ, ha mẽ. 32“Abraão vỹ iso: Topẽ, he tĩ, Isaque ke gé, Jacó ke gé,” he ja tóg nĩ, Topẽ ti. Kãgter ag huri, Abraão, Isaque, Jacó. Hã ra Topẽ tóg: “tỹ inh ag Topẽ nĩ,” he ja nĩgtĩ, ag kãgter kar kỹ. Hã kỹ ag tóg rĩnrĩr nỹtĩ, Topẽ tỹ tỹ ũn rĩnrĩr nỹtĩ ag hã kri ke nĩn kỹ,” he tóg, Jesus ti. 33Kỹ ag tóg ti vĩ mẽg mũ sir, kỹ ti jykre tóg ag mỹ e pẽ tĩ, ti vĩ ti.

Topẽ tỹ ẽg jyvẽn kãfór

(Mc 12.28-34; Lc 10.25-28)

34Kỹ Fariseu ag tóg mẽg mũ, Jesus tỹ Saduceu ag mỹ vĩ há han ja ti, kỹ ag tỹ ti mỹ kafãn ke tóg tũ tĩ sir. 35Kỹ ag tóg ti to vẽnh mãn mũ sir. Kỹ Topẽ vĩ to ẽg kanhrãn tĩ ũ tóg Jesus mỹ: 36“Senhor, Topẽ tỹ ẽg jyvẽn tỹ hẽ nỹ hỹn, ti tỹ ẽg jyvẽn kar kãfór nỹnh mũ?“ he mũ. 37Kỹ Jesus tóg: “ẽg jóg mág to há tãvĩ nỹtĩm nĩ, ti ki ge há han nĩ, ti to jykre pir nỹtĩm nĩ,” he mũ. 38“Topẽ tỹ ẽg jyvẽn kar kãfór hã vẽ. 39Kỹ ti tỹ ẽg jyvẽn ũ tóg, hã ri ke nĩ gé, hã vỹ: ãjag régre ki rĩr há han nĩ, ãjag tỹ vẽnh ki rĩr há han ri ke, he mũ. 40Vẽnh jyvẽn tag vỹ vẽnh jyvẽn kar kãfór nỹtĩ. Régre ti nỹtĩ, Topẽ tỹ ẽg jyvẽn kãfór ti. Ẽg tỹ tag ki króm kỹ ẽg tóg Topẽ jykre ki króm kãn mũ,” he tóg, Jesus ti.

Cristo tỹ tỹ Davi krẽ'krẽ nĩ ra ti kãfór nĩ, Topẽ kósin

(Mc 12.35-37; Lc 20.41-44)

41Kỹ Jesus tóg Fariseu ag mỹ: 42“Cristo to ãjag hẽ ri ke tĩ?“ he mũ. “Ũ krẽ'krẽ nẽ hỹn?“ he tóg. Kỹ ag tóg ti mỹ: “Davi krẽ'krẽ vẽ,” he mũ. 43Kỹ tóg: “hã ra Davi tóg ti to: inh Senhor, he ja nĩ, Topẽ kuprĩg tỹ ti krĩn kỹ. Kỹ tóg: 44ẽg jóg tỹ Topẽ vỹ inh Senhor mỹ: “nĩ ra ver, inh pẽgja tá,” he ja nĩ. “Sỹ ver ã kato vãsãnsãn mũ ag sigsenh ke vẽ,” he ja tóg nĩ, Topẽ ti, he tóg, Davi ti. 45Hã kỹ Davi tóg Cristo to: “inh Senhor,” he ja nĩ. Ti tỹ tỹ ti krẽ'krẽ nĩ ra ti mỹ tỹ ti kri ke nĩnh mũ vẽ'?“ he tóg, Jesus ti. 46Hã ra ag tỹ ti mỹ ne tónh ke tóg tũ tĩ, ag tỹ ti vĩ kafãn sór mũ ra. Vãhã ag tóg ti ki jẽmẽ sór mãn tũ nĩ. Ti kamẽg ag tóg mũ sir.

Currently Selected:

Mateus 22: kgp

Highlight

Copy