Mateus 20

Uva ki rãnhrãj tĩ ag

1Kỹ Jesus tóg ag mỹ: “Topẽ tỹ tỹ ẽg pã'i nĩ vỹ patrão tỹ ti camarada jãvãnh ri ke nĩ,” he mũ. “Kusã ki 6 horas ki tóg, ag jãvãnh tĩ mũ, ag tỹ ti jakré tỹ uva ki rĩr jé. 2Kỹ tóg ũ ag ve kỹ ag mré vẽnh rãnhrãj kaja to jykrén mũ, hã vỹ: jãnkamy pir, he mũ, por dia kaja ti. Kỹ tóg ag mỹ: “ha ki rĩr mũjẽg,” he mũ sir. 3Kỹ ag tóg mũ mũ. Óra tãgtũ tũg kỹ, 9 horas ki tóg tĩg mãn mũ, ũ ag jãvãnh jé. Véké ag tóg ẽmã kuju tá nỹtĩ. 4Kỹ tóg ag mỹ: “inh mỹ inh jakré ki rĩr mũjẽg,” he mũ gé. “Kajãm jé sóg ke mũ,” he tóg. 5Kỹ ag tóg mũ mũ.

Óra tãgtũ ũ tũg kỹ, meio dia ki tóg ũ ag jãvãnh tĩg mãn mũ, kar kỹ tóg 3 horas ki tĩg mãn mũ gé. Ag ve kỹ tóg ag mỹ ke mũ gé, kỹ ag tóg mũ mũ gé, ti jakré ki rĩr jé. 6Vãhã tóg rãkãnh mũ sir. 5 horas ki tĩg mãn kỹ tóg ũ ag vég mũ gé, kỹ tóg ag mỹ: “ãjag tỹ ne jé rãnhrãj tũ nĩ nẽ?” he mũ. “Kurã kar ki ãjag tóg tag ki nỹtĩ, ãjag rãnhrãj tũ ra,” he tóg ag mỹ. 7Kỹ ag tóg: “hã ra ũ tóg ẽg mỹ: ha inh rãnhrãj han, he ja tũ nĩ,” he mũ. Kỹ tóg: “ha inh jakré ki rĩr mũjẽg ge,” he mũ sir. Kỹ ag tóg mũ mũ gé.

8Rãké ra 6 horas ki patrão ẽn tóg ti tũ ki rĩr tĩ mỹ: “ha ag jé prẽr,” he mũ. “Ag mỹ ti kaja ti nĩm. Ũn tỹ rãkãnh kỹ kãmũ mũ ag mỹ nĩm vén, kar kỹ ũ tỹ kusãg ki kãmũ mũ ag mỹ nĩm rén,” he tóg.

9Kỹ ũ tỹ rãkãnh kỹ junjun mũ ag vỹ ag tũ kaja ti mãg mũ, hã vỹ: jãnkamy pir, he mũ. Ag rãnhrãj sĩ ra ag tóg por dia kaja vég mũ sir. 10Kỹ ũ tỹ kusãg ki rãnhrãj mũ ag tóg: “ti hỹn ẽg mỹ ti kaja kãfór nĩm ke mũ, ẽg tỹ kurã kar ki rãnhrãj kỹ,” he mũ, to jykrén kỹ. Hã ra tóg ag mỹ jãnkamy pir ẽn nĩm mũ gé sir, por dia kaja ẽn. 11Kỹ ag tóg ag patrão ti to jũ mũ. 12Kỹ ag tóg ti mỹ: “kurã kar ki ẽg tóg rãnhrãj mỹr, to ẽg ron, ti rỹ jagy ra ẽg tóg to krónh ke ja tũ nĩ. Jãvo tag ag vỹ óra pir hã ki rãnhrãj, hã ra ã tóg ag mỹ ẽg kaja ri ke nĩm,” he ag tóg, ag patrão mỹ.

13Kỹ tóg ag kã mĩ ũ mỹ: “sỹ ã ki kygnẽ pijé',” he mũ. “Inh mré ã tóg jãnkamy pir to jykrén ja nĩ, hã kỹ sóg ã mỹ nĩm mũ. 14Kỹ ã tũ mãn kỹ tĩg. Hã ra sóg ag mỹ nĩm sór mũ gé, sỹ ã mỹ nĩm ja ẽn ri ke. 15Isũ vẽ mỹr, jãnkamy ti, kỹ sóg sỹ tỹ nén han sór mũ ẽn han mũ. Hã ra ã tóg jũ mũ, isỹ ag mỹ vĩ há han to,” he tóg ti mỹ, patrão ti.

16Hã kỹ ẽgno tá kãmũ mũ ag vỹ ũn kãmũ vén mũ ag ri ke nỹtĩnh mũ, tãpry kỹ, jãvo ũn kãmũ vén mũ ag vỹ ẽgno tá kãmũ mũ ag ri ke nỹtĩnh mũ gé,” he tóg, Jesus ti.

Jesus tỹ ti ter ke tó mãn

(Mc 10.32-34; Lc 18.31-34)

17Kỹ Jesus tóg Jerusalém ra tĩ mũ. Kỹ tóg vyrmỹ ũ tỹ 12 (ke) ẽn ag mré vẽmén mũ, ẽpry jagma mũn kỹ. 18“Ha vé,” he tóg. “Jerusalém ra ẽg tóg mũ mũ. Ẽprã ke fi kósin ẽn vỹ jagtar ke mũ. Inh hã vẽ. Topẽ tũ to pã'i ag tóg ag tỹ isỹ nén han sór mũ ẽn han ke mũ, Topẽ vĩ to ẽg kanhrãn tĩ ag ke gé. Ag tỹ iso: “ter jé tóg ke mũ,” henh ke vẽ. 19Kỹ ag tóg fóg ag mỹ inh fẽg ke mũ sir, ẽn ag tỹ iso é he jé, ag tỹ inh mrãnmrãn jé, ag tỹ ka to isa jé. Kurã tãgtũ ki sóg hã ra rĩr mãn ke mũ,” he tóg, Jesus ti.

Ũn régre ag tỹ tỹ ũn mág nỹtĩ sór

(Mc 10.35-45)

20Kỹ Zebedeu krẽ ag mỹnh fi tóg Jesus venh kãtĩ mũ, fi krẽ ag mré. Kỹ fi tóg ti krẽm mũg ke mũ. 21Kỹ tóg fi mỹ: “ã tỹ ne to vĩ sór nẽ?“ he mũ. Kỹ fi tóg: “kejẽn ã tóg tỹ pã'i mág nĩnh mũ, kỹ tóg inh krẽ tag ag tỹ ã rã hã nỹtĩnh há tĩ, ag tỹ ã mré tỹ pã'i mág nỹtĩ jé,” he mũ.

22Kỹ Jesus tóg fi krẽ ag mỹ: “ãjag tỹ nén to vĩ mũ ki kagtĩg ãjag tóg nỹtĩ,” he mũ. “Jagy ti nỹ. Ãjag mỹ inh ri kén jagtar sór mũ'? Ãjag mỹ tovãnh ke tũ nĩ'?“ he tóg. Kỹ ag tóg ti mỹ: “hỹ, tovãnh ke tũ ẽg nĩ,” he mũ. 23Kỹ tóg: “hỹ, jagtar jé ãjag tóg ke mũ, inh ri kén,” he mũ. “Hã ra isũ tũ vẽ, sỹ ãjag tỹ pã'i han ke ti. Topẽ tỹ ũn mỹ: “ha ti rã hã nỹtĩ,” he mũ ẽn ag hã vỹ inh rã hã nỹtĩnh ke mũ,” he tóg, Jesus ti.

24Hã ra ũ tỹ 10 ag tóg mẽg mũ, ũn régre ag tỹ Jesus mỹ tag to vĩ ja ti. Kỹ ag tóg ag to jũ mũ. 25Hã ra Jesus tóg ag jé prẽr kãn kỹ ag mỹ: “fóg ag pã'i ag jykre ki kanhró ãjag tóg nỹtĩ,” he mũ. “Vẽnh kar jẽgnẽg ag tóg tĩ mỹr, kỹ ag mág ag tóg vẽnh kar mỹ: “gem nĩ, ge tũg nĩ,” he tĩ, vĩ tar han kỹ. 26Ag ri ke han tũg nĩ. Ãjag mỹ tỹ ũn mág nỹtĩ sór mũ'? Kỹ tỹ jagnẽ camarada ri ke nỹtĩm nĩ, jagnẽ tũ ki rĩr kỹ. 27Ãjag mỹ tỹ pã'i nỹtĩ sór mũ'? Kỹ tỹ jagnẽ krẽm ke nỹtĩm nĩ, tỹ ũn kãsir nỹtĩm nĩ. 28Hã kỹ sóg camarada tũ nĩ gé. Sỹ tỹ camarada nĩ jé sóg kãtĩg, sỹ ãjag mré rãnhrãj jé. Hã kỹ sóg vẽnh kar jagfy ter ke mũ, sỹ ag krenkren han jé. Tỹ sóg ẽprã ke fi kósin nĩ,” he tóg, Jesus ti.

Jesus tỹ ũn kyvó ag tỹ há' he

(Mc 10.46-52; Lc 18.35-43)

29Hã ki ag tóg Jerusalém ra mũ mũ. Kejẽn ag tóg ẽmã tỹ Jericó fĩn rãm kỹ tá pa mũ, hã ra ũ tỹ hẽn ri ke ag tóg Jesus nón mũ mũ. 30Hã ra ũn kyvó ag tóg ẽpry kri nĩgnĩ kỹ nỹtĩ nĩ, ũn régre ag. Vãhã ag tóg Jesus tỹ jagma tĩg mẽg mũ. Kỹ ag tóg ti jé prẽr mũ. “!..Senhor..!“ he ag tóg. “!..Davi krẽ'krẽ', ẽg jagãgtãn ra..!“ he ag tóg. 31Kỹ ag tóg ag to jũgjũ mũ, ti nón mũ ũ ag. “Mẽ kã nỹtĩ,” he ag tóg mũ. Hã ra ag tóg prẽr mãn', prẽr mãn' he mũ, jamã há ra. “!..Senhor, Davi krẽ'krẽ', ẽg jagãgtãn ra..!“ he ag tóg mũ.

32Kỹ Jesus tóg krỹg he mũ, kỹ tóg ag mỹ: “ne to ãjag vĩ, sỹ ãjag mỹ han jé?“ he mũ. 33Kỹ ag tóg: “ẽg tỹ venh há tóg tĩ,” he mũ. 34Kỹ Jesus tóg ag jagãgtãn kỹ ag kanẽ mẽgmẽg mũ sir. Kỹ ag tóg ẽvãnh há' he mũ sir. Ti nón ag tóg mũ mũ sir.

Currently Selected:

Mateus 20: kgp

Highlight

Copy