Mateus 12

Jesus tỹ tỹ vẽnhkán ke kurã to pã'i

(Mc 2.23-28; Lc 6.1-5)

1Kejẽn Jesus tóg trigo kré mĩ tĩ mũ, ti mré mũ tĩ ag mré. Vẽnhkán ke kurã ki ke vẽ, hã ra ag tóg kókĩnkĩr mũ. Hã kỹ ag tóg, trigo kanẽ tỹ kym ke kỹ ko mũ sir. 2Kỹ pã'i ag tóg ag vég mũ. Kỹ ag tóg Jesus mỹ: “ha vé, ã mré mũ tĩ ag ne tóg, ag tỹ nén han ke tũ han mũ ha', vẽnhkán ke kurã ki'. Vẽnh rãnhrãj vẽ mỹr,” he mũ.

3Hã ra tóg: “vó,” he mũ. “Davi tỹ nén han mũ to jykrén nĩ. Ti kókĩr nĩn kỹ tóg, ti tỹ nén han ke tũ han gé, ti mré mũ tĩ ag mré, hã ra Topẽ pijé ti to jũ mũ'. 4Tag han ja ti nĩ, ha mẽ. Topẽ ĩn kã ra rã kỹ tóg, tá Topẽ jamĩ ẽn kó, tỹ ti tỹ konh ke tũ ra. Kỹ tóg ti mré mũ tĩ ag mỹ vin gé. Topẽ tũ ki rĩr tĩ ag hã tỹ konh ke vẽ vẽ. Hã kỹ tóg rán kỹ nĩ, Topẽ vĩ tỹ rán kỹ nĩ ki,” he tóg.

5“Kỹ Topẽ tũ ki rĩr tĩ ag jykre to jykrén nĩ gé. Tỹ vẽnhkán ke kurã ra ag tóg rãnhrãj mũgtĩ, Topẽ ĩn krẽm ti tũ ki rĩr kỹ. Hã kỹ ag tóg, tỹ vẽnhkán ke kurã ra ki vẽnhkán tũ nĩgtĩ gé, ge ra ag jykre tóg Topẽ mỹ há nĩ. Hã kỹ tóg rán kỹ nĩ gé. 6Ha mẽ, Topẽ ĩn vỹ tỹ ti tũ nĩ. Kỹ ag tóg ti tũ ki rĩr tĩ, tỹ vẽnhkán ke kurã ra. Hã ra sóg Topẽ ĩn kãfór nĩ, Topẽ mỹ. Hã kỹ inh mré mũ tĩ ag tóg Topẽ mỹ há nỹtĩ, ag tỹ vẽnhkán ke kurã ki vẽnhkán tũ ra,” he tóg.

7“Kỹ Topẽ vĩ tag to jykrén nĩ gé, ha mẽ. Ãjag tỹ jagnẽ jagãgtãn kỹ tóg ãjag tỹ inh mỹ nén ũ pũn kãfór nĩ, he ja tóg nĩ. Ãjag tỹ tag to jykrén ra ãjag tóg, inh mré ke ag to jũnh ke tũ nĩ vẽ. Ag kókĩr vẽ mỹr. Nén ũ kórég han ja tũ ag nĩ. 8Hã ra sóg tỹ vẽnhkán ke kurã to pã'i nĩ. Tỹ sóg ẽprã ke fi kósin nĩ“ he tóg, Jesus ti.

Jesus tỹ vẽnh kán ke kurã ki ũ tỹ há' he

(Mc 3.1-6; Lc 6.6-11)

9Kỹ tóg ẽmã ẽn tá kutẽ kỹ ẽmã ũ ra tĩ mũ, kỹ tóg vẽnh kanhrãn jafã kã ra rã mũ sir. 10Hã ra ũ nĩgé tóg vỹ tá nĩ nĩ. Kỹ ag tóg ón kỹ Jesus mỹ: “mỹ há nỹ, ẽg tỹ vẽnhkán ke kurã ki ũ kygtãg ke tag ti?“ he mũ. Ag tỹ pã'i ag mỹ: “vẽnhkán ke kurã ki tóg Topẽ vĩ mranh tĩ, ti tỹ ũ kygtãg kỹ,” he sór vẽ.

11Hã ra Jesus tóg ag mỹ: “ãjag mẽg tỹ vẽnhkán ke kurã ki kãgnó ki kutẽ kỹ ãjag tóg ti kunũnh ke mũ,” he mũ. 12“Ẽg mré ke vỹ tỹ, ẽg mẽg kãfór nĩ mỹr. Kỹ tóg há nĩ, ẽg tỹ ẽg mré ke kygtãg ti kỹ, tỹ vẽnhkán ke kurã ra,” he tóg.

13Kỹ tóg ũn nĩgé tóg ẽn mỹ: “ã nĩgé tỹ krỹg' hé,” he mũ. Kỹ tóg tỹ krỹg' he kỹ há' he mũ sir.

14Kỹ pã'i ag tóg, jũgjũ kỹ pa mũ sir. “Ẽg hỹn hẽ ri kenh mũ, ẽg tỹ ti tén jé?“ he ag tóg mũ, Jesus to. 15Hã ra tóg ki kanhró nĩ, ag tỹ ti tén sór ẽn ki. Kỹ tóg tá kãkutẽ mũ sir.

Isaías tỹ Jesus kãmén ja

Ti tĩg kỹ ũn tỹ hẽn ri ke ag tóg, ti nón mũ mũ, ũn kagyga ag ke gé, fag ke gé. Kỹ tóg ag tỹ há' he kãn mũ sir, fag tỹ ke gé. 16Kỹ tóg ag mỹ: “ker isỹ ãjag tỹ há' he tag kãmén hẽ',” he mũ. 17Hã ra tag tóg rán kỹ nĩ gé. Vãsỹ Topẽ vĩ tó tĩ tỹ Isaías vỹ Jesus to tag rán ja nĩ, 18ha mẽ: “sỹ ũn kuprẽg mũ ẽn, he tóg, Topẽ ti. Inh mỹ rãnhrãj tĩn hã vẽ. Inh fe pẽ vẽgtĩ, sỹ ti ve kỹ tóg inh mỹ sér tĩ. Ti hã mỹ sóg inh kuprĩg jẽnẽnh ke mũ, kỹ tóg inh vĩ tónh ke mũ sir, fóg ag mỹ, kanhgág ag mỹ ke gé, isỹ ag jykre tugnỹm ke ti, he tóg, Topẽ ti. 19Vĩ jũ han ke tũ ti nĩ, jũ kỹ vĩ tar han ke tũ ti nĩ gé. Re tá ag tóg ti vĩ mẽnh ke tũ nĩ gé. Komẽr hã tóg vĩnh ke mũ, he tóg, Topẽ ti. 20Ẽprã ke ag tỹ inh vĩ mranh kỹ ag tóg vãn tóg tỹ kamkam ke ẽn ri ke nỹtĩ. Hã ra ti pijé ag tỹ kamkam ke kãn ke mũ', isỹ ũ to: inh fe, he mũ ẽn ti. Néj gru tỹ nhyn ke sór ẽn ri ke ag nỹtĩ gé. Ti pijé ag tỹ nhyn kenh ke mũ'. Ag mỹ tóg vĩ há han ke mũ. Tag kar kỹ sóg kejẽn vẽnh kar jykre tugnỹm ke mũ. 21Ẽn kã ũ tỹ ti ki ge kỹ nỹtĩ ag hã vỹ krenkren ke mũ, fóg ag mré hã, kanhgág ag mré hã ke gé, he tóg, Topẽ ti,” he ja tóg nĩ, Isaías ti, Jesus to.

Jesus tỹ Japo jykre tó

(Mc 3.20-30; Lc 11.14-23)

22Kejẽn ag tóg, Jesus to ũ pére kãmũ mũ, ũn kyvó. Vĩ vãnh tóg nĩ gé. Hã ra tóg jagrẽ kórég nĩ gé. Kỹ Jesus tóg ti tỹ há' he mũ sir. Kỹ tóg vĩ há' he mũ sir. Vãhã tóg ve há han mũ gé sir. 23Kỹ tóg vẽnh kar mỹ e tãvĩ tĩ. Kỹ ag tóg jagnẽ mỹ: “Davi krẽ'krẽ ẽn tũ mỹ'?“ he mũ sir, Jesus to. “Ũ tỹ vãsỹ rán kỹ nĩ ẽn tũ mỹ'?“ he ag tóg mũ. Ag mỹ tóg tỹ ti hã ve nĩ.

24Kỹ Pã'i ag tóg mẽg mũ sir, Jesus tỹ ti tỹ há' he ẽn ti. Hã kỹ ag tóg Jesus to: “jagrẽ kórég ti nĩ,” he mũ. “Nén-Kórég ag pã'i tỹ ti jagrẽ nĩ, Belzebu ẽn tỹ. Hã kỹ tóg Nén-Kórég ag pan tĩ,” he ag tóg mũ.

25Hã ra Jesus tóg, ag tỹ nén to jykrén mũn ki kanhró nĩ. Kỹ tóg ag mỹ: “pã'i pir krẽm ke ag tỹ jagnẽ kato tẽgtẽn kỹ ag tóg jagnẽ kãgtén kãn ke mũ,” he mũ. “Ẽmã pir ki ke ag tỹ jagnẽ kato tẽgtẽ kỹ, ĩn pir krẽm ke fag tỹ jagnẽ kato tẽgtẽ kỹ fag tóg, vẽnh kãpãm kỹ nỹtĩnh mũ, kỹ fag tóg jagnẽ kãgtén kãn ke mũ. 26Ge ti nĩ gé. Nén-Kórég tỹ Nén-Kórég ũ kutẽm kỹ tóg Nén-Kórég ag tỹ jagnẽ kato tẽgtẽ han mũ sir. Kỹ ag tóg jagnẽ tỹ tũ' henh ke mũ gé, Nén Kórég ag. 27“Belzebu tỹ tóg Nén-Kórég ag pan tĩ,” he ãjag tóg tĩ iso. Jãvo ãjag mré ke ag hỹn vẽjykre tỹ ne tỹ vẽjagrẽ kórég pan tĩ? Ag mỹ Nén-Kórég ag jykre tỹ ag pan tĩ gé', Topẽ jykre tỹ, vó? Topẽ jykre tỹ ag tóg ag pan tĩ. Ãjag tỹ tag to jykrén kỹ ãjag tóg inh jykre há ẽn ki kanhrãn ke mũ vẽ,” he tóg. 28“Topẽ kuprĩg jykre tỹ sóg Japo ag pan tĩ mỹr. Topẽ kuprĩg tỹ Japo ag pan kãn kỹ Topẽ tóg tỹ ẽg pã'i nĩ vẽ mỹr. Tag to jykrén nĩ,” he tóg, Jesus ti.

29“Ẽg tỹ ũn jũ mẽ tũ mãn sór kỹ ẽg tóg ti se vén tĩ, ke tũ nĩ mũ ra tóg ti tũ ki rĩr ke mũ. Ẽg tỹ ti se kar kỹ hã ẽg tóg ti tũ mãn ke mũ sir,” he tóg. “Ge ti nĩgtĩ, sỹ nén han mũ ti. Japo vỹ tar nĩ. Hã ra sóg hur ti sé, hã kỹ sóg ti tũ ag kygvãn ke mũ sir. Ag jagrẽ kórég pan jé sóg ke mũ gé,” he tóg.

30“Ãjag tỹ tỹ inh mré ke tũ nỹtĩn hã kỹ ãjag tóg, inh kato tẽgtẽ mũ. Ãjag tỹ inh mré ẽprã ke ag tỹ Topẽ to kãmũ han tũ nĩn kỹ ãjag tóg, ag kãmũ kamẽg mũ,” he tóg.

31“Ha mẽ, ãjag tỹ Topẽ vĩ mranh mũ ra tóg, ãjag mỹ vẽnh pãte fón sór mũ, ãjag tỹ Topẽ to vĩ kónãn mũ ra ke gé. Ãjag tỹ hã ra Topẽ kuprĩg tỹ ũ krĩn kỹ to: Japo tỹ ti jagrẽ nĩ, hen kỹ tóg, ãjag mỹ vẽnh pãte fón mãn ke tũ nĩ sir, Topẽ ti. 32Ãjag tỹ iso vĩ kónãn mũ ra tóg, ãjag mỹ vẽnh pãte fón sór mũ gé, ãjag tỹ ẽprã ke fi kósin to vĩ kónãn mũ ra. Ãjag tỹ Topẽ kuprĩg to vĩ kónãn kỹ tóg, ãjag mỹ vẽnh pãte fón mãn ke tũ nĩ. Ãjag tỹ ga kri mũn kỹ tóg, tag tỹ vẽnh pãte fón ke tũ nĩ, Topẽ ti, ãjag ter kar kỹ ke gé,” he tóg, Jesus ti, pã'i ag mỹ.

Ka há mré ka kórég kãme

(Lc 6.43-45)

33“Ẽg tỹ ka kanẽ ko há krãn kỹ ti kanẽ vỹ, ko há nĩ, ẽg tỹ ka kanẽ ko vãnh krãn kỹ ti kanẽ vỹ, ko kórég nĩ gé. Ẽg tỹ ti kanẽ ve kỹ ẽg tóg: “ũn kanẽ ko vãnh ja vẽ,” he tĩ. Ge ti nĩgtĩ, ẽg jykre ti. Ũn jykre há tóg há nĩ, jãvo ũn jykre kórég tóg kórég nĩ gé.

34Pỹn ri ke ãjag nỹtĩ. Kórég tãvĩ ãjag nỹtĩ, hã ra ãjag tóg, ón kỹ nén ũ há tó sór tĩ. Ẽg jẽnky ki tóg kãkutẽ tĩ, ẽg tỹ nén to jykrén mũ ti. Ẽg jykre kórég tãvĩ nỹtĩn kỹ ẽg tóg, nén ũ kórég tãvĩ tó tĩ. Hã kỹ ãjag pijé tó há han tĩ'. 35Ũn jykre há vỹ, nén ũ há kar to jykrén tĩ, kỹ tóg ẽg mỹ tó há han tĩ gé. Ũn jykre kórég vỹ, nén ũ kórég kar to jykrén tĩ gé, kỹ tóg ẽg mỹ tó kónãn tĩ gé sir,” he tóg.

36“Ha mẽ, kurã tỹ ẽgno kã, isỹ vẽnh kar jykre tugnỹm ke kurã ẽn kã sóg, ãjag vĩ tugnỹm ke mũ. Ãjag tỹ ón kỹ vĩ ja ẽn ve jé sóg ke mũ gé. Ãjag tỹ nén tó ja kar tugnỹm jé sóg ke mũ, ha vem nĩ,” he tóg. 37“Ãjag tỹ vĩ há han ja nĩn kỹ ãjag tóg, inh mỹ há nỹtĩ gé. Ãjag tỹ vĩ kónãn ja nĩn kỹ ãjag tóg, inh mỹ kórég nỹtĩ. Kỹ ãjag tóg to jagtar ke mũ,” he tóg. Ti tỹ ti kato tẽ mũ ag mỹ Topẽ jykre tón hã vẽ.

Ag tỹ milagre ve sór

(Mc 8.11-12; Lc 11.29-32)

38Kỹ Topẽ vĩ to ẽg kanhrãn tĩ ũ ag tóg Fariseu ũ ag mré Jesus mỹ: “Senhor, ẽg tỹ ã tỹ milagre ũ han venh há tóg tĩ,” he mũ.

39Kỹ tóg ag mỹ: “kórég ãjag nỹtĩ,” he mũ. “Topẽ ki ge sór vãnh ãjag tóg nỹtĩ. Ãjag tỹ milagre ve sór mũ tag venh ke tũ ãjag tóg nĩ. Nén pir hã ve jé ãjag tóg ke mũ, hã vỹ: Jonas tỹ nén ve ja ẽn ri ke, he mũ. 40Jonas ẽn vỹ, goj tãn nug kã kã nĩ ja nĩgtĩ, kurã tãgtũ ki. Tag ri ke ve jé sóg ke mũ gé. Ga krẽm sóg nỹnh mũ, kurã tãgtũ ki. Tỹ sóg ẽprã ke fi kósin nĩ,” he tóg.

41“Kỹ Nínive tá ke ag vỹ, ãjag kato vĩnh ke mũ sir, kurã tỹ ẽgno kã, ha vem nĩ. Ag tỹ Jonas vĩ mẽ kỹ ag tóg ag jykre kórég tovãnh. Tỹ sóg Jonas kãfór nĩ, hã ra ãjag tóg ãjag jykre kórég tovãnh sór tũ nỹtĩ. 42Kỹ pã'i mág ẽn fi, ũ tỹ kuvar há tá kãtĩg ja ẽn fi vỹ ãjag mré nĩnh ke mũ gé, kurã tỹ ẽgno kã. Kỹ fi tóg ãjag mỹ vĩ kónãn ke mũ gé. Kuvar há tá fi tóg kãtĩg ja nĩgtĩ, vãsỹ, fi tỹ pã'i mág tỹ Salomão vĩ mẽ jé. Salomão kãfór vỹ tỹ inh nĩ, hã ra ãjag tóg inh vĩ jẽmẽ jãvãnh nỹtĩ,” he tóg, Jesus ti.

Vẽjagrẽ kórég jykre

(Mc 11.24-26)

43Kỹ tóg: “kejẽn sóg ũ ki vẽjagrẽ kórég kutẽm mũ,” he mũ. “Kỹ tóg ga kórég ra tĩ mũ, ti jagrẽ ẽn ti. Goj venh ke tũ tóg nĩ, tá. Vẽnhkán ke tũ tóg nĩ gé, ti tỹ hẽ ri ken kỹ vẽnhkán ke tũ tĩn kỹ. 44Kỹ tóg vãhã to jykrén kỹ: “inh jé hỹn tĩg mãn ha, sỹ ũ tá kãkutẽ ja ẽn ra. Inh mỹ tóg tỹ ĩn ri ke ja nĩ,” he mũ. Kỹ tóg ti venh tĩ mũ sir. Hã ra tóg krĩ há nĩ, kỹ tóg ti mỹ ĩn há ri ke nĩ sir, ĩn prur, ĩn kuprã, ĩn sĩnvĩ ri ke. 45Kỹ tóg Nén-Kórég tỹ 7 (ke) ag mỹ tónh tĩ mũ sir. Kỹ ag kar tóg ũ ẽn kã ra ge mũ sir. Hã ra ag jykre pãno tóg ti jykre pãno kãfór nĩ. Hã kỹ tóg kórég tãvĩ nĩ sir. Ti jagrẽ pir kutẽm inh vẽ vẽ, hã ra ũ tỹ 8 (ke) ag tóg sir tỹ ti jagrẽ nỹtĩ ha, ti tỹ inh ki rã tũ nĩn kỹ. Ãjag mỹ tóg ge nĩnh mũ, kurã tỹ ẽgno kã. Ãjag jykre pãno to ãjag tóg jagtar ke mũ,” he tóg, Jesus ti.

Jesus mré ke pẽ fag

(Mc 3.31-35; Lc 8.19-21)

46Ti tỹ ver tỹ vẽmén jẽ ra ti mỹnh fi tóg, tá jun mũ sir, ti jãvy ag mré. Ti mỹ fag tóg vẽnh vĩ jẽnẽg mũ, fag tỹ ti mré vẽmén jé. 47Kỹ ũ tóg ti mỹ tónh kãtĩ mũ. “Ã mỹnh fi vỹ re tá jẽ, ã jãvy ag mré. Fag tỹ ã mré vẽmén ke nẽji,” he tóg, Jesus mỹ. 48Kỹ tóg ũ tỹ ti mỹ tó mũ ẽn mỹ: “mẽ',” he mũ. “Inh mỹnh fi mỹ'? Inh jãvy ag mỹ'?“ he tóg. 49Kỹ tóg ti mỹ ti mré mũ tĩ fag ven mũ sir, ti nĩgé tỹ. Kỹ tóg: “inh mỹnh pẽ fi hã vẽ, inh jãvy pẽ ag hã vẽ gé,” he mũ, ti mré mũ tĩ ag to. 50“Ũ tỹ inh panh tỹ kanhkã tá nĩ ẽn vĩ ki króm mũ ag hã vỹ tỹ, inh jãvy pẽ nỹtĩnh mũ, inh ve pẽ fag ke gé, inh mỹnh pẽ fi ke gé,” he tóg, Jesus ti.

Currently Selected:

Mateus 12: kgp

Highlight

Copy