Lucas 8
8
Ũn tỹtá fag tỹ Jesus ki rĩr
1Tag pãte Jesus vỹ ẽmã kar mĩ tĩg kãn mũ, ẽmã kãsir mĩ hã ke gé. Topẽ vĩ tó tóg tĩ mũ. Ag mỹ tóg: “Topẽ tỹ tỹ ãjag pã'i nĩ sór vẽ,” he mũ. Kỹ ũ tỹ 12 (ke) ag tóg ti mré mũ mũ. 2Kỹ ũn tỹtá fag tóg ti mré mũ mũ gé sir, ti tỹ fag tỹ há' hen kỹ. Ũ fag tóg kaga ja nỹtĩgtĩ. Ũ fag tóg jagrẽ kórég ja nỹtĩgtĩ gé. Hã ra tóg fag tỹ há' he kãn ja nĩ. Ũ fi vỹ tỹ Maria fi nĩ, Madalena he mũ tag fi. Jesus vỹ fi jagrẽ kórég tỹ 7 (ke) pan ja nĩ, ha mẽ. 3Kar ũ fi vỹ tỹ Joana fi nĩ gé. Cuza prũ fi vẽ, pã'i mág tỹ Herodes tũ ki rĩr tĩ ẽn prũ fi vẽ. Kar ũ fi vỹ tỹ Suzana fi nĩ gé. Kar ũ fag vỹ ti mré mũ mũ gé. Fag tũ hã tỹ fag tóg ti mỹ vẽjẽn han tĩ, ti mré mũ tĩ ag mỹ ke gé.
Nén fy kãme
(Mt 13.1-9; Mc 4.1-9)
4Kejẽn ũn e ag vỹ, vẽnh mãn mũ sir, ẽmã tỹ hẽn ri ke tá kãmũ kỹ. Kỹ tóg, ag kanhrãn kỹ ag mỹ: 5“kejẽn ũ tóg, nén ũ krãn mũ, gãr hẽn ri ke mũn. Hã ra ti fy ũ tóg ga kri vár mũ, kỹ ag tóg ti sãn mũ, kỹ sẽsĩ vỹ ko mũ gé sir. 6Ti fy ũ tỹ tóg, pãró kri krãn mũ. Kỹ tóg, mur mũ vẽ, hã ra tóg tóg mũ sir, ga tỹ sĩ nĩn kỹ. 7Ti fy ũ tỹ tóg, sónh kã ki krãn mũ. Kỹ sónh tóg, ti mré mur mũ, ti kri tóg rũm ke mũ sir. Kỹ tóg ter mũ sir, sónh kã ki. 8Ti fy ũ tỹ tóg ga há ki krãn mũ. Kỹ tóg mur há han mũ. Kanẽn há han tóg mũ. Kanẽ tỹ 100 (ke) han tóg mũ sir, ga há ẽn ki,” he tóg. Kỹ tóg prẽr mũ. “!..Ũ nĩgrẽg nỹtĩ tỹ tỹ jẽmẽ jé..!” he tóg, prẽr kỹ, Jesus ti.
Jesus tỹ nén fy kãmén
(Mt 13.10-23; Mc 4.10-20)
9Kỹ ti mré mũ tĩ ag tóg ti mỹ: “ne to ke nẽ, nén fy kãme tag ti?” he mũ. 10Kỹ tóg ag mỹ: “ãjag hã mỹ sóg, kãmén há han ke mũ, Topẽ tỹ tỹ ẽg pã'i nĩ ti,” he mũ. “Hã ra sóg ũ ag mỹ: tag ri ke ti nĩ, he tãvĩ han mũ, ũ tỹ ón kỹ mẽg mũ ag mỹ. Kỹ ag tóg mẽg mũ ra ki kagtĩg nỹtĩnh mũ. To jykrén ke tũ ag nĩ gé,” he tóg.
11“Topẽ vĩ vỹ, nén fy ri ke nĩ. 12Ũ ag tóg, Topẽ vĩ jẽmẽg tĩ. Ag tỹ jẽmẽ kar kỹ Japo tóg, ag mỹ tỹ tũ' he tĩ, Topẽ vĩ tỹ. Kỹ ag tóg sir, ti ki ge tũ nĩgtĩ. Krenkren ke tũ ag tóg nĩ sir. Kỹ ag tóg ga kri vár mũ ẽn ri ke nỹtĩ. 13Kar ũ ag tóg tỹ pãró kri krãn kỹ nỹtĩ ẽn ri ke nỹtĩ gé. Mẽg ag tóg tĩ vẽ. Kỹ ag tóg: he, he tĩ. Ag mỹ tóg sér tĩ sir. Hã ra ag tóg tỹ, ẽkré jãre tũ ri ke nỹtĩ mỹr, ha mẽ. Mũ sĩ han ag tóg mũ, Topẽ mré. Nén ũ jagy kutẽ kỹ ag tóg, vãhã tovãnh mũ sir. 14Kỹ ti fy tỹ sónh kã ki krãn kỹ nỹtĩ vỹ, ge nỹtĩgtĩ gé. Topẽ vĩ mẽg ag tóg tĩ gé. Hã ra ag tóg, ag rãnhrãj hã tỹ vẽnh kutãn tĩ. Ón kỹ ag tóg riko nỹtĩ sór mũ, ag rãnhrãj to. Nén kar to ag tóg én tĩ, kỹ tag hã ne ag kókég tĩ'. Hã kỹ ag tóg, Topẽ vĩ mĩ ẽkrén mãn tũ nĩ sir. Kanẽn há han tũ ag tóg nĩ gé sir. 15Kar ga há ki krãn kỹ nỹtĩ ag vỹ, ge nỹtĩgtĩ gé. Jẽmẽg ag tóg tĩ. Kỹ ag tóg, ag fe tỹ ti ki rã mũ sir, ag tỹ ti vĩ ki króm jé. Kỹ ag tóg, kanẽn há han mũ sir. Komẽr hã ag tóg, kanẽn há han', han', he mũ, ag tỹ nén ũ jagy vég mũ ra,” he tóg.
Néj gru kãme
(Mc 4.21-25)
16Kỹ tóg: “ẽg tỹ néj grug kỹ ẽg pijé, kẽj krẽm fẽg tĩ',” he mũ. “Ẽg pijé, kỹmỹ krẽm fẽg tĩ gé'. Ti fẽg jafã kri ẽg tóg fẽg tĩ. Kỹ vẽnh kar tóg vég mũ sir, ag tỹ ẽg ĩn kã ra kãgen kỹ. 17Ge ti nĩ, sỹ ãjag mỹ nén tó mũ kar ti. Ver ãjag tóg to jykrén tũ nĩgtĩ. Ãjag tỹ vãhã to jykrén kãn ke vẽ. Ver ãjag tóg ki kagtĩg nỹtĩ. Ãjag tỹ vãhã ki kanhrãn kãn ke vẽ,” he tóg. 18“Hã kỹ jẽmẽ há han nĩ. Ũ tỹ to jykrén há han kỹ tóg, ũ to jykrén mãn', ũ to jykrén mãn', henh ke mũ. Ũ tỹ inh vĩ to jykrén há han tũ nĩn kỹ tóg ti mỹ tũ' he kãn ke mũ, ti tỹ nén ũ to jykrén mũ kar ẽn mré hã,” he tóg.
Jesus mré ke pẽ fag
(Mt 12.46-50; Mc 3.31-35)
19Kejẽn Jesus mỹnh fi vỹ ti venh kãtĩ mũ, ti jãvy ag mré. Hã ra fag tóg ti ki junjun tũ nĩ, ti pénĩn fór tãvĩ tĩn kỹ. 20Kỹ ũ tóg ti mỹ: “ã mỹnh fi vỹ re tá jẽ, ã jãvy ag mré,” he mũ. 21Hã ra Jesus tóg ti mỹ: “mẽ',” he mũ. “Hã ra ũ tỹ Topẽ vĩ jẽmẽg mũ fag vỹ tỹ inh mỹnh pẽ fi ri ke nỹtĩ, inh jãvy pẽ ri ke ke gé, ũ tỹ Topẽ vĩ ki króm mũ ag,” he tóg.
Jesus tỹ kóho tỹ tũ' he
(Mt 8.23-27; Mc 4.35-41)
22Kejẽn tóg canoa kã ra rã mũ, ti mré mũ tĩ ag mré. Kỹ tóg ag mỹ: “mũ nỹ, goj nig mág kafã ũ ra,” he mũ. 23Ag mũn kỹ Jesus tóg nũr mũ sir. Hã ra vãhã kóho jũ tóg kraug he mũ sir. Kỹ goj tóg canoa kã ki krém ke mũ. Ti fãn sór tóg mũ sir. Kỹ tóg ag mỹ ag kãgter ha mẽ tĩ. 24Kỹ ag tóg ti rĩn mũ sir. “Senhor’, Senhor’, ẽg mỹ tóg ẽg kãgter ha mẽ tĩ,” he ag tóg. Kỹ tóg rĩr mũ sir. Kỹ tóg kóho mỹ vĩ mũ, goj mỹ ke gé. Kỹ tóg krỹg' he mũ sir, kóho ti. Katy' he tóg mũ sir. 25Kỹ tóg ag mỹ: “ãjag tỹ ne jé inh ki ge há han tũ nĩ nẽ?” he mũ. Kỹ tóg ag mỹ e tĩ. Kanẽ jur ag tóg mũ, kỹ ag tóg jagnẽ mỹ: “ti jykre tóg ẽg mỹ e tĩ,” he mũ. “Kóho mỹ tóg vĩ mũ, kỹ tóg ki ke mũ, goj ti ke gé,” he ag tóg.
Jesus tỹ ũn jagrẽ kórég tỹ há' he
(Mt 8.28-34; Mc 5.1-20)
26Kỹ ag tóg Gerasa ag jamã tá junjun mũ sir. Goj nig mág kafã ũ tá tóg nĩ, ga tỹ Galiléia to hã. 27Kỹ tóg canoa kã ki kãkutẽ mũ. Hã ra ũn jagrẽ kórég tỹ hẽn ri ke tóg ti kato tẽ mũ. Si há tóg tĩ ha, ti jagrẽ e nĩ ti. Kỹ tóg kur tũ nĩ. Kator tóg nĩ. Ðn tũ ti nĩ gé. Vẽnh kej tá tóg jẽgtĩ, pãró tỹ vẽnh kej tá. 28Ẽn tóg ti kato tẽ kỹ ti krẽm mũg ke mũ. Prẽr kỹ tóg: “!..ã isỹ hẽ ri kenh mũ, Jesus’..!” he mũ. “!..Kynhmỹ Topẽ kósin'..!” he tóg. “!..Ã mỹ sóg to vĩnh mũ, ã tỹ inh vóg kónãn tũ nĩ jé..!” he tóg. 29Hã ra Jesus tóg Nén-Kórég ag mỹ: “ti ki pa jẽg,” he ja nĩ, hã kỹ tóg prẽr mũ. Ti kãgmĩ tỹ hẽn ri ke han ja ag tóg nĩgtĩ, Nén-Kórég ag. Kỹ ti mré ke ag tóg corrente tỹ ti se ja nĩgtĩ gé, ti mrĩnh kỹ, ti nĩgé, ti pẽn ke gé. Hã ra tóg ti se ja kykym kãn ja nĩgtĩ. Kỹ Nén-Kórég ag tóg ẽmã tũ ja ra ti pére mũ ja nĩgtĩ.
30Kỹ Jesus tóg ti mỹ: “ã jiji hẽ ri ke tĩ?” he mũ. Kỹ tóg: “Mil,” he mũ, Nén-Kórég tỹ hẽn ri ke ag tỹ tỹ ti jagrẽ nỹtĩn kỹ.
31Kỹ ag tóg Jesus mỹ to vĩ mũ, ti tỹ nũgme ra ag jẽgnẽg tũ nĩ jé, inferno ra. 32Hã ra porko e ag tóg tá jẽg nỹtĩ nĩ, pãnónh tá. Kỹ Nén-Kórég ag tóg Jesus mỹ to vĩ e han mũ, ti tỹ ag mỹ: “ha porko ki gejẽg, ge kỹ,” he jé. Kỹ tóg ag mỹ ke mũ. 33Kỹ ag tóg ti ki kãpa mũ sir. Porko ag ki ag tóg ge mũ sir. Kỹ porko ag tóg rán ki re mũ. Goj ki ag tóg vár mũ sir. Nãgnãr kỹ ag tóg tũ' he kãn mũ sir.
34Kỹ ũ tỹ porko ki rĩr tĩ ag tóg pétẽ mũ, ẽmã ra. Tá ag tóg kãmén mũ, ẽmã kãsir mĩ hã ke gé. 35Kỹ tá ke ag tóg ra mũ kãn mũ, nén ẽn ve jé. Ag tỹ Jesus tá junjun kỹ ag tóg ti vég mũ sir, ũn jagrẽ kórég ja ẽn ti. Nĩ tóg mũ ha, Jesus rã hã. Kur tóg nĩ ha, krĩ há tóg nĩ ha. Kỹ ag fe tóg jũrũn ke mũ sir. 36Ũ tỹ Jesus tỹ ti tỹ há' he mũ vég mũ ẽn ag tóg kãmén kãn mũ sir. 37Gerasa tá ke kar ag tóg kanẽ jur nỹtĩ. Hã kỹ ag tóg ti mỹ: “ã tĩg kỹ tóg ẽg mỹ há tĩnh mũ,” he mũ. Kỹ tóg canoa kã ra rã kỹ tĩ mũ, ti mré mũ tĩ ag mré. 38Kỹ ũn jagrẽ kórég ja tóg ti mỹ to vĩ e han mũ, “nhỹ ã mré tĩg mũ,” hen kỹ. Hã ra Jesus tóg ti pére tĩg jãvãnh nĩ. 39“Ã jamã ra vỹn ké,” he tóg ti mỹ. “Tá ag mỹ kãmén nĩ, Topẽ tỹ ã tỹ há' he tag ti,” he tóg. Kỹ tóg ẽmã kar mĩ tĩ mũ. Ag mỹ tóg kãmén kãn mũ sir.
Jesus tỹ Jairo kósin fi rĩn mãn
(Mt 9.18-26; Mc 5.21-43)
40Kỹ Jesus tóg vỹn ke mũ, nig kafã ũ ra. Kỹ tóg vẽnh e ẽn mỹ sér tĩ. Ti jãvãnh ja ag tóg nĩ. 41Kỹ vãhã ũ tóg ti ki jun mũ. Israel ag vẽnh kanhrãn jafã to pã'i vẽ, ti jijin hã vỹ: Jairo, he mũ. Ẽn tóg ti mỹ to vĩ mũ, ti tỹ ti ĩn ra tĩg jé. 42Ti kósin pir fi vỹ kaga jagy nỹ, kỹ fi kaga ẽn vỹ fi tén sór mũ. Kri prỹg tỹ 12 (ke) fi nĩ. Kỹ tóg ti mré tĩ mũ.
Ti tĩg kỹ ũn e ag tóg ti nón mũ mũ. 43Kỹ ag kã ũ fi tóg ag pétẽm mũ. Kyvénh krỹg ja tũ han kỹ fi tóg nĩ, prỹg tỹ 12 (ke) ki. Hã ra médico ag tóg fi kaga tỹ hẽ ri ke ja tũ nĩ. 44Ẽn fi tóg ti nón ti kur tóv mẽg mũ. Kỹ vẽsỹmér fi kyvénh tóg tũ' he mũ. 45Kỹ Jesus tóg: “ũ nỹ inh kur mẽ?” he mũ. Hã ra vẽnh kar tóg: “ha',” he mũ. Kỹ Pedro tóg: “ã kur mẽ kãn ẽg tóg, hã ra ã tóg: “ũ nỹ inh kur mẽ?” he mũ,” he mũ. 46Hã ra tóg: “vó, ũ tóg inh kur mẽ,” he mũ.“Inh kuprĩg vỹ inh mỹ tó, hã kỹ sóg ki kanhrãn mũ,” he tóg. 47Kỹ ũn tỹtá ẽn fi tóg: “Ti hỹn inh vé,” he mũ. Hã kỹ fi tóg jũrũn ke mũ. Ti krẽm fi tóg grĩnh ke mũ. Vẽnh kar rĩnve fi tóg ti mỹ tó kãn mũ.“Isỹ ã kur mẽ kỹ sóg vẽsỹmér há' hé,” he fi tóg. 48Kỹ tóg fi mỹ vĩ há han kỹ: “inh kósin', ã tỹ inh ki rã kỹ ã tóg há' hé. Ha tĩg, jatun mỹ,” he mũ.
49Ti tỹ ver fi mré vẽmén jẽ ra ũ tóg jun mũ, pã'i tỹ Jairo ẽn ĩn tá. “Ã kósin fi vỹ hur tũg. Hã kỹ ti kutãn mãn tũg nĩ,” he tóg.
50Hã ra tóg mẽg mũ, kỹ tóg ti mỹ: “ã fe vóg tũg nĩ,” he mũ. “Inh vĩ hã kri fim nĩ, kỹ ã kósin fi tóg há' henh mũ,” he tóg. 51Kỹ ag tóg mũ kỹ Jairo ĩn tá junjun mũ sir. Kỹ tóg: “Pedro hã vỹ inh mré rãnh mũ, João ke gé, João kãke tỹ Tiago ke gé, gĩr fi panh ke gé, fi mỹnh fi ke gé,” he mũ. 52Hã ra ũn e fag vỹ tá nỹtĩ gé. Kygfỹ fag tóg mũ. Kỹ Jesus tóg fag mỹ: “kygfỹ tũg ra,” he mũ. “Fi pijé ter mũ'. Fi nũr vẽ,” he tóg. 53Hã ra fag tóg ti to é he mũ. Fi ter ki kanhró fag tóg nỹtĩ, hã kỹ fag tóg ti nyg mũ. Hã ra tóg fag mỹ: “re ra pajẽg,” he mũ.
54Fag pa kar kỹ Jesus tóg fi nĩgé kãgmĩg mũ. Kỹ tóg prẽr mũ sir. “!..Nĩ ra, já..!” he tóg, jamã há ra. 55Kỹ fi kuprĩg tóg fi to vỹn ke mũ. Nĩ fi tóg mũ sir, mỹr, ha mẽ, ũn ter mũ ẽn fi. Kỹ Jesus tóg fag mỹ: “ha fi mỹ vẽjẽn ven,” he mũ. 56Kỹ tóg fi han mũ fag mỹ e tãvĩ tĩ sir. Hã ra tóg fag mỹ: “ker ũ mỹ fi rĩr mãn tag tó hẽ',” he mũ.
Currently Selected:
Lucas 8: kgp
Highlight
Share
Copy
Want to have your highlights saved across all your devices? Sign up or sign in
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido
