Lucas 6
6
Vẽnhkán ke kurã ki vẽjykre
(Mt 12.1-8; Mc 2.23-28)
1Kejẽn tóg vẽnhkán ke kurã ki trigo kré mĩ tĩ mũ, ti mré mũ tĩ ag mré. Kỹ ag tóg trigo mó ẽn tỹ kam ke mũ sir. Ag nĩgé tỹ rynhranh kỹ ag tóg ti kanẽ ko mũ sir. 2Hã ra Fariseu ũ ag tóg ag vég mũ. Ag mỹ vẽnh rãnhrãj vẽ, ag tỹ trigo rynhranh mũ ẽn ti. Hã kỹ ag tóg ag mỹ: “ãjag ne tóg nén han ke tũ han mũ nĩ', vẽnhkán ke kurã ki',” he mũ.
3Hã ra tóg ag mỹ: “vó,” he mũ. “Ag kókĩnkĩr vẽ mỹr,” he tóg. “Davi to jykrén nĩ, ti mré mũ tĩ ag to ke gé. Ti kókĩr kỹ tóg ti tỹ nén han ke tũ han gé, hã ra Topẽ pijé ti to jũ mũ'. 4Topẽ ĩn kã ra tóg rã, Davi ti. Tá tóg Topẽ jamĩ ẽn kó. Ti tỹ konh ke tũ vẽ vẽ, Topẽ tũ ki rĩr tĩ ag hã tỹ konh ke vẽ vẽ. Hã ra tóg kó, ti mré mũ tĩ ag mỹ tóg vẽnh kãpópãm gé. Rán kỹ tóg nĩ nĩ mỹr,” he tóg. 5Kỹ tóg ag mỹ: “tỹ sóg vẽnhkán ke kurã to pã'i nĩ mỹr,” he mũ. “Tỹ sóg ẽprã ke fi kósin nĩ,” he tóg.
Jesus tỹ vẽnhkán ke kurã ki ũ tỹ há' he
(Mt 12.9-14; Mc 3.1-6)
6Vẽnhkán ke kurã ũ ki tóg vẽnh kanhrãn jafã krẽm ag kanhrãn mũ. Tá ũ tóg nĩ. Ti nĩgé vỹ tóg ja nĩ. 7Kỹ ẽg kanhrãn tĩ ag tóg Jesus tỹ rĩr mũ, Fariseu ag ke gé. “Ti mỹ ti tỹ há' he sór tũ, tỹ vẽnhkán ke kurã ra'? Ti tỹ ti tỹ há' he kỹ ẽg tóg pã'i ag mỹ ti kãmén mũ,” he ag tóg.
8Hã ra Jesus tóg ag tỹ nén to jykrén mũ ki kanhró nĩ. Kỹ tóg ũn nĩgé tóg ẽn mỹ: “kunĩg,” he mũ. “Tag kã jẽnh kãtĩg,” he tóg ti mỹ. Kỹ tóg kãtĩg kỹ kã jẽ mũ sir. 9Kỹ tóg ag mỹ: “sỹ ãjag ki jẽmẽnh ke,” he mũ. “Vẽnhkán ke kurã ki ẽg hỹn ne han mũ', ẽg tỹ Topẽ vĩ ki króm jé? Ẽg mỹ hỹn nén ũ há han mũ'? Ẽg mỹ hỹn nén ũ kórég han mũ'? Ẽg mỹ ũ kren han mũ hỹn'? Ẽg tỹ ũ tén kỹn mỹ há nĩnh mũ hỹn'?” he tóg. Hã ra ag tóg ti mỹ nén ũ tó tũ nĩ.
10Kỹ tóg ag ki ẽvãnh kãn kỹ ũn nĩgé tóg ẽn mỹ: “ã nĩgé tỹ krỹg hé,” he mũ. Kỹ tóg tỹ krỹg he mũ sir. Ti tỹ tỹ krỹg he kỹ tóg há' he mũ, ti nĩgé tóg ẽn ti. 11Kỹ tóg vẽnh kar mỹ e tĩ. Ag fe tóg gỹm ke mũ, kỹ ag tóg jagnẽ mỹ: “ẽg ti tỹ hẽ ri kenh mũ hỹn',” he mũ, “ti kãgmĩnh mũ, vó?” he ag tóg.
Jesus tỹ apóstolo ag kuprẽg
(Mt 10.1-4; Mc 3.13-19)
12Ẽn kã tóg kejẽn pãnónh ra tĩ mũ, Topẽ mré vẽmén jé. Kuty ẽn kã tóg Topẽ mré vĩ nĩ ki kurãg mũ. 13Tỹ vaj kỹ tóg ti mré mũ tĩ ag jé prẽr kãn mũ, kỹ tóg ag kã mĩ ũ tỹ 12 (ke) ag hã kuprẽg mũ. Ag to tóg: “sỹ ũn vin mũ ag,” he mũ, hã vỹ: apóstolo, he mũ. 14Ag hã vẽ, ha mẽ: Simão, ti jiji ũ hã vỹ: Pedro, he mũ, ti jãvy tỹ André ke gé, Tiago ke gé, ti jãvy tỹ João mré, Filipe ke gé, Bartolomeu ke gé, 15Mateus ke gé, Tomé ke gé, Tiago ke gé, Alfeu kósin tag ti, Simão ke gé, ag tỹ ũ to: Zelote, he mũ tag ti, 16Judas ke gé, Tiago kósin tag ti, Judas Iscariotes ke gé, ũ tỹ Jesus vatánh tá pã'i ag mỹ ti kãmén ke mũ tag ti.
Jesus tỹ ũn e ag ki rĩr
(Mt 4.23-25)
17Kỹ Jesus tóg ag mré pãnónh ẽn tá kãtére mũ sir, kỹ tóg kyjer tá jẽ nĩ. Ti mré mũ tĩ tỹ hẽn ri ke ag vỹ tá nỹtĩ gé, fag ke gé. Ũ tỹ hẽn ri ke ag vỹ ti ki junjun ja nĩgtĩ, ga tỹ Judéia tá kãmũ kỹ, ẽmã tỹ Jerusalém tá ke gé, ẽmã tỹ Tiro tá ke gé, Sidom tá, goj kafã tũ fyr tá kãmũ kỹ ke gé. Hã kỹ tóg fór pẽ tãvĩ nĩ. 18Kỹ tóg ũn jagrẽ kórég ag tỹ há' he mũ, ag jagrẽ kórég pan kỹ, fag mré hã. 19Kỹ vẽnh kar vỹ ti kã krỹ' he sór mũ sir, hã jé ag tóg ti ki junjun mũ. Kỹ ũ tỹ ti kã krỹ' he mũ ẽn ag vỹ há' he kãn mũ, ti tỹ ti jykre tar tỹ ag tỹ há' hen kỹ.
Jesus tỹ ag kanhrãn
(Mt 5.1-12)
20Kỹ tóg ti mré mũ tĩ ag ki ẽvãnh mũ, kỹ tóg ag mỹ: “Topẽ vỹ ãjag ve há han mũ, ãjag tỹ: “kórég ẽg tóg nỹtĩ,” hen kỹ,” he mũ. “Kỹ ãjag tóg Topẽ tỹ tỹ ẽg pã'i nĩ venh ke mũ,” he tóg.
21“Topẽ vỹ ãjag ve há han mũ, ãjag tỹ: inh kókĩr ri ke tóg tĩ, sỹ vẽjykre kuryj ve sór tĩ ẽn ti, hen kỹ. Kỹ ãjag tóg venh ke mũ,” he tóg.
“Topẽ vỹ ãjag ve há han mũ, ãjag vẽsỹrénh mũn kỹ, ẽprã. Ãjag mỹ tóg sér tĩnh mũ, tá,” he tóg.
22“Topẽ vỹ ãjag ve há han mũ, ag tỹ isugrĩn ãjag to kórég nỹtĩn kỹ, ãjag mỹ: “ha mũ jẽg, hen kỹ. Ag tỹ isugrĩn ãjag mỹ vĩ kónãn kỹ tóg há tĩ, ag tỹ ón kỹ ãjag jykre kórég tó kỹ. Tỹ sóg ẽprã ke fi kósin nĩ mỹr,” he tóg. 23“Mỹ sér nỹtĩm nĩ, krĩ kuprã nỹtĩm nĩ, ag tỹ isugrĩn ãjag vóg kónãn mũ ra. Kỹ ãjag tóg kanhkã tá nén ũ há kar venh ke mũ, vẽnh kaja jé, isugrĩn. Ge ja ag tóg nĩgtĩ, ũ tỹ ãjag vóg kónãn mũ ag jógjóg ag. Vãsỹ Topẽ vĩ tó tĩ ag vóg kónãn he ja ag tóg nĩgtĩ gé,” he tóg.
24“Hã ra Topẽ vỹ ãjag ve kónãn mũ, ãjag tỹ: “há ẽg tóg nỹtĩ,” hen kỹ. Ga kri mũn kỹ ãjag tóg nén ũ há vég tĩ, kỹ ãjag tóg kanhkã tá jun ke tũ nĩ,” he tóg.
25“Topẽ vỹ ãjag ve kónãn mũ, ti tỹ ón kỹ ãjag mỹ sér tĩn kỹ, ẽprã, ãjag tỹ vẽjykre kuryj ve sór tũ nỹtĩn kỹ, ti tỹ ãjag mỹ ãjag kókĩnkĩr ri ke tũ nĩ kỹ, ẽprã. Kỹ ãjag tóg venh ke tũ nĩ. Vẽsỹrénh jé ãjag tóg ke mũ. Kỹ tóg ãjag kókĩnkĩr ri ke tĩnh mũ, tá. Kygfỹ jé ãjag tóg ke mũ,” he tóg.
26“Topẽ vỹ ãjag ve kónãn mũ, vẽnh kar tỹ ãjag to vĩ há han mũn kỹ. Ãjag mỹ ti há tĩ, hã ra tóg Topẽ mỹ kórég nĩ. Ge ja ag tóg nĩgtĩ, ũ tỹ ãjag mỹ vĩ há han mũ ag jógjóg ag, ón kỹ Topẽ vĩ tó tĩ ẽn ag mỹ, vãsỹ. Ag mỹ ag tóg vĩ há han ja nĩgtĩ gé. Ag ri ke ãjag tóg nỹtĩ, vẽnh kar tỹ ãjag mỹ vĩ há han kỹ. Hã kỹ tóg ãjag ve kónãn mũ, Topẽ ti,” he tóg.
Ẽg tỹ ẽg kato tẽ mũ ag to há nỹtĩnh ke
(Mt 5.38-48)
27“Ũ tỹ ãjag kato vãsãnsãn mũ ẽn ag to fe nỹtĩm nĩ, inhhã. Ũ tỹ ãjag to jũ mũ ag mỹ nén ũ há han nĩ jãvo. 28Ũ tỹ ãjag mỹ vĩ kónãn mũ ag mỹ vĩ há han nĩ gé. Ũ tỹ ãjag mỹ féfén mũ ag to Topẽ mré vĩm nĩ gé. 29Ũ tỹ ãjag jamẽ ki tãnh kỹ ti mỹ ãjag jamẽ ũ ven nĩ gé, ti tỹ ãjag mỹ ki tãnh jé gé. Ũ tỹ ãjag pãritó mãn sór kỹ ti mỹ ãjag camisa mré nĩm nĩ gé. 30Ũ tỹ ãjag mỹ nén ũ to: “inh mỹ nĩm, hen kỹ ti mỹ nĩm nĩ. Ũ tỹ ãjag tỹ nén ũ mãn kỹ ti mỹ: “inh mỹ isũ nĩm,” he tũg nĩ. 31Ãjag tỹ ũ to: “ti tỹ inh mỹ tag han ra tóg há tĩ vẽ,” hen kỹ inhhã ti mỹ han nĩ, fi mỹ ke gé,” he tóg.
32“Ũ ag tóg ãjag to há nỹtĩ. Ãjag tỹ tag ag hã to há nỹtĩn kỹ tóg tỹ nén ũ tũ nĩ ver. Vẽnh kar vỹ ge nỹtĩ gé. Ũ tỹ ag to há nỹtĩ ẽn ag hã to ag tóg há nỹtĩgtĩ gé, vẽnh kato. Hã ra tóg tỹ nén ũ tũ nĩ ver. 33Ũ ag tóg ãjag mỹ vĩ há han tĩ. Ãjag tỹ ẽn ag hã mỹ vĩ há han kỹ tóg tỹ nén ũ tũ nĩ ver. Ge ag tóg nỹtĩ gé, Topẽ vĩ mranh tĩ ag. Ãjag tỹ ag mỹ vĩ há han kỹ ag tóg ãjag mỹ vĩ há han mũ gé, vẽnh kato. Há ti nĩ, hã ra tóg tỹ nén ũ tũ nĩ ver. 34Ũ ag vỹ, ãjag tỹ ag mỹ prestar hen kỹ ãjag mỹ nĩm mãn mũ, ãjag tũ ti. Ãjag tỹ ag hã mỹ prestar he mãn kỹ tóg tỹ nén ũ tũ nĩ ver. Topẽ vĩ mranh tĩ ag vỹ ge nỹtĩ gé. Ãjag tỹ ag mỹ nĩm mãn kỹ ag tóg ãjag mỹ prestar he mãn mũ sir, ãjag tũ ti. Há ti nĩ, hã ra tóg tỹ nén ũ tũ nĩ ver.
35Ag jãvo ũ tỹ ãjag kato vãsãnsãn mũ ag to há nỹtĩm nĩ, ha mẽ. Vẽnh kar mỹ prestar hem nĩ, ag tỹ ãjag mỹ ãjag tũ nĩm tũ hã ra. Kỹ ãjag tóg kanhkã tá venh ke mũ, ãjag tỹ ũri nén han mũ tag ri ke ti. Hã ki ãjag tóg tỹ Topẽ krẽ nỹtĩ, ãjag tỹ ti ri ke han kỹ. Ti hã ne vẽnh kar mỹ vĩ há han kãn tĩ ver', ũn jykre kórég kar ag mré hã. 36Vẽnh kar jagãgtãn kãn nĩ, ẽg jóg ri ke,” he tóg.
Ẽg tỹ kãnhmar ũ to vĩ kónãn ke tũ
(Mt 7.1-5)
37“Kãnhmar ũ to vĩ kónãn tũg nĩ, kỹ Topẽ vỹ ãjag to vĩ kónãn ke tũ nĩ gé. Kãnhmar ũ to: “kórég ti nĩ,” he tũg nĩ, kỹ Topẽ vỹ ãjag to: “kórég ti nĩ,” henh ke tũ nĩ gé. Vẽnh kar mỹ vẽnh pãte fón nĩ, ke tũ nĩ mũ ra Topẽ vỹ ãjag mỹ vẽnh pãte fón ke tũ nĩ gé. 38Ag mỹ nén ũ há kar nĩm nĩ, kỹ Topẽ vỹ ãjag mỹ nén ũ há kar nĩm ke mũ gé sir, hã ra tóg ãjag mỹ ẽn kãfór nĩm ke mũ, nén ũ há kar tỹ. Hỹ, ge ti nĩ. Ãjag tỹ ũ mỹ nén ũ há han kỹ Topẽ vỹ ãjag mỹ nén ũ há han ke mũ gé. Ãjag tỹ ũ mỹ nén ũ kórég han kỹ tóg ãjag mỹ hã ri ke han ke mũ gé,” he tóg.
39Kỹ tóg ag kanhrãn kỹ ag mỹ: “tag ri ke ti nĩ,” he mũ gé. “Ũn kyvó tỹ ũn kyvó ũ mỹ: sỹ ã pére tĩg ke vẽ, hen kỹ ag tóg kãgnó ki vár kãn ke mũ. 40Aluno pijé ti kanhrãn tĩ kãfór nĩnh mũ'. Ti tỹ kanhrãn há han kỹ tóg kejẽn ti kanhrãn tĩ ri ke nĩnh mũ. 41Jykre kórég mág ãjag tóg nỹtĩ, hã ra ãjag régre jykre pãno sĩ ẽn tóg ãjag mỹ kórég nỹ'. 42Kỹ ãjag tóg ti mỹ: “sỹ ã mỹ ã jykre kórég kurynh há tóg tĩ,” he tĩ', ãjag tỹ ãjag jykre pãno tãvĩ ẽn kurynh jãvãnh hã ra. Ke tũg ra. Ke tũ nĩ mũ ra ãjag tóg jykre régre nỹtĩ. Ãjag jykre kurynh vén nĩ, kar ãjag tóg ãjag régre ag jykre kurynh há han mũ,” he tóg.
Ẽg jykre tỹ ka há ri ke nĩ
(Mt 7.16-20; 12.33-35)
43“Ha vé, ka há pijé, kanẽ kórég han tĩ'. Kỹ ka kórég pijé, kanẽ há han tĩ gé'. 44Ẽg tỹ ti kanẽ ve kỹ ẽg tóg: ũn kanẽ ko há ja vẽ, henh ke mũ. Ke tũ nĩn kỹ ẽg tóg: ũn kanẽ ko vãnh ja vẽ, henh ke mũ. Sónh to ẽg tóg, pẽnva vég tũ nĩgtĩ mỹr', kar ẽg tóg, vãnh tỹ jóhó to uva vég tũ nĩgtĩ gé. 45Ge tóg nỹgtĩ, ẽg jykre ti. Ẽg jykre há nĩn kỹ ẽg tóg, nén ũ há kar to jykrén tĩ. Kỹ ẽg tóg, jagnẽ krĩn há han tĩ gé sir. Jãvo ẽg tỹ jykre kórég nĩn kỹ ẽg tóg, nén ũ kórég kar to jykrén tĩ. Kỹ ẽg tóg, jagnẽ krĩn kónãn tĩ gé sir. Hỹ, ge ti nĩgtĩ. Ẽg tỹ nén to jykrén tĩ ẽn hã kãmén ẽg tóg tĩ, jagnẽ mỹ,” he tóg.
Ðn nũna gunh gunh kãme
(Mt 7.24-27)
46“Ãjag ne tóg inh mỹ: Senhor', he tĩ'. Hã ra ãjag tóg isỹ ãjag mỹ nén tó mũ ẽn han vãnh nỹtĩgtĩ. Kỹ tóg vẽnh mỹ nỹ. 47Ãjag tỹ inh ki ge kỹ, inh vĩ ki króm kỹ ãjag tóg sir, tag ri ke nỹtĩ, ha mẽ. 48Ũ tóg, ti tỹ ĩn han jé kũm tĩ, ga kã há tá. Kỹ tóg ti nũna gunh gunh mũ sir. Kỹ vãhã goj tóg var mũ, kỹ tóg, ĩn kri rũm ke mũ. Hã ra tóg kókég tũ nĩ, goj ti. 49Ãjag tỹ inh vĩ ki króm tũ nĩn kỹ tóg sir, tag ri ke nĩ, ha mẽ. Ũ tóg, ti tỹ ĩn han mũ ra krĩgmỹ ti nũna kafẽg mũ. Kỹ vãhã goj var ẽn vỹ, ti ĩn kri rũm ke mũ sir, kỹ tóg kutẽ mũ sir. Mráj kãn tóg mũ sir, ti nũna tỹ krĩgmỹ nỹtĩn kỹ. Ge ti nĩ, ũ tỹ inh vĩ jẽmẽ jãvãnh ẽn ti,” he tóg.
Currently Selected:
Lucas 6: kgp
Highlight
Share
Copy
Want to have your highlights saved across all your devices? Sign up or sign in
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido