Lucas 4
4
Jesus tỹ Topẽ vĩ mranh tũ
(Mt 4.1-11; Mc 1.12-13)
1 Jesus vỹ Topẽ kuprĩg tỹ jagrẽ nĩ. Hã kỹ tóg goj tỹ Jordão tá vỹn ke mũ, ti kype kỹ jẽn kỹ. Ti tĩg kỹ Topẽ kuprĩg vỹ ti krĩn mũ. 2Kỹ tóg ẽmã tũ ja ra tĩ mũ sir, ga kórég ra. Tá tóg kurã tỹ 40 (ke) han mũ, ẽmã tũ ja tá. Kỹ Japo vỹ ti tỹ ti jóg vĩ mranh han sór mũ, hã ra Jesus tóg ke tũ nĩ. Jẽg tũ tóg nĩ, kurã tỹ 40 (ke) ki. Kỹ tóg kókĩr mũ sir.
3Ti kókĩr nĩn kỹ Japo vỹ ti mỹ: “tỹ ã tóg Topẽ kósin nĩ mỹr. Hã kỹ pó tag tỹ ẽmĩ han nĩ, ã tỹ ko jé,” he mũ. 4Kỹ tóg ti mỹ: “hã ra tag tóg rán kỹ nĩ, ha mẽ: “ẽmĩ tãvĩ jamẽn kỹ ẽg rĩnrĩr tũ nỹtĩ, Topẽ vĩ hã jamẽn kỹ ẽg rĩnrĩr nỹtĩ.” Hã kỹ tóg sỹ ti vĩ mranh jãvãnh tĩ, ẽmĩ to,” he mũ.
5Kỹ tóg ti mré krĩ ra tãpry mũ. Kỹ tóg ti mỹ ga kar ven kãn mũ, ũ tỹ kri mũ kar ag ke gé. 6Kỹ tóg ti mỹ: “isũ vẽ mỹr,” he mũ. Japo ti. “Ã mỹ sóg tovãnh kãn sór mũ, ã tỹ tỹ vẽnh kar tag ag pã'i jẽ jé. Kỹ nén sĩnvĩ tag kar vỹ tỹ ã tũ nĩnh mũ. Ũ tỹ han mũ ẽn tỹ inh mỹ: “té,” hen kỹ sóg isỹ ũn kuprẽg mũ ẽn mỹ nĩm tĩ sir. 7Ã hã mỹ sóg tovãnh sór mũ ha, ã tỹ inh krẽm grĩnh ke kỹ inh mỹ: “Topẽ vỹ tỹ ã nĩ, hen kỹ,” he tóg. 8Kỹ tóg ti mỹ: “tag vỹ rán kỹ nĩ, ha mẽ: “ẽg pã'i tỹ Topẽ hã krẽm ẽg tóg ẽg jakrĩ tỹ grĩnh' ke tĩ, ti hã to ẽg tóg: Topẽ vẽ, he tĩ,” he tóg, Topẽ vĩ tỹ rán kỹ nĩ ki. Hã kỹ tóg sỹ mranh jãvãnh tĩ,” he tóg.
9Kỹ tóg ti mré tĩg mãn mũ, Jerusalém ra. Tá ag tóg Topẽ ĩn to jãpry kỹ ti nĩno tá nỹtĩ nĩ. Kỹ tóg tá Jesus mỹ: “Topẽ kósin vỹ tỹ ã nĩ,” he mũ.“ Kỹ ki hũm nĩ. 10Tag vỹ rán kỹ nĩ, ha mẽ: “ti tỹ jẽgnẽ jafã ag mỹ tóg tónh mũ, kỹ ag tóg ã ki rĩr ke mũ. 11Ag nĩgé tỹ ag tóg ã kãgmĩnh ke mũ, kỹ ã tóg rỹj ke tũ nĩ. Ã pẽn vỹ rỹj ke tũ nĩ gé,” he tóg, Topẽ vĩ tỹ rán kỹ nĩ ki. Kỹ jatun mỹ hũm nĩ,” he tóg. 12Kỹ tóg ti mỹ: “kỹ tag vỹ rán kỹ nĩ gé, ha mẽ,” he mũ. “Topẽ mỹ: ã mỹ ã tỹ nén tó ja ẽn han mũ vỹ? he tũg nĩ,” he tóg mũ gé, Topẽ vĩ tỹ rán kỹ nĩ ki. Hã kỹ sóg hũm ke tũ nĩ,” he tóg.
13Kỹ Japo vỹ ti tỹ nén tónh ke mũ ẽn tó kãn ja nĩ, hã kỹ tóg Jesus tovãnh mũ ver, ti tỹ kejẽn ti mré vĩ mãn jé, kurã ũ kã.
Jesus tỹ Galiléia tá ag kanhrãn
(Mt 4.12-17; Mc 1.14-15)
14Kỹ tóg tĩ mũ sir, Topẽ kuprĩg tỹ ti krĩn kỹ. Ga tỹ Galiléia ra tóg tĩ mũ. Kỹ vẽnh kar tóg ti kãme mẽ kãn mũ sir, ga ẽn tá ke kar ag. 15Kỹ tóg ag kanhrãn mũ sir, ag vẽnh kanhrãn jafã krẽm. Kỹ ti vĩ tóg ag mỹ e tĩ. Hã kỹ ag tóg ti to vĩ há han mũ sir.
Jesus tỹ Nazaré ra vỹn ke
(Mt 13.53-58; Mc 6.1-6)
16Kỹ tóg Nazaré tá jun mũ gé, ti tỹ hẽ tá mog ja ẽn tá. Kỹ tóg ti tỹ nén han tĩ ẽn han mũ. Vẽnh kán ke kurã ki tóg culto venh tĩ mũ. Tá tóg sir jẽgnẽ mũ, Topẽ vĩ rá to ke jé. 17Kỹ ag tóg ti mỹ Isaías tỹ rá jun mũ. Kỹ tóg livro kavãn kỹ to ke kỹ tag tó mũ, ha mẽ: 18“Topẽ kuprĩg vỹ inh krĩn mũ. Inh jagrẽ vẽ mỹr. “Ũn jagtar ag mỹ inh vĩ tóm nĩ,” he tóg inh mỹ. Inh jẽnẽg tóg mũ, isỹ ũn sigse kỹ nỹtĩ ag kygvãn jé, isỹ ũn kyvó ag tỹ ẽvãnh há han jé, isỹ ag tỹ ũn vóg kónãn mũ ag ki rĩr há han jé, ag jatu nỹtĩ jé, 19isỹ vẽnh kar mỹ: ũri ẽg jóg mág vỹ ẽg kren han sór mũ, he jé,” he tóg, Isaías ti, vẽnh rá ẽn ki. Hã to tóg ke mũ.
20To ke kar kỹ tóg ũ tỹ ki rĩr tĩ ẽn mỹ nĩm mãn mũ. Kỹ tóg nĩ mũ sir. Hã ra vẽnh kar tóg ti ki ẽvãnh mũ, ti vĩ mẽ jé. 21Kỹ tóg: “vãsỹ rán kỹ nĩ tag mẽ ãjag tóg,” he mũ. “Ũri ke vẽ. Inh hã to tóg tag rán ja nĩ, Isaías ti,” he tóg.
22Kỹ tóg ag mỹ e tĩ sir. “Ki hã tóg tó mũ,” he ag tóg mũ. Kỹ ag tóg ti to: “José kósin vẽ mỹr, ẽg mré ke ẽn, hã ra tóg ẽg kãfór nĩ sór mũ,” he mũ. 23Kỹ Jesus tóg ag mỹ: “ãjag hỹn iso jykrén kónãn sór mũ,” he mũ. “Médico mỹ ẽg tóg: kur vẽsỹ há' hé,” he tũ nĩgtĩ. Ãjag hỹn inh mỹ: ẽmã tỹ Cafarnaum tá ã tóg ũn kagyga ag tỹ há' hé, kỹ kur tag ki ẽg tỹ há' he gé, ã tỹ vẽnh kar tỹ há' he sór nĩn kỹ, he sór mũ,” he tóg.
24Kỹ tóg ag mỹ: “ti jamã tá ke ag tóg Topẽ vĩ tó tĩ to é he tĩ',” he mũ. “Hã kỹ ãjag tóg iso é he tĩ gé. 25Ha mẽ. Elias to jykrén nĩ. Ti tỹ ga kri tĩ mũn kã Topẽ tóg ti mỹ ta kutẽ vãnh han ke tó ja nĩgtĩ. Kỹ ta tóg kutẽ vãnh han mũ, prỹg tãgtũ kri kysã tỹ 6 (ke) ki. Kỹ tóg prỹg tĩ sir, ga ẽn mĩ, vẽjẽn tóg tũ' he mũ sir. 26Kỹ tóg Elias jẽnẽ, ti tỹ ẽmã tỹ Sarepta ra tĩg jé, Sidom to hã. Tá fóg ũ fi tóg nĩ nĩ, ũn mén ter ja fi. Fi hã mré tóg jẽg mũ sir. Topẽ tỹ fi hã to ti jẽnẽ ja vẽ, ti tỹ fi kren han jé. Elias jamã tá fag tóg e ja nỹtĩgtĩ gé, ũn mén ter ja fag. Hã ra Topẽ tóg fóg ẽn fi hã to ti jẽnẽ ja nĩgtĩ,” he tóg.
27“Kỹ Eliseu to jykrén nĩ gé, vãsỹ Topẽ vĩ tó tĩ ẽn to. Ti tỹ ga kri tĩ mũn kã ũ tỹ vẽnh kaga kren vãnh han mũ ag tóg e ja tĩgtĩ gé. Hã ra ag tóg ti mỹ to vĩ ja tũ nĩgtĩ, ti tỹ ag tỹ há' hen jé. Kuvar há tá fóg tóg kãtĩg ja nĩgtĩ, Naamã ti, ga tỹ Síria tá. Kỹ ẽn hã ne Eliseu mỹ to vĩ kỹ há' he ja nĩgtĩ, inhhã. Ge ãjag tóg nỹtĩgtĩ, iso,” he tóg.
28Kỹ ũ tỹ ti vĩ mẽg mũ ag fe tóg gỹm ke mũ sir, Jesus to. 29Jẽgjẽg nẽgnẽ kỹ ag tóg ti pãnfón kãpa mũ sir. Ag tỹ kãgnó ki ti fón sór vẽ, ti tỹ ki kutẽ kỹ ter jé sir. Nazaré vỹ pãnónh tá nĩ, ag jamã ti. 30Hã ra Jesus tóg ag fĩn rãm kỹ ag ré kỹ tĩ mũ. Ti tỹ ag tóg hẽ ri ke tũ nĩ sir. Ti vĩ kri ag tóg fi jãvãnh nỹtĩ, ti jamã tá ke ag.
Jesus tỹ vẽjagrẽ kórég kutẽm
(Mc 1.21-28)
31Kỹ tóg Cafarnaum ra tĩ mũ. Tá jun kỹ tóg vẽnh kán ke kurã ki ag kanhrãn mũ. 32Kỹ ti vĩ tóg ag mỹ e tĩ. Vẽnh kar vĩ kãfór ti nĩ.
33Hã ra ũn jagrẽ kórég tóg tá nĩ nĩ. Kỹ tóg prẽr kỹ: 34“ha mẽ, ã tỹ ẽg tỹ hẽ ri kenh ke nẽ, Nazaré tá Jesus'?” he mũ. “Ã mỹ ẽg tũg sór mũ'? Ã ki kanhró sóg nĩ. Ã pir mỹ ã tóg tỹ Topẽ mré ke nĩ. Ti tũ pẽ vỹ tỹ ã nĩ,” he tóg. 35Hã ra tóg vĩ tar han kỹ: “vĩ tũg ra!” he mũ. “Ti tovãnh ra!” he tóg. Kỹ ti jagrẽ kórég ẽn tóg ti ter tĩ han kỹ ti ki kutẽ mũ sir. Ti kókég tũ tóg nĩ.
36Kỹ tóg vẽnh kar mỹ e pẽ tãvĩ tĩ sir. Jagnẽ mỹ ag tóg: “ne nẽ hỹn?” he mũ. “Vẽjagrẽ kórég ag mỹ tóg vĩ tĩ, kỹ ag tóg ki ke tĩ, ti kamẽg kỹ. Ti hỹn tỹ ag kri ke nĩ,” he ag tóg mũ sir. 37Kỹ ti kãme tóg vẽnh kar kri rũm ke kãn mũ sir, ga ẽn tá.
Jesus tỹ ũn kagyga e ag tỹ há' he
(Mt 8.14-17; Mc 1.29-34)
38Kỹ tóg vẽnh kanhrãn jafã ẽn ki kutẽ kỹ Simão Pedro ĩn ra tĩ mũ. Hã ra ti má fi vỹ kaga kỹ nỹ nĩ. Rỹg jagy han kỹ fi tóg nỹ nĩ. Kỹ ag tóg ti mỹ fi tó mũ. 39Kỹ tóg fi mỹ: “rỹg mãn tũg nĩ,” he mũ. Kỹ fi rỹ ẽn tóg tũ' he mũ sir. Kỹ fi tóg vẽsỹmér nĩ kỹ ag ki rĩr mũ sir.
40Rã tỹ pun ke kar kỹ ag tóg ũn kagyga ag tatĩ kãmũ mũ. Kỹ tóg ti nĩgé tỹ ag mẽgmẽ kỹ ag tỹ hághá' he kãn mũ. 41Vẽjagrẽ kórég pan kãn tóg mũ gé, ag to jũ kỹ. Ag panh ke to hã ag tóg prẽr tĩ, kỹ ag tóg: “Topẽ kósin vỹ tỹ ã nĩ,” he tĩ. Ti ki kanhró ag tóg nỹtĩ, ti tỹ tỹ Cristo nĩ ti. Hã ra tóg ag mỹ: “vĩ tũg ra,” he mũ.
Jesus tỹ Topẽ vĩ tó
(Mc 1.35-39)
42Tỹ vaj kỹ Jesus tóg ẽmã tũ ja ra tĩ mũ, vẽnh péju kỹ. Kỹ vẽnh kar tóg ti jãvãnh kãn mũ. Vãhã ag tóg ti vég mũ. Kỹ ag tóg ti mỹ: “ẽg ré kỹ tĩ tũg nĩ,” he mũ. 43Hã ra tóg: “vó, ẽmã ũ tá sóg ag mỹ Topẽ vĩ tónh ke mũ gé,” he mũ. “Hã jé Topẽ tóg inh mỹ: ha ag mỹ vẽnh ven, he ja nĩ,” he tóg. 44Kỹ tóg ga tỹ Judéia mĩ tĩ mũ sir. Tĩg kỹ tóg ag mỹ Topẽ vĩ tó mũ sir, ag vẽnh kanhrãn jafã krẽm.
Currently Selected:
Lucas 4: kgp
Highlight
Share
Copy
Want to have your highlights saved across all your devices? Sign up or sign in
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido