Hebreu 12
12
Topẽ tỹ ẽg kanhrãn sór mũ
1Ha vé, ũ tỹ ẽg jo Topẽ tovãnh tũ ag vỹ e tãvĩ nỹtĩ. Ẽg pénĩn ag e nỹtĩ, ẽg ve kỹ. Kỹ tóg há tĩ, ẽg tỹ Topẽ japry jagma mũ há han ke ti. Ẽg tỹ corrida han ri ke ti nĩ. Ẽg tỹ tỹ vaj kỹ corrida han ken kỹ ẽg tóg ũri vẽnhkán há han ke mũ. “Ne nỹ isar han mũ, corrida to?“ he ẽg tóg tĩ. Ẽg tỹ nén han ke mũ ẽn tovãnh ẽg tóg tĩ, Topẽ jykre ri ke ti nĩ, tag ti. “Tag mỹ Topẽ to isar han mũ vỹ?“ hem nĩ, ãjag tỹ nén han ke mũ ẽn kar to. 2Jesus hã mĩ ẽkrén nĩ. Ti hã vỹ ẽg tỹ Topẽ ki rã han. Kỹ tóg ẽg tỹ ti tovãnh ke tũ han ẽn ki kanhró nĩ gé. Krunh to sa kỹ tóg ter mỹr. Ag tỹ ti to é he mũ ra tóg ti mỹ tỹ nén ũ tũ tĩ. Ti tỹ kar kỹ nén venh ke ẽn mĩ tóg ẽkrén ja nĩ, nén tỹ ti mỹ sér nĩnh ke ẽn mĩ. Hã kỹ tóg ũri Topẽ pẽgja tá nĩ nĩ.
3 Jesus mĩ ẽkrén nĩ. Ẽprã ke kar ag vỹ ti kato vĩ ja nĩgtĩ, ũ tỹ Topẽ vĩ mranh mũgtĩ ẽn ag. Ge ra tóg Topẽ to krónh ke ja tũ nĩgtĩ. Ti ki ẽkrén kỹ to krónh krónh ke tũg nĩ. To: “ron inh mũ,” he tũg nĩ gé.
4Ha vé, Topẽ vĩ mranh tũg nĩ. Ãjag tỹ ti vĩ mranh sór mũ tag kato vãsãnsãn nĩ, ke tũ nĩ mũ ra ãjag tóg to ter ke mũ. 5Ti tỹ ẽg jyvẽn kỹ tóg ẽg mỹ: “inh kósin,” he mũ. “Isỹ ã vóg kónãn kỹ inh mỹ vẽnh nenh tũg nĩ,” he tóg. “Isỹ ã mỹ vĩ tar han mũ ra to krónh ke tũg nĩ. 6Isỹ ã to há nĩn hã kỹ sóg ã mỹ vĩ tar han tĩ. Ã kanhrãn jé ke vẽ. Isỹ ã mỹ: “inh kósin vỹ tỹ ã nĩ,” hen kỹ sóg ã mrãnmrãn tĩ gé, ã kanhrãn ti jé,” he tóg, Topẽ vĩ tỹ rán kỹ nĩ ki.
7Hã kỹ ti tỹ ãjag mrãnmrãn tag to tar nỹtĩm nĩ. Ãjag kanhrãn jé ke vẽ. Topẽ tỹ ãjag mỹ: “inh krẽ,” he vẽ. Ẽg panh vỹ ẽg mrãnmrãn kỹ ẽg kanhrãn ja nĩgtĩ gé. Vẽnh kar jykren hã vẽ. Topẽ vỹ ti krẽ mrãnmrãn kỹ ag kanhrãn tĩ, ẽg kar. 8Ti tỹ ãjag tỹ kygnẽ to ãjag mrãnmrãn tũ nĩ ra ãjag pijé tỹ ti krẽ pẽ nỹtĩnh mũ vẽ'. 9Ha vé, ẽg han mũ fag vỹ ẽg mrãnmrãn tĩ, ẽg kanhrãn jãvãnh nĩn kỹ, kỹ ẽg tóg fag kamẽg tĩ. Kỹ ẽg tóg Topẽ kamẽg kãfór han ke mũ, ũ tỹ ẽg rĩnrĩr han mũ ti, ẽg jóg mág ti. 10Kỹ ẽg panh tóg ẽg to ti jykre fi ja nĩgtĩ. To jykrén kỹ tóg ẽg mrãnmrãn tĩ kejẽn, ẽg sĩn kã. Kejẽn tóg ti tỹ kygnẽ kỹ nĩ ra ẽg kanhrãn sór tĩ gé. Hã ra Topẽ tỹ ẽg mrãnmrãn kỹ tóg to jykrén há han tĩ inhhã. Ti tỹ ẽg kanhrãn há han sór vẽ, ẽg tỹ ti ri ke há tãvĩ nỹtĩ jé. 11Ti tỹ ẽg mrãnmrãn ẽn kã tóg ẽg mỹ sér tũ tĩ ver. Ẽn kã tóg ẽg mỹ jagy tĩ. Kar kỹ ẽg tóg vãhã vég tĩ, ti há nĩ ja ti. Kỹ ẽg tóg vẽjykre há han ẽn ki kanhrãn mũ sir. Jagnẽ krĩ kuprãg ki ẽg kanhrãn mũ gé sir.
Ẽg tỹ jagnẽ tar han ke
12Krónh ke ve ãjag nĩ. Kỹ ãjag tóg tỹ ũn kaga tĩg kórég ẽn ri ke nỹtĩ. To tar' he mãn nĩ, ãjag tỹ mũ há han mãn jé. 13Topẽ japry kuryj hã jagma ẽvãnh nĩ. Kỹ ũ tỹ ãjag mỹ to krónh kenh ha mẽ ẽn ag vỹ, ãjag mré to tar' he mãn mũ gé. Topẽ jykre tovãnh sór nĩ ve ãjag nỹtĩ, hã ra tóg, ãjag tar han mãn sór mũ.
14Vẽnh kar mré vẽjykre kuryj han sórm nĩ. Kỹ Topẽ vĩ han kỹ kygnẽ sór tũg nĩ. Ẽg tỹ tag to vãsãn tũ nĩn kỹ ẽg pijé ẽg jóg mág venh ke mũ'. 15Vẽnh ki rĩr há han nĩ, ãjag kã mĩ ũ tỹ Topẽ tỹ ẽg jagãgtãn mũ tag to é he tũ nĩ jé. Ãjag kã mĩ ũn pir tỹ vẽjykre kórég to tar nĩn kỹ tóg ẽg mỹ, ti tỹ ũn e ag krĩn kónãn ha mẽ tĩ, ag tỹ ti jykre kórég ẽn ri ke nỹtĩ jé. Kỹ tóg ẽg jakré kã mĩ vãnh jagy ri ke nĩ. Ẽg jakré kókég ti tĩ, vẽjykre kórég tỹ ẽg kókén ri ke. 16Vẽnh ki rĩr há han nĩ gé, ãjag kã mĩ ũ tỹ Esaú jykre kórég ẽn ri ke han tũ nĩ jé, ũ tỹ Topẽ kato vãsãn tũ nĩ jé. Esaú vỹ Topẽ to é he ja nĩgtĩ, kỹ tóg vẽjẽn tugrĩn ti panh tỹ ti mỹ vĩ há han ke ẽn kren. Ti jãvy mỹ tóg tovãnh, ti panh tỹ ti mỹ vĩ há han ke ẽn ti. Ti tỹ ti panh tỹ ti mỹ vĩ há han ke ẽn to é hen hã vẽ. 17Kar kỹ tóg, ti panh tỹ ti mỹ vĩ há han ke ti mẽ sór ja nĩ, hã ra tóg mẽg tũ nĩ sir. Kỹ tóg fỹ ja nĩgtĩ. Vãhã tóg ti mỹ e tĩ ja nĩgtĩ, hã ra tóg sir rãké ja nỹ. Kỹ Esaú ri ke han sór tũg nĩ.
Topẽ jũ tỹ jagy pẽ
18Vãsỹ Topẽ vỹ ẽg jógjóg ve ag mỹ ti jykre nĩm ja nĩgtĩ. Pãnónh tỹ Sinai tá ag tóg junjun ja nĩgtĩ. Pĩ ve ag tóg, tá. Kỹ tóg tá kuty nĩ ja nĩgtĩ gé, kuty pẽ, kóho jũ ke gé. 19Kỹ trombeta ẽn vỹ kyr ja nĩgtĩ gé. Kỹ Topẽ vỹ ag mỹ vĩ ja nĩ gé. Ag tỹ ti vĩ mẽ kỹ ag tóg jũrũn ke ja nĩgtĩ. Kỹ ag tóg ti mỹ to vĩ mũ, ti tỹ ag mỹ vẽmén tũ nĩ jé, ti tỹ ẽgno ki Moisés hã mré vẽmén jé. 20Ag mỹ tóg: “ãjag mẽg ũ tỹ pãnónh tag ki jun kỹ ti tén nĩ, pó tỹ ti pin kỹ,” he ja nĩ. “Ti tỹ pãnónh tag vóg tugrĩn ti tén nĩ,” he ja tóg nĩ, Topẽ ti. Kỹ ti vĩ tag tóg ag mỹ e ja nĩgtĩ. 21Topẽ tỹ ag mré vẽmén kỹ tóg ag mỹ e tãvĩ nĩ ja nĩgtĩ, Moisés mré hã, hã kỹ tóg: “jũrũn ke inh, mũmẽg kỹ,” he mũ gé, Moisés ti.
22Hã ra tóg ag tỹ nén ve ja ẽn ri ke tũ nĩ, ẽg tỹ ũri Topẽ rĩnja tá jun ke ti. Pãnónh ẽn ri ke tũ ti nĩ, ẽg tỹ kanhkã tá nén venh ke ti. Ẽg tỹ tá jun kỹ ẽg ter mãn ke tũ nĩ gé, ẽg tỹ kanhkã tá pãnónh tỹ Sião he mũ ẽn tá jun kỹ. Topẽ jamã tá ke vẽ, ũn rĩr nĩ ẽn jamã tá, hã vỹ: Jerusalém, he mũ. Topẽ tỹ jẽgnẽ jafã ag vỹ tá nỹtĩ. E tãvĩ ag nỹtĩ. Fénhta mág pẽ vẽ, tá. 23Kỹ Topẽ krẽ sanh kar ag vỹ tá nỹtĩnh ke mũ gé, ũn tỹ Jesus ki ge kỹ nỹtĩ ag kar. Ag jigji vỹ kanhkã tá rán kỹ nỹtĩ. Kỹ Topẽ vỹ tá nĩ gé, ũ tỹ vẽnh kar jykre tugnỹm ke mũ ti. Kỹ ũ tỹ ẽg jo Topẽ ki ge kỹ nỹtĩ ag vỹ tá nỹtĩ gé, ũ tỹ ẽg jo tá junjun mũ ẽn ag. 24Kỹ Jesus vỹ tá nĩ gé, ũ tỹ ẽg jagfy ter mũ ẽn ti, kỹ ẽg tóg ti kyvénh tugrĩn jãnhkri nỹtĩ, Topẽ tỹ ẽg mỹ vẽnh pãte fón ti kỹ. Topẽ tỹ Abel kyvénh ven kỹ tóg jũ mũ, ũ tỹ ti tén mũ ẽn to. Jãvo tóg ti tỹ Jesus kyvénh ven kỹ ẽg mỹ vẽnh pãte fón mũ. Hã kỹ tóg Moisés jykre kãfór nĩ, Jesus ti.
25Hã kỹ jẽmẽ há han nĩ. Ũ tỹ ãjag mỹ Topẽ vĩ tó mũ ẽn vĩ jẽmẽ há han sórm nĩ. Ẽg jógjóg ve ũ ag vỹ Topẽ vĩ mẽ sór ja tũ nĩgtĩ, ti tỹ ag jyvẽn mũ ra. Hã kỹ ag krenkren ja tũ nĩ. Kỹ ẽg krenkren ke tũ nĩ gé, ẽg tỹ ũ tỹ kanhkã tá nĩ ẽn vĩ jẽmẽ sór tũ nĩn kỹ, ti tỹ ẽg jyvẽn mũ ti. 26Vãsỹ tóg, ti tỹ ẽg jógjóg ve ag mré vẽmén kỹ ga tỹ ragra ke han ja nĩgtĩ. Ũri tóg ẽg mỹ: “ga tỹ ragra ke pir han mãn jé sóg ke mũ,” he mũ. “Ẽn kã kanhkã vỹ ragra kenh mũ gé, ha vem nĩ,” he tóg. 27Ti tỹ: “ke pir han mãn jé sóg ke mũ,” hen kỹ ẽg tóg, ki kanhró nỹtĩ, ti tỹ ga tỹ ragra kenh ken ki. Topẽ jamã hã tá ẽg tóg nén tỹ ragra kenh ke ẽn ve mãn ke tũ nĩ ha. 28Kỹ tóg há tĩ, ẽg tỹ Topẽ mỹ: “há ti nĩ, ã tỹ ẽg mỹ nén han mũ ti,” hen kỹ. Ẽg jamã tãg vỹ inhhã ragra kenh ke tũ pẽ nĩ. Kỹ tóg há nĩnh mũ gé, ẽg tỹ Topẽ rãnhrãj han há han kỹ, ti tỹ ti mỹ sér tĩ jé. 29Kỹ Topẽ vỹ pĩ tỹ nén ũ kar kugprũg mũ ri ke nĩ.
Currently Selected:
Hebreu 12: kgp
Highlight
Share
Copy
Want to have your highlights saved across all your devices? Sign up or sign in
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido
