Han Kãme 26

Paulo tỹ vẽnh kãmén mãn

1Kỹ Agripa tóg Paulo mỹ: “ã tỹ vẽnh kãmén kỹ tóg há tĩ,” he mũ. Kỹ tóg: 2“Ã hã ne tóg Judeu jykre kar ki kanhró nĩ',” he mũ. “Hã kỹ tóg inh mỹ há tĩ, ã tỹ ũri inh jagfy vĩ kỹ,” he tóg. 3“Judeu ag tỹ inh kato vĩ kãmén kãn jé sóg ke mũ. 4Judeu kar vỹ inh ki kanhró nỹtĩ, isĩ kã. Inh mur ja tá ag inh vé, isỹ Jerusalém tá nĩn kỹ ke gé. 5Isĩ kã sóg ẽg jykre han kãn mũ. Ki kanhró ag tóg nỹtĩ. Tỹ sóg Fariseu nĩ, jó Fariseu ag vỹ ẽg jykre kar to tar nỹtĩ. 6Ge ra ag tóg inh kato vĩ mũ. Topẽ vỹ ẽg jógjóg ag mỹ: “rĩr mãn jé ãjag tóg ke mũ, ãjag ter kỹ,” he ja nĩgtĩ. Ti vĩ tag kri sóg nĩm mũ, hã kỹ ag tóg inh kato vĩ mũ. 7Povo tỹ 12 (ke) vỹ tỹ ẽg nỹtĩ. Ẽg kar vỹ Topẽ jykre han tĩ, kurã kar ki. Ẽg tỹ ter kar rĩr mãn jé, hã jé ẽg tóg Topẽ jykre han tĩ, pã'i tỹ Agripa'. Sỹ Topẽ vĩ kri fi hã tugrĩn Judeu ag tóg inh kato vĩ mũ. 8Mỹ ã mỹ vẽnh mỹ, Topẽ tỹ ũn ter mũ rĩn mãn ke ti'? Vẽnh mỹ tũ tóg nĩ,” he tóg.

9“Hã ra sóg vãsỹ Jesus kato tẽ ja nĩgtĩ gé. Ũ tỹ ti ki ge kỹ nỹtĩ ag vóg kónãn jagy han ja sóg nĩgtĩ vẽ, fag mré hã. 10Jerusalém tá sóg Jesus tũ ag sigse ja nĩgtĩ gé. Topẽ tũ to pã'i mág ag vỹ inh mỹ tag to vẽnh rá han ja nĩgtĩ. Ag tỹ Jesus mré ke ag kã mĩ ũ tén kỹ tóg inh mỹ há ja tĩgtĩ gé. 11Ẽg vẽnh kanhrãn jafã krẽm isóg ag vóg kónãn ja nĩgtĩ gé, ag tỹ Jesus tovãnh jé, ag tỹ ti mỹ vĩ kónãn jé. Ag to sóg jũ tãvĩ ja nĩgtĩ gé, inh fe tỹ gỹm ken kỹ. Kỹ sóg ẽmã ũ ra ag nón tĩg ja nĩgtĩ gé, ag vóg kónãn jé,” he tóg, Paulo ti.

Paulo tỹ ti tỹ Jesus ki rã kãmén

(Hk 9.1-19; 22.6-16)

12“Hã kỹ sóg ẽmã tỹ Damasco ra tĩg ja nĩgtĩ gé. Topẽ tũ to pã'i mág ag vỹ inh mỹ to vẽnh rá han ja nĩgtĩ, inh mỹ: ha tĩg, hen kỹ. 13Ẽpry kri sóg jẽngrẽ tar vé, rã tỹ ẽg nĩno kã sa ra, kanhkã tá. Rã kãfór vẽ, jẽngrẽ ẽn, ha mẽ. Inh ki tóg kómkóm ké, inh mré mũ ag ki ke gé. 14Kỹ ẽg kar tóg vár mũ, ga kri. Kỹ sóg vẽnh vĩ mẽ. Hebreu vĩ ki tóg inh mỹ: Saulo', Saulo', he mũ. Ã hã ne tóg isũ ag vóg kónãn tĩ', he tóg. Ã vóg isóg mũ, ka junun kri ferro ẽn tỹ, kỹ tóg ã tỹ inh kato vãsãn kỹ ã mỹ kaga jagy tĩnh mũ, ha vem nĩ, he tóg inh mỹ.

15Kỹ sóg ti mỹ: “ã tỹ ũ nĩ?“ he mũ. Kỹ tóg inh mỹ: “tỹ sóg Jesus nĩ,” he mũ. “Ã tỹ ũn vóg kónãn sór tĩ ẽn vỹ tỹ inh nĩ,” he tóg. 16“Jẽg ra,” he tóg. “Ã mỹ sóg vẽnh ven, ã tỹ inh kãmén jé. Ã mỹ sóg vẽnh ven mãn ke mũ gé, kejẽn. Tag kar tó jé ã tóg ke mũ. 17Ã povo mỹ sóg ã jẽnẽnh mũ, fóg ag mỹ ke gé, kanhgág ag mỹ ke gé. Hã ra sóg ã jy nĩgãn ke mũ,” he tóg. 18“Ag kanẽ nugnón sór inh mũ. Ag tỹ vẽjykre pãno han kỹ tóg ag kã ki kuty nĩ sir, hã ra sóg ag kã ki jẽngrẽ han sór mũ. Japo krẽm ag nỹtĩ. Hã ra sóg ag kygvãn sór mũ. Ag tỹ inh vĩ mranh tỹ sóg vẽnh pãte fón sór mũ, ag tỹ ũ tỹ inh ki ge kỹ nỹtĩ ag mré kanhkã tá junjun jé, he tóg inh mỹ, Jesus ti,” he tóg, Paulo ti.

Paulo tỹ ti rãnhrãj kãmén

19“Kỹ sóg ti vĩ mranh tũ nĩ, Agripa',” he tóg. “Kanhkã tá nĩ kỹ tóg inh mré vĩ ja nĩgtĩ, Jesus ti, kỹ sóg ti vĩ han. 20Damasco tá ke ag mỹ sóg tó vén, kar Jerusalém tá ke ag mỹ ke gé, ga tỹ Judéia tá ke kar ag mỹ ke gé. Judeu kar ag mỹ sóg tó mũ. Kar sóg fóg ag mỹ tó mũ gé sir, kanhgág ag mỹ ke gé, ag tỹ ag jykre pãno tovãnh jé, ag tỹ Topẽ jykre han jé sir, vẽnh kar tỹ ag jykre há ve jé,” he tóg.

21“Isỹ tag han to Judeu ag tóg Topẽ ĩn krẽm inh kãgmĩ ja nĩgtĩ, isén jé. 22Hã ra Topẽ tóg ijy nĩgãn mũ. Hã kỹ sóg ũri jẽ nĩ. Ti vĩ tó inh mũ, ũn mág ag mỹ, ũn kãsir ag mỹ ke gé. Vãsỹ Topẽ vĩ tó tĩ ag mré sóg tó mũ, Moisés mré hã. 23Cristo jagtar ke tó ja ag tóg nĩgtĩ, ti ter kar kỹ rĩr mãn vén ke ti, ẽg jo. Kỹ tóg ẽg povo mỹ jẽngrẽ ri ke nĩ sir, fóg kar ag mỹ ke gé, kanhgág kar ag mỹ ke gé,” he tóg.

24Ti tỹ tó kãn tũ ra Festo tóg jamã hára : “krĩ tũ ã nĩ, Paulo'! Ã tỹ vẽnh rá ve mág kỹ tóg ã krĩ tũ tĩ,” he mũ.

25Hã ra tóg ti mỹ: “inh krĩ vỹ há nĩ, Festo',” he mũ. “Ki hã sóg tó mũ, to jykrén há han kỹ. 26Agripa vỹ ki kanhró nĩ. Hã kỹ sóg ti ve kỹ mỹ'ãg tũ nĩ. Mẽ ti huri. Kỹ vẽnh kar vỹ ti mré ki kanhkó nỹtĩ gé.

27 Agripa', ã mỹ Topẽ vĩ tó tĩ ag tỹ nén tó mũ kri fig mũ'? Kri nĩm ã tóg mũ, ki kanhró sóg nĩ,” he tóg.

28Kỹ Agripa tóg ti mỹ: “kỹ ã mỹ isỹ Cristo ki rã ve sór mũ'?“ he mũ.

29Kỹ Paulo tóg ti mỹ: “hỹ, hã to sóg Topẽ mré vĩ mũ,” he mũ. “Ã tỹ inh mré Jesus ki rã kỹ tóg há tĩ vẽ, ã mré inh vĩ mẽg mũ ag ke gé. Isỹ se kỹ jẽ tag hã to sóg ã mỹ: inh ri kem nĩ, henh ke tũ nĩ,” he tóg.

30Kỹ Agripa vỹ jẽgnẽ mũ sir, Festo ke gé, Berenice fi ke gé, ag mré nỹtĩ kar ag ke gé. 31Kỹ ag tóg kãpa mũ. Kỹ ag tóg jagnẽ mỹ: “nén ũ kórég han ja tũ ti nĩ. Ge ra tóg se kỹ jẽ, hã ra,” he mũ. 32Kỹ Agripa tóg Festo mỹ: “ti tỹ kavar kỹ jẽn hã vẽ vẽ, hã ra tóg pã'i mág tỹ Imperador ve sór mũ,” he mũ.

Currently Selected:

Han Kãme 26: kgp

Highlight

Copy