1 Pedro 4
4
Vẽjykre tãg
1Ha vé, Cristo vỹ jagtar nĩ ja nĩgtĩ, vẽsỹrénh kỹ. Kỹ tag to tar nỹtĩm nĩ gé, ãjag tỹ ti kóm jagtar nỹtĩn kỹ. Tag vỹ há nĩ, ha mẽ: ũ tỹ ẽprã jagtar kỹ tóg Topẽ vĩ mranh tũ nĩgtĩ. 2Hã kỹ ũri Topẽ vĩ hã han sórm nĩ. Ti vĩ tovãnh tũg nĩ, ãjag tỹ ga kri mũn kỹ. Ãjag tỹ nén to én mũ ẽn han sór tũg nĩ. 3Vãsỹ ãjag tóg ũ tỹ Topẽ ki kagtĩg ag jykre han ja nĩgtĩ, prỹg tỹ hẽn ri ke ki, mỹr, ha mẽ. Ẽn kã ãjag tóg ãjag prũ tũ fag to én (ka)mẽ ja nỹtĩgtĩ, ãjag mén tũ ag to ke gé. Ãjag tỹ nén to én mũ ẽn han ja ãjag tóg nĩgtĩ. Kronkron mũ ja ãjag tóg nĩgtĩ. Vẽnh kãgrá mỹ fénhta kórég ẽn han ja ãjag tóg nĩgtĩ gé. 4Ũri ãjag tóg tag han mãn sór tũ nỹtĩ ha. Hã kỹ tóg ag mỹ e tĩ, ũ tỹ vẽjykre kórég to tar nỹtĩ ag mỹ, ãjag tỹ ag mré ag jykre pãno han mãn sór tũ nỹtĩn kỹ, ãjag tỹ ag krĩ tũ jãvo krĩ há nỹtĩn kỹ. Hã kỹ ag tóg ãjag to vĩ kónãn tĩ, ũri. 5Hã ra Topẽ tóg ag jykre vég nĩ nĩ. Vẽnh kar jykre tugnỹm ti tĩ mỹr. Kỹ tóg ag mỹ ag jykre to: “tag vỹ há nĩ, ẽn vỹ kórég nĩ,” henh ke mũ, ũn rĩr mũ ag jykre to, ũn kãgter mũ ag jykre to ke gé.
6Ũ tỹ hẽn ri ke ag tóg Jesus mur ke to hã kãgter ja nĩgtĩ. Ẽn ag mỹ tóg vẽnh vĩ sér tónh vyr gé, Cristo ti, vẽnh kuprĩg ag jamã ra, ag krenkren jé. Ag tỹ nén han ja to Topẽ tóg ag vóg kónãn. Hã ra Topẽ tóg ag rĩnrĩn mãn sór ja nĩ gé. Hã kỹ tóg ag kãgter mũ ra ag mỹ vẽnh vĩ jẽnẽg mũ gé, ag tỹ kanhkã tá junjun jé.
7Kakó ti tĩ ha, ga tag tỹ tũ' henh ke kurã ti. Vẽso jykrén nĩ. Krĩ há nỹtĩm nĩ, ãjag tỹ Topẽ mré vẽmén há han jé. 8Kỹ jagnẽ to há tãvĩ nỹtĩm nĩ. Tag to krónh ke tũg nĩ. Ẽg tỹ jagnẽ to há nỹtĩn kỹ ẽg tóg jagnẽ mỹ vẽnh pãte fón ke mũ, ẽg tỹ Topẽ vĩ mranh mũ ti, ti e nỹtĩ hã ra. 9Ũ tỹ kuvar há tá ãjag to pasa kỹ ti mỹ: “inh mré jẽ,” hem nĩ. Ti to vĩ tũg nĩ, ti to mỹ sér nỹtĩm nĩ. 10Kỹ Topẽ vỹ ẽg tar han tĩ. Ũ tóg nén ũ to tar nĩ. Jãvo ũ tóg nén ũ ũ to tar nĩgtĩ gé. Ãjag tỹ nén ũ to tar nỹtĩ ẽn hã ki rĩrm nĩ, vẽnh kar tỹ ãjag tugrĩn tar nỹtĩ jé. Tag vỹ Topẽ mỹ há nĩ. 11Ãjag vẽmén kỹ Topẽ vĩ hã tỹ vẽmén nĩ. Ũ tóg Topẽ tũ ag ki rĩr tĩgtĩ. Kỹ ti jé Topẽ mỹ to vĩ, ti tỹ to ti tar han jé. Ãjag tỹ ãjag rãnhrãj tag ki rĩr há han kỹ Jesus ki ge kỹ nỹtĩ kar ag vỹ Topẽ mỹ vĩ há han ke mũ. Jesus Cristo hã vỹ tỹ ũn mág nĩ. Ti hã vỹ tar nĩ. Kỹ tóg tũ' henh ke tũ pẽ nĩ. Hã vẽ.
Ag tỹ Jesus tugrĩn ẽg vóg kónãn ke
12Inh kanhkã', ãjag to sóg há tãvĩ nĩ. Nén ũ jagy pẽ vég ãjag tóg mũ. Ge ti nỹgtĩ, kỹ to jykrén tũg nĩ. Ẽg kar vỹ tag vég tĩ, Jesus tugrĩn. 13Mỹ sér nỹtĩm nĩ. Ãjag jagtar kỹ ãjag tóg Cristo tỹ ẽg jagfy jagtar mũ ẽn ri ke vég tĩ. Ãjag tỹ ti jagtar ri ke han kỹ ãjag tóg ti mré tỹ ũn mág nỹtĩnh ke mũ gé, ti tỹ tỹ ũn mág nĩnh ke kurã ẽn kã. Ẽn kã tóg ãjag mỹ sér pẽ tĩnh mũ, ha vem nĩ. 14Hỹ, tá tóg ãjag mỹ sér tãvĩ tĩnh mũ, ag tỹ ũri ãjag mỹ vĩ kónãn mũ ra, ãjag tỹ Cristo ki ge kỹ nỹtĩ tugrĩn. Kỹ ãjag tóg ki kanhró nỹtĩnh ke mũ, Topẽ kuprĩg tỹ tỹ ãjag jagrẽ nĩ ti. Ti kuprĩg vỹ ãjag tỹ ũn mág han ke mũ, Topẽ tỹ tỹ ũn mág nĩ ẽn ri ke. 15Ũ ag tóg ag tỹ ũ tén tugrĩn jagtar nỹtĩ, ag tỹ ũ tũ péju tugrĩn ke gé. Ãjag tỹ ag mré vẽjykre pãno tugrĩn jagtar kỹ tóg Topẽ mỹ há tũ nĩ. Ãjag tỹ ti vĩ mranh ke tũ vẽ vẽ. 16Ãjag tỹ hã ra Cristo tugrĩn jagtar kỹ tóg ti mỹ há tĩ. Tag to mỹ'ãg tũg nĩ. Tag to Topẽ mỹ vĩ há han nĩ, ãjag tỹ tỹ Cristo mré ke nỹtĩn kỹ.
17Topẽ vỹ kãnhmar vẽnh kar jykre tugnỹm kãn ke mũ. Hã ra tóg ũ tỹ ti ki ge kỹ nỹtĩ ag jykre tugnỹm vén ke mũ. Ti tỹ ẽg jykre tugnỹm kỹ ẽg tóg nén ũ jagy ve kren ke mũ. Kỹ ũ tỹ ti ki ge tũ ag vỹ nén ũ jagy pẽ ẽn venh ke mũ, ha vem nĩ. 18Hã kỹ tag tóg rán kỹ nĩ, ha mẽ: “ũ tỹ Topẽ vĩ han sór mũ ag vỹ ter kren ke mũ. Kỹ ũ tỹ ti vĩ mranh tĩ ag vỹ kren ke tũ pẽ nĩ, ũ tỹ ti kato tẽ mũ ag,” he ja tóg nĩ. 19Topẽ tỹ ẽg to: “tag vỹ ti jagy venh ke mũ,” hen kỹ ẽg tóg venh ke mũ. Kỹ ẽg tóg ẽg jagtar mũ ra vẽjykre há hã han kỹ nỹtĩnh ke mũ. Ũ tỹ ẽg han mũ ẽn to jykrén jé ẽg tóg ke mũ, Topẽ to. Ti pijé ẽg tovãnh ke mũ'. Ẽg mré tóg nĩ nĩ.
Currently Selected:
1 Pedro 4: kgp
Highlight
Share
Copy
Want to have your highlights saved across all your devices? Sign up or sign in
© 2005, Wycliffe Bible Translators, Inc. in partnership with Sociedade Bíblica do Brasil and Missão de Cristianismo Decidido