Tito 2
2
Laj Tito tenebanbil saꞌ xbe̱n xqꞌuebal xnaꞌleb laj pa̱banel
1Abanan li cꞌaꞌru ta̱chꞌolob chiruheb laj pa̱banel, chaqꞌuehak retal re nak aꞌan tzꞌakal lix ya̱lal li ta̱chꞌolob chiruheb. 2Chaqꞌueheb xnaꞌleb li che̱quel cui̱nk re nak incꞌaꞌ teꞌcala̱k ut cha̱bilakeb xnaꞌleb. Toj cheꞌxcꞌoxla chi us li cꞌaꞌru teꞌxba̱nu ut cheꞌpa̱ba̱nk chi anchaleb xchꞌo̱l. Chixjunil li teꞌxba̱nu, cheꞌxba̱nuhak xban nak nequeꞌxra li ras ri̱tzꞌin ut cheꞌxcuyak li raylal. 3Ut chaqꞌueheb ajcuiꞌ xnaꞌlebeb li che̱quel ixk. Chicꞌutu̱nk lix lokꞌaleb riqꞌuin lix ti̱quilal xchꞌo̱leb. Incꞌaꞌ teꞌxyoꞌob a̱tin chirixeb li ras ri̱tzꞌin ut incꞌaꞌ teꞌcala̱k. Aꞌanakeb ban chic aj cꞌamol be saꞌ li ti̱quilal. 4Riqꞌuin lix cha̱bilal li che̱quel ixk teꞌxcꞌut chiruheb li ixakilbej li toj sa̱jeb nak teꞌxra lix be̱lom joꞌ ajcuiꞌ lix cocꞌaleb. 5Teꞌxcꞌut chiruheb nak cha̱bilakeb xnaꞌleb, ti̱cakeb lix chꞌo̱leb ut teꞌril lix jun cablal chi us. Cha̱bilakeb ut cheꞌpa̱ba̱nk chiru lix be̱lomeb. Cheꞌcua̱nk saꞌ xya̱lal re nak incꞌaꞌ ta̱sachma̱nk xcuanquil li colba-ib qꞌuebil ke xban li Dios. 6Ut chaqꞌueheb ajcuiꞌ xnaꞌlebeb li sa̱j cui̱nk re nak teꞌxcꞌoxla chi us li cꞌaꞌru teꞌxba̱nu re nak teꞌcua̱nk saꞌ ti̱quilal. 7Ut riqꞌuin chixjunil li cꞌaꞌak re ru ta̱ba̱nu, la̱at tatcꞌamok be chiruheb saꞌ ti̱quilal. Chi anchalak a̱chꞌo̱l ut cha̱bilak la̱ yuꞌam nak ta̱cꞌut lix ya̱lal chiruheb. 8Ut nak tat-a̱tinak, tzꞌakal re ru li cꞌaꞌru ta̱ye re nak ma̱ ani ta̱cuechꞌi̱nk rix li cꞌaꞌru ta̱ye. Chi joꞌcan teꞌxuta̱na̱k li xicꞌ nequeꞌiloc ke ut ma̱cꞌaꞌ cꞌaꞌ re ru naru teꞌxye chikix la̱o aj pa̱banel. 9Chaqꞌueheb ajcuiꞌ xnaꞌlebeb li mo̱s re nak cheꞌabi̱nk chiruheb lix patroneb. Incꞌaꞌ teꞌsume̱nk. Cheꞌxba̱nuhak ban li cꞌaꞌru ta̱yehekꞌ reheb re nak sahakeb saꞌ xchꞌo̱l lix patrón riqꞌuineb. 10Incꞌaꞌ cheꞌrelkꞌa li cꞌaꞌru reheb lix patroneb. Cheꞌxba̱nuhak ban lix cꞌanjel chi cha̱bil ut chi anchalakeb xchꞌo̱l re nak ta̱qꞌuehekꞌ xlokꞌal li resilal li Dios li kaColonel riqꞌuin chixjunil li teꞌxba̱nu. 11Li Dios quixcꞌutbesi lix nimal ruxta̱n re xcolbaleb chixjunileb li cuanqueb jun sut rubel choxa. 12Lix nimal ruxta̱n li Dios naxcꞌut chiku nak li Dios naraj nak takacanab xba̱nunquil li ma̱usilal. Chikacanab xba̱nunquil li incꞌaꞌ us li naxrahi ru li kachꞌo̱l. Saꞌ xya̱lal ban chikanumsihak li cutan saꞌ li ruchichꞌochꞌ aꞌin. Tocua̱nk saꞌ ti̱quilal riqꞌuineb li kas ki̱tzꞌin ut chikaba̱nuhak taxak li naraj li Dios. 13Joꞌcan taxak yo̱ko nak yo̱ko chiroybeninquil li lokꞌlaj cutan nak tol-e̱lk cuiꞌchic li Jesucristo li nakayoꞌoni. Saꞌ li cutan aꞌan ta̱cꞌutbesi̱k chiku lix lokꞌal li kanimajcual Dios, li Jesucristo laj Colol ke. 14Aꞌan quixkꞌaxtesi rib chi ca̱mc saꞌ kacꞌabaꞌ la̱o re nak tocolekꞌ chiru li ma̱usilal. Quixba̱nu aꞌan re xti̱cobresinquil li kachꞌo̱l ut re nak chikaqꞌuehak kachꞌo̱l chixba̱nunquil li us. 15Chixjunil li naꞌleb aꞌin li yo̱quin xtzꞌi̱banquil a̱cuiqꞌuin, aꞌan li ta̱chꞌolob chiruheb. Chaqꞌueheb xnaꞌleb ut chakꞌuseb cui incꞌaꞌ us yo̱queb xban nak tenebanbil saꞌ a̱be̱n xban li Dios xba̱nunquil. Ut ma̱ ani chitzꞌekta̱na̱nk a̱cue.
Currently Selected:
Tito 2: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.
