San Marcos 1

Laj Juan laj Cubsihom Haꞌ quixye resil lix cꞌulunic li Jesucristo

1Joꞌcaꞌin nak quiticla chak resilal li colba-ib saꞌ xcꞌabaꞌ li Jesucristo li Ralal li Dios. 2Li profeta Isaías quixtzꞌi̱ba li a̱tin li quixye li Dios re li Ralal:

Xbe̱n cua tintakla junak lin takl. Aꞌan ta̱yehok resil la̱ cꞌulunic re nak teꞌxcauresi rib li tenamit re a̱cꞌulbal.

3Aꞌan tixchꞌolob xya̱lal saꞌ li chaki chꞌochꞌ chi cau xya̱b xcux. Tixye:

Yi̱bomak le̱ yuꞌam ut yoꞌon cua̱nkex chixcꞌulbal li Ka̱cuaꞌ joꞌ nak nequeꞌxyi̱b li be re xcꞌulbal junak li nim xcuanquil. (Isa. 40:3)

4Joꞌcan nak co̱ laj Juan laj Cubsihom Haꞌ saꞌ li chaki chꞌochꞌ ut yo̱ chi cubsi̱nc haꞌ ut yo̱ chixchꞌolobanquil lix ya̱lal chiruheb ut quixye: —Canabomak li ma̱cobc. Chi yotꞌekꞌ e̱chꞌo̱l ut chejal e̱cꞌaꞌux ut checꞌul li cubi haꞌ ut li Dios tixcuy tixsach le̱ ma̱c, chan. 5Nabaleb laj Judea ut nabaleb ajcuiꞌ laj Jerusalén queꞌcuulac cuan cuiꞌ laj Juan chirabinquil li cꞌaꞌru yo̱ chixyebal. Queꞌxxo̱to xma̱c chiru li Dios ut laj Juan quixcubsi xhaꞌeb saꞌ li nimaꞌ Jordán. 6Li rakꞌ narocsi laj Juan, aꞌan yi̱banbil riqꞌuin rix li xul camello ut lix cꞌa̱mal xsaꞌ, aꞌan tzꞌu̱m. Ut aj sa̱cꞌ naxtzaca riqꞌuin xyaꞌal sak cꞌau. 7Naxjultica li ra̱tin li Dios reheb li tenamit ut naxye: —Cha̱lc re jun chic li kꞌaxal nim xcuanquil chicuu la̱in. Xban nak kꞌaxal nim xcuanquil, moco incꞌulub ta nak tincꞌutzub cuib re xhitbal xcꞌa̱mal lix xa̱b. 8La̱in xincubsi e̱haꞌ riqꞌuin haꞌ. Aban aꞌan tixqꞌue e̱re li Santil Musikꞌej, chan.

Nak quixcꞌul li cubi haꞌ li Jesucristo

9Saꞌ eb li cutan aꞌan li Jesús qui-el chak Nazaret xcue̱nt Galilea. Quicuulac riqꞌuin laj Juan ut laj Juan quixcubsi xhaꞌ aran saꞌ li nimaꞌ Jordán. 10Ut nak qui-el chak li Jesús saꞌ li haꞌ, quiril nak quiteli li choxa, ut li Santil Musikꞌej quicube chak saꞌ xbe̱n li Jesús. Chanchan jun li paloma nak yo̱ chak chi cubec. 11Ut qui-abi̱c xya̱b xcux li Dios toj saꞌ choxa. Quixye chi joꞌcaꞌin: —La̱at li cualal kꞌaxal raro̱cat inban. Nasahoꞌ inchꞌo̱l a̱cuiqꞌuin, chan li Dios.

Nak quiyaleꞌ ra̱lenquil li Jesús xban laj tza

12Ut chirix aꞌin, li Jesús qui-ecꞌasi̱c lix chꞌo̱l xban li Santil Musikꞌej re nak ta̱xic saꞌ li chaki chꞌochꞌ bar ma̱cꞌaꞌ cuiꞌ cristian. 13Caꞌcꞌa̱l cutan quicuan chak xjunes saꞌ li naꞌajej aꞌan saꞌ xya̱nkeb li joskꞌ aj xul. Ut chiru li caꞌcꞌa̱l cutan aꞌan, li Jesús quiyaleꞌ ra̱lenquil xban laj tza, aban incꞌaꞌ quixqꞌue rib chi a̱le̱c. Ut eb lix ángel li Dios queꞌcuulac chi cꞌanjelac chiru. 14Ac cuan laj Juan laj Cubsihom Haꞌ saꞌ tzꞌalam nak co̱ li Jesús Galilea ut yo̱ chixjulticanquil resil li colba-ib li naxqꞌue li Dios. 15Li Jesús quixye: —Xcuulac xkꞌehil lix nimajcual xcuanquilal li Dios. Chiyotꞌekꞌ e̱chꞌo̱l chejal e̱cꞌaꞌux ut pa̱bomak li Santil Evangelio, chan li Jesús.

Li Jesús quixbokeb ca̱hib aj car re nak teꞌxic chirix

16Ut nak coxnumekꞌ li Jesús chire li palau cuan Galilea quixtau laj Simón rochben laj Andrés li ri̱tzꞌin. Yo̱queb chixqꞌuebal lix yoy saꞌ li palau xban nak aꞌaneb aj chapol car. 17Li Jesús quixye reheb, —Chine̱ta̱ke. Ma̱cuaꞌ chic caribc te̱ba̱nu. E̱ras e̱ri̱tzꞌin ban chic te̱sicꞌ re teꞌpa̱ba̱nk, chan reheb. 18Ut saꞌ junpa̱t queꞌxcanab lix yoy ut queꞌxta̱ke li Jesús. 19Junpa̱t chic quibe̱c li Jesús nak coxtauheb li ralal laj Zebedeo. Laj Jacobo ut laj Juan xcꞌabaꞌeb. Cuanqueb saꞌ lix jucub. Yo̱queb chixxitinquil lix yoy. 20Li Jesús quixbokeb ut queꞌxcanab laj Zebedeo lix yucuaꞌeb saꞌ li jucub rochbeneb lix mo̱s. Ut queꞌxta̱ke li Jesús.

Li Jesús quirisi li ma̱us aj musikꞌej

21Queꞌcuulac saꞌ li tenamit Capernaum. Saꞌ li hiloba̱l cutan, qui-oc li Jesús saꞌ li cab li nequeꞌxchꞌutub cuiꞌ ribeb laj judío. Ut qui-oc chixchꞌolobanquil xya̱lal chiruheb li tenamit. 22Nequeꞌsach xchꞌo̱leb li tenamit chirabinquil li cꞌaꞌru naxye li Jesús xban nak quixcꞌut xya̱lal chiruheb chi cuan xcuanquil ut moco joꞌ ta queꞌxba̱nu laj tzꞌi̱b li nequeꞌcꞌutuc lix chakꞌrab li Dios. 23Saꞌ li cab chꞌutchꞌu̱queb cuiꞌ cuan jun li cui̱nk cuan ma̱us aj musikꞌej riqꞌuin. 24Li cui̱nk aꞌan quixjap re ut quixye: —¿Cꞌaꞌru ta̱cuaj kiqꞌuin, at Jesús aj Nazaret? ¿Ma chikasachbal xatchal? Ninnau anihat la̱at. La̱at lix Santil Alal li Dios, chan. 25Li Jesús quixkꞌus li ma̱us aj musikꞌej ut quixye re: —Matchokin. Elen riqꞌuin li cui̱nk aꞌin, chan. 26Ut li ma̱us aj musikꞌej quixchꞌikle chi cau li cui̱nk. Quixjap re chi cau ut qui-el riqꞌuin li cui̱nk. 27Quilajeꞌsach xchꞌo̱l chixjunileb li tenamit ut queꞌxye chiribileb rib: —¿Cꞌaꞌru xya̱lal aꞌin? ¿Cꞌaꞌru li acꞌ tijleb aꞌin? Li cui̱nk aꞌin cuan xcuanquil saꞌ xbe̱neb li ma̱us aj musikꞌej ut li cꞌaꞌru naxye, nequeꞌxpa̱b.— 28Saꞌ junpa̱t queꞌrabi resil saꞌ chixjunileb li tenamit xcue̱nt Galilea cꞌaꞌru quixba̱nu li Jesús.

Li Jesús quixqꞌuirtesi lix naꞌ li rixakil laj Simón Pedro

29Nak queꞌel saꞌ li cab li nequeꞌxchꞌutub cuiꞌ ribeb laj judío, li Jesús rochbeneb laj Jacobo ut laj Juan queꞌco̱eb saꞌ rochoch laj Simón ut laj Andrés. 30Nak queꞌcuulac, ticto queꞌxye re li Jesús nak nim xyajel lix naꞌ li rixakil laj Simón. Yocyo ut yo̱ xtik. 31Tojoꞌnak li Jesús quijiloc riqꞌuin li yaj. Quixchap li rukꞌ ut quixcuaclesi. Saꞌ junpa̱t quinumeꞌ lix tik ut qui-oc chi cꞌanjelac chiruheb. 32Saꞌ li ecuu aꞌan nak ac x-oc li sakꞌe, queꞌcꞌameꞌ chak riqꞌuin li Jesús nabaleb li yaj. Ut queꞌcꞌameꞌ ajcuiꞌ chak li cuan ma̱us aj musikꞌej riqꞌuineb. 33Ut li qꞌuila tenamit queꞌchal ut queꞌxchꞌutub ribeb chire li cab cuan cuiꞌ li Jesús. 34Nabaleb li yaj queꞌqꞌuirtesi̱c xban li Jesús. Jalan jala̱nk xyajeleb li junju̱nk. Ut li Jesús quirisiheb nabal chi ma̱us aj musikꞌej riqꞌuineb. Li Jesús incꞌaꞌ quixcanabeb chi a̱tinac li ma̱us aj musikꞌej xban nak eb aꞌan queꞌxnau nak aꞌan li Cristo.

Li Jesús quixye resil li colba-ib aran Galilea

35Cuulajak chic nak toj ma̱jiꞌ na-iqꞌueꞌ li cutan, li Jesús quicuacli ut qui-el saꞌ li tenamit. Ut co̱ xjunes chi tijoc saꞌ jun li naꞌajej bar ma̱cꞌaꞌ cuiꞌ cristian. 36Aꞌut laj Simón joꞌqueb ajcuiꞌ li rochben queꞌco̱eb chixsicꞌbal li Jesús. 37Nak coxeꞌxtau queꞌxye re, —Nabal li tenamit yo̱queb chi sicꞌoc a̱cue, chanqueb. 38Aban li Jesús quichakꞌoc ut quixye reheb: —Tento nak toxic saꞌ eb li naꞌajej li cuanqueb chi nachꞌ re nak toxinchꞌolob ajcuiꞌ chak resil li colba-ib reheb xban nak aꞌan aj e nak xinchal, chan. 39Joꞌcan nak li Jesús quicuulac saꞌ eb li naꞌajej cuan xcue̱nt Galilea. Yo̱ chixjulticanquil lix ya̱lal chiruheb saꞌ li cab li nequeꞌxchꞌutub cuiꞌ ribeb laj judío, ut quirisi li ma̱us aj musikꞌej riqꞌuineb nabal chi cristian.

Li Jesús quixqꞌuirtesi jun li cui̱nk saklep rix

40Saꞌ jun li cutan jun li cui̱nk saklep rix quicuulac riqꞌuin li Jesús. Quixcuikꞌib rib chiru ut quixtzꞌa̱ma xtenkꞌanquil. Quixye re: —La̱in ninnau nak la̱at naru tina̱qꞌuirtesi, chan. 41Li Jesús quiril xtokꞌoba̱l ru li cui̱nk, li saklep rix. Quixyeꞌ li rukꞌ ut quixchꞌeꞌ li cui̱nk. Quixye: —Nacuaj a̱qꞌuirtesinquil. Anakcuan tatinqꞌuirtesi, chan. 42Ut saꞌ junpa̱t qui-el li saklep chirix ut quiqꞌuira. Ma̱cꞌaꞌ chic xyajel quicana. 43Li Jesús quixchakꞌrabi chi us ut quixye re: 44—Abi li tinye a̱cue. Ma̱ ani aj e ta̱serakꞌi li xacꞌul. Ti̱c tatxic riqꞌuin laj tij re nak aꞌan ta̱ril nak xatqꞌuira. Ut ta̱mayeja junak li xul joꞌ naxye saꞌ lix chakꞌrab laj Moisés. Chaba̱nu aꞌan chokꞌ retalil chiruheb li tenamit nak xatqꞌuira, chan. 45Co̱ li cui̱nk ut quilajxserakꞌi reheb chixjunil chanru nak quiqꞌuira. Riqꞌuin aꞌan incꞌaꞌ chic naxqꞌue rib na-oc li Jesús saꞌ eb li tenamit xban nak li qꞌuila tenamit yo̱queb chixsicꞌbal li Jesús. Quicana ban saꞌ jun li naꞌajej bar ma̱cꞌaꞌ cuiꞌ nabal li cristian ut aran quilajeꞌcuulac riqꞌuin li nequeꞌchal chak yalak bar.

Currently Selected:

San Marcos 1: kek

Highlight

Copy