San Mateo 25

Li jaljo̱quil ru a̱tin chirix li laje̱b chi tukꞌ ixk

1Lix nimajcual cuanquilal li Dios, aꞌan chanchan li quicꞌulman saꞌ jun li sumla̱c. Li laje̱b chi tukꞌ ixk queꞌxcꞌam lix candil ut co̱eb saꞌ jun li sumla̱c chixcꞌulbal li be̱lomej. 2O̱b cuanqueb xnaꞌleb ut li o̱b chic ma̱cꞌaꞌ xnaꞌlebeb. 3Li o̱beb li ma̱cꞌaꞌeb xnaꞌleb incꞌaꞌ queꞌxcauresi rib chi us. Queꞌxcꞌam lix candil, abanan incꞌaꞌ queꞌxcꞌam xyaꞌal lix candil. 4Ut li cuanqueb xnaꞌlebeb queꞌxcauresi rib chi us, queꞌxcꞌam lix candil ut queꞌxcꞌam ajcuiꞌ lix yaꞌal. 5Ut nak quibay chak li be̱lomej, nequeꞌxi̱kan chixjunileb toj retal quicube xcuaraheb. 6Ut saꞌ tuktu kꞌojyi̱n, queꞌrabi nak yo̱queb chixjapbal reheb li tenamit chixyebal: “Cueꞌ chak li be̱lomej. Ayukex, cꞌulumak chak,” chanqueb. 7Ut li laje̱b chi tukꞌ ixk queꞌaj ru ut queꞌoc xyi̱banquil lix candil. 8Ut li o̱b li ma̱cꞌaꞌeb xnaꞌleb queꞌxye reheb li o̱b chic li cuanqueb xnaꞌleb: “Jecꞌomak bayak xyaꞌal li kaxam xban nak chupc re li kacandil,” chanqueb. 9Aban li cuanqueb xnaꞌleb queꞌxye: “Incꞌaꞌ naru. Incꞌaꞌ ta̱tzꞌaklok li xyaꞌal li ke cui takaqꞌue e̱re la̱ex. Ayukex riqꞌuineb laj cꞌay. Lokꞌomak chak e̱re,” chanqueb reheb. 10Ut cuanqueb chak chixlokꞌbal lix yaꞌal lix candil nak col-e̱lk li be̱lomej. Ut li o̱b chic li cuanqueb xyaꞌal lix candil queꞌoc rochben saꞌ li cab. Ut quitzꞌapeꞌ li oqueba̱l. 11Ut nak queꞌsukꞌi chak li o̱b chi tukꞌ ixk chixlokꞌbal xyaꞌal lix xameb, queꞌoc chi bokoc saꞌ li oqueba̱l ut queꞌxye: “Ka̱cuaꞌ, te li cab chiku,” chanqueb. 12Ut li be̱lomej quichakꞌoc ut quixye reheb: “Relic chi ya̱l tinye e̱re incꞌaꞌ ninnau e̱ru.” 13Joꞌcan nak la̱in ninye e̱re: Yoꞌon cua̱nkex xban nak incꞌaꞌ nequenau li cutan chi moco li ho̱nal jokꞌe toline̱lk la̱in li Cꞌajolbej.

Li jaljo̱quil ru a̱tin chirix li tumin naxcꞌutbesi chanru nak tocꞌanjelak chiru li Dios

14Ut lix nimajcual cuanquilal li Dios, aꞌan chanchan jun li cui̱nk li ac xic re chi najt. Quixbokeb lix mo̱s riqꞌuin ut quixkꞌaxtesi lix tumin saꞌ rukꞌeb lix mo̱s. 15Quixqꞌue o̱b mil pe̱s re li jun, cuib mil re li jun chic ut quixqꞌue jun mil re li jun chic. Quixqꞌue re li junju̱nk aꞌ yal chanru lix se̱bal xchꞌo̱l chi rilbal. Tojoꞌnak co̱ chi najt. 16Ut li mo̱s li quicꞌuluc re li o̱b mil pe̱s, qui-oc chi yacoc chiru ut quire̱chani o̱b mil pe̱s chic saꞌ xbe̱n li quixcꞌul. 17Ut joꞌcan cuiꞌchic quixba̱nu li quicꞌuluc re li cuib mil pe̱s. Ut quire̱chani cuib mil pe̱s chic saꞌ xbe̱n li quixcꞌul. 18Aꞌut li mo̱s li quicꞌuluc re li jun mil pe̱s, co̱ ut quixbec jun li jul saꞌ chꞌochꞌ. Ut aran quixmuk li jun mil pe̱s li quiqꞌueheꞌ re xban lix patrón. 19Ut najterak chic, quicꞌulun lix patroneb laj cꞌanjel aꞌan. Quixbokeb lix mo̱s chixkꞌaxtesinquil xcue̱nteb. 20Ut quicuulac li mo̱s li quicꞌuluc re li o̱b mil pe̱s. Ut quixcꞌam chak li o̱b mil li quixcꞌul ut quixcꞌam chak ajcuiꞌ li o̱b mil chic li xbe̱n li quire̱chani, ut quixye: “Ka̱cuaꞌ, o̱b mil pe̱s caqꞌue cue. Cuayeꞌ la̱ tumin ut o̱b mil chic xcue̱chani chak saꞌ xbe̱n li caqꞌue cue,” chan. 21Ut lix patrón quixye re: “Kꞌaxal us xaba̱nu. La̱at cha̱bilat ut tzꞌakalat aj cꞌanjel. Saꞌ xbe̱n li caꞌchꞌin xinkꞌaxtesi a̱cue, cha̱bil xat-el. Anakcuan tinkꞌaxtesi chic nabal a̱cue. Chisahokꞌ saꞌ la̱ chꞌo̱l xban nak tattzꞌako̱nk ajcuiꞌ riqꞌuin li sahil chꞌo̱lejil li cuan cuiqꞌuin la̱in,” chan. 22Ut li mo̱s li quicꞌuluc re li cuib mil pe̱s quicuulac ut quixye: “Ka̱cuaꞌ, caqꞌue cue cuib mil pe̱s ut cuib mil pe̱s chic xcue̱chani chak saꞌ xbe̱n,” chan. 23Ut lix patrón quixye re: “Us xaba̱nu. Cha̱bilat aj cꞌanjel. Riqꞌuin li caꞌchꞌin xinqꞌue a̱cue, us xat-el. Anakcuan tinkꞌaxtesi a̱cue nabal chic. Chisahokꞌ saꞌ la̱ chꞌo̱l xban nak tattzꞌako̱nk ajcuiꞌ riqꞌuin li sahil chꞌo̱lejil li cuan cuiqꞌuin la̱in,” chan. 24Ut quicuulac ajcuiꞌ li jun chic li quicꞌuluc re li jun mil pe̱s ut quixye re lix patrón: “Ka̱cuaꞌ, ninnau nak joskꞌat la̱at. Nacatkꞌoloc bar incꞌaꞌ nacat-au cuiꞌ, ut nacatxococ bar cuiꞌ incꞌaꞌ nacatpajin iyaj. 25Joꞌcan nak quinxucuac ut co̱in ut coxinmuk saꞌ chꞌochꞌ li caqꞌue cue. Cueꞌ li jun mil pe̱s li caqꞌue cue,” chan. 26Ut li patrón quijoskꞌoꞌ ut quixye re: “Incꞌaꞌ us la̱ naꞌleb. Incꞌaꞌ nacacuaj trabajic. Xanau nak ninkꞌoloc bar incꞌaꞌ nin-au cuiꞌ. Ut xanau nak ninxococ bar incꞌaꞌ ninpajin cuiꞌ iyaj. 27Joꞌcan ut tento nak xaqꞌue raj lin tumin reheb laj toꞌ tumin. Ut saꞌ incꞌulunic, xincꞌul raj ral lin tumin rochben raj li xaqꞌue chi toꞌ,” chan. 28Ut li patrón quixye reheb lix mo̱s li cuanqueb aran: “Makꞌomak chiru li jun mil pe̱s ut qꞌuehomak re li ani aj iqꞌuin cuan li laje̱b mil pe̱s. 29Chixjunil li ani cuan nabal reheb, mas cuiꞌchic ta̱qꞌuema̱nk re ut kꞌaxal cuiꞌchic nabal ta̱cua̱nk re. Ut li ani caꞌchꞌin ajcuiꞌ cuan re, ta̱makꞌma̱nk chiru li joꞌ qꞌuial cuan re. 30Ut laj cꞌanjel aꞌin, ma̱cꞌaꞌ na-oc cuiꞌ. Isihomak arin ut qꞌuehomak saꞌ kꞌojyi̱n. Aran ta̱cua̱nk li ya̱bac ut li cꞌuxuxi̱nc ruch e,” chan.

Li rakba a̱tin ta̱cha̱lk

31Nak tincha̱lk la̱in li Cꞌajolbej riqꞌuin xnimal inlokꞌal cuochbenakeb chak chixjunileb li ángel, tojoꞌnak toxincꞌojla̱k saꞌ lin cꞌojariba̱l retalil xnimal incuanquil chi rakoc a̱tin. 32Ut teꞌchꞌutuba̱k chicuu chixjunil xte̱paleb li tenamit li cuanqueb saꞌ ruchichꞌochꞌ. Tojoꞌnak tinsiqꞌueb ru ut tinqꞌueheb saꞌ cuib chꞌu̱tal joꞌ nak li pastor narisiheb lix carner saꞌ xya̱nkeb li chiba̱t. 33Ut tinqꞌueheb lin carner saꞌ lin nim ukꞌ ut eb li chiba̱t tinqꞌue saꞌ intzꞌe. 34Ut la̱in li Rey tinye reheb li cuanqueb saꞌ lin nim: “Osobtesinbilex xban lin Yucuaꞌ. E̱chanihomak li nimajcual cuanquilal cauresinbil chokꞌ e̱re chalen chak saꞌ xticlajic li ruchichꞌochꞌ. 35Te̱re̱chani xban nak quintzꞌoca chak ut quine̱qꞌue chi cuaꞌac. Quichakic cue ut quine̱qꞌue chi ucꞌac. Quinsicꞌ cuochochnal ut quine̱cꞌul e̱riqꞌuin. 36Nak ma̱cꞌaꞌ cuakꞌ, queqꞌue cuakꞌ. Nak quinyajer, quine̱tenkꞌa. Nak quincuan saꞌ tzꞌalam, coxine̱ril chak.” 37Ut eb li ti̱queb xchꞌo̱l teꞌxye cue: “Ka̱cuaꞌ, ¿jokꞌe ta biꞌ catkil chi tattzꞌoca̱k ut jokꞌe ta biꞌ catkaqꞌue chi cuaꞌac? ¿Jokꞌe ta biꞌ catkil chi ta̱chakik a̱cue ut jokꞌe ta biꞌ catkaqꞌue chi ucꞌac?” chaꞌkeb cue. 38“¿Jokꞌe ta biꞌ casicꞌ a̱cuochochnal ut catkacꞌul ta kiqꞌuin? ¿Jokꞌe ta biꞌ catkil chi ma̱cꞌaꞌ a̱cuakꞌ ut quikaqꞌue ta a̱cuakꞌ? 39¿Jokꞌe ta biꞌ catkil chi yajat ut catkatenkꞌa ta? ¿Jokꞌe catcuan saꞌ tzꞌalam ut coxatkil ta chak?” chaꞌkeb. 40Ut la̱in tinchakꞌok ut tinye reheb: “Relic chi ya̱l tinye e̱re, cui queba̱nu aꞌin re junak li nequeꞌpa̱ban cue, usta cubenak xcuanquil, cue ajcuiꞌ la̱in queba̱nu chak.” 41Tojoꞌnak la̱in li Rey tinye reheb li cuanqueb saꞌ lin tzꞌe: “Elenkex chicuu. Tzꞌekta̱nanbilex saꞌ li xam li ma̱ jokꞌe ta̱chupk cꞌu̱banbil chak chokꞌ re laj tza ut reheb ajcuiꞌ lix ángel. 42Xban nak la̱in quintzꞌoca chak ut incꞌaꞌ quine̱qꞌue chi cuaꞌac. Quichakic chak cue ut incꞌaꞌ quine̱qꞌue chi ucꞌac. 43Quinsicꞌ li cuochochnal ut incꞌaꞌ quine̱cꞌul e̱riqꞌuin. Ma̱cꞌaꞌ cuakꞌ ut incꞌaꞌ queqꞌue cuakꞌ. Quinyajer ut incꞌaꞌ quine̱tenkꞌa. Quincuan chi pre̱xil ut incꞌaꞌ coxine̱ril chak,” chaꞌkin reheb. 44Ut teꞌchakꞌok ut teꞌxye cue: “Ka̱cuaꞌ, ¿jokꞌe ta biꞌ catkil chi tattzꞌoca̱k? ¿Jokꞌe ta biꞌ catkil chi ta̱chakik a̱cue? ¿Jokꞌe casicꞌ a̱cuochochnal? ¿Jokꞌe catkil chi ma̱cꞌaꞌ la̱ cuakꞌ malaj yajat, malaj cuancat saꞌ tzꞌalam ut incꞌaꞌ catkatenkꞌa?” chaꞌkeb. 45Ut la̱in li Rey tinchakꞌok ut tinye reheb: “Relic chi ya̱l tinye e̱re, xban nak incꞌaꞌ quetenkꞌaheb li nequeꞌpa̱ban cue li ma̱cꞌaꞌeb xcuanquil, incꞌaꞌ ajcuiꞌ quine̱tenkꞌa la̱in,” chaꞌkin reheb. 46Ut eb aꞌan teꞌxic saꞌ li tojba ma̱c chi junelic. Abanan li ti̱queb xchꞌo̱l cua̱nkeb xyuꞌam chi junelic.—

Currently Selected:

San Mateo 25: kek

Highlight

Copy