San Mateo 24

Li Jesús quixye nak tixtau xkꞌehil nak ta̱juqꞌuekꞌ li rochoch li Dios

1Qui-el saꞌ li templo li Jesús, ut nak yo̱ chi xic, queꞌcuulac lix tzolom riqꞌuin ut queꞌxcꞌut chiru li ni̱nki cab xcue̱nt li templo. 2Quichakꞌoc li Jesús ut quixye reheb: —Us ajcuiꞌ nak te̱ril chi us chixjunil aꞌin xban nak ta̱cuulak xkꞌehil nak ma̱ jun chic reheb li pec aꞌan ta̱cana̱k saꞌ xnaꞌaj chi incꞌaꞌ ta ta̱juqꞌuekꞌ, chan. 3Ut chirix aꞌan, co̱ chiru li tzu̱l Olivos ut nak li Jesús quicꞌojla aran xjunes, lix tzolom queꞌcuulac riqꞌuin ut queꞌxye re: —Ye ke jokꞌe ta̱cꞌulma̱nk li yo̱cat chixyebal. ¿Cꞌaꞌru talajcꞌulma̱nk nak ta̱cuulak xkꞌehil la̱ cꞌulunic? Ut, ¿cꞌaꞌru retalil li rosoꞌjiqueb li cutan aꞌin?— 4Quichakꞌoc li Jesús ut quixye reheb: —Cheqꞌuehak retal re nak ma̱ ani chibalakꞌi̱nk e̱re. 5Nabal teꞌcha̱lk chi balakꞌi̱nc, ut teꞌxye nak saꞌ incꞌabaꞌ xeꞌchal, abanan moco ya̱l ta. Toleꞌxye, “La̱in li Cristo”, chaꞌkeb. Ut nabal teꞌbalakꞌi̱k xbaneb. 6Nak te̱rabi nak yo̱ li ple̱t ut nak te̱rabi resil nak ticla̱c re li ple̱t yalak bar, mexxucuac xban nak tento nak ta̱cꞌulma̱nk chi joꞌcan. Abanan moco ac aꞌan ta rosoꞌjiqueb li cutan aꞌin. 7Nabal li tenamit teꞌpletik chi ribileb rib. Ut eb li acuabej teꞌxpleti ribeb. Talajcua̱nk li cueꞌej ut ta̱cua̱nk li yajel ut ta̱cua̱nk li hi̱c saꞌ nabal chi naꞌajej. 8Abanan chixjunil aꞌan yal xticlajic li raylal li ta̱cha̱lk. 9Tojoꞌnak texkꞌaxtesi̱k ut texrahobtesi̱k ut texcamsi̱k. Ut xicꞌ tex-ilekꞌ xbaneb chixjunileb li tenamit saꞌ incꞌabaꞌ la̱in. 10Ut saꞌ eb li cutan aꞌan nabaleb teꞌxcanab lix pa̱ba̱leb. Ut aꞌanakeb chic li teꞌqꞌuehok reheb laj pa̱banel saꞌ raylal. Ut xicꞌ chic teꞌril ribeb. 11Ut nabaleb li profeta aj balakꞌ teꞌcha̱lk ut nabaleb teꞌbalakꞌi̱k xbaneb. 12Ut xban nak ta̱numta̱k li ma̱usilal, nabaleb teꞌxcanab xra̱baleb li ras ri̱tzꞌin. 13Ut li ani tixcuy xnumsinquil li raylal aꞌin toj saꞌ rosoꞌjic lix yuꞌam, aꞌan ta̱colekꞌ. 14Ut li resil lix nimajcual cuanquilal li Dios ta̱yema̱nk yalak bar jun sut rubel choxa re nak chixjunileb li tenamit teꞌrabi resil li colba-ib. Tojoꞌnak ta̱cha̱lk li rosoꞌjiqueb li cutan. 15Chetzolak rix chi us li cꞌaꞌru quixye li profeta Daniel re nak te̱tau ru li cꞌaꞌru ta̱cꞌulma̱nk. Aꞌan quixye nak eb laj balakꞌ teꞌrocsi saꞌ li rochoch li Dios bar ma̱cuaꞌ xcꞌulub cuiꞌ cua̱nc li kꞌaxal yibru ut xucuajel rilbal xban lix ma̱usilal, ut riqꞌuin aꞌan teꞌxmux ru lix templo li Dios. (Dan. 9:27; 12:11) 16Nak te̱ril aꞌan, la̱ex li cuanquex Judea, chex-e̱lelik saꞌ junpa̱t ut texxic toj saꞌ li tzu̱l. 17Li ani cua̱nk chak saꞌ xbe̱n li rochoch nak ta̱cꞌulma̱nk aꞌan, chi cubec chak ut ti̱c ta̱e̱lelik ut incꞌaꞌ chic ta̱oc saꞌ rochoch chirisinquil li cꞌaꞌru cuan re. 18Ut li ani cua̱nk chak saꞌ xcꞌaleba̱l incꞌaꞌ chic chisukꞌi̱k saꞌ rochoch chixxocbal li rakꞌ. 19Tokꞌobak ruheb li yaj aj ixk ut li yo̱queb chi tuꞌresi̱nk saꞌ eb li cutan aꞌan xban nak kꞌaxal cuiꞌchic chꞌaꞌaj li e̱lelic chokꞌ reheb. 20Chextijok ut chetzꞌa̱ma chiru li Dios re nak incꞌaꞌ ta̱cꞌulma̱nk li raylal aꞌin saꞌ habalkꞌe chi moco saꞌ li hiloba̱l cutan. 21Saꞌ eb li cutan aꞌan ma̱ caꞌchꞌin li raylal ta̱cꞌulma̱nk. Ma̱ jun cua quicꞌulman chi joꞌcan chalen chak saꞌ xticlajic li ruchichꞌochꞌ, chi moco ta̱cꞌulma̱nk junak chic joꞌcan mokon. 22Cui ta ma̱cꞌaꞌ saꞌ xchꞌo̱l li Ka̱cuaꞌ xrakbal ruheb li cutan aꞌan, ma̱ ani raj ta̱cana̱k chi yoꞌyo saꞌ ruchichꞌochꞌ. Joꞌcan nak li Ka̱cuaꞌ tixse̱ba xrakbal ruheb li cutan aꞌan saꞌ xcꞌabaꞌeb li sicꞌbileb ru. 23Joꞌcan nak cui ani ta̱yehok e̱re, “Cueꞌ li Cristo,” malaj, “leꞌ cuan li Cristo,” me̱pa̱b li cꞌaꞌru tixye. 24Nabaleb aj balakꞌ teꞌcꞌulu̱nk ut teꞌxye nak aꞌaneb li Cristo. Ut cuan teꞌxye nak aꞌaneb profeta. Nabal li cꞌaꞌak re ru teꞌxcꞌutbesi ut sachba chꞌo̱lej telajeꞌxba̱nu re xyalbal xbalakꞌinquileb li tenamit, joꞌqueb ajcuiꞌ li sicꞌbileb ru xban li Dios. 25Abanan cheqꞌuehak retal. Ac xinye e̱re li cꞌaꞌru talajeꞌcꞌulma̱nk. 26Cui ut nequeꞌxye e̱re, “Leꞌ saꞌ li chaki chꞌochꞌ cuan li Cristo,” mexxic chirilbal. Cui ut nequeꞌxye e̱re, “Arin cuan saꞌ cab,” me̱pa̱b li cꞌaꞌru teꞌxye. 27La̱in li Cꞌajolbej tincꞌulu̱nk saꞌ junpa̱t. Chanchan lix repom li ca̱k na-el chak saꞌ releb sakꞌe ut naxcꞌut rib toj saꞌ roqueb sakꞌe. 28Ya̱l li nequeꞌxye nak bar cua̱nk junak camenak, aran teꞌxtu̱b rib li soꞌsol.

Nak tol-e̱lk cuiꞌchic li Cꞌajolbej Dios

29Ut saꞌ eb li cutan aꞌan nak acak xrakeꞌ li raylal aꞌan, ta̱kꞌojyi̱nokꞌ ru li sakꞌe ut li po incꞌaꞌ chic ta̱cutanokꞌ ru. Ta̱ecꞌa̱nk chak ru li choxa ut li chahim talajeꞌtꞌanekꞌ chak. 30Tojoꞌnak ta̱cꞌutu̱nk saꞌ choxa li cuetalil la̱in li Cꞌajolbej. Ut teꞌyotꞌekꞌ ut teꞌya̱bak chixjunileb li cuanqueb saꞌ ruchichꞌochꞌ. Ut teꞌril cuu la̱in li Cꞌajolbej nak yo̱kin chak chi cha̱lc saꞌ li chok riqꞌuin lix nimal incuanquil ut inlokꞌal. 31Ut nak ta̱ecꞌa̱nk chak chi cau li trompeta, tintaklaheb lin ángel. Ut teꞌxchꞌutub li sicꞌbileb ru inban li cua̱nkeb yalak bar jun sut rubel choxa jun sut saꞌ ruchichꞌochꞌ. 32Cheqꞌuehak retal cꞌaꞌru naxba̱nu li jun to̱n chi higo. Nak nakꞌunkꞌut chak li xak chi e̱lc, riqꞌuin aꞌan te̱nau nak yo̱ chak chi nachꞌoc li sakꞌehil. 33Joꞌ nak li higo naxcꞌutbesi retalil li sakꞌehil, joꞌcan ajcuiꞌ chixjunil li cꞌaꞌak re ru aꞌan talajeꞌcꞌulma̱nk, naxcꞌutbesi retalil nak yo̱ chi cuulac xkꞌehil nak toline̱lk cuiꞌchic la̱in li Cꞌajolbej. 34Relic chi ya̱l tinye e̱re nak toj talajeꞌcꞌulma̱nk chixjunil li cꞌaꞌak re ru aꞌin chi toj ma̱jiꞌ nequeꞌosoꞌ li tenamit aꞌin. 35Li choxa ut li ruchichꞌochꞌ talajeꞌosokꞌ. Abanan li cua̱tin incꞌaꞌ ta̱cana̱k yal chi joꞌcan chi incꞌaꞌ ta ta̱cꞌulma̱nk chixjunil li cꞌaꞌak re ru xinye. 36Abanan ma̱ ani nanaꞌoc re jokꞌe lix kꞌehil ut lix ho̱nal incꞌulunic. Eb li ángel saꞌ choxa incꞌaꞌ nequeꞌxnau chi moco la̱in li Cꞌajolbej ninnaꞌoc re. Caꞌaj cuiꞌ li Dios Acuabej nanaꞌoc re jokꞌe ta̱cꞌulma̱nk aꞌin. 37Joꞌ quicꞌulman saꞌ xcutan laj Noé, joꞌcan ajcuiꞌ ta̱cꞌulma̱nk nak toline̱lk cuiꞌchic la̱in li Cꞌajolbej. 38Saꞌ eb li cutan aꞌan nak toj ma̱jiꞌ quicuan li butꞌi haꞌ, eb li tenamit yo̱queb chak chi cuaꞌac ut yo̱queb chi ucꞌac, ut yo̱queb chi sumla̱c ut chi sumuba̱nc toj saꞌ li cutan nak qui-oc laj Noé saꞌ li jucub cab. 39Ut incꞌaꞌ queꞌxtau xya̱lal toj quichal li butꞌi haꞌ ut quilajeꞌcꞌameꞌ chixjunileb xban li butꞌ. Chanchan ajcuiꞌ aꞌan nak toline̱lk cuiꞌchic la̱in li Cꞌajolbej. 40Saꞌ li cutan aꞌan cuib li cui̱nk cua̱nkeb saꞌ cꞌaleba̱l, jun aj pa̱banel ut jun li ma̱cuaꞌ aj pa̱banel. Ut laj pa̱banel, aꞌan li ta̱cꞌamekꞌ xban li Dios ut li jun chic li ma̱cuaꞌ aj pa̱banel, aꞌan ta̱canaba̱k. 41Ut cuib li ixk yo̱keb chi queꞌec saꞌ jun chi queꞌleb, jun aj pa̱banel ut jun li ma̱cuaꞌ aj pa̱banel. Ut laj pa̱banel, aꞌan li ta̱cꞌamekꞌ xban li Dios ut li jun chic li ma̱cuaꞌ aj pa̱banel, aꞌan ta̱canaba̱k. 42Joꞌcan nak yoꞌon cua̱nkex xban nak incꞌaꞌ nequenau jokꞌe ho̱nal toline̱lk la̱in li Ka̱cuaꞌ. 43Chenauhak aꞌin: nak cui ta naxnau li yucuaꞌbej saꞌ li cab jokꞌe ho̱nal re li kꞌojyi̱n tol-e̱lk laj e̱lkꞌ, ta̱yoꞌlek raj ut incꞌaꞌ raj tixcanab chi elkꞌac xsaꞌ li rochoch. 44Joꞌcan ajcuiꞌ la̱ex yoꞌon cua̱nkex chi oybeni̱nc xban nak incꞌaꞌ nequenau jokꞌe ho̱nal tincuulak la̱in li Cꞌajolbej. Tincuulak chi ma̱cꞌaꞌ saꞌ e̱chꞌo̱l.

Li cha̱bil aj cꞌanjel ut li incꞌaꞌ cha̱bil aj cꞌanjel

45¿Ani ut laj cꞌanjel cha̱bil ut cuan xnaꞌleb? Aꞌan li quiqꞌueheꞌ xcuanquil xban lix patrón saꞌ xbe̱neb li rech mo̱sil ut aꞌan ta̱qꞌuehok re xtzacae̱mkeb saꞌ x-o̱ril. 46Us xak re laj cꞌanjel aꞌan li yo̱k chixba̱nunquil chi joꞌcan nak tol-e̱lk lix patrón. 47Relic chi ya̱l tinye e̱re nak lix patrón tixkꞌaxtesi saꞌ rukꞌ, chixjunil lix juncablal. 48Aban cui laj cꞌanjel aꞌan incꞌaꞌ us lix naꞌleb, tixye saꞌ xchꞌo̱l, “Lin patrón ta̱ba̱yk chak chi cꞌulu̱nc.” 49Ut ta̱oc chixsacꞌbaleb li rech aj cꞌanjelil, ut ta̱oc chi cuaꞌac ut chi ucꞌac rochbeneb li calajenak. 50Ut ma̱cꞌaꞌak saꞌ xchꞌo̱l nak tol-e̱lk lix patrón. 51Ut ta̱cꞌajtesi̱k ru ut ta̱qꞌuehekꞌ saꞌ xya̱nkeb laj caꞌ pacꞌal u. Ut aran ta̱cua̱nk li ya̱bac ut li cꞌuxuxi̱nc ruch e.

Currently Selected:

San Mateo 24: kek

Highlight

Copy