San Mateo 23

Li Jesús quixkꞌuseb laj tzꞌi̱b ut eb laj fariseo

1Tojoꞌnak li Jesús quixchꞌolob lix ya̱lal chiruheb li qꞌuila tenamit joꞌqueb ajcuiꞌ lix tzolom ut quixye reheb: 2—Eb laj tzꞌi̱b ut eb laj fariseo, qꞌuebileb xcuanquil chixchꞌolobanquil xya̱lal li chakꞌrab li quiqꞌueheꞌ re laj Moisés. 3Joꞌcan nak chixjunil li teꞌxye e̱re, checꞌu̱la saꞌ e̱chꞌo̱l ut cheba̱nu. Abanan me̱ba̱nu joꞌ nequeꞌxba̱nu eb aꞌan xban nak yal riqꞌuin xtzꞌu̱mal reheb nequeꞌxye ut incꞌaꞌ nequeꞌxba̱nu li cꞌaꞌru nequeꞌxye. 4Kꞌaxal a̱l li i̱k nequeꞌxqꞌue saꞌ xbe̱neb li cristian ut kꞌaxal chꞌaꞌaj xcꞌambal. Aꞌut eb aꞌan chi moco riqꞌuin ruꞌuj rukꞌeb nequeꞌraj xchꞌeꞌbal. 5Chixjunil li cꞌaꞌak re ru nequeꞌxba̱nu, aꞌan yal re nak teꞌilekꞌ xbaneb li cristian. Nequeꞌxyi̱b chi ni̱nk ru li cocꞌ ca̱x filacterias xcꞌabaꞌ bar nacuan cuiꞌ li chakꞌrab ut nequeꞌxbacꞌ saꞌ xpe̱quemeb ut saꞌ xteleb. Ut nacuulac chiruheb li rakꞌeb chi ni̱nk lix sahob ru chire. 6Ut nak nequeꞌxic chi cuaꞌac saꞌ eb li ninkꞌe nequeꞌxsicꞌ li cha̱bil naꞌajej bar teꞌqꞌuehekꞌ xlokꞌal, ut nequeꞌraj cꞌojla̱c saꞌ li naꞌajej kꞌaxal lokꞌ nak cuanqueb saꞌ li cab bar nequeꞌxchꞌutub cuiꞌ ribeb laj judío. 7Eb aꞌan nequeꞌraj nak teꞌoxlokꞌi̱k ut teꞌqꞌuehekꞌ xsahil xchꞌo̱leb saꞌ eb li be. Ut nequeꞌraj nak li tenamit teꞌxye “tzolonel” reheb. 8Abanan la̱ex me̱rahi ru nak li tenamit teꞌxqꞌue e̱lokꞌal ut teꞌxye “tzolonel” e̱re xban nak jun ajcuiꞌ laj tzolol e̱re cuan. La̱in li Cristo laj tzolol e̱re ut che̱junilex la̱ex e̱ri̱tzꞌin e̱rib. 9Ut ma̱ ani te̱qꞌue chokꞌ e̱ka̱cuaꞌ saꞌ ruchichꞌochꞌ, xban nak jun ajcuiꞌ li Ka̱cuaꞌ cuan. Aꞌan cuan saꞌ choxa. 10Chi moco checꞌabaꞌin aj cꞌamol be, xban nak jun ajcuiꞌ laj cꞌamol e̱be. Aꞌan la̱in li Cristo. 11Li ani nacꞌanjelac che̱ru, aꞌan li kꞌaxal nim xcuanquil saꞌ e̱ya̱nk. 12Li ani naxqꞌue xcuanquil xjunes rib, li jun aꞌan ta̱cubsi̱k xcuanquil. Ut li ani naxcubsi rib, li jun aꞌan ta̱qꞌuehekꞌ xcuanquil. 13Ra cha̱lel saꞌ e̱be̱n, la̱ex aj tzꞌi̱b ut la̱ex aj fariseo, ex aj caꞌ pacꞌal u. Incꞌaꞌ nequecꞌut lix ya̱lal chiruheb li tenamit ut nequeram chiruheb lix cuanquil li Dios. La̱ex incꞌaꞌ nequeraj xkꞌaxtesinquil e̱rib rubel xcuanquil li nimajcual Dios ut incꞌaꞌ ajcuiꞌ nequecanabeb chixkꞌaxtesinquileb rib li ani nequeꞌraj. 14Ra cha̱lel saꞌ e̱be̱n, la̱ex aj tzꞌi̱b ut la̱ex aj fariseo, ex aj caꞌ pacꞌal u. Nequemakꞌ li rochocheb li xma̱lcaꞌan ut nequeyal xmukbal le̱ ma̱usilal riqꞌuin nak najt rok nequextijoc. Ut xban aꞌan kꞌaxal cuiꞌchic ra li tojbal ma̱c li ta̱cha̱lk saꞌ e̱be̱n. 15Ra cha̱lel saꞌ e̱be̱n la̱ex aj tzꞌi̱b ut la̱ex aj fariseo, ex aj caꞌ pacꞌal u. Nequesuti li ruchichꞌochꞌ joꞌ ajcuiꞌ li palau re xsicꞌbal ani ta̱pa̱ba̱nk re le̱ tijleb. Ut nak ac xeꞌxkꞌaxtesi rib saꞌ e̱ya̱nk, kꞌaxal cuiꞌchic yibru xnaꞌlebeb che̱ru la̱ex ut e̱ma̱c la̱ex nak teꞌxic saꞌ xbalba. 16Ra cha̱lel saꞌ e̱be̱n, la̱ex mutzꞌ aj cꞌamol be. La̱ex nequeye: “Li ani tixba̱nu xjuramento saꞌ xcꞌabaꞌ lix templo li Dios, incꞌaꞌ tento tixba̱nu li quixye. Abanan li ani tixba̱nu xjuramento saꞌ xcꞌabaꞌ li oro li cuan saꞌ lix templo li Dios, li jun aꞌan tento nak tixba̱nu li cꞌaꞌru xye saꞌ xjuramento,” chanquex. 17Ma̱cꞌaꞌ e̱naꞌleb ut mutzꞌex xban nak incꞌaꞌ nequetau xya̱lal. ¿Bar cuan li kꞌaxal nim xcuanquil? ¿Ma li oro, malaj aꞌ lix templo li Dios li nasantobresin re li oro? 18Ut nequeye ajcuiꞌ: “Li ani naxba̱nu xjuramento saꞌ xcꞌabaꞌ li artal, li jun aꞌan incꞌaꞌ tento tixba̱nu li cꞌaꞌru quixye. Abanan li ani naxba̱nu xjuramento saꞌ xcꞌabaꞌ li mayej cuan saꞌ xbe̱n li artal, tento nak tixba̱nu li cꞌaꞌru quixye saꞌ lix juramento,” chanquex. 19Ma̱cꞌaꞌ e̱naꞌleb ut mutzꞌex xban nak incꞌaꞌ nequetau xya̱lal. ¿Bar cuan li kꞌaxal nim xcuanquil? ¿Ma li mayej malaj aꞌ li artal li nasantobresin re li mayej? 20Joꞌcan nak li ani tixba̱nu xjuramento saꞌ xcꞌabaꞌ li artal, naxye xjuramento saꞌ xcꞌabaꞌ aꞌan ut saꞌ xcꞌabaꞌ ajcuiꞌ chixjunil li cꞌaꞌru cuan saꞌ xbe̱n. 21Ut li ani naxba̱nu lix juramento saꞌ xcꞌabaꞌ lix templo li Dios, naxba̱nu saꞌ xcꞌabaꞌ lix templo li Dios ut saꞌ xcꞌabaꞌ ajcuiꞌ li Dios li nacuan chi saꞌ. 22Ut li ani naxba̱nu xjuramento saꞌ xcꞌabaꞌ li choxa, naxba̱nu xjuramento saꞌ xcꞌabaꞌ lix cꞌojariba̱l li Dios ut saꞌ xcꞌabaꞌ ajcuiꞌ li Dios li cꞌojcꞌo saꞌ xbe̱n. 23Ra cha̱lel saꞌ e̱be̱n la̱ex aj tzꞌi̱b ut ex aj fariseo, ex aj caꞌ pacꞌal u. Nequemayeja lix laje̱tkil li isquiꞌij, li eneldo ut li comino. Ut nequetzꞌekta̱na li kꞌaxal cuan xcuanquil saꞌ li chakꞌrab. Incꞌaꞌ nequeba̱nu li ti̱quilal. Incꞌaꞌ nequex-uxta̱nan u ut incꞌaꞌ nequexpa̱ban. Us nak nequemayeja lix laje̱tkil abanan incꞌaꞌ raj nequecanab xba̱nunquil li kꞌaxal cuan xcuanquil. 24Ex mutzꞌ aj cꞌamol be, nequeyal e̱kꞌe chixba̱nunquil li cꞌaꞌak re ru li ma̱cꞌaꞌ xcuanquil, abanan li nim xcuanquil incꞌaꞌ nequeba̱nu. Chanchan nak nequetzꞌil ru le̱ haꞌ re nak incꞌaꞌ te̱nukꞌ li cocꞌ suk ut aꞌ chic li ni̱nki xul camello nequenukꞌ. 25Ra cha̱lel saꞌ e̱be̱n la̱ex aj tzꞌi̱b ut aj fariseo, ex aj caꞌ pacꞌal u, xban nak aꞌ chic li rix le̱ secꞌ ut le̱ plato nequechꞌaj, aban lix saꞌ numtajenak chi tzꞌaj xban le̱ ma̱usilal ut li elkꞌac nequeba̱nu. 26Ex mutzꞌ aj fariseo, chꞌajomak xbe̱n cua lix saꞌ le̱ secꞌ ut le̱ plato re nak chꞌajbilak ajcuiꞌ li rix. 27Ra cha̱lel saꞌ e̱be̱n la̱ex aj tzꞌi̱b ut la̱ex aj fariseo, ex aj caꞌ pacꞌal u. Chanchanex li nequeꞌmukeꞌ cuiꞌ li camenak. Bonbileb rix ut cꞌajoꞌ xchakꞌal eb ru, aꞌut chi saꞌ nujenak chi tzꞌaj ut chi xbakel camenak. 28Joꞌcan ajcuiꞌ la̱ex. Relic chi ya̱l nak cha̱bil nequexcꞌutun chiruheb li tenamit. Abanan le̱ chꞌo̱l nujenak chi ma̱usilal ut la̱ex aj caꞌ pacꞌal u. 29Ra cha̱lel saꞌ e̱be̱n la̱ex aj tzꞌi̱b ut la̱ex aj fariseo, ex aj caꞌ pacꞌal u. Nequeyi̱b li queꞌmukeꞌ cuiꞌ li profetas ut nequerutzꞌuꞌuji chak ru li queꞌmukeꞌ cuiꞌ li ti̱queb xchꞌo̱l. 30Ut la̱ex nequeye: “Cui ta la̱o ac cuanco chak saꞌ li cutan nak xeꞌcuan li kaxeꞌ kato̱n, incꞌaꞌ raj xkaba̱nu joꞌ queꞌxba̱nu eb aꞌan. Incꞌaꞌ raj xkacamsiheb li profetas,” chanquex. 31Abanan riqꞌuin li ma̱usilal li nequeba̱nu la̱ex, nacꞌutun nak juntakꞌe̱tex riqꞌuineb le̱ xeꞌto̱nil yucuaꞌ, li queꞌcamsin reheb li profetas. 32Choyomak biꞌ xba̱nunquil li incꞌaꞌ us li queꞌxtiquib xba̱nunquil le̱ xeꞌto̱nil yucuaꞌ. 33Chanchanex cꞌantiꞌ, chanchanex ralex cꞌambolay, ¿chan ta cuiꞌ ru nak texcolekꞌ chiru lix tojba ma̱c saꞌ xbalba? 34La̱in tintaklaheb e̱riqꞌuin li profeta ut li cuanqueb xnaꞌleb ut eb laj tzolonel. Abanan la̱ex incꞌaꞌ te̱rabi. Ut saꞌ xya̱nkeb aꞌan, cuan te̱camsiheb, cuan te̱qꞌueheb chiru cruz, ut cuan cuiꞌchic li te̱rahobtesiheb saꞌ li cab li nequechꞌutub cuiꞌ e̱rib chixtzolbal ra̱tin li Dios. Ut cuan cuiꞌchic te̱ta̱keheb saꞌ li junju̱nk chi tenamit re xchapbaleb. 35Xban le̱ ma̱usilal aꞌan, ta̱tꞌanekꞌ saꞌ e̱be̱n lix camiqueb li cha̱bileb xnaꞌleb riqꞌuin xcamic laj Abel li ti̱c xchꞌo̱l ut toj riqꞌuin xcamic li ralal laj Berequías, laj Zacarías xcꞌabaꞌ, li quecamsi chiru neba̱l chixcꞌatk li rochoch li Dios ut li artal. 36Relic chi ya̱l tinye e̱re nak chixjunil li camsi̱nc queꞌxba̱nu chak junxil, joꞌ ajcuiꞌ li yo̱quex chixba̱nunquil anakcuan, ta̱tꞌanekꞌ ajcuiꞌ saꞌ e̱be̱n la̱ex li cuanquex anakcuan xban nak yo̱quex chixba̱nunquil joꞌ queꞌxba̱nu eb aꞌan.

Quiyotꞌeꞌ xchꞌo̱l li Jesús chirilbaleb aj Jerusalén

37Ex aj Jerusalén, ex aj Jerusalén, nequecamsiheb li tzꞌakal profeta ut nequecuti chi pec eb li nequeꞌtakla̱c e̱riqꞌuin xban li Dios. Nabal sut raj xcuaj e̱colbal joꞌ nak naxchꞌutubeb li ral li caxlan rubel lix xicꞌ. Abanan la̱ex incꞌaꞌ xeraj. 38Ut anakcuan le̱ tenamit joꞌ ajcuiꞌ li templo ta̱cana̱k chi naqꞌuirnac aj chic ru. 39Tinye ut e̱re chalen anakcuan incꞌaꞌ chic te̱ril cuu toj nak te̱ye, “Osobtesinbilak aꞌan li xchal saꞌ xcꞌabaꞌ li Ka̱cuaꞌ”. Toj aran chic te̱ril cuu, chan li Jesús.

Currently Selected:

San Mateo 23: kek

Highlight

Copy