San Mateo 21

Li Jesús queꞌxqꞌue xcuanquil nak queꞌoc Jerusalén

1Nak ac cuulaqueb re Jerusalén, queꞌcuulac chire li tenamit Betfagé bar cuan cuiꞌ li tzu̱l Olivos. Ut li Jesús quixtaklaheb cuibeb lix tzolom ut quixye reheb: 2—Ayukex saꞌ li chꞌina tenamit aꞌan. Ut nak texcuulak, te̱tau jun li bu̱r bacꞌbo aran cuan ral. Te̱hit ut te̱cꞌameb chak cue. 3Ut cui cꞌaꞌru ta̱yehekꞌ chak e̱re, te̱ye re, “Li Ka̱cuaꞌ ta̱ajok re li bu̱r ut aꞌ que ajcuiꞌ tixtakla chak ho̱n”, chaꞌakex re. 4Ut chixjunil aꞌin quicꞌulman joꞌ quiyeheꞌ xban li profeta nak quixye chi joꞌcaꞌin:

5Ye reheb li tenamit aj Sión: —Cueꞌ chak le̱ Rey xchal e̱riqꞌuin. Tu̱lan ut cꞌojcꞌo chak chirix jun li bu̱r. Chirix jun chꞌina ral bu̱r xcomon li nequeꞌi̱kan yo̱ chak chi cha̱lc.— (Zac. 9:9; Isa. 62:11)

6Ut co̱eb lix tzolom ut queꞌxba̱nu joꞌ queꞌyeheꞌ reheb xban li Jesús. 7Queꞌxcꞌam chak li bu̱r rochben li ral ut queꞌxqꞌue li rakꞌeb saꞌ xbe̱neb. Ut li Jesús quitakeꞌ chirix li chꞌina bu̱r. 8Ut li qꞌuila tenamit kꞌaxal nabaleb. Cuan li yo̱queb chixhelbal lix tꞌicr saꞌ be bar ta̱numekꞌ cuiꞌ li Jesús. Ut cuan li queꞌxyocꞌ chak rukꞌ cheꞌ ut queꞌxqꞌue li xak saꞌ be. 9Nak yo̱ chi xic li Jesús cuan yo̱queb chi xic chiru ut cuan yo̱queb chi xic chirix. Japjo̱queb re chixyebal: —Lokꞌoninbil taxak laj Colol ke, li ralal xcꞌajol li rey David. Osobtesinbil taxak li yo̱ chak chi cha̱lc saꞌ xcꞌabaꞌ li Ka̱cuaꞌ Dios. Aj Colol ke taxak li xchal chak riqꞌuin li Dios, chanqueb. 10Ut nak cox-ocak li Jesús saꞌ li tenamit Jerusalén, queꞌxtububi rib chixjunil ut nabaleb li tenamit yo̱queb chixyebal: —¿Ani aꞌin? chanqueb. 11Ut eb li tenamit li yo̱queb chi xic chirix yo̱queb chixyebal: —Aꞌan aꞌin li Jesús li profeta, aj Nazaret re Galilea, chanqueb.

Li Jesús quirisiheb laj cꞌay saꞌ rochoch li Dios

12Ut chirix chic aꞌan li Jesús qui-oc saꞌ li rochoch li Dios ut quixyolesiheb li yo̱queb chi cꞌayi̱nc ut li yo̱queb chi lokꞌoc. Quixbalkꞌusi lix me̱xeb laj jalol ru tumin ut quixbalkꞌusi ajcuiꞌ lix temeb li yo̱queb chi cꞌayi̱nc paloma. 13Quixye reheb: —Joꞌcaꞌin tzꞌi̱banbil saꞌ li Santil Hu chirix li rochoch li Dios: Li cuochoch aꞌin re teꞌtijok cuiꞌ li tenamit nak cuan. Abanan la̱ex xeqꞌue li rochoch li Dios chokꞌ xnaꞌajeb laj e̱lkꞌ, chan li Jesús reheb. 14Ut queꞌcꞌameꞌ riqꞌuin li Jesús saꞌ rochoch li Dios li mutzꞌ ut eb li ye̱k rok ut li Jesús quilajxqꞌuirtesiheb. 15Ut eb lix be̱nil aj tij ut eb laj tzꞌi̱b queꞌril li sachba chꞌo̱lej li yo̱ chixba̱nunquil. Ut queꞌril nak eb li sa̱j al japjo̱queb re chixyebal saꞌ li rochoch li Dios: —Lokꞌoninbil taxak laj Colol ke, li ralal xcꞌajol li rey David, chanqueb. Ut cꞌajoꞌ nak queꞌpoꞌ laj tij ut eb laj tzꞌi̱b. 16Ut queꞌxye re li Jesús: —¿Ma yo̱cat chirabinquil li yo̱queb chixyebal li sa̱j al?— Ut li Jesús quixye reheb: —Yo̱quin chirabinquil. ¿Ma ma̱ jun cua e̱rilom li tzꞌi̱banbil saꞌ li Santil Hu li naxye chi joꞌcaꞌin:

Eb li cocꞌal ut li toj nequeꞌtuꞌuc nequeꞌxqꞌue xlokꞌal li Dios chi tzꞌakal?— (Sal. 8:2)

17Ut li Jesús quixcanabeb ut qui-el saꞌ li tenamit ut co̱ toj Betania bar quihilan cuiꞌ.

Li Jesús quixtzꞌekta̱na li jun to̱n chi higo ma̱cꞌaꞌ ru

18Ut ekꞌela nak yo̱ cuiꞌchic chi xic Jerusalén, quichal xtzꞌocajic li Jesús. 19Ut quiril jun to̱n li cheꞌ higo chire li be. Nak quicuulac cuan cuiꞌ li cheꞌ quiril nak ma̱cꞌaꞌ ru. Junes xak cuan. Quixye re li jun to̱n chi higo: —Ma̱ jun cua chic tatu̱chi̱nk, chan. Ut saꞌ junpa̱t quichakic li cheꞌ. 20Ut nak queꞌril aꞌan, lix tzolom queꞌsach xchꞌo̱l ut queꞌxye: —¿Chanru nak xchakic saꞌ junpa̱t lix to̱nal li higo? chanqueb. 21Quichakꞌoc li Jesús ut quixye: —Relic chi ya̱l tinye e̱re nak cui te̱pa̱b chi tzꞌakal nak li Dios tixba̱nu, ut incꞌaꞌ ta̱cuiba̱nk e̱chꞌo̱l, ta̱ru̱k ajcuiꞌ te̱ba̱nu joꞌ xinba̱nu la̱in re li cheꞌ. Ut moco caꞌaj cuiꞌ ta raj aꞌan te̱ba̱nu. Ta̱ru̱k ajcuiꞌ te̱ye re li tzu̱l aꞌin, “Elen ut cut a̱cuib saꞌ li palau” ut ta̱uxk ajcuiꞌ che̱ru. 22Ut chixjunil li cꞌaꞌru te̱tzꞌa̱ma nak textijok, cui te̱pa̱b nak te̱cꞌul, ta̱qꞌuehekꞌ e̱re.

Eb laj tzꞌi̱b queꞌxcuechꞌi rix xcuanquil li Jesús

23Ut qui-oc cuiꞌchic li Jesús saꞌ rochoch li Dios. Ut nak yo̱ chixchꞌolobanquil lix ya̱lal chiruheb li tenamit, queꞌcuulac riqꞌuineb li xbe̱nil aj tij ut queꞌcuulac ajcuiꞌ eb li xakabanbileb chi cꞌanjelac saꞌ li rochoch li Dios. Ut queꞌxye re: —¿Ani xtaklan chak a̱cue chixba̱nunquil li cꞌaꞌru yo̱cat chixba̱nunquil? Ut, ¿ani xqꞌuehoc a̱cuanquil?— 24Quichakꞌoc li Jesús ut quixye reheb: —La̱in tincuaj ajcuiꞌ patzꞌoc e̱re. Cui te̱sume li cꞌaꞌru tinpatzꞌ e̱re, la̱in tinye e̱re ani xqꞌuehoc lin cuanquil chixba̱nunquil li cꞌaꞌru ninba̱nu. 25¿Ani quitaklan chak re laj Juan chi cubsi̱nc haꞌ? ¿Ma li Dios malaj ut cui̱nk quitaklan re? chan reheb. Eb aꞌan queꞌxcꞌoxla ut queꞌxye chi ribileb rib: —¿Cꞌaꞌru takasume cuiꞌ? Cui takaye nak aꞌ li Dios xtaklan chak re, aꞌan tixye ke cꞌaꞌut nak incꞌaꞌ xkapa̱b li cꞌaꞌru quixye laj Juan. 26Ut cui takaye nak cui̱nk xtaklan chak re, teꞌpokꞌ li tenamit saꞌ kabe̱n ut xiu xiu chic cua̱nko xban nak chixjunileb nequeꞌyehoc re nak laj Juan, aꞌan tzꞌakal profeta.— 27Ut eb aꞌan queꞌchakꞌoc ut queꞌxye re li Jesús: —La̱o incꞌaꞌ nakanau, chanqueb. Ut li Jesús quixye cuiꞌchic reheb: —Chi moco la̱in tinye e̱re ani xqꞌuehoc lin cuanquil, chan reheb.

Li jaljo̱quil ru a̱tin chirix li cuib chi alalbej

28Li Jesús quixye cuiꞌchic reheb: —¿Cꞌaꞌru nequecꞌoxla chirix li oc cue chixyebal? Jun li cui̱nk cuan cuib li ralal. Ut quicuulac riqꞌuin li xbe̱n ralal ut quixye: “At cualal, tatxic anakcuan chi cꞌanjelac saꞌ li cuacui̱mk.” 29Quichakꞌoc li alalbej ut quixye: “Incꞌaꞌ nacuaj xic,” chan. Abanan mokon chic quiyotꞌeꞌ xchꞌo̱l ut co̱. 30Ut li yucuaꞌbej co̱ riqꞌuin li ralal jun chic ut quixtzꞌa̱ma chiru aꞌan nak ta̱xic chi cꞌanjelac saꞌ li racui̱mk. Ut li ralal quichakꞌoc ut quixye: “Cuaꞌ, la̱in tinxic,” chan. Ut incꞌaꞌ co̱. 31¿Ani reheb li cuib aꞌan xba̱nun re li quiraj lix yucuaꞌ? chan. Eb aꞌan queꞌchakꞌoc ut queꞌxye: —Li xbe̱n.— Ut li Jesús quixye reheb: —Relic chi ya̱l tinye e̱re nak eb laj titzꞌol toj ut eb laj yumbe̱t teꞌoc xbe̱n cua che̱ru saꞌ lix nimajcual cuanquilal li Dios. 32Xban nak quicꞌulun e̱riqꞌuin laj Juan laj Cubsihom Haꞌ. Quixcꞌut che̱ru cꞌaꞌru li ti̱quilal ut incꞌaꞌ quepa̱b. Ut eb laj titzꞌol toj ut eb laj yumbe̱t queꞌxpa̱b. Ut la̱ex queril aꞌan ut incꞌaꞌ quiyotꞌeꞌ le̱ chꞌo̱l chi moco quejal le̱ cꞌaꞌux re xpa̱banquil, chan.

Li jaljo̱quil ru a̱tin chirix laj ilol acui̱mk incꞌaꞌ useb xnaꞌleb

33Abihomak jun chic li jaljo̱quil ru a̱tin li oc cue xyebal: Quicuan jun yucuaꞌbej. Quirau jun si̱r li racui̱mk uvas ut quixsut saꞌ corral. Quixyi̱b jun xnaꞌaj bar teꞌxyatzꞌ cuiꞌ li uvas ut quixyi̱b ajcuiꞌ jun chꞌina cab najt xteram re li ta̱cꞌacꞌale̱nk re li acui̱mk. Quixsiqꞌueb laj ilol re li racui̱mk. Ut laj e̱chal re co̱ chi najt saꞌ jalan tenamit. 34Nak quicuulac xkꞌehil xsicꞌbal ru li acui̱mk, laj e̱chal re quixtaklaheb lix mo̱s riqꞌuineb laj ilol re li acui̱mk chixcꞌulbal li joꞌ qꞌuial ru li racui̱mk li ta̱tzꞌak aꞌan. 35Eb li mo̱s queꞌchapeꞌ xbaneb laj ilol re li acui̱mk. Quisaqꞌueꞌ li jun, li jun chic quicamsi̱c, ut li jun chic quicuti̱c chi pec. 36Laj e̱chal re li acui̱mk quixtakla cuiꞌchic jun chꞌo̱leb lix mo̱s, nabaleb chiru li quixtakla xbe̱n cua. Ut joꞌcan cuiꞌchic queꞌxba̱nu reheb. 37Ut incꞌaꞌ chic quixtakla lix mo̱s. Aꞌ chic li ralal quixtakla. “Li cualal teꞌx-oxlokꞌi” chan saꞌ xchꞌo̱l. Joꞌcan nak quixtakla li ralal riqꞌuineb. 38Ut nak queꞌril li ralal, eb laj ilol re li acui̱mk queꞌxye chi ribileb rib, “Aꞌan li ralal li ta̱e̱chani̱nk re li naꞌajej. Kachapak ut kacamsihak, ut la̱o chic toe̱chani̱nk re.” 39Joꞌcan nak queꞌxchap. Ut queꞌrisi saꞌ li naꞌajej ut queꞌxcamsi. 40Ut li Jesús quixpatzꞌ reheb li xbe̱nil aj tij: —Nak ta̱cꞌulu̱nk laj e̱chal re li acui̱mk, ¿cꞌaꞌru tixba̱nu riqꞌuineb laj ilol re li racui̱mk nak nequeye la̱ex?— 41Queꞌxye re: —Incꞌaꞌ ta̱ril xtokꞌoba̱l ruheb laj ilol re li racui̱mk li incꞌaꞌ useb xnaꞌleb. Tixcamsiheb. Jalan chic tixsiqꞌueb re teꞌilok re li racui̱mk. Ut eb aꞌan, saꞌ xkꞌehil li sicꞌoc, teꞌxkꞌaxtesi chi tzꞌakal li joꞌ qꞌuial li ta̱tzꞌak aꞌan, chanqueb. 42Li Jesús quixpatzꞌ reheb: —¿Ma incꞌaꞌ xeril saꞌ li Santil Hu li naxye chi joꞌcaꞌin?

Li pec li queꞌxtzꞌekta̱na laj cablanel, aꞌan li kꞌaxal lokꞌ, li quiqꞌueman chokꞌ xxuc li cab. Li Ka̱cuaꞌ, aꞌan quixqꞌue xlokꞌal li pec. Ut aꞌan xsachba chꞌo̱lej chokꞌ ke la̱o. (Sal. 118:22-23)

43Joꞌcan nak ninye e̱re nak lix nimajcual cuanquilal li Dios ta̱makꞌekꞌ che̱ru ut ta̱qꞌuehekꞌ re jalanil tenamit ut eb aꞌan chic li teꞌpa̱ba̱nk ut teꞌcua̱nk saꞌ ti̱quilal. 44Li ani ta̱tꞌanekꞌ saꞌ xbe̱n li pec aꞌin tixtochꞌi rib. Ut cui ani saꞌ aj be̱n ta̱tꞌanekꞌ li pec aꞌin, xujinbil ta̱cana̱k, chan li Jesús. 45Ut eb lix be̱nil aj tij ut eb laj fariseo queꞌxtau ru nak chirixeb aꞌan yo̱ chi a̱tinac nak quixyeheb li jaljo̱quil ru a̱tin aꞌin. 46Ut queꞌxcꞌoxla raj xchapbal li Jesús, abanan queꞌxucuac xbaneb li qꞌuila tenamit xban nak profeta nak cuan chiruheb.

Currently Selected:

San Mateo 21: kek

Highlight

Copy