San Mateo 20

Chiru li Dios juntakꞌe̱t xcuanquil li junju̱nk

1Lix nimajcual cuanquilal li Dios chanchan jun li yucuaꞌbej cuan saꞌ xjun cablal. Qui-el chak toj ekꞌela chixsicꞌbaleb aj cꞌanjel re teꞌcꞌanjelak saꞌ li racui̱mk. 2Ut queꞌxsume cꞌanjelac chiru chi jun denario li cutan xtojbaleb. Ut quixtaklaheb saꞌ li racui̱mk chi cꞌanjelac. 3Ut nak qui-el cuiꞌchic saꞌ bele̱b o̱r, cuan cuiꞌchic quixtauheb chak saꞌ cꞌayil yal yo̱queb chixbaybal rib. 4Ut quixye reheb: —¿Ma incꞌaꞌ xeraj cꞌanjelac saꞌ li cuacui̱mk ut texintoj chi tzꞌakal? chan reheb. Ut eb aꞌan co̱eb chi cꞌanjelac. 5Caꞌ sut chic co̱ xsicꞌbaleb xtzꞌakobeb lix mo̱s. Co̱ cuaꞌleb ut co̱ cuiꞌchic saꞌ oxib o̱r. 6Ut nak ta̱nachꞌok o̱b o̱r, co̱ cuiꞌchic. Ut cuan cuiꞌchic quixtauheb yo̱queb chixbaybal rib. Ut quixye reheb: —¿Cꞌaꞌut nak yo̱quex chixnumsinquil le̱ cutan arin chi ma̱cꞌaꞌ le̱ trabaj? chan reheb. 7Queꞌchakꞌoc li cui̱nk ut queꞌxye re: —Xban nak ma̱ ani naqꞌuehoc kacꞌanjel.— Ut li patrón quixye reheb: —¿Ma incꞌaꞌ xeraj cꞌanjelac la̱ex saꞌ li cuacui̱mk? chan reheb. 8Ut nak qui-ecuu, li patrón quixye re lix merto̱m: —Bokeb laj cꞌanjel ut ta̱tojeb. Li ta̱tojeb xbe̱n cua, aꞌaneb li tojeꞌ xeꞌoc, ut nak ac xatrakeꞌ xtojbaleb aꞌan, tojoꞌnak ta̱tojeb li xeꞌoc ekꞌela.— 9Ut nak queꞌchal, jun denario queꞌtojeꞌ cuiꞌ li junju̱nk li queꞌoc chi cꞌanjelac saꞌ o̱b o̱r. 10Ut queꞌtojeꞌ ajcuiꞌ li queꞌoc ekꞌela. Saꞌ xchꞌo̱leb aꞌan nak terto raj teꞌxcꞌul chiru li queꞌoc ecuu. Abanan jun denario ajcuiꞌ queꞌxcꞌul li junju̱nk. 11Ut nak ac xeꞌxcꞌul li tumin, queꞌoc chixcuechꞌbal li patrón. 12Ut queꞌxye: —Eb aꞌin li xeꞌoc mokon jun o̱r ajcuiꞌ xeꞌcꞌanjelac. Ut juntakꞌe̱t lix tojbaleb xaqꞌue riqꞌuin li xkacꞌul la̱o. Ut la̱o xocꞌanjelac chiru chixjunil li cutan ut xkacuy xtikcual li sakꞌe ut juntakꞌe̱t xoa̱toj riqꞌuineb li jun chꞌol chic li toj xeꞌoc ecuu.— 13Ut quichakꞌoc li patrón ut quixye re jun reheb li queꞌoc xbe̱n cua: —At cuami̱g, la̱in xatintoj chi tzꞌakal. ¿Ma incꞌaꞌ ta biꞌ xasume cꞌanjelac chi jun denario li cutan? 14Cꞌam la̱ tojbal ut ayu. Li joꞌ nimal xinqꞌue a̱cue la̱at, aꞌan ajcuiꞌ tinqꞌue reheb li xeꞌoc mokon. 15¿Ma incꞌaꞌ ta biꞌ la̱in yal cue saꞌ xbe̱n li cꞌaꞌru cue? ¿Cꞌaꞌut nak nacatcakalin? ¿Ma xban nak cha̱bilin la̱in riqꞌuineb? chan li patrón. 16Joꞌcan nak nabaleb li cuanqueb xcuanquil anakcuan teꞌcana̱k chi ma̱cꞌaꞌak xcuanquil mokon. Ut li ma̱cꞌaꞌeb xcuanquileb anakcuan, teꞌqꞌuehekꞌ xcuanquileb mokon. Nabaleb li bokbileb, abanan incꞌaꞌ qꞌuiheb li teꞌxtau ru lix ya̱lal.

Quixye cuiꞌchic resil lix camic li Jesús

17Ut nak yo̱ chi xic Jerusalén, li Jesús quirisiheb xjunes lix tzolom cablaju ut quixye reheb: 18—Qꞌuehomak retal li cꞌaꞌru ta̱cꞌulma̱nk. Anakcuan yo̱co chi xic Jerusalén bar cuiꞌ tinkꞌaxtesi̱k la̱in li Cꞌajolbej saꞌ rukꞌeb li xbe̱nil aj tij joꞌ ajcuiꞌ saꞌ rukꞌeb laj tzꞌi̱b. Eb aꞌan teꞌxteneb ca̱mc saꞌ inbe̱n. 19Ut tineꞌxkꞌaxtesi saꞌ rukꞌeb li ma̱cuaꞌeb aj judío. Ut eb aꞌan tineꞌxhob, tineꞌxsacꞌ, ut tineꞌxcamsi chiru cruz. Abanan saꞌ rox li cutan tincuacli̱k cuiꞌchic chi yoꞌyo saꞌ xya̱nkeb li camenak, chan li Jesús.

Li naꞌbej quixtzꞌa̱ma xcuanquileb lix yum chiru li Jesús

20Laj Jacobo ut laj Juan, aꞌaneb li ralal laj Zebedeo. Queꞌcuulac riqꞌuin li Jesús rochben lix naꞌeb. Ut li naꞌbej quixcuikꞌib rib chiru li Jesús chixtzꞌa̱manquil jun usilal chiru. 21Li Jesús quixye re: —¿Cꞌaꞌru ta̱cuaj tinba̱nu a̱cue?— Ut li ixk quichakꞌoc ut quixye re: —Ye nak eb lin yum aꞌin teꞌcꞌojla̱k cha̱cꞌatk saꞌ la̱ nimajcual cuanquilal, jun saꞌ la̱ nim ut jun saꞌ la̱ tzꞌe, chan. 22Ut li Jesús quixye re: —Incꞌaꞌ nequenau xya̱lal li cꞌaꞌru yo̱quex chixtzꞌa̱manquil. ¿Ma te̱cuy xcꞌulbal li raylal li oc cue chixcꞌulbal la̱in? ¿Ma te̱cuy xnumsinquil li rahobtesi̱c li tincꞌul la̱in?— Eb aꞌan queꞌxye: —Takacuy, chanqueb. 23Ut li Jesús quixye reheb: —Ya̱l ajcuiꞌ nak la̱ex te̱cꞌul li raylal joꞌ li tincꞌul la̱in. Ut te̱cuy xnumsinquil li rahobtesi̱c joꞌ li tincuy xnumsinquil la̱in. Abanan li naꞌajej saꞌ lin nim ut saꞌ lin tzꞌe ma̱cuaꞌ la̱in tinqꞌuehok re li naꞌajej aꞌan xban nak ac chꞌolchꞌo chiru lin yucuaꞌ ani aj e tixqꞌue li naꞌajej aꞌan, chan li Jesús reheb. 24Ut nak queꞌrabi li laje̱b chic lix tzolom li Jesús li cꞌaꞌru queꞌxtzꞌa̱ma li ri̱tzꞌineb rib, queꞌpoꞌ riqꞌuineb. 25Ut li Jesús quixbokeb riqꞌuin ut quixye reheb: —La̱ex nequenau nak li nequeꞌtaklan saꞌ li ruchichꞌochꞌ nequeꞌnumta saꞌ xbe̱neb li tenamit. Li ni̱nkeb xcuanquil, aꞌaneb li nequeꞌtaklan. 26Abanan ma̱cuaꞌ joꞌcan te̱ba̱nu la̱ex. Li ani ta̱raj cua̱nk xcuanquil saꞌ e̱ya̱nk, tento nak tixcubsi rib ut ta̱cꞌanjelak che̱ru. 27Ut li ani naraj nima̱k xcuanquil saꞌ e̱ya̱nk, tento nak tixcubsi rib ut ta̱cꞌanjelak che̱ru. 28La̱in li Cꞌajolbej. Abanan incꞌaꞌ xinchal re nak teꞌxcꞌanjela cuu. Xinchal ban re tincꞌanjelak chiruheb chixjunil ut re xqꞌuebal lin yuꞌam re xtojbal rix lix ma̱queb chixjunileb.—

Li Jesús quixqꞌuirtesiheb li mutzꞌ

29Nak yo̱queb chi e̱lc Jericó, nabaleb li tenamit queꞌta̱ken re li Jesús. 30Ut cuanqueb cuibeb li mutzꞌ chunchu̱queb chire li be. Nak queꞌrabi nak yo̱ chi cha̱lc li Jesús, queꞌxjap re chixyebal: —Ka̱cuaꞌ, Ralalat xcꞌajol laj David. ¡Chacuuxta̱na taxak ku!— 31Ut eb li tenamit queꞌxchꞌilaheb ut queꞌxye reheb nak incꞌaꞌ teꞌchoki̱nk. Aꞌut eb aꞌan kꞌaxal cuiꞌchic cau queꞌxjap re chixyebal: —¡Ka̱cuaꞌ, ralalat xcꞌajol laj David, chacuuxta̱na taxak ku!— 32Quixakli li Jesús, quixbokeb ut quixye reheb: —¿Cꞌaꞌru te̱raj tinba̱nu e̱re? chan reheb. 33Ut eb li mutzꞌ queꞌxye: —Ka̱cuaꞌ, takaj ta̱ilok li xnakꞌ ku.— 34Ut li Jesús quiril xtokꞌoba̱leb ru, quixchꞌeꞌ li xnakꞌ ruheb. Ut saꞌ junpa̱t queꞌiloc li ruheb ut queꞌxta̱ke li Jesús.

Currently Selected:

San Mateo 20: kek

Highlight

Copy