San Mateo 16

Eb laj fariseo joꞌ eb ajcuiꞌ laj saduceo queꞌraj rilbal li milagro

1Queꞌcuulac laj fariseo ut eb laj saduceo riqꞌuin li Jesús. Queꞌraj xyalbal rix ut queꞌoc chixtzꞌa̱manquil chiru nak tixba̱nu junak milagro chiruheb re rilbal ma ya̱l nak riqꞌuin li Dios nachal lix cuanquil. 2Ut li Jesús quichakꞌoc ut quixye reheb: —Nak na-ecuu nequeye “cha̱bilak li cutan cuulaj xban nak cak ru li choxa.” 3Ut ekꞌela nequeye “ho̱n naxqꞌue hab xban nak cak ru ut kꞌojyi̱n ru li choxa.” La̱ex aj caꞌ pacꞌal u. Nequenau xqꞌuebal retal ru li choxa. Abanan, caꞌaj cuiꞌ aꞌan nequenau rilbal. Incꞌaꞌ nequeqꞌue retal cꞌaꞌru xya̱lal li yo̱ chi cꞌulma̱nc saꞌ eb li cutan aꞌin. 4La̱ex jun te̱p chi tenamit incꞌaꞌ us le̱ naꞌleb. Nequetzꞌekta̱na li Dios ut nequeraj nak ta̱cꞌutbesi̱k che̱ru junak milagro. Abanan incꞌaꞌ ta̱cꞌutbesi̱k che̱ru, caꞌaj cuiꞌ li milagro li qui-ux re laj Jonás, chan li Jesús. Tojoꞌnak quixcanabeb ut co̱. 5Nak ac xeꞌnumeꞌ lix tzolom jun pacꞌal li palau, queꞌxqꞌue retal nak incꞌaꞌ queꞌxcꞌam xtzacae̱mk. 6Ut li Jesús quixye reheb: —Cheqꞌuehak retal, me̱bon e̱rib riqꞌuin xchꞌamal xcaxlan cua eb laj fariseo chi moco riqꞌuin xchꞌamal xcaxlan cua eb laj saduceo. 7Eb lix tzolom queꞌoc chi a̱tinac chi ribileb rib ut queꞌxye: —Xban nak incꞌaꞌ xkacꞌam chak li caxlan cua, joꞌcan nak yo̱ chixyebal ke chi joꞌcan.— 8Li Jesús quixnau li cꞌaꞌru yo̱queb chixyebal ut quixye reheb: —La̱ex incꞌaꞌ nequexpa̱ban chi tzꞌakal. ¿Cꞌaꞌut nak yo̱quex chi cꞌoxlac chirix li xinye e̱re? ¿Cꞌaꞌut nak yo̱quex chixyebal chiribil e̱rib nak ma̱cꞌaꞌ le̱ caxlan cua? 9¿Ma toj ma̱jiꞌ nequetau xya̱lal? ¿Ma incꞌaꞌ najulticoꞌ e̱re nak xinjachi li o̱b chi caxlan cua reheb li o̱b mil chi cui̱nk? Ut, ¿jarub chacach li relaꞌ quexoc? chan. 10—Ut, ¿ma incꞌaꞌ najulticoꞌ e̱re nak xinjachi li cuukub chi caxlan cua reheb li ca̱hib mil chi cui̱nk? Ut, ¿jarub chacach li relaꞌ quexoc? 11¿Cꞌaꞌut nak incꞌaꞌ nequetau xya̱lal nak ma̱cuaꞌ chirix li caxlan cua yo̱quin chi a̱tinac nak xinye e̱re: Me̱bon e̱rib riqꞌuin li xchꞌamal xcaxlan cua eb laj fariseo ut eb laj saduceo? chan. 12Tojoꞌnak queꞌxtau ru nak ma̱cuaꞌ chirix xchꞌamal lix caxlan cua yo̱ chi a̱tinac. Chirix ban lix tijlebeb laj fariseo ut laj saduceo yo̱ chi a̱tinac.

Laj Pedro quixye nak li Jesús, aꞌan li Cristo

13Chirix chic aꞌan li Jesús co̱ rochbeneb lix tzolom saꞌ li naꞌajej Cesarea re Filipo. Nak yo̱queb chi xic, quixpatzꞌ reheb lix tzolom: —¿Anihin la̱in nak nequeꞌxye li tenamit?— 14Eb aꞌan queꞌchakꞌoc ut queꞌxye: —Cuan nequeꞌyehoc nak la̱at laj Juan laj Cubsihom Haꞌ. Ut cuan nequeꞌyehoc nak la̱at li profeta Elías, ut cuan nequeꞌyehoc nak la̱at li profeta Jeremías. Ut cuan cuiꞌchic nequeꞌyehoc nak la̱at junak chic reheb li profeta.— 15Ut li Jesús quixye reheb: —Ut la̱ex, ¿Anihin la̱in nak nequeye?— 16Quichakꞌoc laj Simón Pedro ut quixye: —La̱at li Cristo,#Saꞌ li versículo 16:16 li a̱tin “Cristo” saꞌ ra̱tinoba̱leb aj griego, naraj naxye laj Colonel li yechiꞌinbil xban li Dios chixcolbaleb li cuanqueb saꞌ ruchichꞌochꞌ. Ut saꞌ ra̱tinoba̱leb laj hebreo nayeman Mesías re. li Ralal li yoꞌyo̱quil Dios.— 17Tojoꞌnak quichakꞌoc li Jesús ut quixye re: —Us xak a̱cue, at Simón, ralalat laj Jonás, xban nak moco cui̱nk ta xcꞌutbesin cha̱cuu lix ya̱lal aꞌin. Lin Yucuaꞌ cuan saꞌ choxa, aꞌan ban li xcꞌutbesin cha̱cuu. 18Ut la̱in ninye a̱cue nak la̱at laj Pedro. Ut saꞌ xbe̱n li sako̱nac aꞌin la̱in tincabla lin iglesia ut laj tza ma̱cꞌaꞌak xcuanquil saꞌ xbe̱n. 19Ut la̱in tinqꞌue a̱cuanquil saꞌ xbe̱neb li ani teꞌpa̱ba̱nk cue. Ut chixjunil li cꞌaꞌru ta̱cꞌu̱b ru saꞌ xya̱lal saꞌ ruchichꞌochꞌ, li Dios tixcꞌu̱b ajcuiꞌ ru saꞌ choxa. Li cꞌaꞌru ta̱ye us arin saꞌ ruchichꞌochꞌ, li Dios tixye ajcuiꞌ nak us. Ut li cꞌaꞌru ta̱ye incꞌaꞌ us, li Dios tixye ajcuiꞌ nak incꞌaꞌ us.— 20Tojoꞌnak quixye reheb lix tzolom nak ma̱ ani aj e teꞌxye nak li Jesús, aꞌan li Cristo, li yechiꞌinbil xban li Dios.

Li Jesús quixye resil lix camic

21Chalen saꞌ li cutan aꞌan li Jesús quixtiquib xchꞌolobanquil chiruheb lix tzolom nak tento ta̱xic Jerusalén chixcꞌulbal nabal li raylal xbaneb li cui̱nk li xakabanbileb chi cꞌanjelac saꞌ li templo ut xbaneb li xbe̱nil aj tij joꞌ eb ajcuiꞌ laj tzꞌi̱b. Quixye reheb nak ta̱camsi̱k ut nak ta̱cuacli̱k cuiꞌchic chi yoꞌyo saꞌ rox li cutan. 22Ut laj Pedro quirisi xjunes li Jesús ut qui-oc chixkꞌusbal: —Ka̱cuaꞌ, chan re, li Dios taxak chicolok a̱cue re nak incꞌaꞌ ta̱cꞌul chi joꞌcan, chan. 23Ut li Jesús quixsukꞌisi rib chirilbal laj Pedro ut quixye re: —Elen arin saꞌ xnakꞌ cuu. La̱at chanchanat laj tza. Michꞌinan inchꞌo̱l a̱ban chixba̱nunquil li cꞌaꞌru tento tinba̱nu. La̱at incꞌaꞌ yo̱cat chixcꞌoxlanquil joꞌ naxcꞌoxla li Dios. Yo̱cat ban chixcꞌoxlanquil joꞌ naxcꞌoxla li cui̱nk, chan. 24Ut li Jesús quixye reheb lix tzolom: —Li ani ta̱raj inpa̱banquil, tento nak tixtzꞌekta̱na li cꞌaꞌru naxrahi ru lix chꞌo̱l. Tixcuy xnumsinquil li raylal, usta ta̱camsi̱k saꞌ incꞌabaꞌ. Ut chinixta̱kehak. 25Li ani naxra lix yuꞌam arin saꞌ ruchichꞌochꞌ, aꞌan tixsach li junelic yuꞌam. Aꞌut li ani naxsach lix yuꞌam arin saꞌ ruchichꞌochꞌ saꞌ incꞌabaꞌ, aꞌan ta̱re̱chani li junelic yuꞌam. 26¿Cꞌaꞌru tixra li cui̱nk cui ta̱re̱chani chixjunil xbiomal li ruchichꞌochꞌ ut tixsach li junelic yuꞌam xban li biomal? ¿Ma cuan ta biꞌ cꞌaꞌru tixtoj cuiꞌ li yuꞌam chi junelic? 27La̱in li Cꞌajolbej tincha̱lk riqꞌuin xnimal xlokꞌal lin Yucuaꞌ cuochbeneb lix ángel. Tojoꞌnak tinqꞌue lix kꞌajca̱munquil chi xjunju̱nkaleb joꞌ chanru lix yehom xba̱nuhom. 28Relic chi ya̱l tinye e̱re nak cuanqueb arin saꞌ e̱ya̱nk li incꞌaꞌ teꞌca̱mk toj tineꞌril chi cha̱lc la̱in li Cꞌajolbej riqꞌuin incuanquilal, chan li Jesús.

Currently Selected:

San Mateo 16: kek

Highlight

Copy