San Mateo 14

Lix camic laj Juan laj Cubsihom Haꞌ

1Saꞌ eb li cutan aꞌan laj Herodes li acuabej quirabi resil li cꞌaꞌru yo̱ chixba̱nunquil li Jesús. 2Ut aꞌan quixye reheb laj cꞌanjel chiru: —Aꞌan tana laj Juan laj Cubsihom Haꞌ. Aꞌan xcuacli cuiꞌchic chi yoꞌyo saꞌ xya̱nkeb li camenak. Joꞌcan nak cuan xcuanquil chixba̱nunquil li milagros, chan. 3Ac junxil laj Herodes quixtakla xchapbal laj Juan. Queꞌxbacꞌ riqꞌuin cadena ut queꞌxqꞌue saꞌ tzꞌalam. Laj Herodes quixba̱nu chi joꞌcan yal xban nak joꞌcan quiraj lix Herodías. Lix Herodías aꞌan li rixakil laj Felipe li ri̱tzꞌin laj Herodes. Ut laj Herodes quixcꞌam chokꞌ rixakil. 4Toj ma̱jiꞌ naqꞌueheꞌ saꞌ tzꞌalam laj Juan laj Cubsihom Haꞌ nak quixye re laj Herodes chi joꞌcaꞌin: —Nimla ma̱c xaba̱nu nak xacꞌam chokꞌ a̱cuixakil lix Herodías, chan laj Juan re. 5Joꞌcan nak laj Herodes quiraj raj xcamsinquil, aban quixucuac chiruheb li qꞌuila tenamit xban nak laj Juan profeta nak cuan chiruheb aꞌan. 6Ut saꞌ xninkꞌeinquil lix chihab laj Herodes, lix coꞌ lix Herodías quixajoc chiruheb chixjunileb li ulaꞌ. Ut cꞌajoꞌ nak quicuulac chiru laj Herodes. 7Joꞌcan nak laj Herodes quixyechiꞌi re riqꞌuin juramento nak tixqꞌue re chixjunil li cꞌaꞌru tixpatzꞌ. 8Ut li xkaꞌal chi ac tacchiꞌinbil xban lix naꞌ, quixye re laj Herodes: —Qꞌue cue arin saꞌ plato lix jolom laj Juan laj Cubsihom Haꞌ, chan. 9Ma̱ caꞌchꞌin nak quirahoꞌ xchꞌo̱l laj Herodes chirabinquil li quixye. Aban xban li juramento li ac quixye chiruheb li cuanqueb saꞌ me̱x rochben, quixtakla xqꞌuebal re li xkaꞌal li cꞌaꞌru quixpatzꞌ. 10Quixtakla xchꞌotbal xcux laj Juan aran saꞌ tzꞌalam. 11Ut queꞌxcꞌam chak lix jolom laj Juan saꞌ jun plato ut quikꞌaxtesi̱c re li xkaꞌal. Ut li xkaꞌal quixqꞌue re lix naꞌ. 12Nak queꞌrabi resil lix camic laj Juan, eb lix tzolom queꞌcuulac chixcꞌambal li camenak ut coxeꞌxmuk. Ut coxeꞌxye chak resil re li Jesús.

Li Jesús quixqꞌueheb chi cuaꞌac li o̱b mil chi cui̱nk

13Nak quirabi resil li quicꞌulman, li Jesús qui-el aran. Qui-oc saꞌ jun li jucub ut co̱ saꞌ jun naꞌajej cuan xjunes. Ut nak queꞌxqꞌue retal li tenamit nak co̱, queꞌel chak saꞌ lix tenamiteb ut queꞌco̱eb chi rokeb saꞌ a̱nil bar co̱ cuiꞌ li Jesús. 14Ut li Jesús nak qui-el saꞌ li jucub, quiril li qꞌuila tenamit li ac queꞌcuulac xbe̱n cua chiru aꞌan. Ut quixtokꞌoba ruheb ut quixqꞌuirtesiheb li yaj cuanqueb saꞌ xya̱nkeb. 15Ut nak qui-ecuu, queꞌcuulac lix tzolom riqꞌuin li Jesús ut queꞌxye re: —Yo̱ chi ecuu̱c ut ma̱cꞌaꞌ cuan arin cuanco cuiꞌ. Joꞌcan nak ta̱taklaheb li qꞌuila tenamit chixlokꞌbal lix cua saꞌ eb li cocꞌ tenamit.— 16Li Jesús quixye reheb: —Moco tento ta nak teꞌxic eb aꞌan. Qꞌuehomak xcuaheb la̱ex.— 17Ut eb aꞌan queꞌxye: —Ma̱cꞌaꞌ cuan ke la̱o arin, caꞌaj cuiꞌ o̱b chi caxlan cua ut cuib chi car.— 18Li Jesús quixye reheb: —Cꞌamomak chak cuiqꞌuin.— 19Ut nak ac xtaklaheb li qꞌuila tenamit chi cꞌojla̱c saꞌ li pachꞌayaꞌ, quixchap li o̱b chi caxlan cua ut li cuib chi car, qui-iloc takecꞌ ut quixbantioxi chiru li Dios. Ut quixjachi ut quixqꞌue li caxlan cua reheb lix tzolom ut queꞌxjeqꞌui reheb li qꞌuila tenamit. 20Ut queꞌcuaꞌac chixjunileb toj retal queꞌcꞌojla xchꞌo̱leb. Ut queꞌxxoc li joꞌ qꞌuial qui-elaꞌan. Cablaju chacach nujenak li relaꞌ qui-elaꞌan. 21Eb li queꞌcuaꞌac cuanqueb o̱b mil chi cui̱nk chi incꞌaꞌ qꞌuebileb saꞌ ajl li ixk ut eb li cocꞌal.

Li Jesús quibe̱c chiru li palau

22Tojoꞌnak li Jesús quixtaklaheb lix tzolom chi oc saꞌ li jucub re nak aꞌaneb xbe̱n cua teꞌxic jun pacꞌal li palau roybeninquil nak tixchakꞌrabiheb li qꞌuila tenamit. 23Ut nak ac xchakꞌrabiheb li tenamit, yo̱ chi oc li kꞌojyi̱n nak li Jesús co̱ chiru tzu̱l chi tijoc. Ut aran cuan xjunes. 24Ut li jucub li yo̱queb chi xic cuiꞌ lix tzolom ta̱cuulak saꞌ xyi li palau, ut lix cau ok li palau cau nocoxquet rib chiru li jucub, xban nak chiru yo̱ chak chi cha̱lc li ikꞌ. 25Sake̱uc re nak quicuulac li Jesús bar cuanqueb cuiꞌ ut yo̱ chi be̱c chiru li haꞌ. 26Nak queꞌril lix tzolom nak cuan jun yo̱ chi be̱c chiru haꞌ, queꞌxucuac ut queꞌxjap re ut queꞌxye: —Anum aꞌan.— 27Aꞌut li Jesús ticto quira̱tinaheb ut quixye reheb: —Mexxucuac. La̱in li yo̱quex chicuilbal. Cacuubresihomak e̱chꞌo̱l, chan reheb. 28Quichakꞌoc laj Pedro ut quixye: —Ka̱cuaꞌ, cui la̱at, ye nak tinxic ajcuiꞌ la̱in a̱cuiqꞌuin chiru li haꞌ.— 29Li Jesús quixye re: —Quim.— Ut laj Pedro qui-el chak saꞌ li jucub ut qui-oc chi be̱c chiru li haꞌ re ta̱xic riqꞌuin li Jesús. 30Abanan nak quixqꞌue retal li ca̱k-sut-ikꞌ, quixucuac, ut qui-oc chi subecꞌ saꞌ li haꞌ ut quixjap re ut quixye: —¡Ka̱cuaꞌ, china̱colak! chan. 31Ut li Jesús saꞌ junpa̱t quixyeꞌ li rukꞌ, quixchap ut quixye re: —At cui̱nk, incꞌaꞌ nacatpa̱ban chi tzꞌakal. ¿Cꞌaꞌut nak xacuiba a̱chꞌo̱l?— 32Ut nak queꞌoc saꞌ li jucub, quichꞌana li ikꞌ. 33Ut eb li cuanqueb saꞌ li jucub queꞌxcuikꞌib rib chiru li Jesús ut queꞌxlokꞌoni ut queꞌxye re: —Relic chi ya̱l nak la̱at li Ralal li Dios, chanqueb re.

Li Jesús quixqꞌuirtesi li yaj aran Genesaret

34Nak quicuulac li Jesús rochbeneb lix tzolom jun pacꞌal li palau, coxeꞌel saꞌ li naꞌajej Genesaret. 35Eb li cui̱nk cuanqueb aran ticto queꞌxqꞌue retal nak aꞌan li Jesús ut queꞌxye resil saꞌ chixjunil li naꞌajej aꞌan. Ut quilajeꞌxcꞌam li yaj riqꞌuin re nak tixqꞌuirtesiheb. 36Ut queꞌxtzꞌa̱ma chiru nak tixcanabeb li yaj chixchꞌeꞌbal li rakꞌ. Ut chixjunileb li queꞌchꞌeꞌoc re li rakꞌ quilajeꞌqꞌuira.

Currently Selected:

San Mateo 14: kek

Highlight

Copy