Malaquías 3
3
1Li Dios quixye: —La̱in tintakla lin takl laj cꞌamol be chicuu. Aꞌan ta̱chꞌoloba̱nk xya̱lal chiruheb li tenamit re nak eb aꞌan yoꞌon cua̱nkeb chixcꞌulbal li Jun li tintakla. Chi se̱b ta̱cha̱lk li Ka̱cuaꞌ li yo̱quex chixsicꞌbal ut ta̱oc saꞌ li templo. Li ani cha̱lc re, aꞌan ta̱xakaba̱nk re xcuanquil li contrato, li yo̱quex chiroybeninquil, chan li Dios. 2¿Ani ta cuiꞌ tixcuy rilbal lix cꞌulunic li Ka̱cuaꞌ? Ut, ¿ani ta cuiꞌ ta̱ru̱k tixxakab rib nak ta̱cꞌulu̱nk xban nak aꞌan joꞌ jun li xam li na-isin xtzꞌajnil li oro, ut joꞌ li xabo̱n li nasakobresin re li tꞌicr? 3Li Ka̱cuaꞌ ta̱risiheb lix ma̱usilaleb laj tij. Chanchan nak naxchunub rib laj yi̱bom plata ut oro. Naxqꞌue saꞌ xam li plata ut li oro re risinquil lix tzꞌajnil. Joꞌcan ajcuiꞌ tixba̱nu li Ka̱cuaꞌ nak ta̱risi lix ma̱usilaleb. Nak ac isinbilak chic lix ma̱usilal li ralal xcꞌajol laj Leví, ta̱ru̱k chic teꞌmayejak chiru li Ka̱cuaꞌ saꞌ ti̱quilal. 4Ta̱sahokꞌ cuiꞌchic saꞌ xchꞌo̱l li Ka̱cuaꞌ xcꞌulbal lix mayejeb laj Judá joꞌ ajcuiꞌ lix mayejeb laj Jerusalén joꞌ nak quixcꞌul chak chi sa saꞌ xchꞌo̱l lix mayejeb saꞌ eb li chihab quilajeꞌnumeꞌ najter kꞌe cutan. 5Li Ka̱cuaꞌ li nimajcual Dios quixye: —La̱in tincha̱lk chi rakoc a̱tin saꞌ e̱be̱n. La̱in tinyehok re nak cuan xma̱queb li nequeꞌtu̱lac, joꞌqueb ajcuiꞌ li nequeꞌmuxuc caxa̱r, joꞌqueb ajcuiꞌ li nequeꞌxpatzꞌ lin cꞌabaꞌ yal riqꞌuin ticꞌtiꞌ. Ut la̱in ajcuiꞌ tinyehok re nak cuan ajcuiꞌ xma̱queb li incꞌaꞌ nequeꞌxtoj chi tzꞌakal laj cꞌanjel, joꞌqueb ajcuiꞌ li nequeꞌrahobtesin reheb li xma̱lcaꞌan ut eb li nequeꞌrahobtesin reheb li ma̱cꞌaꞌ xnaꞌ xyucuaꞌ, joꞌqueb ajcuiꞌ li nequeꞌxba̱nu raylal reheb li jalaneb xtenamit, chi moco nequeꞌxxucua cuu la̱in, chan li Ka̱cuaꞌ li kꞌaxal nim xcuanquil.
Tento xqꞌuebal re li Dios li junju̱nk saꞌ xlaje̱tkil
6—La̱in li Ka̱cuaꞌ. Incꞌaꞌ ninjala. Joꞌcan nak toj ma̱jiꞌ ninsach e̱ru, la̱ex li ralal xcꞌajol laj Jacob. 7Chalen nak toj cua̱nkeb chak le̱ naꞌ e̱yucuaꞌ, la̱ex quetzꞌekta̱na li chakꞌrab li quinqꞌue e̱re ut incꞌaꞌ queba̱nu li cꞌaꞌru quinye. Sukꞌinkex cuiqꞌuin ut la̱in texincꞌul cuiꞌchic chokꞌ cualal incꞌajol, chan li nimajcual Dios. Abanan la̱ex nequeye, “¿Cꞌaꞌru xopaltoꞌ cuiꞌ nak tosukꞌi̱k a̱cuiqꞌuin?” chanquex. 8La̱in li Ka̱cuaꞌ Dios ninpatzꞌ e̱re: ¿Ma ta̱ru̱k ta biꞌ ta̱relkꞌa li cꞌaꞌru cue junak li cui̱nk? Incꞌaꞌ raj. Abanan la̱ex yo̱quex chi elkꞌac chicuu. Ut nequeye, “¿Cꞌaꞌru xkelkꞌa a̱cue?” chanquex. La̱ex xex-elkꞌac chicuu xban nak incꞌaꞌ nequeqꞌue li junju̱nk saꞌ xlaje̱tkil ut incꞌaꞌ nequeqꞌue le̱ mayej. 9Tzꞌekta̱nanbilex che̱junilex la̱ex, joꞌ ajcuiꞌ chixjunil li tenamit, xban nak yo̱quex chirelkꞌanquil li cꞌaꞌru cue. 10Joꞌcan ut nak cꞌamomak chak che̱junilex li junju̱nk saꞌ xlaje̱tkil saꞌ xnaꞌaj li mayej re nak ta̱cua̱nk li cꞌaꞌru ta̱cꞌanjelak saꞌ li cuochoch. Ut yalomakin anakcuan riqꞌuin aꞌin. ¿Ma incꞌaꞌ tana tinte chak re li choxa ut tinqꞌue chak chi numtajenak le̱ rosobtesinquil? chan li nimajcual Dios. 11—La̱in incꞌaꞌ tincanab chi sachecꞌ le̱ racui̱mk. Incꞌaꞌ tincanabeb li xul chixsachbal ru le̱ racui̱mk. Ta̱cua̱nk ban ru chi nabal le̱ uvas. 12Ut chixjunileb li xni̱nkal ru tenamit teꞌxye nak osobtesinbilex xban nak cꞌajoꞌak chic xchꞌinaꞌusal le̱ naꞌaj, chan li nimajcual Dios.
Li Dios naxtokꞌoba ruheb li cha̱bileb xnaꞌleb
13—Kꞌaxal ra nanak cuiꞌ le̱ ra̱tin xeye cue, chan li Ka̱cuaꞌ. Ut toj nequeye, “¿Cꞌaꞌru xkaye? ¿Cꞌaꞌru xatkahob cuiꞌ?” chanquex. 14La̱ex xeye, “Ma̱cꞌaꞌ aj e nak yo̱co chi cꞌanjelac chiru li Ka̱cuaꞌ. ¿Cꞌaꞌru takara nak yo̱ko chixpa̱banquil lix chakꞌrab? ¿Cꞌaꞌru takara nak yo̱ko chi cꞌuluc raylal chixta̱kenquil li Ka̱cuaꞌ li nimajcual Dios?” chanquex. 15Ut nequeye ajcuiꞌ, “Us xak reheb li incꞌaꞌ useb xnaꞌleb. Eb li nequeꞌba̱nun ma̱usilal, us cuanqueb. Nequeꞌxba̱nu li ma̱usilal yal re xyalbal rix li Dios ut ma̱cꞌaꞌ nequeꞌxcꞌul,” chanquex.— 16Abanan eb li nequeꞌxxucua ru li Ka̱cuaꞌ queꞌxjultica chi ribileb rib li rusilal li Dios. Ut li Ka̱cuaꞌ quirabi ut quixqꞌue retal li cꞌaꞌru queꞌxye. Ut chiru li Ka̱cuaꞌ quitzꞌi̱ba̱c saꞌ jun li hu lix cꞌabaꞌeb li nequeꞌxucuan ru ut nequeꞌqꞌuehoc xlokꞌal li Ka̱cuaꞌ. 17Li nimajcual Dios quixye: —Saꞌ li cutan nak tinchꞌutub ruheb lin tenamit, kꞌaxal lokꞌakeb chicuu. Joꞌ jun yucuaꞌbej naril xtokꞌoba̱l ru li ralal li nacꞌanjelac chiru, joꞌcan ajcuiꞌ nak tincuil xtokꞌoba̱l ruheb lin tenamit la̱in. 18Toj aran te̱qꞌue retal li ani quixba̱nu li us ut li ani incꞌaꞌ quixba̱nu li us. Te̱qꞌue retal lix jalanil riqꞌuineb li ani queꞌcꞌanjelac chicuu ut li ani incꞌaꞌ queꞌcꞌanjelac chicuu, chan li Ka̱cuaꞌ.
Currently Selected:
Malaquías 3: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.
