Hebreos 2
2
Li colba-ib kꞌaxal lokꞌ
1Xban nak li Cristo kꞌaxal lokꞌ chiruheb li ángel, joꞌcan nak takaqꞌue kachꞌo̱l chixpa̱banquil li cꞌaꞌru xkabi, re nak incꞌaꞌ ta̱sachk saꞌ kachꞌo̱l lix ya̱lal. 2Li esilal yebil xbaneb li ángel tzꞌakal ya̱l ut eb li incꞌaꞌ queꞌpa̱ban ut eb li queꞌxkꞌet li chakꞌrab, queꞌxcꞌul xtojbal xma̱queb joꞌ xcꞌulubeb. 3Cui eb aꞌan queꞌxcꞌul xtojbal xma̱c, ¿chan put ru nak tocolekꞌ la̱o chiru li tojba ma̱c cui nakatzꞌekta̱na li lokꞌlaj colba-ib li quixyechiꞌi ke li Ka̱cuaꞌ Jesucristo? Li Jesucristo quixyechiꞌi ke li kacolbal kꞌaxal lokꞌ. Ut chirix aꞌan, eb li queꞌabin re li ra̱tin, aꞌan eb ajcuiꞌ queꞌchꞌoloban lix ya̱lal chiku. 4Li Dios quixcꞌut chiku nak tzꞌakal ya̱l aꞌan riqꞌuineb li retalil ut li milagro li quilajxba̱nu riqꞌuin lix nimal xcuanquilal. Ut naxcꞌut ajcuiꞌ chiku nak ya̱l xban nak naxqꞌue li Santil Musikꞌej reheb li junju̱nk. Joꞌcan nak ac xma̱tan xma̱tan li junju̱nk joꞌ naraj li Dios.
Li Ka̱cuaꞌ Jesucristo quitzꞌejcualoꞌ re kacolbal
5Yo̱co chi a̱tinac chirix li acꞌ ruchichꞌochꞌ li ta̱cha̱lk. Li Dios incꞌaꞌ quixqꞌue xcuanquileb li ángel re nak teꞌtakla̱nk saꞌ xbe̱n aꞌan. 6Joꞌcaꞌin tzꞌi̱banbil saꞌ li Santil Hu:
At inDios, li cui̱nk ma̱cꞌaꞌ xcuanquil. ¿Cꞌaꞌut nak nacacꞌoxlaheb? Li cui̱nk ma̱cꞌaꞌeb xcuanquil. ¿Cꞌaꞌut nak nacaqꞌue a̱chꞌo̱l chirixeb?
7Xacubsi caꞌchꞌin xcuanquil chiruheb li ángel. Abanan xaqꞌue xnimal xlokꞌal. Ut xaxakab xcuanquil saꞌ xbe̱neb la̱ cꞌanjel xaba̱nu riqꞌuin a̱cuukꞌ.
8La̱at xaqꞌue chixjunil li cꞌaꞌak re ru rubel xcuanquil li cui̱nk. (Sal. 8:4-6)
Ut nak li Dios quixqꞌue chixjunil li cꞌaꞌak re ru rubel xcuanquil li cui̱nk, ma̱cꞌaꞌ cuan incꞌaꞌ ta napa̱ban chiru. Aꞌut anakcuan toj ma̱jiꞌ nakil nak chixjunil li cꞌaꞌak re ru cuan nequeꞌpa̱ban chiru. 9Abanan nakaqꞌue retal chanru nak li Jesucristo quinima̱c ru ut quiqꞌueheꞌ xlokꞌal. Usta quicubsi̱c xcuanquil jarubak cutan chiruheb li ángel, nak quitzꞌejcualoꞌ, quiqꞌueheꞌ xlokꞌal xban li raylal quixcꞌul nak quicam saꞌ kacꞌabaꞌ la̱o. Xban lix nimal rusilal li Dios, li Jesucristo quicam re xcolbal chixjunileb li cuanqueb saꞌ ruchichꞌochꞌ. 10Riqꞌuin xcꞌulbal li raylal, li Jesucristo quitzꞌakobresi̱c ru chiru li Dios. Li Ka̱cuaꞌ Dios quiyi̱ban re chixjunil li cꞌaꞌak re ru. Xban aꞌan nak aꞌ li Dios yal re saꞌ xbe̱n. Joꞌcan nak quixtakla chak li Jesucristo chi xcꞌulbal li raylal ut quicam re xtojbal rix li kama̱c. Ut aꞌan ajcuiꞌ laj cꞌamol be chiruheb li ralal xcꞌajol li teꞌtzꞌako̱nk saꞌ lix lokꞌal. 11La̱o nocosantobresi̱c xban li Ka̱cuaꞌ Jesucristo. La̱o ut li Jesucristo junaj ajcuiꞌ li kachoxahil Yucuaꞌ. Xban aꞌan li Jesucristo incꞌaꞌ naxuta̱na̱c chixyebal nak la̱o lix herma̱n. 12Quixye chi joꞌcaꞌin:
At inYucuaꞌ, tinchꞌolob a̱cuesilal chiruheb lin herma̱n. Saꞌ xya̱nkeb li chꞌutchꞌu̱queb tinbicha la̱ lokꞌal. (Sal. 22:22)
13Ut quixye cuiꞌchic:
Cauhak inchꞌo̱l riqꞌuin li Dios.
Ut quixye ajcuiꞌ:
Cueꞌquin arin la̱in, cuochbeneb li ralal xcꞌajol li Dios li xkꞌaxtesi saꞌ cuukꞌ. (Isa. 8:17-18)
14Ya̱l nak la̱o ut li Jesucristo junaj li kachoxahil Yucuaꞌ. Li Jesucristo quitzꞌejcualoꞌ joꞌ la̱o. Quicuan xquiqꞌuel. Quicuan xbakel ut xtibel. Li Jesucristo quicam. Riqꞌuin lix camic, li Ka̱cuaꞌ Jesucristo quixsach xcuanquil laj tza, xban nak saꞌ xcꞌabaꞌ laj tza nak cuan li ca̱mc. 15Chalen chak saꞌ kayoꞌlajic, nakaxucua ru li ca̱mc. Aban riqꞌuin lix camic li Ka̱cuaꞌ Jesucristo quirisi li kaxiu chiru li ca̱mc. 16Relic chi ya̱l li Ka̱cuaꞌ Jesucristo incꞌaꞌ quichal chixtenkꞌanquileb li ángel. Quichal ban chixtenkꞌanquileb li ralal xcꞌajol laj Abraham. (Ut la̱o ajcuiꞌ ralal xcꞌajol laj Abraham, xban nak nakapa̱b li Cristo.) 17Xban nak li Jesucristo quicꞌulun chixtenkꞌanquileb li cuanqueb saꞌ ruchichꞌochꞌ tento nak quitzꞌejcualoꞌ joꞌ eb lix herma̱n. Chi ya̱l nak quitzꞌejcualoꞌ re nak ta̱ruxta̱na ku ut tixtoj rix li kama̱c. Li Jesucristo aꞌan lix yucuaꞌil aj tij chi cꞌanjelac chiru li Dios. 18Li Ka̱cuaꞌ Jesucristo quixcꞌul li raylal ut quiyaleꞌ ra̱lenquil. Aban, incꞌaꞌ quixqꞌue rib chi a̱le̱c. Joꞌcan nak nim xcuanquil chixtenkꞌanquileb li nequeꞌyaleꞌ ra̱lenquil.
Currently Selected:
Hebreos 2: kek
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators. All rights reserved.