1 Timoteo 5

Laj Timoteo tixqꞌue xnaꞌlebeb laj pa̱banel saꞌ xya̱lal

1Ma̱kꞌuseb li che̱quel cui̱nk saꞌ joskꞌil. Qꞌueheb ban xnaꞌleb joꞌ la̱ yucuaꞌ cha̱cuu nak ta̱cuileb. Ut chaqꞌueheb ajcuiꞌ xnaꞌleb li sa̱j cui̱nk joꞌqueb a̱cui̱tzꞌin cha̱cuu nak ta̱cuileb. 2Ut chaqꞌueheb xnaꞌleb li che̱quel ixk joꞌ la̱ naꞌ cha̱cuu nak ta̱cuileb. Ut chaqꞌueheb ajcuiꞌ xnaꞌleb li sa̱j ixk joꞌqueb la̱ cuanab cha̱cuu nak ta̱cuileb. Chaqꞌueheb xnaꞌleb riqꞌuin xti̱quilal a̱chꞌo̱l.

Laj Pablo quixchꞌolob xya̱lal chanru nak teꞌtenkꞌa̱k li xma̱lcaꞌan

3Cha-oxlokꞌiheb li xma̱lcaꞌan ut chatenkꞌaheb cui ya̱l nak ma̱ ani chic nequeꞌtenkꞌan reheb. 4Abanan cui cuan ralal xcꞌajol, aꞌan eb chic teꞌtenkꞌa̱nk reheb. Tento nak teꞌxtzol rib chixba̱nunquil chi joꞌcaꞌin re nak teꞌxnau rilbal lix jun cablaleb. Teꞌxnau xkꞌajca̱munquil lix naꞌ xyucuaꞌ joꞌ nacuulac chiru li Dios. 5Li xma̱lcaꞌan li jun a̱tal, caꞌaj chic riqꞌuin li Dios nayoꞌonin. Naxnumsi li cutan ut li kꞌojyi̱n chi tijoc ut naxtzꞌa̱ma chiru li Dios nak ta̱tenkꞌa̱k. 6Abanan li xma̱lcaꞌan li naxsicꞌ xsahil xchꞌo̱l junes riqꞌuin li naxrahi ru, li jun aꞌan chanchan ac camenak xban lix ma̱c usta toj yoꞌyo. 7Ta̱chꞌolob lix ya̱lal aꞌin chiruheb chixjunileb laj pa̱banel re nak ma̱cꞌaꞌak xkꞌusbaleb. 8Tento nak junak laj pa̱banel tixtenkꞌaheb li rechꞌalal. Ut kꞌaxal cuiꞌchic tento nak tixchꞌolaniheb li cuanqueb saꞌ li rochoch. Cui incꞌaꞌ naxba̱nu aꞌan, li jun aꞌan incꞌaꞌ naxqꞌue xcuanquil lix pa̱ba̱l ut kꞌaxal cuiꞌchic nim lix ma̱c chiruheb li toj ma̱jiꞌ nequeꞌxpa̱b li Dios. 9Ma̱ ani junak xma̱lcaꞌan ta̱tzꞌi̱ba̱k xcꞌabaꞌ saꞌ xya̱nkeb li nequeꞌtenkꞌa̱c xbaneb laj pa̱banel cui toj ma̱jiꞌ naxba̱nu oxcꞌa̱l chihab. Ut ma̱cuaꞌak aj muxul ru xsumlajic nak quicuan. 10Tento ajcuiꞌ nak li xma̱lcaꞌan naꞌno̱k ru riqꞌuin li cha̱bilal ac xba̱nu. Ac xqꞌuiresiheb lix cocꞌal saꞌ xya̱lal. Quixcꞌul li rulaꞌ saꞌ xya̱lal nak queꞌcuulac saꞌ rochoch. Quixchꞌaj li rokeb li rech aj pa̱banelil. Quixtenkꞌaheb li yo̱queb chixcꞌulbal li raylal. Cui cha̱bil li cꞌanjel quixba̱nu, naru tixcꞌul lix tenkꞌanquil. 11Abanan, li xma̱lcaꞌan li toj sa̱jeb incꞌaꞌ ta̱tzꞌi̱ba̱k xcꞌabaꞌeb saꞌ xya̱nkeb li nequeꞌxcꞌul xtenkꞌanquil xban nak ma̱re teꞌxra cuiꞌchic ru li sumla̱c ut ma̱re anchal incꞌaꞌ chic teꞌxqꞌue xchꞌo̱l chi cꞌanjelac chiru li Cristo. 12Ut ma̱re anchal cheꞌcuechꞌi̱k rix xban nak incꞌaꞌ chic teꞌcꞌanjelak chiru li Cristo joꞌ queꞌxyechiꞌi xba̱nunquil. 13Ut joꞌ cuiꞌ anchal nequeꞌxtzol ribeb chi subuc cutan nak nequeꞌxic saꞌ li junju̱nk chi cab. Ut ma̱cuaꞌ caꞌaj cuiꞌ subuc cutan nequeꞌxba̱nu. Nequeꞌxtzol aj ban cuiꞌ li moloc a̱tin ut li qꞌuehoc etal ut nequeꞌxye li moco yehecꞌ ta naraj. 14Joꞌcan nak nacuaj nak li xma̱lcaꞌan li toj sa̱jeb teꞌsumla̱k cuiꞌchic. Cheꞌcua̱nk ralal xcꞌajol ut cheꞌxjolomi lix jun cablal re nak incꞌaꞌ tohobekꞌ la̱o aj pa̱banel xbaneb li xicꞌ nequeꞌiloc ke. 15Ninye aꞌin xban nak cuanqueb li xma̱lcaꞌan li ac queꞌrisi ribeb saꞌ kaya̱nk ut yo̱queb chixba̱nunquil li cꞌaꞌru naraj laj tza. 16Cui junak aj pa̱banel usta ixk usta cui̱nk, cuan junak rechꞌalal xma̱lcaꞌan, tento nak tixtenkꞌa. Incꞌaꞌ tixqꞌue nabal li i̱k saꞌ xbe̱neb li rech aj pa̱banelil li nequeꞌtenkꞌan reheb li xma̱lcaꞌan li ma̱cꞌaꞌeb ralal xcꞌajol.

Laj Pablo quixye chanru teꞌxba̱nu laj pa̱banel li teꞌcꞌamok be saꞌ xya̱nkeb

17Oxlokꞌinbilakeb li nequeꞌcꞌamoc be chi cha̱bil saꞌ xya̱nkeb laj pa̱banel. Ut xcꞌulub ajcuiꞌ nak teꞌxcꞌul xkꞌajca̱munquil xban nak nequeꞌxqꞌue xchꞌo̱l chixchꞌolobanquil xya̱lal li ra̱tin li Dios ut chixtzolbaleb laj pa̱banel. 18Joꞌcaꞌin tzꞌi̱banbil saꞌ li Santil Hu:

Ma̱bacꞌ xtzꞌu̱mal re li bo̱yx nak yo̱ chixyekꞌinquil ru li trigo re risinquil saꞌ rix. Canab ban chixcuaꞌbal caꞌchꞌinak re, nak yo̱ chi cꞌanjelac. (Deut. 25:4)

Joꞌcan ajcuiꞌ laj cꞌanjel. Tzꞌi̱banbil ajcuiꞌ retalil nak tento ajcuiꞌ nak tixcꞌul lix tojbal. 19Ma̱pa̱b li ani ta̱jitok re junak aj cꞌamol be saꞌ xya̱nkeb laj pa̱banel cui yal jun ajcuiꞌ li najitoc re. Cua̱nk ban cuib oxibak li teꞌjitok re, re nak ta̱pa̱ba̱k nak ya̱l lix ma̱c. 20Ut li ani cuan xma̱c, us xkꞌusbal chiru chixjunileb laj pa̱banel re nak li jun chꞌol chic aj cꞌamol be teꞌxucuak ut teꞌxcꞌoxla chi us li cꞌaꞌru teꞌxba̱nu. 21Joꞌ chiru li Dios, joꞌ chiru li Ka̱cuaꞌ Jesucristo, joꞌ ajcuiꞌ chiruheb li santil ángel, la̱in nintzꞌa̱ma cha̱cuu nak ta̱ba̱nu la̱ taklanquil yo̱quin chixyebal a̱cue. Ut incꞌaꞌ ta̱sicꞌ ru junak. Juntakꞌe̱takeb ban chixjunileb nak ta̱cuileb. Jun xxiquic nak ta̱kꞌuseb li ani cuanqueb xma̱c. 22Ma̱qꞌue junak chi cꞌamoc be saꞌ junpa̱t saꞌ xya̱nkeb laj pa̱banel. Xbe̱n cua ta̱cuil chanru lix yuꞌam xban nak cui la̱at ta̱xakab chi cꞌanjelac chi junpa̱t ut na-oc chi ma̱cobc, cuan ajcuiꞌ ma̱c saꞌ a̱be̱n la̱at. Chatcua̱nk ban chi ti̱c la̱ chꞌo̱l. 23Xban nak cuan xyajel la̱ saꞌ, ma̱cuucꞌ junes haꞌ. Naru ta̱cuucꞌ caꞌchꞌinak li vino re xbanbal. 24Ma̱xakab junak aj cꞌamol be chi junpa̱t chi cꞌanjelac xban nak cuanqueb li cui̱nk nacꞌutun cꞌaꞌru lix ma̱queb ut cuan li rakba a̱tin saꞌ xbe̱neb. Ut cuanqueb cuiꞌchic toj mokon nacꞌutun cꞌaꞌru lix ma̱queb. 25Ut cuan ajcuiꞌ li nequeꞌba̱nun re li cha̱bilal. Cuan nak nacꞌutun li cha̱bilal nequeꞌxba̱nu ut cuan nak incꞌaꞌ nacꞌutun. Abanan, toj mokon chic ta̱cꞌutu̱nk li us nequeꞌxba̱nu.

Currently Selected:

1 Timoteo 5: kek

Highlight

Copy