Tito 2

Wan Cuybꞌanile Caw Yel

1Jal jaach, jaach tiꞌ, wuẍtaj Tito, jaꞌ ojabꞌ tzet smoo chi el kuneni, jaꞌ cha wakꞌ cuyle oj, wan bꞌeybꞌale chi ẍaꞌle sbꞌa yetoj wan cuybꞌanile caw yel. 2Cha wal tet ebꞌ ichamtaj winaj, tol cꞌam chi scamtze el sbꞌa ebꞌ yetoj an. Watxꞌ ojabꞌ chi yute sbꞌa ebꞌ, yet watxꞌ ey yeloc apnoj ebꞌ yul sat ebꞌ yet animail. Tol chi snaꞌ sbꞌa scꞌul ebꞌ yin wan tzettaj yetal yet cꞌamto chi swaꞌne. Caw ojabꞌ chi yaoc scꞌul ebꞌ yin wan cuybꞌanile yel. Ey ojabꞌ scamcꞌulal ebꞌ yin yet animail. Tecꞌan ojabꞌ chi yute sbꞌa ebꞌ yet chi yilon syaꞌilal ebꞌ. 3Jacꞌalaꞌ pax ebꞌ ix ixnamil ix xa, cha wal tet ebꞌ, tol watxꞌ chi yute sbꞌeybꞌal ebꞌ, jaxca chi yoche scꞌul Dios. Cꞌam ojabꞌ chi alwi pena kꞌumale ebꞌ yin yet animail. Catuꞌ cꞌam ojabꞌ chi oc ebꞌ yin yaawiloj uqꞌuem anil. Cha cuy ebꞌ yin wan tiꞌ, yet watxꞌ chi oc ebꞌ yin cuywawomal yin tzet watxꞌ. 4Catuꞌ chi cuywa ebꞌ ix tet ebꞌ ix kꞌopo ix to yin tzet chi yunne, cꞌal yin tzet chi yalaꞌ. Chi cuywa pax ebꞌ yin tol chi scamcꞌulnen yichamil ebꞌ ix cꞌal yuneꞌ ebꞌ ix. 5Tol ojabꞌ chi snaꞌ sbꞌa scꞌul ebꞌ yin wan tzettaj yetal yet cꞌamto chi yunne. Tool ojabꞌ sbꞌeybꞌal ebꞌ ix. Syaꞌilne ojabꞌ sna ebꞌ ix. Watxꞌ ojabꞌ chi yute scꞌul ebꞌ ix tet yet animail. Jijem ojabꞌ ebꞌ ix tet yichamil, yet watxꞌ cꞌam ojabꞌ bꞌuchwal kꞌane chi al-le yin skꞌane Dios. 6Yetoj pax oj, chi cam ja walon tet ebꞌ achꞌetaj winaj, tol ojabꞌ chi snaꞌ sbꞌa scꞌul ebꞌ yin wan tzettaj yetal yet cꞌamto chi yunne. 7Watxꞌ cha wute ja bꞌeybꞌal yin masanil tzettaj yetal yil ebꞌ. Jaꞌ ojabꞌ yet chach cuywa xol ebꞌ, chach cuywa yin masanil ja cꞌul, catuꞌ man ojabꞌ yin oj maaxil kꞌane. 8Tool cꞌal cha wute ja cuywa ja bꞌa tet ebꞌ, yet watxꞌ cꞌam ojabꞌ mac chi aloni, tol cꞌam swatxꞌil wan cha wakꞌ scuy ebꞌ tuꞌ. Yuxan, caxcꞌal ey ebꞌ chi tit sjowal ja win, oj qꞌuixwoj pax a ebꞌ, yutol cꞌam junoj tzetyetal pena chi skeꞌ yalon ebꞌ kin. 9Cha wal tet ebꞌ creyente eyoc yakꞌomaloj servil junojxa, tol jijem ojabꞌ chi yute sbꞌa ebꞌ tet syaawil. Watxꞌ ojabꞌ chi yute sbꞌa ebꞌ jaxca chi yoche scꞌul syaawil ebꞌ tuꞌ. Manche stakꞌwi ecꞌ stiꞌ syaawil ebꞌ. 10Cꞌam ojabꞌ chi mocꞌwitoj tzetyetal ebꞌ tet syaawil. Catuꞌ chi xꞌoxon eloj tol tool chi yute sbꞌa yin yunen masanil tzettaj yetal. Ta chi yun ebꞌ yakꞌomal servil jaxca masanil jix wal tuꞌ, jaxca tiꞌ oj yun xꞌoxon eloj tol caw sakꞌal scuybꞌanil cu Colomal Dios. 11Cha wakꞌ masanil wan tiꞌ scuy ebꞌ, wuẍtaj Tito, yutol jaꞌ Dios jix xꞌox swatxꞌcꞌulal ey jon. Jaꞌ yu swatxꞌcꞌulal Dios tuꞌ, yuxan ey colbꞌanile tet masanil ánima yul yibꞌankꞌinal tiꞌ. 12Yu swatxꞌcꞌulal tuꞌ, yuxan chi naꞌcha el ku, tol sowalil chi cu bꞌejcan masanil tzet man watxꞌoj yul sat Dios, cꞌal masanil tzet man watxꞌoj chi koche oc yul yibꞌankꞌinal tiꞌ. Catuꞌ tol chi snaꞌ sbꞌa cu cꞌul yin wan tzettaj yetal yet cꞌamto chi kunne, catuꞌ watxꞌ cꞌal chi kute cu bꞌeybꞌal. Asan yin Dios chi kaoc cu naꞌbꞌal yet ey jon ecꞌ yul yibꞌankꞌinal tiꞌ. 13Kunwej jaxca tuꞌ xin, yet lalan kechbꞌanen sjul jun cꞌual tzalacꞌulal yet oj jul cu Diosal caw miman yeloc apnoj, Naj cu Colomal Jesucristo. 14Jix yakꞌ sbꞌa Naj cam cu yaꞌiloj, yu cu scolon el yul skꞌabꞌ spenail. Jix yiꞌel masanil cu penail Naj, yet watxꞌ asan Naj ey yalon yet kin, catuꞌ asan ojabꞌ tzet watxꞌ chi koche chi kunne. 15Jaꞌ masanil wan xax wal ey jaach tiꞌ, al tet ebꞌ creyente tituꞌ. Cha wiptze ebꞌ. Cha wakꞌ ja wip ja tenchane ebꞌ pena sbꞌeybꞌal, yutol jaxca tuꞌ ja wopiso yei. Catuꞌ cꞌam cha chaꞌ yal ebꞌ tol cꞌam ja wopiso.

Currently Selected:

Tito 2: knj

Highlight

Copy