Lucas 21
21
Saꞌbꞌeal Jun Ix Mebꞌa Ix Tet Dios, Camnajxa Yichamil
(Marcos 12:41-44)
1Jaꞌ junel, eecꞌ Jesús yul stemplo Dios. Jix yiloni, tzet cꞌal jix yute yaon eytoj stumin ebꞌ bꞌeom yul jun chabꞌal saꞌbꞌeal tet Dios. 2Jix yilon pax yapni jun ix mebꞌa ix, camnajxa yichamil. Jix yaon eytoj caabꞌ chꞌen centavo ix. 3Yuxan jix yal Jesús tet ebꞌ eyecꞌ yetoj jaxca tiꞌ:
—Caw yel chi wal ey jex, jaꞌ jun ix camnajxa yichamil tiꞌ, caw mebꞌa ix. Jal pax saꞌbꞌeal ix tet Dios jix yakꞌ tuꞌ, yel ecꞌbꞌan yeloc apnoj yintaj yet masanil ebꞌ jix yakꞌ yet. 4Yutol junjun ebꞌ, jaꞌ chꞌen jix yakꞌ can sobra chi yaeytoj ebꞌ saꞌbꞌealoj tet Dios. Jal jun ix ix tiꞌ xin, caw mebꞌa ton ix. Tzꞌajan jix yaeytoj masanil stumin ix saꞌbꞌealoj tet Dios. Cꞌamxa tzet jix can tet ix, ẍi Jesús tet ebꞌ.
Jix Yaltej Jesús Tol Oj Makꞌle Ey Stemplo Dios
5Ey wan ebꞌ lalan yalontej yu stemplo Dios tuꞌ, tzet utbꞌil tol caw watxꞌ yili, caw watxꞌ scawxi yu chꞌen chꞌen eyoc yin, yetoj yu wan saꞌbꞌeal ánima eyoc yin. Yuxan jix yaltej Jesús tet ebꞌ jaxca tiꞌ:
6—Jaꞌ wan lalan je yilon tiꞌ, oj ecꞌ bꞌulna masanil yet jun tiempoal oj juloj. Cꞌam junoj wan chꞌen latzꞌbꞌil a tiꞌ oj can yibꞌan yet chꞌenal, ẍi Jesús tet ebꞌ.
Wan Txꞌoxbꞌanile Oj Xꞌox Dios Yet Tuxa Chi Jul Slawubꞌal Yul Yibꞌankꞌinal
(Mateo 24:3-28; Marcos 13:3-23)
7Jix skꞌanlen ebꞌ tet Jesús jaxca tiꞌ:
—Jaach cuywam, ¿bꞌakꞌin oj jul jun cha wal tuꞌ? ¿Tzet txꞌoxbꞌanile oj xꞌox Dios yet tuxa oj juloj? ẍi ebꞌ tet Jesús. 8Jix yalon tet ebꞌ jaxca tiꞌ:
—Caw listo cꞌal che yute je bꞌa, yet watxꞌ cꞌam mac oj jex etnen oj. Yutol ecꞌal mac oj juloj, oj tzꞌaj yaoc jin bꞌi ebꞌ yin, “Jain ton Cristo jin an,” ẍi ebꞌ oj tzꞌaj yalon ebꞌ. “Tol jix jul slawubꞌal yul yibꞌankꞌinal,” ẍi ebꞌ oj yalon pax ebꞌ. Manche je yaoc yin je cꞌul tzet oj yal ebꞌ tuꞌ. 9Oj je yabꞌ skꞌaneal wan mimej jowal, oj a waan ebꞌ comon ánima yin jowal yin ebꞌ yaaw. Manche je xiwaoj. Yutol sowalil jaꞌ wan tiꞌ oj bꞌabꞌoj ecꞌ eloj. Man to pax oj lawoj ecꞌ yul yibꞌankꞌinal tiꞌ yet tuꞌ. 10Oj smitxꞌle a sbꞌa mimej nación* yin jowal. Yetoj wan txꞌoj txꞌoj mimej conobꞌal, oj smitxꞌle pax a sbꞌa yin jowal. 11Ecꞌal bꞌey oj ecꞌ mimej quixcabꞌ caw jow. Ecꞌal wan tzetyetal oj je yil satcan, caw oj xiw ánima yu. Oj xꞌoxon a sbꞌa wan yechel bꞌey satcan tol caw miman yeloc apnoj tuꞌ.
12Jaꞌ yet cꞌamto chi jul wan tuꞌ, ey mac oj jex mitxꞌonoj, catuꞌ oj yakꞌon ebꞌ penacꞌulalil je yin. Oj jex yiꞌtoj ebꞌ bꞌey snail sculto yu chi snaꞌoc ebꞌ je yin, catuꞌ oj jex yaon oc ebꞌ preso. Oj jex yiꞌtoj ebꞌ sattaj ebꞌ rey, cꞌal sattaj wanxa ebꞌ yaaw yu cꞌal che yaoc je cꞌul win an. 13Jaxca cꞌal tuꞌ oj skeꞌ je yalon can el jin kꞌaneal tet ebꞌ. 14Sowalil ojabꞌ che yotajne el sbꞌabꞌelal, tol ma skeꞌ je seyon tzet oj je yute je colon je bꞌa yet oj jex apnoj sattaj ebꞌ tuꞌ. 15Yutol jain oj jin kꞌanabꞌ el je yin, catuꞌ oj wakꞌon je jelanil. Yuxan, cꞌam junoj ebꞌ chi jowi oc scꞌul je yin tuꞌ oj jex akꞌon ganar. Cꞌam junoj ebꞌ chi apni sjelanil jaxca jun oj wakꞌ ey jex an. 16Ey jex, tol jaꞌ je mam je txutx, je yuẍtaj, je yican, je yamigo, jaꞌ oj meltzo oc je yin. Ey jex oj jex makꞌle cam yu ebꞌ. 17Jal masanil ánima xin, oj jowi oc scꞌul ebꞌ je yin, yutol eyoc je cꞌul win an. 18Cꞌam pax junoj jex oj jex qꞌueyle eloj, caxcꞌal junoj xil je jolom. 19Ta tecꞌan cꞌal oj je yute je bꞌa, oj je yakꞌ ganar je chaꞌon je kꞌinal tol ey cꞌal yin tobꞌalkꞌinal.
20Jaꞌ yet oj je yiloni, tol jix joyle Jerusalén tiꞌ yu ebꞌ soldado, naꞌcha ojabꞌ el je yu, tol tuxa oj lawoj. 21Jaꞌ ebꞌ eyecꞌ bꞌey Judea tiꞌ, to ojabꞌ ebꞌ bꞌey wonan. Jaꞌ ebꞌ eyecꞌ bꞌey Jerusalén tiꞌ, el ojabꞌ pax a ebꞌ. Jaꞌ ebꞌ chi ecꞌ naatlaj, cꞌam ojabꞌ chi oc ebꞌ yul conobꞌ tiꞌ. 22Yutol jaꞌ yet jun tiempoal tuꞌ oj jul jun miman syaꞌtajilal. Jaꞌton yet tuꞌ, oj yun jantaj tzet tzꞌibꞌebꞌilcan yul An Juun Tzꞌibꞌebꞌilcanoj. 23Jaꞌ ebꞌ ix mimejalxa yet jun tiempoal tuꞌ, cꞌal ebꞌ ix eyto yuneꞌ chi txutxwi, okꞌbꞌalcꞌule ebꞌ ix yet oj eltoj ebꞌ ix tuꞌ. Yutol caw miman syaꞌtajilal oj jul yibꞌan ebꞌ ánima bꞌey wan lugar tiꞌ. Yutol oj tit sjowal scꞌul Dios yibꞌan ebꞌ ket Israelal. 24Ecꞌal ebꞌ oj cam can xol jowal tuꞌ. Ecꞌal ebꞌ oj tojcan preso, oj sajlem cantoj ebꞌ bꞌey conobꞌlaj. Oj etex can ey Jerusalén tiꞌ yu ebꞌ man Israeloj tuꞌ, masantaꞌcꞌal yet oj lawoj stiempoal yakꞌon ebꞌ yaawil, jaxca chi yoche Dios.
Jaꞌ Tzet Oj Juloj Yet Oj Jul Jesús Yet Scaelal
(Mateo 24:29-35, 42-44; Marcos 13:24-37)
25Ey wan yechel oj xꞌox sbꞌa yin cꞌu, cꞌal yin xꞌaaw, cꞌal yin weycan. Jal bꞌey sat txꞌotxꞌ tiꞌ xin, oj somcha el scꞌul ánima yu xiwcꞌulal bꞌey junjun conobꞌ. Yutol oj a pulna jaꞌ mar catuꞌ oj awoj smakꞌon ey sbꞌa jaꞌ. 26Oj sajbꞌoj el ebꞌ ánima yu xiwcꞌulal, yet oj snaꞌontej ebꞌ tzettaj yetal oj jul yul yibꞌankꞌinal tiꞌ. Jaꞌ wan tzetyetal ey yip bꞌey satcan, oj tzicoꞌtanele ebꞌ. 27Oj lawoj tuꞌ, catuꞌ oj yilon ebꞌ ánima, oj jin eyol xol jun asun, jain Akꞌbꞌil Wopiso yu Dios xol ebꞌ ket animail tiꞌ an.* Oj jin jul yetoj miman wipal, cꞌal jin miman tzejejial. 28Jaꞌ yet lalanxa sbꞌey sjul wan tzetyetal jix wal tiꞌ an, tzalajonwej. Chex a tꞌanan satcan, yutol tuxa oj jex colchaoj, ẍi Jesús tet ebꞌ.
29Catuꞌ jix yalontej jun skꞌaneal tiꞌ tet ebꞌ:
—Naꞌwejtej tzet utbꞌil chi yun yakꞌon xaj teꞌ higo cꞌal wanxa teꞌ teꞌ chi pujel xaj. 30Jaꞌ yet chi uninbꞌi xaj teꞌ, je yotaj xa tol tuxa chi jul nabꞌilkꞌinal.#21:30 Yin Español chi yal “verano” titiꞌ, yutol jaꞌ bꞌey conobꞌ Israel, verano stiempoal nabꞌ, man jaxca oj titiꞌ. 31Yetoj pax oj, jaꞌ yet oj je yilon sjul wan jix wal tiꞌ an, naꞌcha ojabꞌ el je yu, tol tuxa chi waꞌxi oc Dios Yaawiloj.
32Caw yel chi wal ey jex, man oj cam wan ánima tuꞌ, masantaꞌcꞌal oj yun masanil wan jix wal tiꞌ an. 33Oj lawoj el satcan cꞌal yul yibꞌankꞌinal tiꞌ, jal jin kꞌane xin, man oj tan el tzet chi wal an.
34Che yil cꞌal je bꞌa. Manche je yakꞌ cawxo el je bꞌa yu kꞌin cꞌal yu uqꞌueanil, ma yu junojxa tzetyetal chex oc bꞌiscꞌulal yu bꞌey yul yibꞌankꞌinal tiꞌ. Ta cꞌamaj, jaꞌ yet oj jul jun cꞌual tuꞌ, man listo oj je yei. 35Jaxca junoj yaal, queytuꞌ oj yun sjul yibꞌan masanil ánima yul yibꞌankꞌinal tiꞌ. 36Yuxan caw listo che yute je bꞌa. Txalanwej cꞌal tobꞌalkꞌinal, yet watxꞌ oj skeꞌ je colon je bꞌa yalan wan tzet oj jul tuꞌ, catuꞌ chex apni jin sattaj, jain Akꞌbꞌil Wopiso yu Dios xol ebꞌ ket animail tiꞌ an, ẍi Jesús tet ebꞌ.
37Junjun cꞌal cꞌu jix cuywa Jesús yul stemplo Dios. Jaꞌ yet akꞌbꞌalil, jaꞌ bꞌey wonan Olivo chi bꞌet weyoj. 38Junjun cꞌu, chi pet jul ebꞌ ánima yet skꞌinibꞌalil bꞌey stemplo Dios, yu yabꞌen tzet chi yal Jesús.
Currently Selected:
Lucas 21: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.