Lucas 18
18
Skꞌaneal Jun Ix Camnajxa Yichamil Yetoj Jun Naj Yaaw
1Jix yaltej Jesús jun skꞌaneal tiꞌ tet ebꞌ scuywom, yu yalon yabꞌ ebꞌ, tol watxꞌ chi txali cꞌal ebꞌ tobꞌalkꞌinal, catuꞌ cꞌam chi isabꞌi a ebꞌ. 2Jix yalon tet ebꞌ jaxca tiꞌ:
—Jaꞌ junel, ey jun naj yaaw bꞌey jun conobꞌ. Cꞌam yeloc apnoj Dios yul sat naj. Cꞌam pax yeloc apnoj ebꞌ yet animail naj yul sat. 3Jaꞌ bꞌey jun conobꞌ tuꞌ, ey jun ix ix camnajxa yichamil. Junjun cꞌal cꞌu chi apni ix sattaj naj yaaw tuꞌ. Chi apni yalon ix jaxca tiꞌ: “Ey jun ánima acꞌul oc win an. ¿Cꞌam mi chin ja waꞌne el yetoj?” ẍi ix. 4Caw cꞌam cꞌal chi yal scꞌul naj chi swaꞌne jun jowal tuꞌ. Yuxan, jacꞌalaꞌ sjulecꞌ ix yalon sbꞌa. Niẍtejal xin, jix snaꞌon naj jaxca tiꞌ: “Jain tiꞌ, cꞌam yeloc apnoj Dios yul jin sat an. Cꞌam pax yeloc apnoj junoj ánima yul jin sat an. 5Jal pax jun ix ix tiꞌ, junjun cꞌal cꞌu jaxca tiꞌ sjulecꞌ ix jin cꞌatan an. Yuxan, oj jin waꞌne yeoc jun jowal tiꞌ tet ix an. Ta cꞌamaj, ma xa techa ix wu an, ta jacꞌalaꞌ sjulecꞌ ix jin cꞌatan an,” ẍi naj.
6Queytuꞌ jix yute snaꞌon naj yaaw pena snaꞌbꞌal tuꞌ. 7Jal pax Dios, ¿tumi taꞌ man oj yal scꞌul swaꞌne el tzet chi yal ebꞌ sicꞌbꞌil el yu, yet chi yalon sbꞌa ebꞌ yet cꞌualil cꞌal akꞌbꞌalil? ¿Tumi miman tiempo oj ecꞌoj, catuꞌ oj swaꞌne el Dios tzet chi yoche ebꞌ tuꞌ? 8Chi wal ey jex, oj waꞌnele el ebꞌ yu Dios yin eymanil. Jaꞌ yet oj jin jul junelxa, jain Akꞌbꞌil Wopiso yu Dios xol ebꞌ ket animail an, ¿ey mi cꞌal ebꞌ chi yaoc scꞌul yin Dios yul yibꞌankꞌinal tiꞌ? ẍi Jesús tet ebꞌ.
Skꞌaneal Jun Naj Fariseo Yetoj Jun Naj Tejom El Toolabꞌal
9Jaꞌ junxa skꞌaneal tiꞌ, jix yaltej Jesús tet wan ebꞌ watxꞌ sbꞌeybꞌal yaloni. Jaꞌ ebꞌ tuꞌ, cꞌam swatxꞌil wanojxa ánima yul sat ebꞌ. Yuxan jix yal Jesús tet ebꞌ jaxca tiꞌ:
10—Ey cawan winaj jix bꞌetecꞌ txaloj bꞌey stemplo Dios, Fariseo jun, tejom el toolabꞌal junxa. 11Jaꞌ jun Fariseo tuꞌ, linan aoj, catuꞌ jix txali jaxca tiꞌ: “Jaach jin Diosal, chi wal yu diosal ey jaach an, yutol jain tiꞌ, man laan oj jin jaxca wanojxa ánima an. Jaꞌ ebꞌ ánima tuꞌ, caw elkꞌom ebꞌ, man watxꞌoj sbꞌeybꞌal ebꞌ, chi mulwi ebꞌ. Yetoj pax jun naj tejom el tumin tiꞌ, yuwal dios yutol man laan oj jin yetoj naj an. 12Yutol jain tiꞌ, cael chi wijle nocha jin bꞌa junjun semana. Yetoj cꞌal pax oj, chi wakꞌ sdiezmoal masanil tzet chi wakꞌ ganar,” ẍi naj, chi tzꞌaj yalon naj tet Dios. 13Jaꞌ jun tejom el tumin tuꞌ, naat taꞌ linantej. Caw chi xiw scꞌul, ma a tꞌanan niꞌoj satcan, tucꞌal jix smakꞌ xaamscꞌul yu scuscꞌulal. Jix yaloni: “Jaach jin Diosal, cꞌam mi chi okꞌ niꞌoj ja cꞌul win an, caw penawom jin sicꞌlebꞌil an,” ẍi naj tet Dios. 14Chi wal ey jex, jaꞌ naj tejom el tumin tuꞌ, yet xacꞌal jun txolan tuꞌ, jix al-le naj watxꞌil yu Dios, yet cꞌamto chi paxtoj naj bꞌey sna. Jal naj Fariseo tuꞌ xin, ma yal Dios tol watxꞌ naj yul sat. Yutol jaꞌ mac chi yiꞌa can sbꞌa, chi iꞌle eyoj. Jal mac chi yiꞌey sbꞌa, chi iꞌle aoj, ẍi Jesús.
Jix Xꞌoxel Swatxꞌcꞌulal Jesús Yin Ebꞌ
(Mateo 19:13-15; Marcos 10:13-16)
15Ey mac jix iꞌontej wan unin scꞌatan Jesús, yu yaon atoj skꞌabꞌ Naj yibꞌan sjolom ebꞌ. Jaxa yet jix yilon ebꞌ scuywom jaxca tuꞌ, jix stenon oc tucan ebꞌ chi iꞌontej ebꞌ unin tuꞌ. 16Jix yalon Naj tet ebꞌ jaxca tiꞌ:
—Iꞌwejtej ebꞌ unin tiꞌ ey jin an. Manche je tenoc tucan ebꞌ chi iꞌontej ebꞌ unin ey jin. Yutol asan ebꞌ eyoc snaꞌbꞌal yin Dios jaxca ebꞌ unin eyoc snaꞌbꞌal yin smam xutx, asan ebꞌ ey yalon yet yoc Dios Yaawiloj. 17Caw yel chi wal ey jex, jaꞌ ebꞌ cꞌam chi chaꞌon Dios Yaawiloj jaxca chi yun sjijen ebꞌ unin tzet chi al-lei, cꞌam bꞌakꞌin oj oc ebꞌ yul skꞌabꞌ Dios, ẍi Jesús tet ebꞌ.
Jun Bꞌeom Jix Kꞌanabꞌ Yetoj Jesús
(Mateo 19:16-30; Marcos 10:17-31)
18Ey jun naj yaaw jix kꞌanlen tet Jesús jaxca tiꞌ:
—Mamin, watxꞌ jaach, yuxan chin kꞌanle ey jaach an, ¿tzet sowalil chi wun an, catuꞌ chi wiꞌon kꞌinale tol ey cꞌal yin tobꞌalkꞌinal an? ẍi naj tet Jesús.
19—¿Tzet yuxan chin ja wal watxꞌil? Cꞌam junoj mac watxꞌ, asan Dios watxꞌ. 20Ja wotajxa wan chejbꞌanile chi alon jaxca tiꞌ: “Manche oc ja mul yul skꞌabꞌ ja wetbꞌi. Manche jaach makꞌwi cam ánima. Manche jaach elkꞌanwi. Manche ja naꞌa kꞌane yin ja wet animail. Ey ojabꞌ yeloc apnoj ja mam ja txutx yul ja sat,”#Éxodo 20:12-16; Deuteronomio 5:16-20. ẍi Jesús tet naj.
21—Yin tax jin yaliẍal jix cꞌoli cꞌal jin jijen masanil wan chejbꞌanile tiꞌ, ẍi naj tet Jesús.
22—Ey pax junxa sowalil tol cha wunne. Yuxan asiꞌ, txon can el masanil ja tzettaj yetal, catuꞌ cha poꞌontoj stool xol ebꞌ mebꞌa, yet watxꞌ oj ja chaꞌ ja bꞌeomal bꞌey satcan. Chi lawi jun tuꞌ, chach jul pax jin cꞌatan junelxa an, catuꞌ chach ecꞌ cꞌal cuywoj wintaj an, ẍi Jesús tet naj.
23Jaꞌ yet jix yabꞌen naj wan tuꞌ, caw jix cusa scꞌul naj, yutol caw bꞌeom naj sicꞌlebꞌil. 24Jaꞌ yet jix yilon Jesús tol jix cusa naj, jix yalon jaxca tiꞌ:
—Jaꞌ ebꞌ bꞌeom tol eyoc sbꞌeomal yipoj scꞌul, caw yaꞌtaj yoc Dios Yaawiloj ebꞌ. 25Kꞌinaloj junoj noꞌ camello. ¿Tumi taꞌ chi ecꞌ el noꞌ yul yixal junoj acuẍa? Yel xacꞌal yaꞌtaj yoc Dios Yaawiloj ebꞌ bꞌeom tet yet chi ecꞌ el noꞌ yul yixal junoj acuẍa, ẍi Jesús.
26Jix yalon ebꞌ jix abꞌen wan kꞌane tuꞌ jaxca tiꞌ:
—Ta queytuꞌ jaxca tuꞌ xin, ¿mac wal junoj chi skeꞌ scolchai? ẍi ebꞌ.
27—Jaꞌ wan tzet cꞌam chi skeꞌ yu ánima, jaꞌ Dios chi skeꞌ yu, ẍi Jesús tet ebꞌ.
28Jix yalon naj Pedro tuꞌ tet Jesús jaxca tiꞌ:
—Jaach cuywam, jaon tiꞌ, jix cu bꞌejcan masanil cu tzettaj yetal, catuꞌ jix cu ecꞌ cꞌal cuywoj ja wintaj, ¿tzet oj yun keloc apnoj jaon tiꞌ? ẍi naj Pedro.
29Jix yalon Jesús tet ebꞌ jaxca tiꞌ:
—Caw yel chi wal ey jex, jaꞌ ebꞌ chi sbꞌejcan sna, yistil, smam, xutx, yuẍtaj, yanabꞌ, yuninal, jin yaꞌiloj, catuꞌ asan Dios chi yoche chi yakꞌ servil. 30Yel xacꞌal miman tzet oj ẍaꞌ ebꞌ yet jun tiempoal tiꞌ. Jaxa yet jun tiempoal oj jul yatoj tuꞌ, jaꞌ taꞌ tuꞌ, oj ẍaꞌ ebꞌ skꞌinal tol ey cꞌal yin tobꞌalkꞌinal, ẍi Jesús tet ebꞌ.
Jix Yaltej Scamichal Jesús Junelxa Yin Eyojto
(Mateo 20:17-19; Marcos 10:32-34)
31Jix yawten ebꞌ lacawan scuywom Jesús tuꞌ xꞌojli. Jix yalon tet ebꞌ jaxca tiꞌ:
—Jaꞌ tinaniꞌ, tol lalan cu too bꞌey Jerusalén. Jatuꞌ oj yunen el masanil tzet tzꞌibꞌebꞌilcan yu ebꞌ ẍejabꞌ Dios yet peyxa, yet jix yalon can el jin kꞌaneal ebꞌ, jain Akꞌbꞌil Wopiso yu Dios xol ebꞌ ket animail an. 32Catuꞌ oj jin ale oc yul skꞌabꞌ ebꞌ man Israeloj. Oj jin sbꞌuchon ebꞌ. Oj yalon ebꞌ tzetyetal pena win an, catuꞌ oj tzubꞌloj oc ebꞌ win an. 33Oj jin smakꞌon pax ebꞌ. Oj lawoj tuꞌ, catuꞌ oj jin yakꞌon cam ebꞌ. Jaxa yin yoxial tuꞌ, oj jin pitzcꞌu pax aoj, ẍi Jesús tet ebꞌ.
34Ma cꞌal naꞌcha el niꞌoj yu ebꞌ. Man yotaj oj ebꞌ niꞌoj tzet chi yal yeloc apnoj wan jix yal tuꞌ, yuxan ma naꞌcha el yu ebꞌ.
Jaꞌ Naj A Jericó Jix Ilwi Can A Yu Jesús
(Mateo 20:29-34; Marcos 10:46-52)
35Jaꞌ yet lalan yapni Jesús bꞌey conobꞌ Jericó, ey jun naj cꞌam chi skeꞌ yilwi, chotan ey naj stiꞌ bꞌe. Lalan skꞌanon saꞌbꞌeal tet ánima chi ecꞌ yul bꞌe tuꞌ. 36Jaꞌ yet jix yabꞌen naj tol ecꞌal ánima chi bꞌilwi yecꞌ yul bꞌe tuꞌ, jix skꞌanlen naj yabꞌe, tzet yuxan ecꞌal ebꞌ chi eqꞌui. 37Jix al-le tet naj, tol jaꞌ Jesús a Nazaret chi eqꞌui. 38Yuxan jix a yaw naj yin ipal jaxca tiꞌ:
—Jesús, yicꞌaal naj David,#18:38 Yicꞌaal naj David junxa sbꞌi yu Cristo. Tol Akꞌbꞌil Yopiso Colwawomal. ¿cꞌam mi chi okꞌ ja cꞌul win an? ẍi naj tet Jesús.
39Jaꞌ ebꞌ bꞌabꞌel sattaj Naj Jesús tuꞌ, jix tenchanele naj cꞌam chi ilwi tuꞌ yu ebꞌ, yet watxꞌ chi tzꞌini ey naj. Jaꞌ yet jix yabꞌen naj jaxca tuꞌ, tol jix a cꞌal sjowal yel yaw naj:
—Mamin, yicꞌaal naj David, ¿cꞌam mi chi okꞌ ja cꞌul win an? ẍi naj junelxa.
40Jix oc linan Jesús tuꞌ, catuꞌ jix awtele naj yu. Jaꞌ yet jix apni naj scꞌatan Jesús, jix skꞌanlen tet naj jaxca tiꞌ:
41—¿Tzet cha woche chach wute an? ẍi Jesús tet naj.
—Mamin, chi woche cha jaj can jin sat tiꞌ an, ẍi naj tet Jesús.
42—Jajcha ojabꞌ can ja sat tiꞌ. Tol jix waꞌxi, yutol jix ja waoc ja cꞌul win an, ẍi Jesús tet naj.
43Jaꞌ yet jun txolan tuꞌ, jix jajcha can sat naj, jix yilon naj. Yuxan jix oc tzajan naj yintaj Jesús. Jix yalon watxꞌ kꞌane naj tet Dios. Yetoj pax masanil ebꞌ jix ilon jun tuꞌ, jix yal watxꞌ kꞌane ebꞌ tet Dios.
Currently Selected:
Lucas 18: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
