Lucas 15
15
Skꞌaneal Jun Noꞌ Meꞌ Jix Qꞌueytoj
1Masanil ebꞌ tejom el toolabꞌal cꞌal wanxa ebꞌ pena chi el yuneni, jix apni ebꞌ yabꞌen skꞌane Jesús. 2Yuxan jix al-le skꞌumal Jesús yu ebꞌ Fariseo cꞌal ebꞌ cuywam yin sley Moisés, jix yalon ebꞌ jaxca tiꞌ:
—Jaꞌ jun winaj tiꞌ, chi cꞌal ẍaꞌ ebꞌ penawom, catuꞌ chi low pax yetoj ebꞌ.
3Catuꞌ jix yalontej Jesús jun kꞌane tiꞌ, yet watxꞌ chi naꞌcha el yu ebꞌ. Jix yalon jaxca tiꞌ:
4—Kꞌinaloj ta ey junoj winaj ey junoj 100 smeꞌ catuꞌ chi qꞌueytoj junoj noꞌ. Cꞌam mi chi sbꞌejcan wan 99 noꞌ tuꞌ naj bꞌey acꞌal catuꞌ chi too naj seyon ecꞌ jun noꞌ jix qꞌueytoj tuꞌ, masantaꞌcꞌal chi ilcha noꞌ yu naj. 5Jaꞌ yet chi txax noꞌ tuꞌ yu naj, chi yiꞌontej naj yin tzalacꞌulal. 6Jaꞌ yet chi apni bꞌey sna xin, chi syambꞌan oc jantaj ebꞌ swatxꞌil ánima naj cꞌal jantaj ebꞌ ey scawilal naj tuꞌ, catuꞌ chi yalon naj tet ebꞌ jaxca tiꞌ: “Jaꞌ noꞌ jin meꞌ jix qꞌueytoj an, jaꞌ tinaniꞌ, jix txax noꞌ wu an, yuxan, tzalaanwej wetoj an,” ẍi naj. 7Queyton tuꞌ, kꞌinaloj ta ey 99 ánima watxꞌ chi yute sbꞌa, man sowalil oj chi snaꞌ sbꞌa scꞌul ebꞌ yin spenail snaꞌoni. Cꞌam mac chi tzala scꞌul yu ebꞌ bꞌey satcan tuꞌ. Chi wal can el ey jex an, ta ey junoj penawom chi snaꞌ sbꞌa scꞌul catuꞌ chi sqꞌuexbꞌonen snaꞌbꞌal, jaꞌ yu jun ánima tuꞌ xin, txꞌojxa wal tzalacꞌulal chi oc bꞌey satcan yu ebꞌ ángel.
Jun Tumin Jix Qꞌueytoj
8Ma kꞌinaloj tinaniꞌ ta ey junoj ix ix, ey laonebꞌoj stumin, ta chi qꞌueytoj junoj chꞌen. Tumi cꞌam chi stzejtane ix yul sna tuꞌ, chi cꞌoli sqꞌuison sna ix tuꞌ yin cꞌuancꞌulal, catuꞌ chi cꞌoli seyon ecꞌ chꞌen jix qꞌueytoj tuꞌ masantaꞌcꞌal chi ilcha chꞌen yu ix. 9Jaꞌ yet chi txax chꞌen tuꞌ yu ix, chi syambꞌan oc ebꞌ swatxꞌil ixal ix, cꞌal jantaj ebꞌ ix ey scawilal ix tuꞌ, catuꞌ chi yalon ix tet ebꞌ jaxca tiꞌ: “Jaꞌ chꞌen jin tumin jix qꞌueytoj an, jaꞌ tinaniꞌ jix txax chꞌen wu an, yuxan tzalaanwej wetoj an.” 10Queyton tuꞌ chi yun yoc mimej tzalacꞌulal bꞌey satcan yu ebꞌ ángel yet chi yilon ebꞌ snaꞌon sbꞌa junoj penawom yin spenail catuꞌ chi sqꞌuexon snaꞌbꞌal, ẍi Jesús tet ebꞌ.
Jun Naj Cꞌaale Jix Yetne El Stzettaj Yetal
11Jix yalon pax Jesús tet ebꞌ jaxca tiꞌ:
—Ey jun winaj ey cawan scꞌaal. 12Jaꞌ naj tzunan unin jix yal tet smam: Mamin, akꞌ jin tzettaj yetal bꞌeytet taꞌ oj wiꞌ tuꞌ an. Jaꞌ yet jix yakꞌon naj mame tuꞌ stzettaj yetal tuꞌ xin, 13jix cꞌoli syambꞌan a stzettaj yetal naj tuꞌ, catuꞌ jix xonon el naj. Jix too naj bꞌey jun conobꞌ caw naat. Jaꞌ tituꞌ jix sqꞌueyel stumin naj yin spenail. 14Jaꞌ yet xax qꞌueyel masanil stumin naj tuꞌ, jix apni jun miman wail bꞌey jun conobꞌ tuꞌ, catuꞌ jix cꞌoli yoc naj yin cuscꞌulal. 15Queyton tuꞌ jix yun stoo seyon smulnail naj yintaj jun winaj yul conobꞌ tuꞌ, catuꞌ jix chejletoj naj bꞌey jun acꞌal ilo txitam yu naj.#15:15 Jaꞌ yul sley Moisés chi yalaꞌ, tol cꞌam chi skeꞌ ẍiꞌon ẍiꞌbꞌeal txitam yu ebꞌ Israel, yuxan caw qꞌuixwiltaj steynele txitam yu junoj ebꞌ. 16Jix yochen xacꞌal naj jix sloꞌon sat teꞌ teꞌ chi sloꞌ noꞌ txitam tuꞌ, yutol caw chi nocha naj, cꞌam cꞌal mac chi akꞌon niꞌoj sloꞌbꞌe naj. 17Queyton tuꞌ jix yun snaꞌoni: “¿Tzet yuxan, queytuꞌ chi wute jin bꞌa an? ¿Tumi jantaj ebꞌ naj smooso naj jin mam an, catuꞌ chi yakꞌ pax sobra loꞌbꞌe tet ebꞌ naj? Jal jin pax an xin, chi wakꞌ cam jin bꞌa yu wail titiꞌ an,” ẍi naj. 18Oj jin paxtoj bꞌey sna naj jin mam tuꞌ an, catuꞌ oj walon tet naj: “Mamin, jix oc jin penail tet Dios an, catuꞌ jix oc pax jin penail ey jaach an. 19Manxa jin moo oj chin ja wal oc ja cꞌaal oj an, jaxca junoj ja mooso chi wunoc an,” ẍi naj yin snaꞌbꞌal. 20Catuꞌ jix a waan naj, jix too bꞌey smam tuꞌ xin.
Eyto wal yapni naj scꞌatan smam tuꞌ, catuꞌ jix yilontoj naj mame tol jaꞌ scꞌaal naj chi apni. Eyman jix too naj ẍaꞌon scꞌaal tuꞌ. Jix oc lakꞌan naj yin naj, catuꞌ jix oc pax tzꞌubꞌan naj yin stiꞌ naj yu tzalacꞌulal. 21Jaꞌ naj cꞌaale tuꞌ, jix yal naj tet smam jaxca tiꞌ: “Mamin, jix oc jin penail tet Dios an, catuꞌ jix oc jin penail ey jaach an, catuꞌ manxa jin moo oj chin ja wal oc ja cꞌaal oj an,” ẍi naj tet smam. 22Jal naj mame tuꞌ, jix yal naj tet ebꞌ mooso yeoc yintaj jaxca tiꞌ: “Eyman, iꞌwejtej an pichile caw watxꞌ yili, catuꞌ che yaon oc an yin naj, catuꞌ che yaon oc scolkꞌabꞌ naj, catuꞌ che yaon pax oc xanabꞌ naj.#15:22 Jaꞌ ebꞌ mooso cꞌam colkꞌabꞌe ma xanabꞌe chi ale oc yin ebꞌ, asanne ebꞌ miman yeloc apnoj chi ale oc yet. 23Iꞌwej pax tej noꞌ wacax loꞌtzebꞌil, catuꞌ che potxꞌon cam noꞌ, tol oj cu lowwej, catuꞌ oj oc skꞌinal naj. 24Yutol jaꞌ jun jin cꞌaal tiꞌ, jaxca tol camnajxa naj, jaꞌ tinaniꞌ, jix pitzcꞌu a naj. Qꞌueynaj taꞌ toj naj, jal tinaniꞌ, jix yakꞌ jul sbꞌa naj,” ẍi naj mame tuꞌ. Catuꞌ jix oc skꞌinal naj tuꞌ xin.
25Jaꞌ yet jix apni naj tzunan unin tuꞌ xin, cꞌam naj bꞌabꞌel cꞌaale eyecꞌoj yutol eytoj naj mulnail. Jaꞌ yet jix apni naj bꞌabꞌel cꞌaale tuꞌ scawilal na xin, jix yabꞌen naj tol lalan yoc bꞌit cꞌal canal. 26Jix yawtentej jun smooso smam naj tuꞌ, jix skꞌanlen naj tet: “¿Tzet yuxan ey jun kꞌin tiꞌ?” ẍi naj. 27Jix takꞌwi naj mooso tuꞌ tet naj, jix yalon naj jaxca tiꞌ: “Yu naj ja wuẍtaj jix juli, yuxan eyoc kꞌin tiꞌ. Jix makꞌle cam noꞌ wacax loꞌtzebꞌil yu ja mam, yutol jix jul naj ja wuẍtaj tuꞌ yin tzalacꞌulal,” ẍi naj mooso tuꞌ. 28Jaꞌ naj bꞌabꞌel cꞌaale tuꞌ xin, jix tit sjowal naj sicꞌlebꞌil. Ma ẍaꞌ scꞌul naj yoctoj naj yul na yu sjowal scꞌul tuꞌ, masantaꞌcꞌal jix eltej naj mame, jix jul smonten naj, yet watxꞌ chi octoj yul na tuꞌ. 29Catuꞌ jix takꞌwi naj tet smam jaxca tiꞌ: “Ilaꞌ, eyxa tiempo jaach cꞌoli wakꞌon servil an, catuꞌ cꞌam bꞌey pena chi wute jin bꞌa ey jaach an. Jain tiꞌ, caw jijem jin cꞌal ey jaach an. Cꞌam pax juneloj cha wakꞌ junoj yuneꞌ jin chiw jin chiꞌ yetoj ebꞌ naj jin watxꞌil ánima an. 30Jal yet chi jul jun naj ja cꞌaal jix bꞌet qꞌueyon can el ja tumin yin spenail yetoj ebꞌ ix amul ix, cha makꞌon pax cam noꞌ wacax loꞌtzebꞌil,” ẍi naj tet smam. 31Catuꞌ jix yalon naj mame tuꞌ tet naj jaxca tiꞌ: “Cha cꞌaal, jaach tiꞌ, ey jaach cꞌaltaꞌ ecꞌ wetoj an. Jaꞌ masanil jin tzetyetal an, ja wet cꞌaltaꞌ yeoc wetoj an. 32Jaꞌ tinaniꞌ xin, smoo ton cu chaꞌon skꞌinal naj ja wuẍtaj tiꞌ, cꞌal cu tzala yu naj, yutol jaꞌ jun ja wuẍtaj tiꞌ, jaxca tol camnajxa taꞌ naj, jaꞌ tinaniꞌ, jaxca tol jix pitzcꞌu a naj. Qꞌueynaj taꞌ toj naj, jal tinaniꞌ, jix yakꞌ jul sbꞌa naj,” ẍi naj mame tuꞌ.
Currently Selected:
Lucas 15: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
