Génesis 11

Jun Miman Torre Babel Sbꞌi Bꞌey Babilonia

1-2Jaꞌ yet jun tiempoal tuꞌ, yet jix lawi ecꞌ jun miman yaax nabꞌ junne tiꞌeal chi yal ebꞌ ánima. Jaꞌ yet lalan stoo ebꞌ yetcꞌulal bꞌey chi aol cꞌu, jix apni oc ebꞌ bꞌey jun miman acꞌal yul yet Sinar. Jaꞌ tituꞌ jix caey ecꞌ ebꞌ. 3Ey jun cꞌual jix swa alne ebꞌ, jix yalon ebꞌ jaxca tiꞌ: Cu waꞌnewej ladrillo, catuꞌ chi kakꞌonwej tzꞌaꞌoj, ẍi ebꞌ. Ladrillo xa jix yakꞌbꞌalne ebꞌ, catuꞌ manxa chꞌenoj; jaꞌ asfalto natural jix yaoc ebꞌ yin spixiloj. 4Jix lawi tuꞌ jix yalon ebꞌ naj jaxca tiꞌ: Kakꞌwej kip cu masanil, cu waꞌnewej junoj miman conobꞌ, catuꞌ chi cu waꞌnewej junoj miman torre, caw naat chi a tzꞌujanoj, yet watxꞌ caw miman chi yun cu bꞌinalei. Junxane bꞌulan chi kute cu bꞌa, cꞌam ojabꞌxa chi cu sajlemtoj sat txꞌotxꞌ txꞌotxꞌ tiꞌ, ẍi ebꞌ naj.

5Jal Jehová xin, jix eyol jul yilon jun conobꞌ tuꞌ, cꞌal jun torre chi swaꞌnetoj tzꞌujan ebꞌ tuꞌ. 6Jix yalon Jehová jaxca tiꞌ: Jaꞌ ebꞌ ánima tiꞌ, junne conobꞌal yeoc ebꞌ catuꞌ junne tiꞌeal chi yal ebꞌ, yuxan jix ẍaꞌel yich jun mulnail tiꞌ ebꞌ; cꞌam tzet chi tenon oc tucan ebꞌ naj yin swaꞌnen tzet chi yoche scꞌul. 7Jaꞌ tinaniꞌ xin, eyojon wejtoj xol ebꞌ, cu somtoj stiꞌ ebꞌ, yet watxꞌ cꞌamxa chi naꞌcha el yu ebꞌ tzet chi yal junjun ebꞌ, ẍi Jehová.

8-9Queyton tuꞌ jix yun spoꞌocha cantoj ebꞌ yu Jehová, catuꞌ jix sbꞌejon ebꞌ swaꞌnen a jun conobꞌ tuꞌ. Jaꞌton bꞌey jun conobꞌ tuꞌ somcha cantoj stiꞌ ebꞌ ánima yu Jehová, catuꞌ jix sajlem cantoj ebꞌ masanil yul yibꞌankꞌinal tiꞌ, yuxan jaꞌ sbꞌi jun conobꞌ tuꞌ jix yij can a Babel.#11:8-9 Jaꞌ yin Hebreo, jaꞌ jun kꞌane “babel,” laan yetoj jun kꞌane “somcꞌulal”.

Ebꞌ Yicꞌaal Naj Sem

(1a Crónicas 1:24-27)

10Jaꞌton skꞌaneal ebꞌ yicꞌaal naj Sem tiꞌ: Jaꞌ yet caabꞌ abꞌil xa yecꞌ can el jun miman yaax nabꞌ tuꞌ, ey 100 abꞌil skꞌinal naj Sem yet tuꞌ, catuꞌ jix ali jun scꞌaal chi yij Arfaxad. 11Jix lawi tuꞌ, 500 abꞌil jix too ecꞌ Sem tuꞌ, eyto scꞌaal, cꞌal scutzꞌin jix ali.

12Jaꞌ naj Arfaxad, ey 35 abꞌil skꞌinal yet jix ali jun scꞌaal chi yij Sélah. 13Jix lawi tuꞌ 403 abꞌil jix too ecꞌ Arfaxad tuꞌ, eyto scꞌaal cꞌal scutzꞌin jix ali.

14Jaꞌ naj Sélah, ey 30 abꞌil skꞌinal yet jix ali jun scꞌaal chi yij Éber. 15Jix lawi tuꞌ, 400 abꞌil jix too ecꞌ Sélah tuꞌ, eyto scꞌaal cꞌal scutzꞌin jix ali.

16Jaꞌ naj Éber, ey 34 abꞌil skꞌinal yet jix ali jun scꞌaal chi yij Péleg. 17Jix lawi tuꞌ, 430 abꞌil jix too ecꞌ Éber tuꞌ, eyto scꞌaal cꞌal scutzꞌin jix ali.

18Jaꞌ naj Péleg, ey 30 abꞌil skꞌinal yet jix ali jun scꞌaal chi yij Reú. 19Jix lawi tuꞌ, 209 abꞌil jix too ecꞌ Péleg tuꞌ, eyto scꞌaal cꞌal scutzꞌin jix ali.

20Jaꞌ naj Reú 32 abꞌil skꞌinal yet jix ali scꞌaal chi yij Serug. 21Jix lawi tuꞌ, ey 207 abꞌil jix too ecꞌ Reú eyto scꞌaal cꞌal scutzꞌin jix ali.

22Jaꞌ naj Serug, ey 30 abꞌil skꞌinal yet jix ali scꞌaal chi yij Nahor. 23Jix lawi tuꞌ, 200 abꞌil jix too ecꞌ Serug, eyto scꞌaal cꞌal scutzꞌin jix ali.

24Jaꞌ naj Nahor, ey 29 abꞌil skꞌinal yet jix ali scꞌaal chi yij Térah. 25Jix lawi tuꞌ, 119 abꞌil jix too ecꞌ Nahor, eyto scꞌaal, cꞌal scutzꞌin jix ali.

26Jaꞌ naj Térah, ey 70 abꞌil skꞌinal yet jix ali scꞌaal chi yij Abram, jix ali Nahor, cꞌal pax Harán, jaꞌton ebꞌ oxwan scꞌaal naj Térah tiꞌ.

Ebꞌ Yicꞌaal Naj Térah

27Jaꞌton skꞌaneal ebꞌ yicꞌaal naj Térah tiꞌ, jaꞌton smam naj Abram, Nahor cꞌal naj Harán. Jaꞌ naj Harán tuꞌ, jaꞌton smam naj Lot. 28Jix cam naj Harán tuꞌ bꞌey conobꞌ Ur, yul yet Caldeo bꞌey alinaj. Iquisto ecꞌ smam naj Térah tuꞌ yet jix cami.

29Jix yiꞌle sbꞌa naj Abram yetoj ix Sarai, jaꞌ naj Nahor jix yiꞌle sbꞌa yetoj ix Milcá, ix scutzꞌin Harán, sno sbꞌa yetoj ix chi yij Iscá. 30Jaꞌ ix Sarai tuꞌ man uneꞌwom ix oj ix. 31Jix lawi tuꞌ, jix el naj Térah tuꞌ yul conobꞌ Ur yul yet Caldeo, catuꞌ jix snaꞌ tol chi too naj yul yet Canaán. Jix yiꞌontoj jun yuninal yetoj, jaꞌton Abram, jix yiꞌon pax toj Lot, jaꞌton yitxiquin, scꞌaal camom Harán, yetoj yalibꞌ chi yij Sarai. Jix apni oc ebꞌ bꞌey conobꞌ Harán, jaꞌ tituꞌ jix caey ecꞌ ebꞌ. 32Jaꞌ bꞌey txꞌotxꞌ Harán tuꞌ jix cam naj Térah, ey 205 abꞌil skꞌinal naj yet jix cami.

Currently Selected:

Génesis 11: knj

Highlight

Copy