Éxodo 1
1
Jix Etex Ebꞌ Yicꞌaal Naj Jacob Bꞌey Txꞌotxꞌ Egipto
1Jaꞌton sbꞌi ebꞌ yuninal naj Israel tiꞌ, ebꞌ jaꞌjun yetoj naj yet jix apni oc bꞌey Egipto, yetoj cꞌal yuninal junjun ebꞌ: 2Jaꞌton ebꞌ naj tiꞌ: Rubén, Simeón, Leví, Judá, 3Isacar, Zabulón, Benjamín, 4Dan, Neftalí, Gad cꞌal Aser. 5Ey 70 sbꞌisil ebꞌ yicꞌaal naj Jacob jaꞌjun yetoj yet jix apni oc bꞌey txꞌotxꞌ Egipto; jal pax naj José xin, eyxa cꞌaltaꞌ ecꞌ naj tituꞌ.
6Jaꞌ naj José tuꞌ, yetoj masanil ebꞌ yuẍtaj, cꞌal ebꞌ jaꞌjun yetoj naj Jacob tuꞌ, junjuntaj cꞌal jix yun scam ebꞌ masanil. 7Asan xin, caw ecꞌal tocꞌal yuninal ebꞌ jix ali. Yu tuꞌ xin, jix chꞌibꞌ sbꞌisil ebꞌ Israel tuꞌ, yel xacꞌal bꞌinabꞌil ebꞌ, caw ey smey ebꞌ, caw jix noel masanil yul yet Egipto yu ebꞌ.
8Yet jix ecꞌ cꞌal jayebꞌoj abꞌil yu ebꞌ tituꞌ, jix oc junxa naj rey bꞌey conobꞌ Egipto tuꞌ, manxa otajbꞌiloj José yu naj, ta tol jix colwa naj yin conobꞌ Egipto tuꞌ yet yalantoj. 9Yu jun tuꞌ, jix yalon naj rey tuꞌ tet masanil ebꞌ conobꞌ tuꞌ jaxca tiꞌ: Chim je yil tinaniꞌ, yutol jaꞌ ebꞌ Israel tiꞌ, caw ecꞌbꞌanxa sbꞌisil ebꞌ ey jonwej, yel xacꞌal chi ecꞌbꞌantoj ebꞌ kibꞌan. 10Yuxan jaꞌ tinaniꞌ xin, sowalil chi cu naꞌwej tzet chi yun ebꞌ, yet watxꞌ man oj ecꞌbꞌantoj sbꞌisil ebꞌ ey jon, yutol tala ey bꞌakꞌin ey junoj jowal chi jul cu xol yetoj junojxa nación, catuꞌ chi yaon oc sbꞌa ebꞌ yetoj ebꞌ pena snaꞌbꞌal tuꞌ, jaxam yoc ebꞌ naj yin jowal tuꞌ kin, jaxam yel ebꞌ naj yul cu conobꞌ tiꞌ, ẍi naj rey tuꞌ.
11Yu tuꞌ xin, jix ale oc yilomal ebꞌ naj, catuꞌ jix ale oc ebꞌ yin mulnail caw yaꞌtaj. Jix chejle swaꞌne caabꞌ mimej conobꞌ ebꞌ, jaꞌton Pitón cꞌal Ramsés. Jaꞌ bꞌey caabꞌ conobꞌ tuꞌ, jaꞌ tituꞌ jix scꞌubꞌa ixim tiriw naj rey. 12Caw chi etex ebꞌ Israel tuꞌ yu ebꞌ a Egipto tuꞌ, asan xin, yel xacꞌal jix chꞌibꞌ sbꞌisil ebꞌ. Yuxan caw chi xiw ebꞌ a Egipto tuꞌ tet ebꞌ.
13Jix ale oc ebꞌ Israel tuꞌ yin mulnail caw yaꞌtaj yu ebꞌ a Egipto tuꞌ. 14Ecꞌom yaꞌ chi yun ebꞌ winaj yin mulnail. Jix ale oc ebꞌ yin tecꞌo stzokꞌom, cꞌal swaꞌnen xaan ebꞌ yetoj ladrillo. Man asanne oj wan tuꞌ, jix chejle pax oc ebꞌ awo tiriw, cꞌal yin wanojxa mulnail, jacꞌal oc ebꞌ naj chi waꞌneni. Caw okꞌbꞌal cꞌul jix utele ebꞌ Israel tuꞌ. 15Ey wal junxa tzet jix utele ebꞌ yu naj rey tuꞌ; jix yal naj tet ix Sifrá cꞌal tet ix Puá, jaꞌton ebꞌ ix sicꞌom unin yeoc xol ebꞌ ix a Israel tuꞌ, jix yalon naj jaxca tiꞌ:
16—Jaꞌ yet che yilon yali yuneꞌ ebꞌ ix a Israel tuꞌ, che seyon je yil yin eymanil, ta ix unin, chꞌibꞌ ojabꞌi, ta tol winaj unin xin, che makꞌwej camoj, ẍi naj rey tuꞌ tet ebꞌ ix.
17Jaxa ebꞌ ix sicꞌom unin tuꞌ, caw ey xiwcꞌulal ebꞌ ix tet Dios. Ma sjije ebꞌ ix jaxca yalon naj sreyal Egipto tuꞌ, tucꞌal chi yiloc ebꞌ ix yet chi ali ebꞌ winaj unin tuꞌ. 18Jaxa yet jix yabꞌen naj rey jun tuꞌ, jix awtele ebꞌ ix yu naj, catuꞌ jix yalon tet ebꞌ jaxca tiꞌ:
—¿Tzet yuxan tucꞌal che yiloc wan winaj unin chi ali tuꞌ? ẍi naj. Jix yalon ebꞌ ix tet naj jaxca tiꞌ:
19—Yutol man laan oj ebꞌ ix a Israel tuꞌ yetoj ebꞌ ix a Egipto tiꞌ, yutol caw ey yip smimanil ebꞌ ix sicꞌlebꞌil, cꞌam tocꞌal chi cu apni oc jon, catuꞌ chi waꞌxi scꞌul ebꞌ ix, ẍi ebꞌ.
20Yu cꞌal jaxca tuꞌ jix yun yalon ebꞌ ix sicꞌom unin tuꞌ, yuxan caw jix chꞌibꞌ sbꞌisil ebꞌ Israel, yel xacꞌal ey smey ebꞌ. 21Jaꞌ ebꞌ ix sicꞌom unin tuꞌ, ey xiwcꞌulal ebꞌ ix tet Dios, yuxan jix yakꞌ syaaxilal Dios yibꞌan ebꞌ ix, caw watxꞌ cꞌal chi yun ẍꞌibꞌ yuneꞌ ebꞌ ix. 22Jaꞌ yet jix yilon naj rey Faraón tol cꞌam chi skeꞌ jaxca tuꞌ, catuꞌ jix yalon naj tet ebꞌ sconobꞌ tuꞌ jaxca tiꞌ: Jaꞌ masanil ebꞌ winaj unin chi ilcha je yu xol ebꞌ Hebreo tiꞌ, che kꞌojcantoj ebꞌ yul jaꞌ Nilo, jal ebꞌ ix ix unin xin, chꞌibꞌ ojabꞌ ebꞌ, ẍi naj rey.
Currently Selected:
Éxodo 1: knj
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
