Hechos 8

Yacꞌulal Saulo Yin Ebꞌ Creyente

1Jaꞌ naj Saulo tuꞌ, jix ẍaꞌ scꞌul skꞌojchꞌennele cam Esteban tuꞌ. Jaꞌ yet jun cꞌu tuꞌ, jix ẍaꞌel yich scajatnele ebꞌ creyente sicꞌlebꞌil bꞌey Jerusalén tuꞌ. Yuxan jix el ebꞌ. Ey ebꞌ jix too bꞌey wan conobꞌlaj yul yet Judea, ey ebꞌ jix too yul-laj yet Samaria. Asanxane ebꞌ ẍejabꞌ Jesús jix cancan bꞌey Jerusalén tuꞌ. 2Jaꞌ yet jix cam Esteban tuꞌ, jix iꞌletoj smimanil mujle yu wan winaj jijem tet Dios. Caw chi okꞌ ebꞌ yu scamichal naj. 3Jal pax Saulo xin, caw jix a can yakꞌon acꞌulal yin ebꞌ creyente. Jix octoj yul-laj na, catuꞌ jix jutxwi eltej winaj cꞌal ix yul-laj na tuꞌ, catuꞌ jix iꞌletoj ebꞌ preso yu.

Jix Al-le El Skꞌaneal Yet Colbꞌanile

4Jaꞌ yet jix eltej ebꞌ bꞌey Jerusalén tuꞌ xin, catuꞌ jix sajlem cantoj ebꞌ. Yal cꞌal bꞌey jix apni ebꞌ, jix yalel skꞌaneal colbꞌanile ebꞌ. 5Jaꞌ naj Felipe, jaꞌ bꞌey conobꞌ Samaria jix apni, jix cꞌoli yalon el skꞌaneal Cristo snan xol ebꞌ ánima tituꞌ. 6Jix cꞌal yaoc xiquin ebꞌ ánima yin tzet jix yal tuꞌ. Jix yilon pax wan milagro* ebꞌ jix el xꞌoxoni. 7Jaꞌ bꞌey conobꞌ tuꞌ, ecꞌal ebꞌ ánima eyoc pena espíritu yin, chi cꞌal elcan yin ebꞌ yu naj Felipe tuꞌ. Jix el yaw ebꞌ pena espíritu, catuꞌ jix el ebꞌ. Ecꞌal mac sicbꞌinaj el smimanil, cꞌal ebꞌ cꞌam chi skeꞌ sbꞌeyi, jix waꞌxi can yu naj Felipe tuꞌ. 8Yu wan tzet jix yun tuꞌ xin, caw jix tzala a ebꞌ ánima bꞌey jun conobꞌ tuꞌ. 9Ey jun winaj chi yij sbꞌi Simón tituꞌ. Caw chi etnewi ánima bꞌey conobꞌ Samaria, yutol chi yalaꞌ, tol miman yeloc apnoj, catuꞌ ey tzet chi skeꞌ yu. 10Masanil ebꞌ ánima chi yaoc scꞌul yin naj, ebꞌ yeynajil cꞌal ebꞌ mimej winaj, catuꞌ chi yalon ebꞌ jaxca tiꞌ:

—Jaꞌ naj Simón tiꞌ, caw yel ey yipal Dios yin naj, ẍi ebꞌ.

11Caw chi yaoc scꞌul ebꞌ yin naj, yutol peyxa tax jix cꞌoli yetnen ánima naj, catuꞌ chi yaloni tol tzꞌajan ton scꞌul naj. 12Jal naj Felipe tuꞌ xin, jix alon el xol ebꞌ tzet utbꞌil chi yun yoc Dios Yaawiloj ebꞌ. Jix yalon pax el skꞌaneal Jesucristo snan xol ebꞌ. Yuxan, ey ebꞌ winaj, cꞌal ebꞌ ix jix yaoc scꞌul yin tzet jix yal naj tuꞌ, catuꞌ jix yakꞌon bautizar sbꞌa ebꞌ. 13Jaꞌ naj Simón tuꞌ, jix ya pax oc naj yin scꞌul tzet jix yal Felipe tuꞌ, catuꞌ jix yakꞌon bautizar sbꞌa. Catuꞌ jix oc xacꞌal tzajan yintaj naj Felipe. Ey wan milagro jix el xꞌoxon Felipe tuꞌ, tol caw miman yeloc apnoj. Caw jix qꞌueya scꞌul naj Simón tuꞌ yet jix yilon naj. 14Jaꞌ yet jix yabꞌen ebꞌ ẍejabꞌ Jesucristo eyecꞌ bꞌey Jerusalén, tol ey mac jix yaoc scꞌul yin skꞌane Dios bꞌey Samaria tuꞌ, catuꞌ jix chejletoj naj Pedro yetoj naj Juan yu wanxa ebꞌ. 15Jaꞌ yet jix apni ebꞌ, jix txali ebꞌ yu ebꞌ creyente tituꞌ, yet watxꞌ chi ẍaꞌ can Santo Espíritu ebꞌ. 16Yutol cꞌamto junoj ebꞌ chi chaꞌon Santo Espíritu tituꞌ. Asan tucꞌal yin sbꞌi Naj Kaawil Jesús jix akꞌle bautizar ebꞌ. 17Jix sbꞌatxbꞌa atoj skꞌabꞌ naj Pedro yetoj naj Juan yibꞌan sjolom ebꞌ, catuꞌ jix ẍaꞌon can Santo Espíritu ebꞌ.

18Jaꞌ yet jix yilon naj Simón tol jaꞌ yet jix yaon atoj skꞌabꞌ ebꞌ yibꞌan sjolom ebꞌ creyente tuꞌ, catuꞌ jix ẍaꞌon can Santo Espíritu ebꞌ, jix yalte tumin tet ebꞌ ẍejabꞌ Jesucristo tuꞌ, 19jix yalon tet ebꞌ jaxca tiꞌ:

—¿Cꞌam mi chi skeꞌ je yakꞌon pax jun opiso tiꞌ ey jin an, yet watxꞌ yal cꞌal mac chin bꞌatxbꞌa atoj jin kꞌabꞌ yin sjolom, chi ey can jul Santo Espíritu yin ebꞌ wu an? ẍi naj tet ebꞌ.

20Catuꞌ jix yalon naj Pedro tet naj jaxca tiꞌ:

—Qꞌuey ojabꞌ el ja tumin ja wetoj. Jaꞌ jun saꞌbꞌeal tiꞌ, asan chi el yin scꞌul Dios chi yakꞌa. ¿Tumi chi skeꞌ ja manon yetoj ja tumin tiꞌ ja naꞌoni? 21Caw cꞌam ja walon ja wet yin jun tiꞌ ketoj. Yutol cꞌam swatxꞌil ja naꞌbꞌal yul sat Dios. 22Yuxan, naꞌ ja bꞌa yin jun ja penail tiꞌ. Al tet Dios, tala cꞌuxan chi yakꞌ mimancꞌulal Dios ja wibꞌan yu tzet cha naꞌ yin ja pixan tuꞌ. 23Yutol chi wil an, jaxca junoj tzetyetal caw kꞌaꞌ sicꞌlebꞌil, queytuꞌ yeoc ja naꞌbꞌal yul sat Dios, catuꞌ asan tzet man watxꞌoj lalan ja wakꞌon servil, ẍi naj Pedro tuꞌ tet naj.

24Jix yalon naj jaxca tiꞌ:

—Ocanwej wal tean tet Naj Kaawil wu an, catuꞌ cꞌam chi jul niꞌoj jun syaꞌilal che yal tuꞌ wibꞌan an, ẍi naj tet ebꞌ.

25Jix lawi tuꞌ xin, catuꞌ jix yalon el skꞌaneal Jesús ebꞌ ẍejabꞌ, cꞌal tzettaj jix yil ebꞌ. Jix yalon pax el skꞌaneal Dios ebꞌ. Ecꞌal aldealaj yul yet Samaria bꞌey jix ecꞌ yalel skꞌaneal yet colbꞌanile ebꞌ. Catuꞌ jix pax ebꞌ bꞌey Jerusalén.

Jaꞌ Yet Jix Yil-len El Sbꞌa Naj Felipe Yetoj Naj A Etiopía

26Ey jun yángel Naj Kaawil jix alon tet Felipe jaxca tiꞌ:

—Akꞌ lista ja bꞌa. Asiꞌ bꞌey sur, catuꞌ chach too yul jun bꞌe chi tit bꞌey Jerusalén catuꞌ chi apni bꞌey conobꞌ Gaza, ẍi jun ángel tuꞌ tet naj. Jaꞌ jun bꞌe tuꞌ, jaꞌton jun chi ecꞌ bꞌey cusiltaj txꞌotxꞌ. 27Jix yakꞌon lista sbꞌa naj Felipe tuꞌ, catuꞌ jix toi. Jix yil-len el sbꞌa yetoj jun winaj a Etiopía yul bꞌe tuꞌ. Jaꞌ jun winaj tuꞌ, eunuco* naj, yaaw yeoc yu jun ix ix chi ijon Candace,#8:27 Jaꞌ bꞌey Etiopía, ix cꞌal ebꞌ chi oc yaawil. Candace sbꞌi ebꞌ yet chi oc ebꞌ yin yaawil ebꞌ tuꞌ. ix yaaw bꞌey Etiopía tuꞌ. Cꞌubꞌam tumin yopiso naj yu ix. Jix bꞌetecꞌ naj yiꞌon ey sbꞌa tet Dios bꞌey Jerusalén. 28Catuꞌ lalan spaxtoj naj bꞌey Etiopía. Chotan atoj yul scarreton. Lalan yilon An Juun naj, An Tzꞌibꞌebꞌilcan yu naj Isaías, ẍejabꞌ Dios. 29Jix yalon Santo Espíritu tet Felipe jaxca tiꞌ:

—Jitztoj ja bꞌa scꞌatan jun carreton tuꞌ, ẍi Espíritu tet.

30Jaꞌ yet jix apni naj scꞌatan, jix yabꞌeni tol lalan yawtele An Juun Tzꞌibꞌebꞌilcan yu naj Isaías yu naj. Jix yalon Felipe tuꞌ tet naj jaxca tiꞌ:

—¿Chim naꞌcha el ja wu tzet chi yal An Juun tiꞌ? ẍi Felipe tet naj.

31Jix yalon naj jaxca tiꞌ:

—Ta cꞌam mac chi alon ey jin an, ¿tzet oj wute wotajnen el an? Ocantej yul carreton tiꞌ wetoj an, catuꞌ chach ey chotanoj, ẍi naj tet Felipe. 32Jaꞌ An Juun lalan yilon naj tuꞌ, chi yal jaxca tiꞌ:

Jaxca noꞌ meꞌ chi iꞌletoj camoj, queytuꞌ oj yun yiꞌletoj naj camoj.

Jaxca junoj noꞌ meꞌ, cꞌam chi el yaw yet chi tzujlei, queytuꞌ oj yute pax sbꞌa naj, cꞌam cꞌal tzet oj yalaꞌ.

33Caw qꞌuixwiltaj oj utele yu ebꞌ, catuꞌ yin man yeloj oj yun snaꞌle oc yin naj.

Cꞌam junoj mac oj skeꞌ yaloni, tol ey yicꞌaal naj oj canoj, yutol oj akꞌle camoj, ẍi yul An Juun tuꞌ.#Isaías 53:7, 8.

34Catuꞌ jix skꞌanlen el naj tet Felipe tuꞌ jaxca tiꞌ:

—Chin kꞌanle ey jaach, ¿mac ey skꞌaneal jun jix yal can naj ẍejabꞌ Dios tiꞌ? ¿Jacꞌal oc naj jix yal can skꞌaneal, ma txꞌoj junoj mac chi yalaꞌ? ẍi naj tet Felipe.

35Catuꞌ jix yalon Felipe tet naj yu mac chi yal An Juun tuꞌ. Jix cꞌoli yalon skꞌaneal Jesús tet naj.

36Lalan cꞌal sbꞌey stoo ebꞌ yul bꞌe xin, catuꞌ jix apni ebꞌ bꞌey jun jaꞌ jaꞌ. Jix yalon naj a Etiopía tuꞌ tet Felipe jaxca tiꞌ:

—Ilaꞌ jun jaꞌ jaꞌ tiꞌ. ¿Cꞌam mi chi skeꞌ chin ja wakꞌ xacꞌal bautizar tinaniꞌ an? ẍi naj tet Felipe.

37/—Chi skeꞌ, ta yin masanil ja cꞌul cha waoc ja cꞌul yin Cristo,* ẍi Felipe tet naj.

—Chi waoc yin jin cꞌul an, tol jaꞌ Jesucristo Scꞌaal ton Dios, ẍi naj./ 38Catuꞌ jix yalon naj Felipe tuꞌ, tol chi smitxꞌoc tucan scarreton tuꞌ, catuꞌ jix eytoj ebꞌ scawanil tuꞌ xol jaꞌ. Jix akꞌle can bautizar naj yu naj Felipe tuꞌ. 39Jaxa yet jix pax atej ebꞌ xol jaꞌ tuꞌ xin, jix iꞌle el Felipe yu Yespíritu Naj Kaawil. Ma yil naj a Etiopía tuꞌ bꞌey jix too oc naj. Catuꞌ jix too naj yul bꞌe tuꞌ yin tzalacꞌulal. 40Jal naj Felipe tuꞌ xin, jix apni bꞌey jun conobꞌ chi yij Azoto. Catuꞌ jix too junelxa. Jix ecꞌ yalel skꞌaneal yet colbꞌanile bꞌey masanil wanxa conobꞌ masantaꞌcꞌal jix apni bꞌey conobꞌ Cesarea.

Currently Selected:

Hechos 8: knj

Highlight

Copy