2a Timoteo 2

Tecꞌan Chi Kute Cu Bꞌa Kakꞌon Servil Jesucristo

1Jaach jaxca tol jin cꞌaal an. Tecꞌbꞌa ja bꞌa yetoj swatxꞌcꞌulal Dios chi yakꞌ ey jon, yutol junxane keoc yetoj Cristo Jesús. 2Jaꞌ wan cuybꞌanile jix ja wabꞌ walon snan xol ebꞌ creyente ja wetoj, jaꞌ wan cuybꞌanil tuꞌ cha wakꞌcan yul skꞌabꞌ ebꞌ jijem, ebꞌ chi skeꞌ scuywa snan xol yet creyenteal. 3Jaxca junoj soldado tol caw watxꞌ, jaxca ojabꞌ tuꞌ cha wute ja wakꞌon techa syaꞌilal cha wilaꞌ, yu lalan ja wakꞌon servil Jesucristo. 4Kꞌinaloj junoj soldado yeoc yin yopiso tinaniꞌ. Ma skeꞌ comon cꞌal oj toj yin junojxa comon mulnail, yutol asan chꞌan jun yaaw chi skeꞌ yakꞌon servil. 5Kꞌinaloj junoj winaj eyoc yin junoj sajach tinaniꞌ, caw chi yoche chi yakꞌ ganar naj. Ta cꞌam pax chi sjije jaxca yalon sleyal jun sajach tuꞌ, ma skeꞌ ẍaꞌon spaj. 6Ilaꞌ pax ebꞌ mulnawom tinaniꞌ, Bꞌabꞌel chi mulna can ebꞌ, catuꞌ chi ẍaꞌon yelol sat yawo ebꞌ yin sbꞌabꞌelal. 7Jaꞌ wan xax waltoj ey jaach tiꞌ an, chi cam ja naꞌon sicꞌlebꞌil, catuꞌ jaꞌ Naj Kaawil oj akꞌon naꞌcha el masanil ja wu. 8Naꞌtej Jesucristo, Naj yicꞌaal naj David, Naj jix pitzcꞌu a xol ebꞌ camnaj. Jaꞌton jun skꞌaneal yet colbꞌanile tiꞌ chi waleloj. 9Yu cꞌal chi walel jun tiꞌ, yuxan lalan wabꞌen syaꞌil tinaniꞌ. Tol tax pixbꞌil jin yetoj cadena, jaxca tol miman jin penail yul sat ley. Jal pax skꞌane Dios, man pixbꞌil oj yetoj cadena jaxca chi yun jin pixle ey tiꞌ. 10Ey wanxa ebꞌ sicꞌbꞌilxa el yu Dios, chi woche tol oj ẍaꞌ ebꞌ swatxꞌil ketoj. Yu jun tuꞌ, yuxan chi wakꞌ techa jantaj cꞌal tzet chi jul wibꞌan, ta yu jun tuꞌ chi ẍaꞌ pax scolbꞌanil ebꞌ. Jaꞌ jun colbꞌanile tuꞌ caw miman yeloc apnoj. Jaꞌ chi akꞌle ey jon yin junelne, yutol junxane keoc yetoj Cristo Jesús. 11Jaꞌ wan kꞌane oj waltoj ey jaach tiꞌ an, caw yel.

Ta camnaj jon yetoj Naj, oj cu iquisbꞌoj cꞌal ecꞌ yetoj Naj yin junelne.

12Ta chi kakꞌ techa syaꞌil yetoj, oj kakꞌ yaawilal yetoj Naj.

Ta chi kiꞌel Naj kin, oj jon yiꞌ pax el Naj yin.

13Ta jaon, cꞌam chi kun tzet chi kalaꞌ, jal pax Naj chi cꞌal yun tzet chi yalaꞌ.

Yutol cꞌam chi skeꞌ sqꞌuexon stiꞌ Naj yin tzet chi yalaꞌ.

Jaꞌ Tzet Chi Yoche Scꞌul Dios Chi Yun Ebꞌ Yakꞌomal Servil

14Jej snaꞌ ebꞌ tituꞌ yu wan chi waltoj ey jaach tiꞌ. Sattaj Naj Kaawil cha wal tet ebꞌ, tol man comonoj chi steele sbꞌa ebꞌ yin kꞌane. Naꞌbꞌacꞌal chi yetne sbꞌa ebꞌ yin, cꞌam niꞌoj yopiso. Jaꞌ ebꞌ chi abꞌen steelen sbꞌa ebꞌ tuꞌ, tucꞌal chi somcha can el scꞌul ebꞌ yu ebꞌ. 15Caw cha wakꞌ ja wip ja mulna yin yet Dios, yet watxꞌ chi yil Dios tol watxꞌ ja mulnail, catuꞌ jichan cꞌal cha wute ja walon el skꞌane Dios jaꞌcaw yel. Ta cha wun jaxca chi wal tiꞌ, cꞌam tzet yinal oj jaach qꞌuixwoj a sattaj Dios. 16Man ja chaꞌ ja wabꞌ tzet chi yal ebꞌ comon cꞌal chi kꞌanabꞌi, ebꞌ cꞌam yeloc apnoj tzet chi yalaꞌ. Yu scomon kꞌane ebꞌ tuꞌ, yuxan chi cꞌal too ebꞌ xol tzet man watxꞌoj. 17Jaxca junoj yaax yaꞌbꞌil chi el lebꞌebꞌoj, queytuꞌ chi yun yel lebꞌebꞌoj wan comon kꞌane chi yal ebꞌ tuꞌ. Queytuꞌ yutenaj sbꞌa naj Himeneo yetoj naj Fileto. 18Yuxan jix sbꞌejcan jun cuybꞌanil jaꞌcaw yel ebꞌ. Catuꞌ chi tzꞌaj yalon ebꞌ jaxca tiꞌ: “Xax pitzcꞌu a ebꞌ creyente camnaj,” ẍi ebꞌ, chi tzꞌaj yalon ebꞌ. Chi ecꞌ akꞌle somcha scꞌul wanojxa ebꞌ ánima yu ebꞌ, yet watxꞌ cꞌamxa chi yaoc scꞌul ebꞌ yin Naj Kaawil jaxca ebꞌ tuꞌ. 19Jal pax jun cuybꞌanile yanaj ey yich Dios, caw ey yip. Jaxca junoj yich na cꞌam niꞌoj chi bꞌilwi, queytuꞌ jun tuꞌ. Eyoc jun sello yin, tol chi yal jaxca tiꞌ: “Yotaj Dios mactxequel ebꞌ yet.#Números 16:5. Yal cꞌal mac chi yaloc sbꞌa yetoj Cristo, sowalil chi sbꞌejcan masanil spenail,” ẍi jun sello tuꞌ. 20Kꞌinaloj ey junoj miman na ecꞌal mitxꞌkꞌabꞌe yul. Ey la chꞌen mitxꞌkꞌabꞌe, ey la oro yetoj plata, caw ey yopiso. Ey pax teꞌ mitxꞌkꞌabꞌe, cꞌal txꞌotxꞌ mitxꞌkꞌabꞌe. Jaꞌ caabꞌxa tujan tuꞌ, comon mitxꞌkꞌabꞌe cꞌal. Txꞌoj txꞌoj yopiso junjun tujan mitxꞌkꞌabꞌe tuꞌ. 21Jaxca wan mitxꞌkꞌabꞌe tuꞌ, quey jon ton tuꞌ. Ta chi cu bꞌejcan masanil spenail, caw miman keloc apnoj sattaj Naj Kaawil. Asan Naj ey jon yet. Ey kopiso yu Naj, yutol yal cꞌal tzet chi yoche scꞌul Naj, listo xacꞌal keoc kuneni. 22Manche ja wun tzet man watxꞌoj, jaxca wan tzet chi yoche oc ebꞌ ja wet achꞌeal. Jichan cꞌal cha wute ja bꞌeybꞌal. Asan yin Naj Kaawil bꞌey cha waoc ja cꞌul. Ey ojabꞌ ja camcꞌulal. Ey ojabꞌ watxꞌcꞌulal je yin jaxca chi yute sbꞌa ebꞌ cꞌam niꞌoj spenail sattaj Naj Kaawil, yet chi yalon sbꞌa ebꞌ tet. 23Ey ebꞌ comon cꞌal chi steele a sbꞌa, caw naꞌbꞌacꞌal. Cꞌam niꞌoj yeloc apnoj tzet chi yal ebꞌ. Manche jaach kꞌanabꞌ yetoj ebꞌ. Ja wotajxa, tol jowalxa chi yun slawi can tzet chi yal ebꞌ tuꞌ. 24Jaꞌ mac chi akꞌon servil Naj Kaawil, cꞌam chi skeꞌ, tol comon cꞌal chi yatoj sbꞌa xol jowal. Sowalil yin watxꞌcꞌulal chi yute sbꞌa ebꞌ tet masanil ánima. Sowalil watxꞌ chi yute cuywa sbꞌa ebꞌ, catuꞌ miman pax chi yute scꞌul ebꞌ. 25Yetoj pax oj, watxꞌcꞌulal ojabꞌ cꞌal chi yute yalon ebꞌ tet ebꞌ chi tit sjowal. Tala cꞌuxan oj akꞌle snaꞌ sbꞌa scꞌul ebꞌ yu Dios, catuꞌ oj yotajnen el ebꞌ jun cuybꞌanil jaꞌcaw yel. 26Yutol, jaꞌ ebꞌ tuꞌ, jaxca tol mitxꞌbꞌil ey ebꞌ yu naj diablo, yet watxꞌ chi yun ebꞌ tzet chi yoche. Ta chi snaꞌ pax sbꞌa scꞌul ebꞌ, oj colcha ebꞌ yul skꞌabꞌ diablo tuꞌ.

Currently Selected:

2a Timoteo 2: knj

Highlight

Copy