Sakari 13
13
Suxurene nun wule nabine
1Na lɔxɔni,
tigin minima nɛn Dawuda yixɛtɛne xa,
e nun Yerusalɛn muxune,
alogo yulubine nun xɔsin xa ba e ma.
2Alatala Sɛnbɛn Birin Kanna falan ni ito ra:
Na lɔxɔni,
n suxurene xinle bama nɛn yamanani,
ɲinan yi ti e xɔn ma fefe!
N mɔn nabine nun xaxili ɲaxin bama nɛn yamanani.
3Xa muxuna nde mɔn nabiya falan ti,
a nga nun a baba naxan a barixi,
ne a falama a xa nɛn,
e naxa, “I xa faxa,
amasɔtɔ i bata wulen fala Alatala xinli.”
A nga nun a baba naxan a barixi,
ne a sɔxɔnma nɛn
a nɛma nabiya falane tima.
4Na lɔxɔni, nabine birin yagima nɛn
e fe toxine nun e waliyiya falane ra.
E mi fa nabiya domaan soma sɔnɔn
alogo e xa madaxun ti.
5E birin a falama nɛn, e naxa,
“Nabi mi n na, xɛɛ biin nan n na.
Amasɔtɔ muxuna nde n sara nɛn
xabu n dii ɲɔrɛ waxatini.”
6Koni e a maxɔdinma nɛn, e naxa,
“Nanse laru itoe ra i kanken ma?”
A e yabima nɛn, a naxa,
“E n maxɔlɔ nɛn n xɔyine konni.”
Silanfanna
7“Silanfanna,
i xa keli n ma xuruse rabaan xili ma,
xɛmɛn naxan n fɛma.”
Alatala Sɛnbɛn Birin Kanna falan ni ito ra.
“Xuruse rabaan faxa,
yɛxɛɛne xa xuya ayi.
N yi keli a xunxurine xili ma.
8Nayi, yamaan dɔxɔde saxan,
firin faxama nɛn keden yi lu na.
Alatalaa falan nan na ra.
9N yi a dɔnxɛn sa tɛɛni
n yi a rasɛnsɛn alo gbetina.
N yi e mato tɛɛni,
alo xɛmaan matoon kii naxan yi.
Nayi, e n maxandima nɛn,
n yi e yabi.
N na a falama nɛn,
‘N ma yamaan nan ne ra.’
E yi a fala, e naxa,
‘Alatala nan nxɔ Ala ra.’ ”
Currently Selected:
Sakari 13: Kitabuna
Highlight
Share
Copy
Want to have your highlights saved across all your devices? Sign up or sign in
© 2012 Traducteurs Pionniers de la Bible
© 2012 Pioneer Bible Translators
This work is licensed under the Creative Commons Attribution ShareAlike 4.0 license
