Yuba 11
11
Sofara yi falan ti Yuba xa
1Nama kaan Sofara yi falan tongo, a naxa,
2“Fala wuyaxini itoe yabi mi na ba?
Falan nan tun yoon fima muxun ma ba?
3Muxune dundɛ i ya fala ɲaxine bun ma ba?
I magelen tiyɛ ba, muxe mi i rayagi?
4I a falama, i naxa,
‘N ma fekolonna sariɲan,
fɛ yo mi n na Ala yɛtagi.’
5Koni, xa Ala yi waxi falan ti feni nun,
xa a yi a dɛni biyɛ a falan ti i xa nun,
6xa a yi a fekolonna wundone fala i xa,
naxanye fan xaxinla xa,
nayi, i yi a kolonma nɛn
a Ala mi i hakɛne birin saranxi i ra.”
7“I nɔɛ Ala miriyane kolonɲɛ?
I nɔɛ Ala Sɛnbɛ Kanna sɛnbɛn danna kolonɲɛ?
8A mate dangu kore xɔnna ra.
I nanse ligɛ? A tilin laxira xa.
I nanse famuma?
9A kuya dangu bɔxɔn na,
a gbo dangu fɔxɔ ige baan na.
10Xa Ala fa muxune suxɛ,
xa a e xili kiti sadeni,
nde nɔɛ a matandɛ?
11Amasɔtɔ, Ala fuyantenne kolon,
a na hakɛn to,
a mi a yɛɛn naxiyɛ a ma.
12Koni, kɔmɔn mi nɔɛ findɛ xaxilimaan na,
alo sofali xuruxin to mi barɛ burunna ra.”
13“I bɔɲɛn nafindi Ala ma,
i yiin ti a tan xa,
14i mɛ i hakɛne ra,
i nama tin tinxintareyaan yi so i konni.
15Nayi, fɛ mi luma i ra,
i xunna kenla sɔtɔma nɛn,
i findi muxu kɛndɛn na,
i mi fa gaxuma sese ra.
16I ɲinanma nɛn i ya sɔxɔlɛne ra,
i ɲinanma nɛn e xɔn
alo igen naxan danguma xude wunla ra.
17I ya siimayaan makɛnɛnma nɛn
alo yanyi tagina,
a dimin yi lu alo xɔtɔnna.
18I lannayaan sɔtɔma nɛn,
bayo i yigin sɔtɔma nɛn,
Ala i rakantanma nɛn
i lu bɔɲɛ xunbenli.
19Muxu yo mi fa i raxulunɲɛ i ya xixɔnli,
muxu wuyaxi fama nɛn i xandideni.
20Koni, ɲaxudene yɛɛn danxuma nɛn,
e yigin kalama nɛn,
e yengi fa tixi sayaan nan na.”
Currently Selected:
Yuba 11: Kitabuna
Highlight
Share
Copy
Want to have your highlights saved across all your devices? Sign up or sign in
© 2012 Traducteurs Pionniers de la Bible
© 2012 Pioneer Bible Translators
This work is licensed under the Creative Commons Attribution ShareAlike 4.0 license
