Iuwãu 3

Haga Myẽꞌym 3

Nikutemu Tuut Raꞌyn Iesui Ewowi

1Toineꞌen tawa Ierusarẽi me wẽtup ok miit Nikutemu e hap het rakat. Miꞌi ti Iuteuria ywania akag iꞌatunapin koro hat. 2Miꞌi ti wãtym muo Nikutemu toto Iesui kape. Putꞌok e Iesui ete hawyi toꞌe tope -Urumuꞌe hat e ewat eminug wakuap koꞌi yt uwe misepap ewy i raꞌyn e. Miꞌi pote uruikuap Tupana epoꞌoro urumuꞌe hamo hap mehin e. Miꞌi pote uruikuap Tupana toineꞌen ewywo kahato Mehin e Iesui pe. 3Maꞌato Iesui tiwesat -Pywo pe ti areꞌe epe uwe uwe iꞌywaĩꞌĩ pakupꞌi miꞌi haria yn ni teꞌeropyhuꞌat Tupana emiitno e. Pywo ti wemoherep pakup i haria yn tukupteꞌen aru atipy pe aikope Tupana toineꞌen Morekuatno hap tote are e. 4Miꞌi hawyi Nikutemu -Yt uwe kuap i raꞌyn ten teke pakup i toty ymyẽ pe e. Aikotã som pyno waku watuwemoherep pakup i hap e. 5-Mesuwat uiꞌe hap ti pywo pe areꞌe. Wemoherep pakup i haria yn ni teꞌeropyhuꞌat kuap Tupana emiitno e. Pywo yꞌy wywo iꞌewyte Tupana Paꞌãu kaipyi ewemoherep hawyi yn Tupana mepytno ereineꞌen e. Miꞌi hap ewy yn ni teꞌeropyhuꞌat miitꞌin Tupana mepytꞌinno e Iesui. 6-Maꞌato toꞌywot kaipywiat wemoherep hat ti miit piit kawiat topyhuꞌat maꞌato Tupana Paꞌãu kaipywiat wemoherep hat ti ipaꞌãu me Tupana mepyt ri raꞌyn tuwemoherep e. 7Kat pote yt hotꞌokꞌe i uimienoi eꞌywaĩꞌĩ pakup i ro uiꞌe hap e Iesui. 8-Pyno Tupana Paꞌãu kaipyi yn Tupana mepytno erepyhuꞌat. Miꞌi etiat enoi hamuat niatpo kahato maꞌato aikotã ywytu hewyry tomikyꞌesat ewy kahato hap ewy e. Ipuehay watikuap kahato wen maꞌato aikope pyi wasere tuut hap yt uwe i ikuap iꞌewyte ito hap yt uwe i ikuap. Miꞌi hap ewy Tupana Paꞌãu tomoherep pakup i miitꞌin tomikyꞌesat ewy e. Yt heremo i Tupana Paꞌãu ywytu ewy maꞌato putꞌok e hawyi watikuap Tupana raꞌyn Tupana saꞌyru wo Tupana sakiꞌyt no teꞌeropyhuꞌat e. 9Miꞌi hawyi Nikutemu toꞌe -Yt atikuap i te emienoi Uhyt e. 10-Paĩ are en aiꞌywania Isareu ywania muꞌe hat koro kahato pykai apo yt etikuap i miowat uimienoi epiat e Iesui. 11-Pywo pe ti ahenoi epe mesuwat urumikuap oktan e. Iꞌewyte uruꞌakasa hap oktan maꞌato apo yt etimohey i urumienoi koꞌi e. 12Miitꞌin misepap sehay mesuwarotiat puo raꞌyn ahenoi epe wen maꞌato miꞌi pykai yt etikuap hin i uiꞌe hap aikotã ten etikuap uimienoi Tupana misepap sehay puo atipy piat raꞌyn ahenoi epe pote e. 13Yt uwe i miꞌi rẽ toto atipy kape. Wẽtup ok yn toto atipy kape hawyi iꞌewyte tuut raꞌyn meikowo atipy kaipyi. Wẽtup ok yn Miꞌi ti Miitꞌin Ykeꞌet tuut raꞌyn atipy kaipyi e.

14Saꞌawyꞌi ahaꞌaseꞌi Muisei timopoĩꞌam ariaꞌyp posak ete moĩ iãꞌãkap imehit rakat mohag wo. Miꞌi tutunug yahig note moĩ tok pe moĩ miekatuꞌu koꞌi moehãite hamo ipap tet pupi. Miꞌi hap ewy ti aru Miitꞌin Ykeꞌet taꞌatumopoĩꞌam ariaꞌyp posak ete e. 15Miꞌi hawyi meiẽwat iꞌatumimopoĩꞌam mohey haria wyti wuatꞌi eꞌat piat ieineꞌen hanuaria tukupteꞌen e. 16Katupono Tupana tiꞌatukyꞌe kahato miitꞌin haype tutum Tosaꞌyru wẽtup ok takat iꞌatuepe e. Miꞌi pote uwe uwe imohey miꞌi haria wyti aru yt ikuꞌuro sese i maꞌato wuatꞌi eꞌat pe raꞌyn iꞌatuehãite hap toineꞌen e Iesui. 17Taꞌi Tupana tipoꞌoro Tosaꞌyru miitꞌin ehakyeraꞌat hanuat sese. Taꞌi yt miitꞌin atumaꞌat yt hamo i Tupana tipoꞌoro Tosaꞌyru e. 18Uwe uwe Haꞌyru mohey haria ti Tupana yt tiꞌatuꞌapiheg i maꞌato iraniaꞌin ti aru yt imohey i haria Tupana miꞌatuꞌapiheg wuatnuaria tukupteꞌen are. Miꞌiria pe wyti aru mio tã e Tupana -Yt nakuaria i sese eipe e katupono Uhaꞌyru uimiium pun haria eipe e. 19-Atum kahu raꞌyn Uhaꞌyru ariãty ewy ehepe mekewat muap uhewowiat moherep hamuat wen maꞌato yt eweikyꞌesat i Uhaꞌyru ariãty ewywuat e. Yt naku i eipe e katupono poꞌog iꞌypyryp hap neꞌi miꞌi haype eweikyꞌesat are katupono eiminug saꞌag hap nug hap poꞌog eweikyꞌesat iꞌypyryp wiat haype e. Miꞌi pote iꞌypyryp we yn eweikupteꞌen e. 20Yt nakuap i nug haria yt ikyꞌesat i neꞌi ariãty e. Taꞌatukyꞌesat pya kahato taꞌatukawiat hẽtyhot hap katupono taꞌatuminug saꞌag koꞌi moherep hap yt taꞌatukyꞌesat i haype e. 21Maꞌato iraniaꞌin wakuap nug neran haria tõꞌẽ tõꞌẽ ariãty kape katupono taꞌatukyꞌesat taꞌatuminug wakuap koꞌi Tupana esaika hap wywuat tuwemoherep hap e Iesui Nikutemu pe.

Iuwãu Tinapin Miitꞌin

22Meiũran hawyi toto Iesui yi Iuteu kape topotmuꞌeria wywo. Miꞌi hawyi toineꞌen motꞌi itote topotmuꞌeria wywo. Miꞌi tote taꞌatusetꞌok kahato miitꞌin yꞌy pe. 23Miꞌi turan woꞌosetꞌok hat Iuwãu tiꞌatusetꞌok miitꞌin tawa hit Enũ pe yt pya hin i tawa Sarim kai katupono toineꞌen yꞌy iwato rakat itote. Miꞌi kape tõꞌẽ tõꞌẽ miitꞌin Iuwãu kape teꞌeruwesetꞌok yꞌy piat hamo. 24Miꞌi tã hap ewy Iuwãu pyhik hap eꞌyian mete. 25Itote tuꞌuka tuꞌuka toꞌope sehay wo Iuwãu potmuꞌeria wẽtup ok Iuteu wywo aikotã aikotã som poꞌog hãpyk watiꞌatusetꞌok miitꞌin taꞌatuꞌe hap ete tuꞌuka sehay wo. 26Miꞌi hawyi tuwat Iuwãu kape teꞌeroꞌe hamo -Urumuꞌe hat iꞌatuꞌe mekewat ihainia Iutãu eꞌy sakpuat emimoherep saꞌawyꞌi wuat wyti toineꞌen mio meiũpe yi Iuteu pe. Koitywy miitꞌin toiꞌatusetꞌok kahato raꞌyn itote poꞌog aikai. Yt naku i miꞌi tã urutoꞌe katupono koitywy wyti wuatꞌi miitꞌin tuwat kahato miꞌi hat kape teꞌeruwesetꞌok hamo hawyi yt tõꞌẽ i poꞌog ahewowi iꞌatuꞌe Iuwãu me. 27Miꞌi hawyi Iuwãu tiꞌatuwesat -Uiwyriaꞌin Tupana atipy piat ieineꞌen hat yn wyti hum kuap ahepe tomikyꞌesat ewy nug hamo. Koran som hap oktan Tupana tum ahepe rakat yn waku watunug are e. 28Uimienoi kaipyi eweikuap taꞌyn uito yt mekewat Tupana mipoꞌoro Aiporekuatnuat i te hap e. Maꞌato Tupana uipoꞌoro muap Aipotypot kapiat moherep hamo e. 29Pyno iãꞌãkap wuo ahenoi ehepe aikotã areineꞌen Aipotypot uut hap ete e. Karãpe woꞌokyiꞌat hap turan toineꞌen woꞌokyiꞌat hanuat wy ok sese. Miꞌi ti toineꞌen itote mekewat woꞌokyiꞌat hap ekatup hamo. Mekewat eꞌat pe iwy ok hekatup kahato towyꞌok eharyꞌi hap eꞌat putꞌok e hap kape. Tuwanetup kahato turan meiũran woꞌokyiꞌat teran hat ehay toikuap taꞌyn. Miꞌi hawyi iwepiit kahato katupono woꞌokyiꞌat hap yt pya hin i raꞌyn. Miꞌi hawyi woꞌokyiꞌat hanuat putꞌok e hawyi iwyꞌok iwepiit sese raꞌyn e. Miꞌi hap ewy uimowepiit hap topyhuꞌat. Miꞌi hawyi Tupana miium uhepiat nug hamo waku raꞌyn e. 30Miꞌi hawyi waku Miꞌi Miit tuwemowato poꞌog uikai. Putꞌok e hawyi waku uito poꞌog kurin areineꞌen miitꞌin wanetup hawe e. 31Miꞌi Miit atipy kaipywiat poꞌog wakuat wuatꞌi kawiat hat are. Yi totiaria ti taꞌatumikuap oktan yn henoi kuap maꞌato atipy kaipywiat suut hat mienoi wyti poꞌog iwato yi totiaria mienoi kai are e. 32Atipy kaipywiat taꞌakasa hap tohenoi tomikuap oktan maꞌato Miꞌi Miit yt uwe i imohey e Iesui piat. 33Maꞌato watomohey atipy kaipywiat mienoi hawyi ti watikuap meremo pywuat sese Tupana watoꞌe hap e. 34Tupana Mipoꞌoro atipy kaipywiat wyti henoi hãpyk yne kahato topoꞌoro hat ehay upi katupono tutum yne Topaꞌãu tehay enoi hanuat pe e. 35Taꞌi Tupana tikyꞌe kahato ti Tosaꞌyru miꞌi tupono tutum yne ipo pe e. 36Pyno ti watomohey pote yn wuatꞌi eꞌat pe raꞌyn ahehãite maꞌato yt watihaymohey i Haꞌyru pote ti yt karãpe i watoineꞌen ahehãite hap maꞌato watukupteꞌen Tupana miꞌapiheg koꞌi wo e woꞌosetꞌok hat Iuwãu topotmuꞌeria pe.

Currently Selected:

Iuwãu 3: mav

Highlight

Copy