Iesui Potmuꞌeria 16

Haga 16

1Miꞌi hawyi Pauruꞌin putꞌok iꞌatuꞌe i tawa Tepe pe tawa Irita pe. Miꞌi hawyi itote Pauruꞌin tipuẽti uhyt Timoteu. Ity ti Iesui mohey hat Iuteu ywania maꞌato iꞌywot Kereku ywania. 2Miꞌi hawyi tawa Irita piaria tawa Ikuniu piaria Iesui mohey haria -Taꞌi waku kahato ti rat Timoteu iꞌatuꞌe itotiaria. 3Miꞌi hawyi Pauru toꞌe Timoteu pe -Toꞌiro uhupi kurum iwasu e. Ereto teran uhupi pote Iuteuria ewy ro ereineꞌen aikotã ety ewy aiꞌywania Iuteuria muꞌe hamo are e. Miꞌi hawyi taꞌatuemurui sokpe tek Iuteuria eko ewy hawyi Timoteu topyhuꞌat Iuteu wo toty ewy. Miꞌi tã ti Pauru tikyꞌesat Timoteu piit katupono toikyꞌesat Iuteuria mimotypot no topyhuꞌat Timoteu hap e. Katupono toikuap taꞌyn itotiaria tikuap wẽtup ywania neꞌi Timoteu ywot hap pote. 4Miꞌi hawyi Pauru Sira Timoteu wywo hewyry saꞌawyꞌi wuat tewyry hap koꞌi upi. Miꞌi tote taꞌatuhenoi mekewat Ierusarẽi kaipywiat woꞌonapin hap miwan Iesui yn ahehakyeraꞌat kuap e hap miwan taꞌatuhenoi. Mekewat kat iꞌatuꞌe kat iꞌatuꞌe 12 ok takaria e hap Iesui mohey haria akagnia e hap taꞌatuhenoi itote. 5Miꞌi hawyi taꞌatuewyry hap upiaria Pauruꞌin tiꞌatumoesaika poꞌog naꞌyn Iesui mohey hap ete. Miꞌi pote poꞌog naꞌyn iꞌatutypyꞌi itote. 6Miꞌi hawyi yi Karasia yi Wiriteu upi Pauruꞌin iꞌatuewyry. Miꞌi hawyi yi Asia kape tuwat teran maꞌato Tupana Paꞌãu Wakuat toꞌe -Yt ewehenoi teiꞌo uhehay itote mesup mehinꞌin e. 7Miꞌi pote tuwat tawa Misia kape. Itote pyi tuwat teran yi Pitinia kape i raꞌyn maꞌato Iesui Paꞌãu waĩꞌe i raꞌyn. 8Miꞌi hawyi tawa Misia sakpo tokokaꞌat neꞌi. Miꞌi hawyi tuwat teran yi Turate kape maꞌato -Waĩꞌe i Iesui Paꞌãu. 9Miꞌi hawyi -Aikope waku pyno watuwat e yn tuwanetup hawe. Miꞌi hawyi Pauru taꞌakasa tomuꞌetu wãtym muo wẽtup ok yi Masetunia piat yꞌam miat kape. Miꞌi hawyi toikuap ihay -Eriot ro meikowo urueꞌyi Masetunia kape urupowyro hamo mehin e toikay kay. 10Miꞌi hawyi tuwehymut raꞌyn Pauru hawyi mio tã toꞌe -Meremo urutuwat teran kahato yi Masetunia kape. Miꞌi haype ti uruikat kahato aikotã miat uruwat hamuat. Katupono Tupana urukay kay raꞌyn iꞌatuwowi tehay wakuat enoi hamo hap uruikuap taꞌyn e. 11Miꞌi hawyi meiũpepyi uito Iruka areto raꞌyn Pauruꞌin wywo. Yara wato puo hãpyk pe urutuwat raꞌyn wasere upi yꞌy wato yi hit Samutasia kape. Miꞌi hawyi ihatꞌok hawyi wẽtup tawa Neapuri kape urutuwat yi Masetunia sese kape. 12Miꞌi hawyi urutuwat tawa wato yi Masetunia wywuat tawa Wiripu kape. Miꞌi hawyi urutuwehytꞌok tawa Wiripu pe Humanu ywania muꞌe Iesui etiat hamo. Itote urutukupteꞌen motꞌi. 13Miꞌi hawyi Sapatu eꞌat pe urutuwat yꞌy hit i kape aikope Iuteu ywania iꞌatuehay Tupana kape hap kape. Miꞌi hap kape urutuwat tawa pyi. Miꞌi tote urutaꞌapyk hawyi meiũran tõꞌẽ tõꞌẽ haryporiaꞌin. Miꞌiria uruiꞌatumuꞌe raꞌyn. 14Wẽtup ok iꞌatupyꞌasetpe toineꞌen mana Iritia. Mana Iritia ti tawa Tiatira pywiat. Sokpe hup ikahu rakat weneru hat. Tupana motypot hat sese miꞌi. Miꞌi ipap kahato Pauru mienoi upi hawyi Tupana tomoherep taꞌyn mekewat sehay mana pe. 15Miꞌi hawyi mana Iritia timohey Iesui yne toꞌyat piaria wywo hawyi tuwesetꞌok yꞌy pe toꞌyat piaria torannia wywo. Miꞌi hawyi -Mimiꞌin e Pauruꞌin me koitywy ti atomohey kahato raꞌyn Aikaꞌiwat atipy piat e. Miꞌi tupono uimohey ehepiat pote eweikupteꞌen no meiũpe uiꞌyat piaria yatype mimiꞌin e mana Iritia Pauruꞌin me. Ihay awaĩ hawyi urutopyhuꞌat iꞌyat pe.

16Miꞌi hawyi wẽtup eꞌat pe urutuwat i raꞌyn aiũpe Tupana wywuat sehay hap kape mekewat yꞌy hit i kape. Miꞌi hawyi muap upi uruipuẽti piꞌã ahiag paꞌãu ipiit piat rakat e. Miꞌi piꞌã mimoherep ahiag kaipywiat wyti aikotã aikotã e hap koꞌi ikaꞌiwaria haꞌup sat kahato. 17Miꞌi hawyi mekewat piꞌã toto Pauruꞌin upi. Miꞌi hap tote muap upi ihay haty wo iraniaꞌin me muap upiaria pe -Miꞌiria miitꞌin ni Tupana sese ywaitiat eropat haria sese e ahiag paꞌãu piꞌã wẽ pyi. Miꞌiria wyti Tupana kapiat muap moherep haria e mekewat piꞌã. 18Miꞌi e hap ewy ti yne eꞌat pe mio tã e ihay Pauruꞌin upi. Ihay poꞌog poꞌog moityꞌi pote Pauru yt tikyꞌesat i poꞌog. Miꞌi hawyi tuwemorem howawi hawyi toꞌe -Uito ti morekuat Iesui mipoꞌoro. Miꞌi tupono areꞌe -Ereto ro meiũwat piꞌã piit pyi e ahiag paꞌãu me. Mio tã e hawyi tuwẽtem naꞌyn meremo ipiit pyi. 19Miꞌi pote piꞌã kaꞌiwaria teꞌeroꞌe -Pyno ihãite raꞌyn piꞌã. Yt naku i yt kat i raꞌyn ahiag paꞌãu piꞌã piit pe iꞌatuꞌe toꞌope. Miꞌi hawyi taꞌatusat Pauru Sira. Miꞌi hawyi iherep mo taꞌatueropoꞌok yi upi morekuaria kape wuatꞌi weneru hap kape. 20Miꞌi hawyi teꞌeroꞌe morekuaria pe Pauruꞌin ete -Meimuẽwuaria Iuteuria yt naku i kahato iꞌatuꞌe. Pywo ti wuꞌuka hap nug haria sese miꞌiria iꞌatuꞌe saꞌag. Aimoweukaꞌi ahetawa etiat haria miꞌiria iꞌatuꞌe. 21Uruto wyti Humanuꞌin. Pyno ti yt naku i iꞌatuwat iꞌatueko watunug meiũpe uhytꞌiꞌin iꞌatuꞌe. Taꞌatuhenoi saꞌag neꞌi ahepe iꞌatuꞌe suraraꞌin me. 22Miꞌi hawyi itotiaria iꞌatuehay pirik Pauru Sira ete. Iꞌatupyꞌahak kahato. Miꞌi hawyi morekuaria tuwat Pauruꞌin esokpe hiot hiot pun hamo. Miꞌi hawyi teꞌeroꞌe -Pyno waku eweipoityk poityk to ariaꞌyp mo iꞌatuꞌe taꞌatuesuraraꞌin me. 23Miꞌi hawyi taꞌatupak pak kahato raꞌyn Pauruꞌin hawyi taꞌatupag iheg me raꞌyn woꞌopyhyp hawe. Miꞌi hawyi etiꞌatuꞌapykok to iꞌatuꞌe raꞌyn woꞌopyhik hap kaꞌiwat pe. 24Miꞌi pote tohytmoĩ raꞌyn iheg muo sese raꞌyn okaꞌapy pe. Miꞌi hawyi woꞌopyhik hap ariaꞌyp kawiat pe toiꞌatupyhik. 25Miꞌi hawyi wãtym hake turan Pauru Sira teꞌeruwehum kahato hap wywo teꞌeruwepy Tupana kape. Miꞌi pote iꞌatupyhik haria itotiaria ikuap yne iꞌatuwepy hap. 26Miꞌi hawyi meremo yi huruk hurukꞌe. Poꞌog naꞌyn hawyi mekewat woꞌopyhik hap yi hewo hewo raꞌyn. Miꞌi hawyi iꞌahotꞌe raꞌyn. Tuweꞌokenhypꞌok yne raꞌyn mekewat woꞌopyhik hap tuwewi. Miꞌi hawyi iꞌatupoꞌi poꞌi hap hewo hewo yne raꞌyn itote. 27Miꞌi turan tuwehymut raꞌyn woꞌopyhik hat surara akag hawyi toꞌe tuwepe -Teꞌeruweꞌokenhypꞌok taꞌyn sig paĩ e. Yt naku i kahato katupono uimipyhik koꞌi tuwat tuwat yne raꞌyn som e. Miꞌi hawyi totat tekyseꞌyp tuweꞌauka teran haype -Yt naku i aru uhete katupono morekuat ikuap hawyi uiꞌapiheg moityꞌi uiꞌauka meremo hamo uimipyhik koꞌi teꞌeruwepopy pote e. 28Miꞌi pote -Yt eraꞌauka teiꞌo uhyt e Pauru tuwak popuo. Urutukupteꞌen meiũpe torannia uruto mehin e. 29Miꞌi hawyi -Eweterut ariãty uhowowi e woꞌopyhik hap yat apykok hat temiit pe. Miꞌi hawyi meremo teke hawyi toto Pauru Sira kape hawyi tuwepỹꞌãtutuk tyry toꞌe popuo. 30Miꞌi hawyi toteropoꞌok taꞌyn iꞌatupyhik hap kaipyi toꞌyat kape. Miꞌi hawyi apo e iꞌatuepe -Aikotã som waku atunug uhehakyeraꞌat hamo e. 31-Pyno etomohey ro Iesui yn naꞌyn hawyi etunug Ekaꞌiwat no Iesui miꞌi pote yn ehakyeraꞌat hap toineꞌen uhyt. Iꞌewyte eꞌyat piaria toiꞌatuehakyeraꞌat e woꞌopyhik hat pe Pauru. 32Miꞌi hawyi Pauruꞌin henoi kahato Tupana ehay woꞌopyhik hat yat piaria pe. 33Miꞌi hawyi woꞌopyhik hat tiꞌatusei raꞌyn iꞌatuꞌahyk ahyk hawywiat iꞌatusuu iꞌatupiit etiat. Miꞌi hawyi huhywitip hap koꞌi toikoho yne e. Miꞌi tã tutunug hawyi Pauruꞌin hetꞌok taꞌyn yne iꞌyat piaria wywo yꞌy wo. 34Miꞌi hawyi teꞌeraꞌaipok taꞌyn woꞌopyhik hat yat kape. Miꞌi hawyi taꞌatuꞌatumoenuk taꞌyn Pauru Sira. Miꞌi hap tote teꞌeruwehum kahato raꞌyn Tupana ete katupono toimohey kahato Tupana toꞌyat piaria wywo.

35Ihatꞌok hawyi morekuaria tiꞌatupoꞌoro raꞌyn woꞌopyhik hat kape taꞌatuemiitꞌin -Waku ti tuwenoꞌẽ raꞌyn gaꞌatpuat aimiꞌahyk ahyk koꞌi aimipyhik koꞌi taꞌatuꞌe haype taꞌatuꞌatupoꞌoro. 36Miꞌi hawyi woꞌopyhik hat henoi raꞌyn Pauruꞌin me -Morekuaria tipoꞌoro raꞌyn sehay uhytꞌiꞌin e. Pyno waku mesup eweiwat i raꞌyn uruetawa pyi e. Pyno waku raꞌyn eweiwat i ro uiwyriaꞌin e woꞌopyhik hat. 37Maꞌato Pauru toꞌe -Yt urupap i rat e. Uruto ti Humanu ywaniaꞌin eiperia ewywuaria e. Gaꞌatpo morekuat yt hẽtup hin i uruepe aikotã urueko ewy e. Kat poteĩ morekuat pyno uruꞌahyk ahyk kahato e. Yt naku i ereꞌe ro morekuaria pe e. Kat poteĩ pyno urupyhik mesuwe gaꞌatpo yt apo eiꞌe rakirẽ i e Pauru. Miꞌi hawyi mesup morekuat -Eweiwat ro uruetawa pyi yt uwe mikuap mo i e uruepe. Miꞌi pote waku ti morekuaria tõꞌẽ meiũpe uruenotem hamuat e. Pyno ewehenoi ro uruehay morekuaria pe e Pauru. 38Miꞌi hawyi toto raꞌyn morekuaria kape. Miꞌi hawyi tohenoi raꞌyn iꞌatuepe Pauru e hap. Taꞌatukuap taꞌyn Pauruꞌin Humanu ywania hawyi iꞌatuwuwu kahato raꞌyn morekuaria katupono Humanu ywania yt naku i watiꞌapiheg e morekuat koro Sesa. 39Miꞌi hawyi morekuaria tuwat Pauruꞌin kape iꞌatuhep woꞌopyhik hap pywiat hamo taꞌatuwese kahato popuat Pauruꞌin poꞌoro hamo -Uhytꞌiꞌin waku ti eweiwat raꞌyn ahetawa pyi iꞌatuꞌe morekuaria Pauruꞌin me. 40Miꞌi hawyi tuwat mana Iritia yat kape taꞌatupyhik hap kaipyi. Miꞌi hawyi taꞌatukay kay yne Iesui mohey haria taꞌatuewawi hawyi taꞌatuꞌatumoesaika Tupana ehay se wywo itotiaria. Miꞌi hawyi tuwat raꞌyn mekewat tawa Wiripu pyi.

Currently Selected:

Iesui Potmuꞌeria 16: mav

Highlight

Copy