Iesui Potmuꞌeria 12

Haga 12

Morekuat Eroti Timohan Iesui Mohey Haria Ipehig Hawe

1Miꞌi hawyi mekewat eꞌat pe morekuat Eroti tipoꞌoro temiitꞌin suraraꞌin Iesui mohey haria akag koꞌi pag towoꞌopyhik hawe. 2Miꞌi hawyi tesuraraꞌin toiꞌatupoꞌoro wẽtup ok Iesui potmuꞌe auka hamo Iuwãu ykeꞌet Tiaku auka hamo. Taꞌatupuẽti hawyi taꞌatuꞌauka raꞌyn kyseꞌyp mo. 3Miꞌi hawyi Iuteuria tikuap Tiaku auka hap hawyi teꞌeruwehum morekuat ete taꞌatumikyꞌesat ewy kahato tutunug pote. Miꞌi hawyi morekuat tipyhik taꞌyn Peteru mekewat man teneg u hap eꞌat pe Iuteuria mowepiit hamo. Totat hawyi toipun naꞌyn ipyhik hawe. 4Miꞌi hawyi 16 suraraꞌin toiporokpun iꞌapykok hamo. Yt toikyꞌesat i Peteru tuwẽtem hap haype. -Ienuk hap ikahuro raꞌyn hawyi ti aru aterut Peteru meiũpe miitꞌin tokpe miitꞌin mikyryꞌi hamo e tuwanetup hawe morekuat. 5Miꞌi tupono poꞌog toimoheg Peteru maꞌato Iesui mohey haria Peteru wyriaꞌin hẽtup haty wo Tupana pe ipowyro hamo. 6-Pyno mukiꞌite waku Peteru tuut uhowowi e morekuat Eroti tuwanetup hawe. Maꞌato iheg me Peteru toket neꞌi suraraꞌin typy ok po pe kokai kokai haity ipo ete suraraꞌin po pe. Iꞌewyte suraraꞌin okenꞌypy hik haria tukupteꞌen. 7Miꞌi turan Tupana mipoꞌoro atipy kaipywiat putꞌok e okenꞌypyke. Miꞌi hawyi hẽtyhot raꞌyn itote. Miꞌi hawyi Peteru toipetek hawe toihymut -Epoĩꞌam merep to uhyt e. Miꞌi hawyi ipoĩꞌam naꞌyn hawyi mekewat ipo etiat haity porapꞌe raꞌyn. 8Miꞌi hawyi toꞌe i Peteru pe -Ewoꞌokytyt hap poꞌi ro erepysokpe pag no e. Miꞌi hawyi meremo tuwepysokpe pag. -Etopag no ekamisa wato e. Miꞌi hawyi toꞌiro uhupi uhyt e.

Tupana Mipoꞌoro Peteru Hep Hamuat Ipehig Hap Kaipyi

9Miꞌi hawyi toto atipy piat ewatꞌypmo Peteru. Miꞌi hawyi -Taꞌi uimuꞌetu apo paĩ e sio herewe e. Taꞌi uimuꞌe poityꞌi kahato apo paĩ sio yt e. 10Miꞌi hawyi typy ok surara sakpo tokosap hawyi okenꞌypy wato Asu kawiat iheg nakat kape tuwat. Miꞌi ti tuwewi raꞌyn tuweꞌokenhypꞌok. Miꞌi hawyi tuwenoꞌẽ. Miꞌi hawyi tawa puat rote henotem hat meremo yt tuwekuap i raꞌyn. 11Miꞌi hawyi tawa puꞌap tote tuweran hawyi Peteru ete hotꞌokꞌe i raꞌyn. Miꞌi hawyi toꞌe tuwepe -Taꞌi yt uimuꞌetu hin i rasig paĩ e. Koitywy wyti atikuap kahato raꞌyn morekuat Eroti po pywiat Uikaꞌiwat piat uhenotem hap paĩ e. Taꞌi mekewat atipy piat mipoꞌoro wyti iheg nakat woꞌopyhyp hap pyi uiporenotem naꞌyn e. Katupono toĩ raꞌyn muap Iuteu ywania piat uiꞌauka irane turan e Peteru tuwanetup hawe. 12Hotꞌokꞌe kahato hawyi toto raꞌyn Iuwãu Maku ty yat kape raꞌyn. Miꞌi turan itotiaria teꞌeruwaꞌatunug kahato taꞌatuhẽtup kaꞌap Peteru powyro Tupana piat hamo. 13Miꞌi turan Peteru kurara okenhyp toiꞌahyk ahyk. Miꞌi pote mio apo uwe iꞌatuꞌe hawyi toto iꞌatueropat hat mana Hote okenꞌypy kape ikuap hamo. 14Miꞌi hawyi ihay ete toikuap. Miꞌi hawyi taꞌaipok meremo iraniaꞌin kape henoi hamo. Tuwehum moityꞌi haype yt tohoꞌoꞌokenhypꞌok rakirẽ i taꞌaipok. 15Miꞌi hawyi tohenoi -Peteru raꞌyn iuẽ tuut okenꞌypyke raꞌyn e. Maꞌato -Heso i aimoweukaꞌi rat iꞌatuꞌe. Miꞌi hawyi mana Hote -Pywo rat yt uheso i rat e. -Yt Peteru i iꞌatuꞌe maꞌato iwat ipowyro hat atipy kaipywiat iꞌatuꞌe. 16Maꞌato ipuehay i raꞌyn okenhyp ete. Miꞌi hawyi taꞌatuꞌokenhypꞌok. Miꞌi hawyi -Peteru ti sio iꞌatuꞌe raꞌyn. Miꞌi hawyi teꞌeruwanetup kahato. 17Iꞌatuehay pirik pote topo wo -Eipoꞌinik to e. Waku hawyi tohenoi iꞌatuepe aikotã me Tokaꞌiwat piat tenotem iheg mywiat hap -Pyno mesuwat ewehenoi uiwy Tiaku uheꞌywytꞌin Iesui upiaria pe e. Miꞌi hawyi toto raꞌyn wẽtup tawa kape i raꞌyn. 18Miꞌi pykai heꞌihatꞌok hawyi tuꞌuka raꞌyn Peteru pyhik haria hãipe kai toꞌope -Aikope som Peteru taꞌatuꞌe hawyi. 19Miꞌi turan Eroti tikuap Peteru yt uwe i raꞌyn hap. Miꞌi hawyi temiitꞌin toiꞌatupoꞌoro ikat hamo. Maꞌato yt toipuẽti i hawyi iꞌapykok haria toiꞌatukay kay. Miꞌi hawyi toiꞌatuꞌapo -Kat pote topopy hap kuap hamo. Miꞌi hawyi Eroti tiꞌatuꞌuka iꞌapykok haria suraraꞌin yne. Miꞌi hawyi morekuat Eroti toto tama Iuteu pyi tawa Sesareia kape. Miꞌi tote raꞌyn topyhuꞌat.

Morekuat Eroti Ikuꞌuro

20Miꞌi hawyi Eroti haiwot kahato tawa Sitau piaria ete. Iꞌewyte tawa Tiro piaria ete. Toipyhyp teran naꞌyn muap kareꞌen erut iꞌatuewowiat hap. Miꞌi pote tõꞌẽ tõꞌẽ Eroti kape imowepiit hamo. Miꞌi hawyi morekuat emiit Paraitu e hap mekewat morekuat yat koro eropat hat kape tuwat saꞌawyꞌi imowepiit hamo. Paraitu waku e hawyi tuwat morekuat Eroti kape imoperup i hamo -Waku ti etiꞌatukyꞌe Tiroꞌin Sitauꞌin iꞌatuꞌe katupono iꞌatumiꞌu koꞌi tuut morekuat Eroti po pyi. 21Miꞌi pote teꞌeruwaꞌatunug yne raꞌyn tuꞌisaria. Miꞌi hawyi Eroti taꞌatukay kay sehay wakuat nug hamo. Woꞌowese hap taꞌatukyꞌesat ikaipyi. Miꞌi hawyi tuut raꞌyn morekuat esokpe ikahu rakat puo. Miꞌi hawyi taꞌapyk iꞌatupyꞌasetpe morekuat amyap tote. 22Miꞌi hawyi tutumig toꞌoehay wo itote. Miꞌi waku hawyi -Ewat ehay wyti yt miitꞌin ehay ewy i raꞌyn. Tupana ehay ewy raꞌyn iꞌatuꞌe taꞌatuehay wo. Miꞌi hap poꞌog imikyꞌesat ewy. 23Waĩ yt e hin i. Poꞌog tomohey hap yn toikyꞌesat Tupana kai. Miꞌi hawyi meremo atipy kaipywiat Tupana mipoꞌoro tiꞌahyk. Miꞌi hawyi ipyhu tekꞌe raꞌyn ut piat toꞌu pote. 24Miꞌi hawyi Iesui mohey haria tiꞌatumuꞌe kahato Tupana ehay wo. Miꞌi hawyi tukupteꞌen naꞌyn itote imohey pakup i haria. 25Miꞌi hawyi mehin Panape Sauru wywo taꞌatumoꞌẽ yne raꞌyn mekewat kareꞌen ihakyꞌeꞌi rakaria pe Ierusarẽi me. Miꞌi hawyi itote pyi taꞌatuerut kurum iwasu Iuwãu Maku tawa Antiokia kape.

Currently Selected:

Iesui Potmuꞌeria 12: mav

Highlight

Copy